Гимнография свт. Тихона, патриарха Московского и всея России
СЛУЖБА ИЖЕ ВО СВЯТЫХ ОТЦУ НАШЕМУ СВЯЩЕННОИСПОВЕДНИКУ ТИХОНУ, ПАТРИАРХУ ВСЕРОССИЙСКОМУ
НА ВЕЛИЦЕЙ ВЕЧЕРНИ
Блажен муж: 1-й антифон.
На Господи, воззвах: стихиры, глас 6:
Земля Псковская прославися, / яко в малем селении Клине / от благочестиваго корене плод благокрасен прозябе, / Василий, отроча благонравное, / святителю Великому тезоименитое. / В сем же имени велий, яко царственный, / путь ему преднаречеся.
Благочестивый иерей Иоанн, отец твой, святителю, / откровения дивнаго сподобися, / егда мати его почившая / во сне ему явися / и тя, еще ти отроку сушу, / единаго от триех братий / велика преднарече.
Измлада церковь Божию возлюбив / и благочестия вожделев, святе, / в духовном вертограде / во слове Божий / и отеческих и благочестивых писаниих, / начат поучатися.
Что убо сотворю, / киим образом жития моего / Тебе, Владыце и Богу, добре послужу, / киими подвиги, Тебе содействующу, / душу мою от грех очищу? / – в меру возраста пришед, / слезно взывал еси ко Господу, блаженне.
Слава, глас 8:
Путь девства, нищеты, / своея воли отсечения / избрал еси, блаженне, / иноческое пострижение прияв, / в немже именем Тихон наречен бе, / да путем благочестия святителя Задонскаго шествуеши.
И ныне, Богородичен: Царь Небесный:
Вход. Прокимен дне. И чтения 3.
На литии стихиры, глас 3:
Во граде Торопце, / во храме Божии, / идеже родитель твой служаше, / благочестию в юных летех / поучался еси, святителю.
Тих нравом, / кроток и смирен сердцем / воистинну пред Богом и людьми явился еси, / иго Христово чрез все житие добре пронеся, / во обителех небесных упокоился еси, блаженно, / молися ныне и о нас, / да и мы на земли добре поживше, / Царствия Божия наследники быти сподобимся.
Слава, глас 8:
Бог тя возвеличи, святителю отче Тихоне, / Первоиерарха Церкви Своея поставив, / ты же жребий служения сего / яко волю благую Его восприим, / в первосвятительстем подвизе твоем / присно ревновал еси о славе, - / Отца и Сына и Святаго Духа - / Троицы Единосущныя и Нераздельныя.
И ныне, Богородичен, глас тойже:
К Тебе, о Богомати, / вси ныне слезно взываем: / вонми предстательству святителя Тихона о нас / и Сыну Твоему молитвы вознеси / о спасении душ наших.
На стиховне, стихиры, глас 2:
Якоже свеща на свещнице светит всем, / тако ты, благочестием сияющь, блаженне, / поставлен бысть Господем во епископа земли Холмския, / да светом Христова учения / осияваеши люди, в ней живущия.
Стих: Уста моя возглаголют премудрость, и поучение сердца моего разум.
Бог благослови и освяти тя, земле Американская, / православным бо людем твоим во ограде Российския Церкве сущим / блаженнаго Тихона епископа даде, / той многими храмы лице твое украси / и яко богомудрый священноначальник / паству свою ко Христу приведе.
Стих: Благовестих правду Твою / в церкви велице.
Святии вси земли Ярославския, / сретайте иерарха добра, / Тихона блаженнаго, / той бо, якоже и вы, многия труды зде понесе, / и ныне тщится вкупе с вами молитися Христу Богу / спастися душам нашим.
Слава, глас 4:
Земля Литовская прославися / пришествием твоим, блаженне, / людие же православнии, / в ней сущий, / яко светильника веры и благочестия тя прияша / и в поклонении Триединому Богу тобою утвердишася, / святительский же омофор твой / надежный покров и защита / от злых обстояний тем явися.
И ныне, Богородичен, глас тойже:
Призри на моления Твоих раб, Всенепорочная, / утоляющи лютая на ны востания, / всякия скорби нас изменяющи, / Тя бо едину твердое и известное утверждение имамы / и Твое предстательство стяжахом, / да не постыдимся, Владычице, Тя призывающии, / потщися на умоление Тебе верно вопиющих: / радуйся, Владычице, всех Помоще, / Радосте и Покрове, / и Спасение душ наших.
Тропарь, глас 1:
Апостольских преданий ревнителя / и Христовы Церкве пастыря добраго, / душу свою за овцы положившаго, / жребием Божиим избраннаго / Всероссийскаго Патриарха Тихона восхвалим / и к нему с верою и упованием возопиим: / предстательством святительским ко Господу / Церковь Русскую в тишине соблюди, / расточенная чада ея во едино стадо собери, / отступившия от правыя веры к покаянию обрати, / страну нашу от междоусобныя брани сохрани / и мир Божий людем испроси.
НА УТРЕНИ
На Бог Господь: тропарь святителю, дважды.
Слава, и ныне, Богородичен.
По 1-м стихословии седален, глас 2:
Жезл первосвятительский дерзновенно приял еси, святе, / да яко добрый пастырь, небоязненно в подвизе твоем шествуя, / заблуждшая горохищная овчата обрящеши, / татиями похищенная во двор овчий паки возвратиши, / многоразличными болезньми и недуги обдержимыя добре уврачуеши / — и все Христово стадо словесных овец / в истине и правде упасеши.
Слава, и ныне, Богородичен, глас тойже:
Покрый нас всемощным Покровом Твоим, / Всемилостивая Владычице Богородице, / защити нас от всяких сетей вражиих, / дадеся бо Ти благодатная сила, / яко рождшей Владыку Христа и Спаса душ наших.
По 2-м стихословии седален, глас 5:
Благодарение Богу / воздадите, людие российстии, / Той бо пробавил есть милость Свою вам, / Тихона блаженнаго / Первоиерарха Церкви Своея постави, / да во дни испытаний / обрящете в нем образ веры / от наветов вражиих неколеблемы, / неложнаго упования на помощь Божию / и любовию Христовою исполненный.
Слава, и ныне, Богородичен, глас тойже:
Утоли, Владычице, / болезни душ наших. / Радостию благодатною о Тебе исполни сердца наша, /на Тя бо надеющийся / причастницы жизни вечныя будем.
По полиелеи седален, глас 8.
Подобен: О преславнаго чудесе.
Приидите, вернии, / согласно вей восхвалим святителя предивнаго, / священноначальника Церкви Российския богомудраго, / Тихона блаженнаго, / иже достойно иго Христово / чрез все житие свое понесе, / и ныне во обителех Отца Небеснаго водворився, / молится о спасении душ наших.
Слава, и ныне, Богородичен:
Буди благословен день и час, / вонь же благоволи Господь Тобою, Пречистая Богородице, / явити Спаса мiру, / сим же нам имети Тя яко дерзновенную Предстательницу и Ходатаицу пред Сыном Твоим / о спасении душ наших.
Степенна, 1-й антифон 4-го гласа.
Прокимен, глас 4: Вознесох избраннаго / от людей Моих.
Стих: Елеем Моим помазах его.
Всякое дыхание:
Евангелие от Иоанна, зачало 36.
По 50-м псалме стихира, глас 6:
Церковь Божию и чад ея преискренне любяй, / и к пользе тых деяния своя всемерно направляя, / жертвенно и дерзновенно, / якоже древле Моисей, / Господу взывал еси, святителю: / уне мне, Владыко, / да забвению предастся имя мое в человецех, / но спасена будет Церковь Твоя во отечестве моем / и иссякнут потоцы крови мучеников, / землю Российскую обильно обагрившия.
КАНОН Святителю, глас 6
Песнь 1
Ирмос: Яко по суху пешешествова Израиль, / по бездне стопами, / гонителя фараона / видя потопляема, / Богу победную песнь поим, вопияше.
Якоже плод красный спасительнаго сеяния Божия / явился еси в Церкви, святителю Христов, / родителей благочестивых, иерея Иоанна и Анны, быв отрасль предивная.
Предречение дивное во сне отцу твоему о грядущем величии твоем, еще ти отроку сушу, по мнозех летех сбыстся, / зане воистинну Великим Господином Российския Церкве явился еси, блаженне.
Образ кротости, смирения и любви о Господе являя, / добрый помощник юным другом твоим был еси, блаженне, / сего ради и тыя, еще ти отроку сушу, архиерея Божия прорекоша тя.
Богородичен:
Спаси нас от всяких бед, / Всемилостивая Владычице Богородице, / и Твоими молитвами к Сыну Твоему и Богу нашему / исцели от греховныя болезни страждущия души наша.
Песнь 3
Ирмос: Несть свят, / якоже Ты, Господи Боже мой, /вознесый рог верных Твоих, Блаже, / и утвердивый нас на камени / исповедания Твоего.
В вертоградех духовных, православно богословити и слово Божие иными языки глаголати поучался еси прилежно, блаженне, / и сие в церковном служении твоем добрый плод принесе.
Егда Владыка Господь объятия отча отверзе ти и яко возлюбленна сына, во иночестве Тихона прият тя, / таже и начальника в вертоградех духовных Пскова и Казани поставити тя благоволи, / да православныя отроки богомудрию и христианскому благочестию научиши, блаженне.
Холмскую паству добре управити призва тя Владыка Христос, / темже и начало положи святительским подвигом твоим, / да в них укрепляяся, изряден архиерей Всероссийския Церкве явишися, блаженне.
Богородичен: Множества грехов люто обдержат души наша. / Ты же, Пречистая Богомати, молитвами Твоими ко Иже от Тебе Рождшемуся, пленения сего греховнаго избави и на стезю спасения настави нас.
Седален, глас 1:
Доброму евангельскому пастырю подражая, / дерзновенно во двор овчий вшел еси, святителю, / и своя овцы глашая по имени, / во ограде церковней тыя невредимо соблюл еси.
Слава, и ныне, Богородичен, глас тойже:
К Тебе, о Богомати, / молитвенно мы ныне прибегаем / и предстательства Твоего пред сыном Твоим / усердно просим / от греховнаго ловительства сохрани нас / и на путь спасения настави.
Песнь 4
Ирмос: Христос моя сила, / Бог и Господь, / честная Церковь боголепно поет, взывающи / от смысла чиста, о Господе празднующи.
Смотрению Божию следуя, / велению матере Церкве повинуяся, / земли дальния Американския достигл еси / и тамо новую паству — людей алеутских, креольских, кенарских — во ограде Христовы Церкве яко добрый пастырь соблюл еси, / Тихоне блаженне.
Радуйтеся и веселитеся верныя чада Церкве Российския, иже в Пенсильвании, Калифорнии, Флориде и иных землех Американских сущии, / святитель бо Тихон ныне престолу Божию предстоит и молится о спасении душ наших.
Кронштадтскаго пастыря / собеседник быти сподобился еси, блаженне, / еще сый епископ града Ярославля, / и той ти всероссийское пастырство предуказа. / Темже и ныне с ним престолу Божию предстоя, / моли спастися душам нашим.
Богородичен:
Достойно есть прославляти Тя, Владычице, / присно спасающую землю Российскую. / Се бо и святитель Тихон в Ярославстем храме Успения Твоего, / государя Николая, яко истиннаго помазанника Божия срете / и благодарственныя молитвы вкупе с ним о заступлении отечества нашего / Тебе и Сыну Твоему принесе.
Песнь 5
Ирмос: Божиим светом Твоим, Блаже, / утренюющих Ти души любовию озари, молюся, / Тя ведети, Слове Божий, / Истиннаго Бога, / от мрака греховного взывающа.
Егда по грехом нашим нашествие иноплеменных Господь попусти, / и земля Российская кровию обагрися, / ты, святителю, покаяние проповедуя, / и врачевству душевному и телесному страждущих добре содействуя, / крепце стояти за веру православную, / царя благовернаго и отечество святое призывал еси.
Ополчению вражеску у стен града Вильно стоящу, / цельбоносныя мощи святых мученик Антония, Иоанна и Евстафия / из обители Святаго Духа благоговейно изнесл еси, святителю, / и во граде Москве / от поругания иноземных невредимы сохранил еси.
Благоволением Божиим и народа Божия избранием / Московским архипастырем поставлен был еси, святе, / темже и достойный преемник Московских святителей явился еси.
Богородичен:
Ангельский собор и человеческий род о Тебе радуется, Благодатная Марие, / Мати Неискусомужная, / Невместимаго бо во чреве вместила еси / и родила еси Спаса мiру.
Песнь 6
Ирмос: Житейское море, / воздвизаемое зря напастей бурею, / к тихому пристанищу Твоему притек, вопию Ти: / возведи от тли живот мой, / Многомилостиве.
Пустынножитель-старец пред образом Владычицы усердно моляся, / жребий со трепетом из ковчезца извлече, / на немже имя твое, / яко Богом избраннаго Первосвятителя, начертано бе, / сего ради и мы ныне, якоже тогда иерархи Собора, немолчно "аксиос" тебе, архипастырю наш, вопием, / сотвори и нас яко словесныя овцы достойны быти пажити твоея.
О глубины богатства и премудрости Божия! / Изволися Духу Святому со иерархи / поставити тя, блаженне, Патриарха Церкве Российския, / да во дни испытания веры / свидетельствующи крепкое в ней стояние / и паству твою неврежденну / от наветов вражиих добре соблюдеши.
О неизреченныя любве и милосердия Божия! / святитель Тихон во главу Российския Церкве поставляется / и мнозии людие / добраго пастыря обретают, / и во ограде церковней соблюдаются.
Богородичен:
Радуются и ликуют людие российстии, Приснодево, / Введение Твое во храм празднующе, / и возведение святителя Тихона Патриархом Российским / в сей же день благодарно воспоминающе, / усердно взывают Ти: / О Владычице Державная, / молитвами святителя Тихона / Церковь и землю Российскую / от всех наветов вражиих спаси / и вся верныя в чертоги небесныя введи.
Кондак, глас 2:
Тихостию нрава украшен, / кротость и милосердие кающимся являяй, / во исповедании православныя веры и любве ко Господу / тверд и непреклонен пребыл еси, / святителю Христов Тихоне. / Молися о нас, да не разлучимся от любве Божия, / яже о Христе Иисусе, Господе нашем.
Песнь 7
Ирмос: Росодательну убо пещь / содела Ангел / преподобным отроком, / халдеи же опаляющее / веление Божие, / мучителя увеща вопити: / благословен еси, Боже отец наших.
Плач, стенание и горе великое, / грядущия на Церковь Российскую предзрел еси, Первосвятителю, / обаче Христовою любовию укрепляем, / мужественно взывал еси: / благословен еси, Боже отец наших.
В лютую годину / первосвятительский жезл со страхом и трепетом прияв, блаженне, / Церковь Российскую яко корабль нерукотворный добре управил еси, / верныя же научил еси взывати: / благословен еси, Боже отец наших.
Пророку древнему Илии, / взыскующу не преклоньших колена пред Ваалом, / подражал еси первосвятителю, / да взыщеши, / яже не преклониша выю ловительству безбожных, / таже и падших из глубины греховныя воздвигнеши, / и верныя научиши в скорбных обстояниих / взывати Господу: / благословен еси, Боже отец наших.
Богородичен:
Помощницу надежную имамы Тя, Богородице, / многажды бо в скорбных обстояниих / предстательство о людех российских / пред Сыном Твоим являла еси.
Песнь 8
Ирмос: Из пламене преподобным росу источил еси / и праведного жертву водою попалил еси: / вся бо твориши, Христе, токмо еже хотети, / Тя превозносим во вся веки.
Во образ твоего усерднаго подражания / служению первосвятителей Московских, / в священныя одежды тех достойно облачен был еси, блаженне, / темже с ними о нас молися, да и мы достойны будем превозносити Господа во вся веки.
Жезл Первосвятителя Петра / со дерзновением приял еси, блаженне, / да образ власти предстоятеля в Церкви Российстей воставиши. / Мы же ведяще сицевую милость Божию к нам, / Господа превозносим во вся веки.
Грехом нашим умножившимся, / попусти Господь братоубийству / и междоусобным бранем в земли Российстей быти. /Ты же, святителю, / людей враждующих к покаянию и примирению призывал еси, / научая превозносити Христа во веки.
Богородичен:
В дому Твоем, Пречистая Дево, / храме Успения Твоего, / поставление блаженнаго Тихона в Первосвятителя Российскаго свершися. / Темже молитвы того, / яко вернаго избранника служителя Твоего, / к Богу вознеси и спаси души наша.
Песнь 9
Ирмос: Бога человеком невозможно видети / на Негоже не смеют чини Ангельстии взирати, / Тобою же, Всечистая, явися человеком / Слово Воплощенно, / Егоже величающе, / с небесными вои Тя ублажаем.
Плачем и рыданием / земля Российская огласися, / кровь святых мученик и исповедник Христовых потоки по ней излияся, / храмы Божий осквернишася и попранию предашася. / Увы мне, Земле моя! / — взывал еси, святителю, / кое врачевание прилежит ти, / да всех сих избавишися.
Увы мне, людие российстии! — взывал еси, блаженне. / Господа забыхом, / в делех наших осуетихомся, / попечение же о души николиже имехом. / Ей, глаголю вам, / благоволения Божия не обрящем, / аще души наша слезами покаяния пред Господом не потщимся очистити.
В темнице томящуся ти, святителю, / о Церкве премного болезновал еси, / иерарси бо и священницы нецыи / на стезю Иуды предателя ступивше / и неправедно власть в Церкви восхитивше, / злохудожная деяния своя, яко обновления благая нарекоша; / и сим паству Российскую в смятение приведоша / и в нестроениих церковных тяжце повинни быша.
Ни скорбь, ни теснота, ни гонение, / ни глад, ни нагота, / ниже беда, ни меч не возмогут разлучити верных чад Христовых от любве Его / — апостольски рекл еси, святителю.
Богородичен:
Кия похвалы возгласим Ти, Пречистая. / Киими словесы / величие Твое восславим, / яко Спаса родила еси душ наших.
Светилен, глас 1:
Первосвятителя Российскаго Тихона днесь прославим, / память его благочестно почитающе, / той бо, яко светильник пресветлый, просиял есть / и образом пресветлаго жития своего / ревностному служению Богу люди научает.
Слава, и ныне, Богородичен:
Радуйся, Богородице Дево, / Владычице Державная, / Светодавца Христа миру Рождшая; / радуйся, похвало всея вселенныя; / радуйся, Пречистая Мати Божия Благословенная.
На хвалитех стихиры, глас 4:
Вере в людех оскудевшей, / любви истощившейся, / надежди иссякнувшей, / попусти Господь / мор жесток, болезнь и глад на люди отечества нашего. / Ты же, святителю, / святыни Божия от поругания неверных защищая, / о страждущих болезновал еси / и к милосердию и жертве посильней / от щедрот своих для оных / всероссийскую паству призывал еси.
Словеса премудра / о еже не леты, но деяньми благими / полнота жития человеческаго пред Богом измеряется, / на тебе исполнишася святителю. / Темже душу добродетельми обогащену имея, / в Небесныя обители вселился еси, / идеже молишися о нас присно.
Внимайте убо себе, / людии российстии! / Пробави бо Господь ныне милость Свою нам: / потоки крови мученик иссякоша, / пленения от власти безбожных свободихомся, / попраннныя храмы Божий восставляются / — бежим всемерно приражения греховнаго, / да не паки гнев Божий наведем на ся, / и не будет нам последняя горша первыя.
Слава, глас 8:
Кровми святых мученик / Церковь Христова древле утвердися, / такожде и во дни твоя, святителю Тихоне, / во отечестве нашем яко потоцы водныя, / кровь святых мученик пролияся, / обаче смотрением Божиим / сия семенем явися, / из негоже прозябе благосеннолиственное древо Руси Православныя.
И ныне, Богородичен:
Пречистая Дево Мати, / благоволила еси святителю Тихону в день благовестия Ти Архангела Гавриила / поприще земнаго пути его скончати / и яко избранника Твоего в небесных чертозех вселити. / Темже, о Богомати, / молитвы святителя Тихона / о страждущей стране Российстей и людех ея / к Сыну Твоему и Богу вознеси / и спаси души наша.
Славословие великое и отпуст.
НА ЛИТУРГИИ
служба святительская
Тропарь святителю Тихону, патриарху Московскому и всея Руси
Тропарь, глас 3:
В годину тяжкую Богом избранный в совершенной святости и любви Бога прославил еси, во смирении величие, в простоте и кротости силу Божию являя, положил душу за Церковь, за люди своя, исповедниче патриарше святе Тихоне, моли Христа Бога, Емуже сораспялся еси, и ныне спасти землю Русскую и паству Твою.
Тропарь, глас 1 (Прославление):
Апостольских преданий ревнителя и Христовы Церкве пастыря добраго, душу свою за овцы положившаго, жребием Божиим избраннаго Всероссийскаго патриарха Тихона восхвалим и к нему с верою и упованием возопиим: предстательством святительским ко Господу Церковь Русскую в тишине соблюди, расточенная чада ея во едино стадо собери, отступившия от правыя веры к покаянию обрати, страну нашу от междоусобныя брани сохрани и мир Божий людем испроси.
Кондак, глас 2:
Тихостию нрава украшен, кротость и милосердие кающимся являяй, во исповедании православныя веры и любве ко Господ тверд и непреклонен пребыл еси, святителю Христов Тихоне. Молися о нас, да не разлучимся от любве Божия, яже о Христе Иисусе, Господе нашем.
Молитва святителю Тихону, патриарху Московскому и Всея России
О пастырю наш добрый, святый великий патриарше Тихоне, яко град горний ты явился еси, добрая дела твоя и доныне светятся пред человеки. Вемы, яко ты, предстоя Престолу Пресвятыя Троицы, велие имаши дерзновение в молитвах пред Господем. Воззри и ныне на нас грешных и недостойных чад твоих, к тебе бо яко имущему велие дерзновение пред Творцем всяческих, ныне припадаем и усердно молимся: умоли Господа, да подаст нам решимость стяжати благочестие отцев наших, егоже ты стяжал еси от юности твоея. Ты в житии своем ревностный защититель и хранитель истинныя веры был еси, помози и нам незыблему соблюсти веру православную. Тихая бо душа твоя зело преуспела в Божественном смиренномудрии, научи и нас разум наш питати не многомятежною мудростию человеческою, но смиренным познанием воли Божией. Ты пред лицем лютых врагов Христовых истиннаго Бога дерзновенно исповедал еси, молитвою своею укрепи нас, малодушных, да и мы всегда и всюду противостанем духу безбожия и льсти. Ей, угодниче Божий, не презри нас, молящихся тебе, ибо не токмо от бед и скорбей избавление просим, но силы и твердости, великодушия и любве просим, дабы переносити оныя напасти, возстающия на ны. Испроси нам неослабное терпение даже до конца жития нашего, мир с Господом и грехов отпущение. Отче святый! Укроти в стране нашей ветры неверия и смуты, да водворит Господь на земли Российстей тишину и благочестие и любовь нелицемерную. Молитвами твоими да сохранит ю от междоусобныя брани, да укрепит святую Церковь нашу Православную, да не оскудеет она истинными пастырями, добрыми делатели, право правящими слово евангельской истины. Упаси и заблуждшия овцы стада Христова. Наипаче же моли Господа сил, да возродится Русская земля святым покаянием и единым сердцем и едиными усты прославит дивнаго во святых Своих Бога в Троице славимаго Отца и Сына и Святаго Духа во веки веков. Аминь.
АКАФИСТ святителю Тихону, патриарху Московскому и Всея России
Кондак 1
Избранный архиерею, предивный угодниче и исповедниче Христов, Русския Церкве крепкое ограждение, отечеству нашему ходатаю и заступниче, прославляюще прославльшаго тя Господа, даровавшаго нам в тебе новаго и великаго предстателя, похвальное пение восписуем ти; ты же имеяй велие дерзновение ко Владыце Небесе и земли, от всяких нас бед свободи зовущих:
Радуйся, святителю Тихоне, Церкве Православныя похвало и утверждение.
Икос 1
Ангелов Творец и Господь в буреносныя дни мятежа и нестроения велия, восхотев людем страждущим утешение даровати, яви тя, патриарше претихий и предобрый, яко светило светозарное, светом Трисияннаго Божества озаряющее души верных, да и ны не грядут по тебе вси желающии со Христом быти, сего ради во умилении вопием ти:
Радуйся, от жребия патриаршества аки от монашескаго послушания не уклонивыйся;
Pадуйся, ревностному исполнению Божественных хотений научивыйся.
Радуйся, на престол патриарший, двесте лет пустовавый, в день Введения во храм Пресвятыя Богородицы возшедый;
Pадуйся, в день Благовещения со престола первосвятительскаго ко Престолу Пресвятыя Троицы прешедый.
Радуйся, первосвятительством и исповедничеством украшенный;
Pадуйся, для Бога живший и Богом просветленный.
Радуйся, яко подвигом своим патриаршество непреложно утвердивый;
Pадуйся, образ пастыря добраго собою явивый.
Радуйся, Донския обители сугубое прославление;
Pадуйся, Православныя Церкве во Америце утверждение.
Радуйся, российския паствы боговидное наследие;
Pадуйся, богоначертанный свиток правыя веры.
Радуйся, святителю Тихоне, Церкве Православныя похвало и утверждение.
Кондак 2
Видя люди российстии о попрании святынь православных зело скорбящия и страхом объятыя, упованием полагал еси верным живот вечный, а не смерть имети; темже светом богоразумия твоего, Тихоне благосердне, и нас озари, да купно с тобою вопием Творцу всяческих: Аллилуиа.
Икос 2
Разум богопросвещен имея, богомудре Тихоне, отвергл еси всяческое плоти мудрование, с разумом же и волю повинул еси Господеви, темже сосуд чист и селение Духа Истины явился еси. Сего ради яко богомудраго наставника тя ублажающе, воспеваем:
Радуйся, с юношеских лет Патриарх прозванный;
Pадуйся, делателю винограда Христова избранный.
Радуйся, яко благостынным святительством утверждению Православия во Америце споспешествовал еси;
Pадуйся, яко всегда к высоте добродетелей пасомых тобою вел еси.
Радуйся, стадо тебе от Христа врученное во спасение наставивый;
Pадуйся, и сам вседушно Царствия Горняго вожделевый.
Радуйся, премудрости Божией созерцателю и проповедниче;
Pадуйся, разума Апостольския Церкве хранителю.
Радуйся, златоустый благовестниче православныя правды;
Pадуйся, небоязненный обличителю суемудрия и неправды.
Радуйся, праведности дивное благоухание;
Pадуйся, не посрамляяй нашего упования.
Радуйся, святителю Тихоне, Церкве Православныя похвало и утверждение.
Кондак 3
Сила Вышняго яве показа тя, священнопроповедниче Тихоне, в трудех крестоношения суща, егда всеоружием Божия благодати козни тьмочисленных враг православныя веры разрушал еси, Богу поя победительно: Аллилуиа.
Икос 3
Имея веру несумненну и помысл чист, вся красная мира сего презрел еси, Тихоне богоблаженне, и в чине святительстем Господеви неленостно послужил еси. Темже благостию украшенный и ведением свыше озаренный, аки звезда путеводная светиши всем, вопиющим тебе:
Радуйся, единаго Христа всем сердцем возлюбивый;
Pадуйся, дарованный талант приумноживый.
Радуйся, яко угождал еси Богу всяческим благоугождением;
Pадуйся, вооруженный мудростию, кротостию и смирением.
Радуйся, правды и истины прежде всего искавый;
Pадуйся, истину дерзновенно вещавый.
Радуйся, заточение правды ради небоязненно претерпевый;
Pадуйся, смиренномудрием вознесенный.
Радуйся, вечную мзду добродетельми стяжавый;
Pадуйся, яко оными и противляющихся воле Божией удивлявый.
Радуйся, о утверждении паствы твоея присный ходатаю;
Pадуйся, теплый к Богу о нас предстателю.
Радуйся, святителю Тихоне, Церкве Православныя похвало и утверждение.
Кондак 4
Бурю внутрь имея помышлений суетных не возможем, Тихоне всемудре, величие исповедничества твоего проповедати, обаче твоими молитвами у Престола Всевышняго в правоверии и благочестии укрепляеми, воспеваем Ему: Аллилуиа.
Икос 4
Слышавше людие о благоплодных добротах души твоея, богоносне Тихоне, желанием вожделеша тя видети на престоле первосвятительстем, абие свыше свидетельствован был еси яко сосуд Божественнаго изволения. Темже дивящеся чудному Божию промышлению, приносим ти благохваления сицевая:
Радуйся, Первосвятителю, от Самаго Господа проначертанный;
Pадуйся, мужу желаний, пасти стадо Христово избранный.
Радуйся, Пастыреначальника Иисуса Христа благоволение;
Pадуйся, незыблемости вечных христианских истин подтверждение.
Радуйся, апостолом сопричастниче;
Pадуйся, великим святителем сопрестольниче.
Радуйся, яко первопрестольником богомудрым равночестен явился еси;
Pадуйся, яко преемником твоим верный путеводитель ко спасению соделался еси.
Радуйся, духови повинувый плотская мудрования;
Pадуйся, спасительнаго Православия немолчное назидание.
Радуйся, чудес приснотекущий источниче;
Pадуйся, молитвенниче народный, старче и любимче всея Руси.
Радуйся, святителю Тихоне, Церкве Православныя похвало и утверждение.
Кондак 5
Боготечную звезду яви тя Господь, досточудне отче наш Тихоне; зане паству твою добре осиял еси светом Православия, правы стези указуя к Царствию Христову и научая присно взывати к Богу: Аллилуиа.
Икос 5
Внегда поставлен был еси на свещнице служения первосвятительскаго, всемудре Тихоне, потщался вседушно Богу благоугодити и не вотще потрудился еси, просвещая омраченныя страстьми. Мы же, ведяще тя архипастыря богомудра и строителя дому Божия верна и предобра, похвальная возсылаем ти:
Радуйся, у кормила правления церковнаго твердо стоявый;
Pадуйся, свет Христов верным возсиявый.
Радуйся, нужды духовно окрадуемых предваряяй;
Pадуйся, в попечении о Церкви на всяк день умирание подъемляяй.
Радуйся, душетленному зверю стадо твое расхищати не попустивый;
Pадуйся, Церковь в гонениих сущую верную Христу сохранивый.
Радуйся, яко тобою миродержца избавляемся;
Pадуйся, яко тобою ревности по Бозе исполняемся.
Радуйся, яко красен явился еси богословием и благими деяньми;
Pадуйся, яко мерзкаго неистовства потребил еси мудрование.
Радуйся, яко пресекл еси прелести гноение;
Pадуйся, народу православному похваление.
Радуйся, святителю Тихоне, Церкве Православныя похвало и утверждение.
Кондак 6
Проповедник благочестия воистинну явился еси, делателю непостыдный и право правящий слово истины, священноначальниче Тихоне, яко добрый воин Христов ограждая паству твою в годину смертных искушений и подвизая взывати истинному Богу: Аллилуиа.
Икос 6
Возсиял еси в первопрестольной яко звезда лучезарная, блистанием учений твоих и исповедничества озаряя души верных и разгоняя тьму нечестия. И ныне плоды сеяния твоего насыщаеши вся, яже со удивлением и любовию взывают к тебе:
Радуйся, на престол первосвятительский Промыслом Божиим возшедый;
Pадуйся, крестный путь с паствою своею прошедый.
Радуйся, яко жезлом благоволения стадо Христово пасл еси;
Pадуйся, яко овец заблуждших и обреченных на заклание не оставил еси.
Радуйся, потерянную овцу отыскавый, угнанную возвративый;
Pадуйся, пораженную перевязавый, больную укрепивый.
Радуйся, разжиревшее и буйное овча истребивый;
Pадуйся, богомерзких ересей востание отразивый.
Радуйся, от распрей церковных много скорбевый;
Pадуйся, неправедное лишение сана и монашескаго звания претерпевый.
Радуйся, яко для народа русскаго его драгоценное Сокровище Церковь и святое Православие сохранивый;
Pадуйся, яко твоими труды и ныне живем и движими есмы.
Радуйся, святителю Тихоне, Церкве Православныя похвало и утверждение.
Кондак 7
Желая невозбранно пастырем добрым быти, емуже суть овцы своя, потщался еси, богоносне Тихоне, на пользу душ стада твоего всем вся быти, да вси взыщут Единаго Бога. Мы же, уповая достигнути спасения преславным ходатайством твоим, со дерзновением воспеваем: Аллилуиа.
Икос 7
Новаго и дивнаго попечителя Церкве Российския вемы тя, святителю Тихоне, понеже во исповедании твоем не устрашился еси человеческих прещений, и святоотеческия заветы соблюл еси. Сего ради и крепость духовную подаде ти Подвигоположник Христос; мы же недостойнии возносим ти сицевая:
Радуйся, самоотвержение всецелое показавый;
Pадуйся, спасения многих взыскавый.
Радуйся, яко волков хищных от паствы твоея отгнал еси;
Pадуйся, яко коварство их мудро распознал еси.
Радуйся, над всеми кознями сатанинскими восторжествовавый;
Pадуйся, всеоружие благочестия подъявый.
Радуйся, Промысла Божия о людех провозвестниче;
Pадуйся, дивное нравов очистилище.
Радуйся, сокровищ православныя веры усердный хранителю;
Pадуйся, Божия благоволения к людем исполнителю.
Радуйся, таинниче Божий, еще на земли небесных благ вкусивый;
Pадуйся, святость души твоея житием явивый.
Радуйся, святителю Тихоне, Церкве Православныя похвало и утверждение.
Кондак 8
Странное и преславное чудо есть маловерным и малодушным зрети, богоявленне Тихоне, како в лютых гонениих престол первосвятительский имея, священную жизнь стяжавая, православную утвердил еси веру и премудростию твоею и словес благодатию научил еси стадо твое богоугодно воспевати: Аллилуиа.
Икос 8
Весь исполнь любве Христовы, Тихоне благосерде, паству свою не оставил еси: яко Ангел хранитель чадом своим пребываеши, молитвы Всевышнему о них возсылая: сего ради усердно чтем светлую память твою, благодарственное хваление воспевая ти:
Радуйся, обилием любве твоея мир удививый;
Pадуйся, в чине властителя кротость и мягкость явивый.
Радуйся, славу предобраго и преблагаго владыки снискавый;
Pадуйся, свет Царства Небеснаго на земли показавый.
Радуйся, апостольских преданий ревнителю;
Pадуйся, церковных канонов премудрый насадителю.
Радуйся, в святительстем служении своем труд и подвиг, а не славу и почет прозреваяй;
Pадуйся, истинно правоверныя повеления подаваяй.
Радуйся, яко Божественнаго священства правило был еси;
Pадуйся, яко великое воздаяние первосвятительства приял еси.
Радуйся, каменю драгий, землю Русскую всю украшаяй;
Pадуйся, на славословие Божие нас немощных созываяй.
Радуйся, святителю Тихоне, Церкве Православныя похвало и утверждение.
Кондак 9
Подвигом добрым подвизался еси, всечестне Тихоне, непреткновенно течение лет совершил еси: благостынною и боголюбезною душею твоею к вечному животу преселился еси, идеже с чинми небесными и собором святых купно поеши Богу победную песнь: Аллилуиа.
Икос 9
Ветия многовещанныя не возмогут по достоянию изрещи пречуднаго прославления памяти твоея, богогласе Тихоне; мы же к покаянию тобою подвигаеми и благосердию твоему подражати хотяще, песньми похвальными тя ублажаем сице:
Радуйся, добрый твоего стада наставниче и правителю;
Pадуйся, колеблющихся в вере твердый оградителю.
Радуйся, свирепство имущих власть небоязненно претерпевый;
Pадуйся, кесарю токмо кесарево воздавый.
Радуйся, славу Царя царствующих и Господа господствующих мужественно воинствовавый;
Pадуйся, спасительная предания нам предавый.
Радуйся, яко тобою святое Православие ревностно охраняется;
Pадуйся, яко тобою всякий порыв к небесному благословляется.
Радуйся, во мраце нечестия правую веру утверждаяй;
Pадуйся, гнев Божий на милость к нам грешным прелагаяй.
Радуйся, великими московскими святители вспомоществуемый;
Pадуйся, покровом Пречистая Богородицы осеняемый.
Радуйся, святителю Тихоне, Церкве Православныя похвало и утверждение.
Кондак 10
Спасти хотя Церковь Русскую, преславне отче наш Тихоне, скверная учения беззаконных анафематствовал еси, богоборцем противяся тако; да убоялися тя яко втораго Ермогена. Мы же почитающе всечестную память страданий твоих вопием прославльшему тя Богу: Аллилуиа.
Икос 10
Забрало незыблемо и благонадежно Церкве явился еси, показуя собою мужественнаго борения образ и утверждая делы и словесы крепко стояти за правую веру, священноглагольниче Тихоне. И ныне светом твоим тьма отгоняется и обнажается плетение лукаваго совета, Божественныя твоея мудрости сияньми, да вси вопием ти сице:
Радуйся, яко обретатели злочестивых ересей посрамлены показал еси;
Pадуйся, яко нрав дерзкаго безбожия всенародно обличал еси.
Радуйся, новомучеников российских и сущих в гонениих за Церковь удобрение;
Pадуйся, яко и сам принимал еси за Христа заточение.
Радуйся, вольным Христовым страданием подражавый;
Pадуйся, страдания за Христа и Церковь Его радостию почитавый.
Радуйся, страданием исповедание совершивый;
Pадуйся, на Бога Промыслителя все упование возложивый.
Радуйся, яко обличаеши прелести сокровения;
Pадуйся, яко ужасаеши нечестивых помышления.
Радуйся, правую веру чрез многи подвиги непреложно утвердивый;
Pадуйся, благочестивую отрасль труды твоими возрастивый.
Радуйся, святителю Тихоне, Церкве Православныя похвало и утверждение.
Кондак 11
Пение умиленное приносим ти, таинниче Христов, сияеши бо ныне на Небеси благолепия венцем украшен: яко верен святитель правдою одеялся еси и в раи сладости ликуеши; о песнословящих тя Отца Небеснаго прилежно моли, вопиющих Ему: Аллилуиа.
Икос 11
Всемирнаго светильника яви тя Христос, богодухновенне отче наш Тихоне: ведый сердца твоего смирение, на престоле святительстем тя посади. Ты же благовония жертв всего себе Ему принося, иерей был еси и жертва; сего ради немолчными гласы глаголем ти:
Радуйся, светлостию жития возсиявый;
Pадуйся, живот нестареющийся достойно приявый.
Радуйся, истины державный поборниче;
Pадуйся, покаяния рачительный проповедниче.
Радуйся, лжеучителей лукавство разоривый;
Pадуйся, маловерных в православной вере утвердивый.
Радуйся, за веру православную и благочестие российское заточение от безбожных приявый;
Pадуйся, мучение за Христа благодушно претерпевый.
Радуйся, яко силою Божией в подвиге непобедим явился еси;
Pадуйся, яко храм всечестен Богу был еси.
Радуйся, паствы твоея изрядный душепопечителю;
Pадуйся, на помощь тя призывающим скорый пособителю.
Радуйся, святителю Тихоне, Церкве Православныя похвало и утверждение.
Кондак 12
Благодать восхотев восприяти от Щедродателя Владыки всех и Господа, прежде конца явился еси, всехвальне отче Тихоне, мертвенностию жизненосною ко греху одеян, Христа чтити научая богоприятне. Той же дарованием чудес обогати тя, освяти и прослави на Небеси и на земли, научая о тебе воспевати: Аллилуиа.
Икос 12
Поюще венец исповедничества, приемый тобою, Тихоне досточудне, недоумеем, како воистинну наречем тя, ибо тобою в Троице славимый Бог наш славно прославися. Сего ради приносим ти похваления сицевая:
Радуйся, труд крестоношения богоугодно подъявый;
Pадуйся, токмо благоволения Божия искавый.
Радуйся, сосуде, Духа Святаго исполненный;
Pадуйся, дарами Духа Владычня обогащенный.
Радуйся, вечное приемый от Бога благословение;
Pадуйся, людем твоим испросивый Божие благоволение.
Радуйся, многоцелебныя мощи твоя во огни явивый;
Pадуйся, сими храм от огня сохранивый.
Радуйся, славы Божия велий ревнителю;
Pадуйся, молитв наших скорый исполнителю.
Радуйся, паствы твоея присное радование;
Pадуйся, во всем житии твоем Православия путевождю.
Радуйся, святителю Тихоне, Церкве Православныя похвало и утверждение.
Кондак 13
О пастырю наш предобрый, святый патриарше Тихоне, приими сие малое тебе хваление и моли венчавшаго тя славою Господа Сил, да возродит Россию во Христе; да дарует мир жительству нашему и Церкве святей Своей, ограждая ю от всех душепагубных и безбожных веяний; да обратит в любовь к Себе и ближнему сердца всех человек; да дарует познати Себе Духом Святым Своим велию множеству соотечественников наших, вере ненаученных и от веры отвращенных; да сподобимся ныне и присно и во веки веков единем сердцем и единеми усты воспевати Ему: Аллилуиа.
Этот кондак читается трижды, затем икос 1-й и кондак 1-й
