Гимнография сщмч. Елеазара Спиридонова пресвитера
Гимнография:
Даты:
Тропарь:
Тропарь, глас 4:
Днесь благоверние людие, / сошедшеся восхвалим / добраго сего священномученика и страдальца Елеазара, / сей бо, укрепляемь силою Божиею, / душу свою положил за Христа, / много пострадав от безбожных властей, / сего ради от Господа венец прият, / и ныне предстоит Ему и молится о граде сем / и о всех нас, чтущих память его.
Кондак:
Кондак, глас тойже:
Яко многосветлая звезда, / днесь во граде Евпатории возсиял еси, отче, / веры ради пострадал еси, / Христовым стопам последовати усердно возжелел еси, / и честною смертию своею поборников веры низложил еси. / Темже вопием ти: / спаси стадо твое, еже собрал еси, мудре, да зовем ти: / радуйся, священномучениче Елеазаре, отче наш.
Молитва:
Молитва
О пастырю добрый и великий угодниче Христов, священномучениче отче наш Елеазаре, Крымския земли похвало и града Евпатории славо!
К тебе молитвеннику теплому и предстателю перед Богом непостыдному припадаем и молим тя: воззри на нас, грешных, почитающих память твою и прибегающия к твоему заступлению: умоли Господа, да простит нам вся согрешения и беззакония наша.
Ты мученически в годину лютых гонений от безбожных душу твою за веру положил еси, даруй и нам мужество во всем подражати тебе.
Ты бо приял от Господа благодать и силу великую за многая и тяжкая страдания твоя и терпение, еже везде и во всем нам помогати и Владыку Господа нашего о всех чтущих память твою дерзновенно молити: умоли Господа, да подаст нам решимость стяжати благочестие отцев наших.
Ты в жизни земной ревностный защитник и хранитель истинныя веры был, помози и нам, маловерным и слабым, незыблиму соблюсти веру отеческую Православную. Ты перед лицем врагов Христовых Истинного Бога дерзновенно исповедал еси, молитвою своею укрепи и нас, малодушных, да и мы всегда и всюду противостанем духу безбожия и лести. Ей, угодниче Божий, не презри нас, молящихся тебе, ибо не токмо избавление от бед и скорбей просим, но силы и твердости, великодушия и любви просим, дабы переносить нам оныя напасти возстающия на ны. Испроси нам неослабное терпение даже до конца жития нашего, мир с Господом и просимых грехов и заблуждений безбожных отпущение!
Отче святый! Моли о нас Господа Бога нашего, да низпослет мир на грады и веси Отечества нашего, да избавит нас от нашествия иноплеменных, междоусобныя брани и всяких раздоров и нестроений, да водворит Господь в земле Российстей тишину и благочестие и любовь нелицемерную во всех чадах Православныя Христианския Церкви и да избавит нас Господь Бог от ересей, раскола и всякого суеверия.
Молитвами твоими у престола Царя Небеснаго, да укрепит Господь Святую Церковь нашу Православную, да не оскудеет она истинными пастырями, добрыми делателями, право правящим слово Евангельской истины.
Буди же воинам вождь духовный, болящим врач, печальным утешитель, гонимым заступник, юным наставник, всем же благосердный отец и за вся теплый молитвенник, наипаче же сподобимся, молитвами твоими, небесного царствия Христа Бога нашего, идеже ты ныне водворяешися со ангелы и всеми святыми новомученики и исповедники Российскими, хваля Бога, во святей Троице прославляемаго Отца и Сына и Святого Духа, ныне и присно и во веки веков. Аминь.
