Гимнография сщмч. Фаддея, архиеп. Тверского
Служба священномученику Фаддею, архиепископу Тверскому
на велицей вечерни
На Господи воззвах: стихиры, глас 2:
Сосуде священнейший Духа Божественнаго был еси, иерарше достославне, душу очистив от страстей, в путех гоним, в темницех заключаем, принеслся еси яко жертва чиста Христу.
Твердый служителю Церкве Христовы, любителю монашескаго жития, образе кротости и незлобия, священномучениче Фаддее, предстоя днесь Престолу Вседержителя, поминай паству твою, да вси ходатайством твоим получим велию милость.
Священномучениче отче наш Фаддее, украсил еси Церковь Христову страдании твоими, яко добр воин Иисус Христов, сего ради молим тя: молитвами твоими не остави ны.
Слава, глас 6:
Венцем славы украшаем и Престолу Божию предстоя, Божественнаго света исполняем, священномучениче Фаддее преславне, моли спасти чтущия тя.
И ныне, глас тойже:
Пресвятая Дево, Царице небеси и земли, Мати Христа Бога нашего, молитвами возлюбившаго Тя святителя Фаддея, покрый нас покровом милосердия Твоего.
Вход. Прокимен дне. Чтения три священномученика.
На литии стихира храма.
Слава, священномученика, глас 8:
Всечестную память твою празднующе, сошедшеся днесь в храм сей святый, воспеваем житие и мученическую кончину твою, святителю Фаддее досточудне.
И ныне, Богородичен:
Царице наша Преблагословенная, к Тебе прибегаем и молим: молитвами светильника Церкве Христовы просвети души наша.
На стиховне стихиры, глас 6:
Священномучениче Фаддее, похвало Церкве святей, молися Христу Богу о пастве твоей, да спасет Господь души наша.
Стих: Честна пред Господем смерть преподобных Его.
Светильниче Церкве Христовы, отче наш Фаддее, наслаждаяся ныне светом Божественныя Славы, молися о всех нас.
Стих: Блажен муж бояйся Господа, в заповедех Его восхощет зело.
Славяще днесь страдания твоя, святителю Христов Фаддее, тя молим укрепити веру нашу.
Слава, глас 8:
Ты еси прибежище наше и покров спасения, ты еси предстатель о всех нас, темже тя почитаем купно с другом твоим Патриархом Тихоном, моли спастися душам нашим.
И ныне, глас тойже:
Владычице мира, Упование и Предстательство верных, приими молитвы раб Твоих, чтущих светлую память Фаддея священномученика.
Тропарь, глас 1:
Хвала Богу и жертва живая / житие твое, священномучениче Фаддее, явися. / Постом, бдением и молитвою Небесная дарования приим, / многим добрый помощник и утешитель бысть. / Пастырскою мудростию и тихостию нрава украшен, / лукавства врагов Христовых препобедил еси. / Слава Давшему тебе во страданиях крепость, / слава, яко мученика, Венчавшему тя, // слава Действующему тобою всем исцеления.
на утрени
На Бог Господь, тропарь святаго дважды.
Слава и ныне, Богородичен: Гавриилу, вещавшу:
По первом стихословии седален, глас 5:
Пламенный проповедниче Христовы истины, священномучениче Фаддее приснопамятне, явил еси непоколебимость воли и величие духа во страдании твоем.
Слава и ныне, Богородичен:
По слову Твоему блажат Тя вси роди, Пресвятая Владычице наша Богородице, сего ради умильно взываем: радуйся, всего мира очищение.
По втором стихословии седален, глас 3:
Защитниче Православия и истинный столпе Церкве Христовы, отче наш Фаддее, сохраняй стадо еже пасл еси.
Слава и ныне, Богородичен:
Возвыси благодать Твою, Чистая, яко да спасемся чтущии Тя.
Величание:
Величаем тя, священномучениче Фаддее, и чтим честная страдания твоя, яже за Христа претерпел еси.
Псалом избранный:
Услышите сия, вси языцы, внушите, вси живущии по вселенней.
По полиелеи седален, глас 6:
Днесь восхваляем новаго светильника Тверския земли, истиннаго святителя Божия, мужа крепосте и разума, моля просветити души наша.
Слава и ныне, Богородичен:
Святая Преблагословенная Дево Богородице, яви Свое Матернее Предстательство во еже грехов оставление даровати нам.
Степенна, 1-й антифон 4-го гласа.
Прокимен, глас 4: Проидохом сквозе огнь и воду, / и извел еси ны в покой.
Стих: Разжегл ны еси, яко же разжизается сребро.
Всякое дыхание: Евангелие от Матфея, зачало 36.
По 50-м псалме стихира, глас 6:
Достойно и праведно днесь восхвалим Архипастыря-молитвенника, продолжателя делания апостольскаго великаго, священномученика Фаддея достославнаго, умиленно прося помиловати души наши.
Канон священномученику Фаддею,
архиепископу Тверскому, глас 1.
Песнь 1.
Ирмос: Горькия работы избавлься Израиль, непроходимое пройде яко сушу: врага зря потопляема, песнь яко Благодетелю поет Богу, чудодеющему мышцею высокою, яко прославися.
Припев: Святый священномучениче Фаддее, моли Бога о нас.
Великаго архиерея тя почтим, священномучениче Фаддее преславне, яко да молитвами твоими добре о Господе наше течение совершим.
Яко чудно житие твое, священномучениче Фаддее, ангелом касающися невещественным нравом жительства твоего.
Слава: Ты шел еси крестным путем в злополучную годину Церкве Российския, сего ради Господь возлюби тя.
И ныне, Богородичен: Тя, Пречистую Матерь Божию, святитель честный Фаддей издетска возлюбил есть и бысть Помощница сего чрез все течение служения его.
Песнь 3.
Ирмос: Не мудростию и богатством да хвалится смертный своим, но верою Господнею, православно взывая Христу Богу, и поя присно: на камени Твоих заповедей утверди мя, Владыко.
Священномучениче Фаддее, святителю Христов, радуйся, ты бо еси наша радость неизреченная и Церкве Русския всесветлое украшение.
Тя святителя предивнаго почитают днесь людие Волынския и Тверския земли и радуются зело, имеюще тя великаго ходатая у Престола Триединаго Бога.
Слава: В преддверии праздника Воплощения Бога Слова, ты мученически скончал еси житие и веселишися со небесными силами, воспевающими славу в вышних Богу и на земли мир.
И ныне, Богородичен: Обрадованная, приими молитву недостойных раб Твоих и помилуй стадо Твое, еже стяжала еси, Пренепорочная.
Седален:
Струю нам слова подаждь, Боже, и силу исповедати Тя, молитвами священномученика Фаддея преславнаго.
Слава и ныне, Богородичен:
Призри, Пречистая, спасти ны, да благодарно славим Тя, всемощную Заступницу рода христианскаго.
Песнь 4.
Ирмос: Слыша древле Аввакум, Христе, чудный Твой слух, и страхом взываше: от юга Бог приидет, и Святый от горы приосененныя чащи, спасти помазанныя, слава силе Твоей Господи.
Се ныне стояще во храме Господни, притекаем к раце мощей твоих, отче Фаддее, и молим тя дати умиление сердцам нашим.
Видя злобу безбожных мучителей твоих, ты присущей ти кротостию противостал еси смирением, моля Христа Бога да не воздаст им по делом их.
Слава: Яко советник Христовых оправданий быв, советы безбожных до конца отклонил еси и себе предал еси, священномучениче, быти утопляему во сквернах.
И ныне, Богородичен: Похвало Божественная священномученика Фаддея, Пресвятая Богородице Дево, радости неизреченныя сподоби ны, поющия Тя.
Песнь 5.
Ирмос: Свет Твой незаходимый воссияй, Христе, в сердца верно поющих Тя, мир подавай нам паче ума, тем от нощи неведения ко дню светом Твоим текуще, славословим Тя, Человеколюбче.
Ты словом и делом явил еси образ Архипастыря достойнаго, отче наш Фаддее, помози и нам быти верны звания христианскаго.
Ты житием своим путь истинный показа ко Христу, святителю отче Фаддее, темже и нас укрепи молитвами пред Господем, дабы ноги твердо поставити во исповедании веры.
Слава: Егда приведен был еси пред судище беззаконных, ты кротостию отвергл еси клевету и свидетельствова без страха истину исповедания твоего.
И ныне, Богородичен: Недугующа телом и душею, посещения Материнскаго от Тебе сподоби, Едина Богомати, яко Благаго же Родительница.
Песнь 6.
Ирмос: Очисти мя, Спасе, многа бо беззакония моя, и из глубины зол возведи, молюся: к Тебе бо воззопих, и услыши мя, Боже спасения моего.
Образ жития твоего удивляет собратий твоих, священномучениче Фаддее прехвальне, но ты еще крепчая усилял смирение тщася победити гордость мира сего.
Не забуди нас убогих до конца, Церкве Тверския святителю и украшение, но моли Христа Бога нашего: да дарует нам терпение побеждати супостата.
Слава: Ты, святителю предивне, не отвергл еси Господа, но следовал еси стопам Его, сего ради Господь содела тя наследником блаженнаго упокоения.
И ныне, Богородичен: Тя, Радость и Славу священномученика Фаддея, Богородице, молим верно: радости вечныя нас сподоби, поющих Тя присно.
Кондак, глас 4.
Духа небоязни, силы, любве и упования / даде Пастыреначальник ти, святителю Фаддее, / во страдании бо твоем благодарение Богу воздавал еси / и в гонениях страждущия утешал еси, // глаголя: не унывайте, Христос бо с нами есть.
Икос.
Воссиял еси якоже солнцу заря, священномучениче Фаддее светоносне, тем твою память достойно славим и просим: моли Христа Бога грехов оставление нам даровати и в мире спастися.
Песнь 7.
Ирмос: Проидоша яко чертог пещный пламень нестерпимый, иже за благочестие иногда, отроцы святии показавшеся яве, и согласно воспевающе песнь пояху: отцев Боже, благословен еси.
Радуйся светлым торжеством, граде Тверь, имея покровителя и заступника пред Богом, мы же раби твои припадающе вопием ти: угодниче Христов отче Фаддее, не промолчи о нас, тепле моляся ко Господу.
Красен был еси и земли Астраханския, идеже показался еси проповедник истинныя веры. Темже удивляеми от усердия взываем: радуйся, града Астрахани похвало неложная.
Слава: Светильника Церкве Христовы, поставленныя на свещнице веры, сошедшеся вси воспоим.
И ныне, Богородичен: Живых и мертвых Предстательнице, страсти сердец наших умертви, Всенепорочная.
Песнь 8.
Ирмос: Чуда преестественнаго показа образ, огнеросная пещь древле: огнь бо не опали юныя дети, Христово являя от Девы Божественное Рождество, тем воспевающе воспоим: да благословит тварь вся Господа и превозносит во вся веки.
Твоею неизреченною благостынею, Боже, молитвами угодившаго Ти святителя Фаддея, услыши глас и воздыхание верно творящих память его.
Святый священномучениче Фаддее, пищи небесныя ныне наслаждаешися, Господа воспевающе: Боже отец наших, благословен еси.
Слава: Власть вязати и решити получивый, разреши множество зол наших, да возможем пети Господа: Боже отец наших, благословен еси.
И ныне, Богородичен: Никтоже погибе, Чистая Богородице, иже веры надежду стяжав к Тебе православно.
Песнь 9.
Ирмос: Неизглаголанные Девы таинство: небо бо сия и престол Херувимский и светоносный показася, Христа Бога Вседержителя, Сию благочестно яко Богородицу величаем.
На стадо и Церковь, юже ты пасл еси, священномучениче Фаддее, врази устремишася, но ходатайством твоим пред Богом сих посрами до конца.
Чада твоя собрашася в день мученическия кончины твоея и предстояще раце мощей твоих, со хвалами мнозими величают тя.
Слава: Архиереи и священницы, монаси и мирстии, светло празднуйте досточудную память новомученика Церкве Российския, восхваляя его в песнех и пениих духовных.
И ныне, Богородичен: Умири мир, Христе, мольбами Чистыя Богоотроковицы и предстательством священномученика Фаддея, дивнаго во святых Твоих.
Светилен.
Пламеннаго провозвестника Единыя, Соборныя и Апостольския Церкве имущи и светлаго светильника Фаддея, сошедшеся радостно по достоянию восхвалим.
Слава и ныне, Богородичен:
Призри на ны, Всепетая Богородице Дево, приемля недостойную молитву раб Твоих.
Стихиры на хвалитех, глас 2:
Днесь радость велия на небесех и в Церкве Божии на земли, и вси сошедшеся прославляем дивнаго святителя Фаддея, телом почивающаго[1] на земли, душею же Престолу Божию предстоящаго.
Ревности Божественныя исполнен еси, священномучениче Фаддее достохвальне, в смутныя годины Отечествия нашего, явился еси адамант веры Христовы.
Прославляя истиннаго носителя заветов апостольских, священномученика Фаддея, вернии возопиим: Христа Бога моли даровати Церкве единомыслие, мир и велию милость.
Слава и ныне, Богородичен:
Светлое пророческое сбытие, апостольская похвало, Ты еси Всечистая, просвети ны, рабы Твоя.
на литургии
Блаженны от канона, песни 3 и 6.
Прокимен, глас 7: Честна пред Господем / смерть преподобных Его. Стих: Что воздам Господеви о всех, яже воздаде ми.
Апостол к Римляном, зачало 99.
Аллилуйя, глас 6: Священницы Твои облекутся в правду, и преподобнии Твои возрадуются. Стих: Бог нам Прибежище и Сила, Помощник в скорбех, обретших ны зело.
Евангелие от Луки, зачало 106.
Причастен: В память вечную будет праведник
Тропарь, глас 1-й
Хвала Богу и жертва живая│ житие твое, священномучениче Фаддее, явися.│ Постом, бдением и молитвою Небесная дарования приим,│ многим добрый помощник и утешитель бысть.│ Пастырскою мудростию и тихостию нрава украшен,│ лукавства врагов Христовых препобедил еси.│ Слава Давшему тебе во страданиях крепость,│ Вслава, яко мученика, Венчавшему тя,║ Кслава Действующему тобою всем исцеления.
Молитва.
О, пречудный угодниче Христов, истинное сокровище и красото Церкве Российския, священномучениче отче наш Фаддее, ты от юности явил еси благодатныя дары: кротость, незлобие и смирение, и от чина иноческаго дух пламенный монашеский стяжа, созерцание и богомыслие. Служением твоим архипастырским земли Тверския, Волынския, Астраханския освятил еси. Гонения, заточения, страдания претерпев, собратий твоих утешал еси, глаголя: «Не унывайте, с нами Христос».
Ей, святче Божий, друже иже во святых отца нашего Патриарха Тихона, не остави нас убогих в молитвах твоих пред Престолом Триединаго Бога. Аминь.
Молитва вторая.
О великий и преславный угодниче Христов, священномучениче Фаддее! Светильниче пресветлый, на свещнице Церкви Православной возженный, сосуде чистоты и избранное селение Духа Святаго! Молим убо тя: сохрани под кровом молитвенных крил твоих Православное Отечество наше и паству, юже собрал еси, да не закоснеем в окаменении сердец и нерадении о спасении нашем. О пастырю добрый и ближний друже Христов! Сподоби и нас, путем покаяния шествуя, возлюбити Бога всем сердцем и помышлением нашим и ближняго яко себе, и тако по неложному слову апостола: приближитесь Господу, и приближится вам, - сподобитися вожделенных селений райских, идеже ты с лики святых пребываеши, прославляя в Троице славимаго Бога, Отца и Сына и Святаго Духа, ныне и присно и во веки веков. Аминь.
Акафист священномученику Фаддею
Кондак 1.
Избраннаго от Бога на высоту святительскаго служения, молитвенника изряднаго и чистоты православныя веры ревнителя, Твери града и всея земли Российския небеснаго заступника, новаго чудотворца предивнаго вси воспоим: Радуйся священномучениче Фаддее, молитвенниче о душах наших!
Икос 1.
Ангел пресветлый явился еси на земли, преблаженне Фаддее, тихостию нрава и смирением украшен, издетска Господеви угождати желая, сего ради вопием ти:
Радуйся, иерейскаго корене ветвь пречестная,
Радуйся, от святыя купели славным именем Иоанна Дамаскина нареченный;
Радуйся благочестивых родителей кроткое утешение,
Радуйся благоговейное верных удивление;
Радуйся, чадо послушания, в страсе Божием возращенное,
Радуйся, отроча чистое, во храме Господнем воспитанное;
Радуйся, от сродников и знаемых благочестию наученный,
Радуйся, благим нравам, вере и любви оных подражателю;
Радуйся, священномучениче Фаддее, молитвенниче о душах наших.
Кондак 2.
Видяще твое по Бозе усердие, удивляхуся вси, како вмале премудрость Божию познавши, возжада душа твоя источника приснотекущаго, от негоже верных сердца благодатию наполняются и немолчно восхваляют Бога: Аллилуйя!
Икос 2.
Разум неуразуменный уразумети потщався, востекл еси, блаженне, под кров преподобнаго Сергия, не в суетных и тленных поучатися, но Господа лицем к Лицу узрети желая, сего ради вопием ти:
Радуйся, от пелен архиереем пророчески нареченный,
Радуйся, несумнительно путь служения Господеви избравый;
Радуйся, неуклонное шествие ко Христу от юности в сердце своем положивый,
Радуйся, душу свою невредиму от ветров безбожных учений сохранивый;
Радуйся, в терниих и волчцех пшеницу веры Христовы возрастивый,
Радуйся, плод сторичный Владыце Христу принесый;
Радуйся, ближним поработати пламенне вожделевый,
Радуйся, о души бессмертней присно попечение имевый.
Радуйся, священномучениче Фаддее, молитвенниче о душах наших!
Кондак 3.
Силою свыше укрепляем, выну болезнуя о спасении души своея, добрых учителей искал еси, по слову святых отец, яко неудобь спасается без наставника к Богу шествуяй, и обрел еси оных, яко многоценное сокровище. Тех богомудрым поучением прилежно внимал еси, Богу благодарственно поя: Аллилуйя!
Икос 3.
Имеяй непрестающую болезнь в сердцы своем, в кий бо час услышиши глас "Се Жених грядет" недоумея, светильник свой присно горящий уготовал еси, елеем благодати преисполнив сего. Мы же, части мудрых дев улучити желая, воспеваем ти сице:
Радуйся, постниче, себе Христа ради утеснивый,
Радуйся, вина от юности никакоже вкусивый;
Радуйся, древним отцем пустынным измлада подражавый;
Радуйся, противу страстей душепагубных подвизавыйся;
Радуйся, любве исполнение стяжавый,
Радуйся, семена греха непрестанно из сердца своего исторгавый;
Радуйся, помысел возношения самоукорением низложивый,
Радуйся, смирением гордую выю помыслов суетных сокрушивый.
Радуйся, священномучениче Фаддее, молитвенниче о душах наших!
Кондак 4.
Бури помышлений сумнительных возмущаша душу твою, о доблий воине Христов, егда служити Богу и ближним всем сердцем возжелал еси, о стези же монашестей недоумевая, молился еси Богу со слезами: "Скажи мне, Господи, путь, в онь же пойду, яко к Тебе взях душу мою," - поя Ему с надеждою: Аллилуйя!
Икос 4.
Слышавше от праведника Кронштадтскаго, егоже яко ангела земнаго узрел еси, словеса Христовы: "Аще любиши Мя, паси овцы Моя...", уразумел еси волю Божию спасительную. Сим предречена бысть и мученическая кончина твоя, еюже увенча тя Господь, сего ради вопием ти:
Радуйся, в день Успения Пречистыя Владычицы в воинство Ея вчиненный,
Радуйся, дивным смотрением Божиим имя апостола, во младости предреченное, получивый;
Радуйся, небесное ангельское звание паче всех земных возлюбивый,
Радуйся, Бесплотным силам во всем уподобитися возжелавый;
Радуйся, благодатию священства почтенный,
Радуйся, благоговейный Престола Божия предстоятелю;
Радуйся, научение юных аки святое послушание восприявый,
Радуйся, в подвизе любве и попечения о пастве твоей пребывый.
Радуйся, священномучениче Фаддее, молитвенниче о душах наших!
Кондак 5.
Яко звезду боготечную, путь верным указующую, воздвиже тя Пастыреначальник на тверди церковней просветити мрак неведения и привести Господеви люди совершенны, да радостно вси воспоют с тобою Богу: Аллилуйя!
Икос 5.
Видеша людие талант пастырства добраго, дарованный ти от Господа, егоже не яко бремя тяжкое восприял еси, но яко иго легкое понесл еси, любовию вся покрывая, ничимже смущаяся, на Господа твердое упование имый; мы же, дивящеся, вопием:
Радуйся, Пастыря кроткаго дивный подражателю, Радуйся, небесному покровителю твоему подобниче; Радуйся, апостольское дерзновение имевый,
Радуйся, об Отечестве твоем, тьмою неверия покрывающемся, скорбевый;
Радуйся, о рассеянных по путем погибельным присно болезновавый,
Радуйся, на зов твой текущих с любовию приимавый;
Радуйся, яко обида и памятозлобие от тебе далече быша,
Радуйся, яко превыше немощей человеческих пребыл еси.
Радуйся, священномучениче Фаддее, молитвенниче о душах наших!
Кондак 6.
Проповедует земля Волынская подвиги и труды твоя, святителю Фаддее, яко истинною смертию для мира и гробом себялюбию архиерейское служение почел еси, неуклонно шествие ко Христу творя и воспевая Ему присно: Аллилуйя!
Икос 6.
Воссия свет святительскаго служения твоего, о пастырю неусыпный, снедаше бо тя огнь любве ко Христу. Возжада душа твоя благодати Божией, о Господе хвалитися научающей: "Пшеница Божия есмь," - яко Богоносец восклицая. Мы же, видяще таковое усердие твое, воспеваем сице:
Радуйся, наречение в день священномученика Игнатия приявый,
Радуйся, сему Богоносцу любовию ко Христу уподобивыйся;
Радуйся, славы суетныя на земли не взыскавый,
Радуйся, совершенный образе чистоты и смиренномудрия;
Радуйся, омофор яко крест на рамена своя возложивый;
Радуйся, Архиерею Великому, небеса прошедшему, последовавый,
Радуйся, благочестие свое, яко жезл для овец словесных, имевый,
Радуйся, яко глава твоя увенчана бысть венцем долготерпения.
Радуйся, священномучениче Фаддее, молитвенниче о душах наших!
Кондак 7.
Хотя явити всем красоту веры Православныя, неустанно трудился еси, да люди новы Христу приобрящеши, кротостию и тихостию нрава к себе привлекая, выну поя Богу: Аллилуйя!
Икос 7.
Новаго тя Златоуста показа Человеколюбец Христос, неусыпно бо вертоград Господень, зноем безбожия иссушаемый, животворною влагою словес твоих напоял еси. Сего ради вопием ти:
Радуйся, от Источника воды живыя верных напояющий,
Радуйся, светильниче светлый, путь спасения нам озаряющий;
Радуйся, плотскаго мудрования до конца отвративыйся,
Радуйся, Писаний Божественных изъяснителю;
Радуйся, о просвещении истиннем радевый,
Радуйся, очи сердечныя отроком учением твоим отверзаяй;
Радуйся, юныя души на путь спасения наставляяй,
Радуйся, добрый соработниче Христов и верный Того учениче.
Радуйся, священномучениче Фаддее, молитвенниче о душах наших!
Кондак 8.
Странное чудо является притекающим к тебе, блаженне Фаддее, ибо данною тебе Божиею благодатию во дни печали и скорбных обстояний светлым лицем радость пасхальную всем возвещал еси, воспевая Богу: Аллилуйя!
Икос 8.
Весь хвала Богу и жертва живая был еси, святе Фаддее, глаголал бо еси, яко крестный путь спасения благодать Божия радостию преисполняет, юже мир не позна. Сего ради от святителя Тихона святость твоя известися, юже похваляюще, воспеваем ти сицевая:
Радуйся, странствия Владычня возследователю,
Радуйся, бессмертныя трапезы Христовы насладивыйся;
Радуйся, яко во страданиях Господеви уподобился еси,
Радуйся, яко клеветы, осуждение и заточение понесл еси;
Радуйся, яко во узилищи с тобою сущия утешал еси,
Радуйся, уныние и скорбь далече от них отревал еси;
Радуйся, дар прозорливости от Господа получивый,
Радуйся, и в темници милостыню творивый.
Радуйся, священномучениче Фаддее, молитвенниче о душах наших!
Кондак 9.
Всякия утоляя печали, безмездник предивный явился еси, сирым и нищим вся раздавая, да обет нестяжания совершение исполниши. О сем же людие земли астраханския зело чудишася, егда вольную нищету твою узрели суть, умиленным сердцем воспевая Богу: Аллилуйя!
Икос 9.
Ветия суемудренныя нечестивыя видим твоим житием посрамляемыя, богомудре Фаддее; поправшия бо каноны церковныя и отеческия предания ко Христу привел еси, не словесы грозными заблудшия обличая, но богоподражательными своими нравы. Сего ради вопием ти:
Радуйся, на всяк день у Престола Господня молитвы возносивый,
Радуйся, словом богоносным паству свою неустанно учивый;
Радуйся, вся покрывающую любовь имевый,
Радуйся, светом Христовым заблуждшия просветивый;
Радуйся, отцев Вселенских соборов верный последователю,
Радуйся, еще в житии земном за святость почитаемый;
Радуйся, зерно Божественныя истины возрастивый,
Радуйся, преславное Российския земли заступление.
Радуйся, священномучениче Фаддее, молитвенниче о душах наших!
Кондак 10.
Спастися хотя всякому, притекающему к тебе, наставниче добрый, страждущих яко слуга Христов приимал еси, раны греховныя тех исцеляя и волю Божию им открывая, воспевая Богу: Аллилуйя!
Икос 10.
Стена еси всем прибегающим к тебе, богопросвещенне Фаддее, во дни бо лютых гонений Тверь град молитвою твоею ограждая, призывал еси люди твоя верными быти Христу даже до смерти, да жительствуют по словеси Евангельскому: "Не убойтеся от убивающих тело, души же не могущих убити". Укрепи же и нас, малодушных и унылых, зовущих ти таковая:
Радуйся, всяческия поношения смиренно претерпевый,
Радуйся, тя бо ни скорбь, ни теснота, ни глад, ни нагота, ни меч не устрашиша;
Радуйся, яко сия вся от любве Христовы тя не отлучиша,
Радуйся, ветве лозы Христовы, сторичный плод принесшая;
Радуйся, душу твою молитвою и любовию окриливый,
Радуйся, в мире многомятежнем, яко в тишей пустыни поживый;
Радуйся, святителей пресветлое украшение,
Радуйся, всем верным прерадостное утешение.
Радуйся, священномучениче Фаддее, молитвенниче о душах наших!
Кондак 11.
Пение хвалебное возносим ти, священномучениче Фаддее; течение скончав, веру соблюл еси, тесным путем в житии твоем шествуя, душу твою молитвою и постом предуготовал и безкровным самозакланием венец мученический прежде кончины твоея стяжал еси, воспевая Богу: Аллилуйя!
Икос 11.
Светом небесныя благодати зримо, святе, просиял еси, заушения и заплевания в темници претерпевая, егда Владычица Пречистая за тя заступися и мучителей к покаянию приведе. Темже юдоль плача в гору святую претворися, мы же воспеваем ти сицевая:
Радуйся, светом Фаворским пред кончиною своею возблиставый,
Радуйся, всецело себе Богу предавый;
Радуйся, возвеселивый ангелы своими подвиги,
Радуйся, яко скорбь твоя в радость преложися;
Радуйся, ты бо соделал еси душу свою храмом Бога Живаго,
Радуйся, яко венца трегубаго в преподобничестве,святительстве и мученичестве, сподобился еси;
Радуйся наставниче и учителю, душу свою за други своя положивый,
Радуйся, и за враги своя смиренно Господа моливый.
Радуйся, священномучениче Фаддее, молитвенниче о душах наших!
Кондак 12.
Благодать свыше ти данную сведуще, восхваляем мученическую кончину твою, преблаженне Фаддее, ты бо прослави Христа на земли жизнию, паче же смертию своею, по кончине же своей славою небесною осиянный, токи исцелений нам присно источаеши. Мы же, прославляя Бога, дивнаго во святых своих, воззовем Ему: Аллилуйя!
Икос 12.
Воспеваем тя, чудотворца новаго и преславнаго, достохвальне Фаддее, за Христа бо страданием твоим в радость вечную вшел еси, и ныне во свете неприступнем пребываеши, лицезрения Троицы Присносущныя наслаждаяся и со ангелы и всеми святыми у Престола Божия ликуя, идеже и нас помяни, вопиющих ти таковая:
Радуйся, от мученик древних ничимже умаленный,
Радуйся, святче Божий, возсиявый силою и духом древних отцев;
Радуйся, в сонм новомучеников российских вчиненный,
Радуйся, мощи твоя святыя нам, недостойным, явивый;
Радуйся, яко честныя мощи твоя всем исцеления источают,
Радуйся, яко мощи твоя граду Твери и всей Российстей земликрепкое заступление;
Радуйся, присно радование всем возглашати призывающий,
Радуйся, яко по имени твоему и житие твое бысть.
Радуйся, священномучениче Фаддее, молитвенниче о душах наших!
Кондак 13.
О заступниче наш у престола Царя Небеснаго, / священномучениче славный Фаддее, / веры православныя твердый поборниче / и за Отечество наше присный молитвенниче!/ Нынешнее наше приими приношение, /да молитвами твоими вечныя муки избавимся,/ и Небесныя радости сподобимся, / воспевая Богу: Аллилуйя!//(Сей кондак читается трижды, затем чтется икос 1 и кондак 1).
