Гимнография прмч. Никона Беляева

Гимнография: 
[Служба]  [Великое бдение]  [Бдение]  [Полиелей]  [Славословие]  [«на 6»]  [«на 4»]  [Тропарь]  [Кондак]  [Молитва]  [Канон]  [Акафист]
Даты: 
Иконы: 
Бдение (с литией): 

 

Служба преподобному Никону Оптинскому, исповеднику

На вечерне

Стихиры на “Господи воззвах”, глас 4

Приидите возрадуемся Господеви/ воскликнем Богу Спасителю нашему:/ яко удивил еси Господи милость Твою на нас/ и воздвигл еси в дому отцев наших мужа богопросвещеннаго/ оптинскаго старчества благодатнаго приемника/ новомучеников Российских восходящую звезду/ иноков хваление и исповедников красоту/ Никона преподобнейшего отца/ Церкви Русской незыблемое утверждение.

О, коль красны нози твои!/ О, коль сладостны уста твоя;/ во изгнание текшия благовествующе Спаса Христа/ попирающе главу змиеву/ и и безбожныя затыкающе уста/ яко вторицею глас Предтечев рек –/ се Агнец Божий – / Иже спасет Россию от годины лютыя/ Нань же надеющеся победим враги/ Десницею Высокую.

Столп благочестия/ монашествующих правило известное/ молитвы огненное светило сущим во тьме/ мужества твердое забрало/ старца Варсанофия избранное чадо/ исповедников Русских высокая похвала/ Никоне отче всечестне/ твое стадо соблюди неврежденно от сетей вражиих/ и псы безбожныя прогони/ божественными предстательствы твоими.

Слава, глас 1

Монашествующих кроткое утешение/ веры непоколибимое утверждение/ неустрашимаго борителя противу духов тьмы/ страстей искоренителя и безмезднаго врача/ в разсуждении искуснаго и блюстителя чистоты/ вернии вси стяжахом Никона приснопамятнаго/ оптинских преданий некрадомое сокровище/ лампаду неугасимую у Престола Божия/ благовонное кадило прилежнаго моления/ иже благоуветливым явлеет к нам Лице Праведнаго Судии/ и прошения восполняет/ имже и умиротворяются концы Русския земли/ и утешение сладостное приемлют сердца сокрушенные.

И ныне, глас 8

Виждь Елисавет, к Деве Марии глаголющу:/ что пришла еси ко мне Мати Господа моего?/ Ты Царя носиши, и аз воина,/ Ты Законадавца, и аз законоположителя,/ Ты Слово, и аз глас,/ проповедающ Царство Небесное.

Стихиры на стиховне, глас 2

Светильник благочестия возсия днесь концем/ озаряя всю подсолнечную/ землю Русскую облистая исповеданием святым/ светоносное утро являя веры православныя/ мрачную разсеявающе безбожную нощь/ и страстей вещи попаляющий/ Никон добропобедный исповедник// Христа присно величающий.

Свет возия праведнику/ и правым сердцем веселие

Щитом веры вооружся/ богопротивных множество враг победил еси/ песнь во устех нося богокраснаго исповедания/ еюже утверждаются монашествующих полки/ и злочестивыя посрамляются/ и хвалится пустынь Оптинская / и Церковь Русская красуется/ Никоне преподобне// Христа величающе.

Честна пред Господем/ смерть преподобных Его

Ныне днесь светлаго торжества/ Никон к Богу преселяется/ небеса радостию ширятся/ душу приемлюще всесвятую/ старцы Оптинстии соборно ликуют в Раю/ на земли мощи своя во обретение уготовляют/ Тако бо изволися Духу Святому/ еже первии последнии будут/ и последнии первии// Христа вкупе прославляюще.

Слава, глас 6

Вертоградарю старчества Оптинскаго/ и обители страже неусыпный/ садоделателю искусный явился еси отче Никоне/ егда прииде зной лютаго безбожия/ Словом животворным обильно еси я орошал/ тайнами божественными питая чад твоих/ но яростию гонений затворенни быша храмы оптинстии/ ты же бескровную жертву последнюю совершив/ во изгнание потекл еси яко на голгофу/ и ключем послушания дверь небесную отворив/ идеже во обители своя прияша тя старцы Оптинскии/ с нимиже молися Христу/ и нам во обители райстей водворитися/ яко послушницы есьмы ваших велений.

И ныне, глас тойже

Елисавет зачат Предтечу благодати,/ Дева же Господа славы/ целовастеся обе матери/ и младенец взыграся:/ внутрь бо раб хваляше Владыку./ Удивившися же, мати Предтечева начат вопити:/ откуда мне се/ да Мати Господа Моего прииде ко мне?/ Да спасет люди отчаянныя// Имеяй велию милость.

Тропари

Предтечи, глас 4

Пророче и Предтече пришествия Христова...

Слава, тропарь преподобному, глас тойже

Духовному твоему наставнику отче Никоне всячески прилепився/ и от него почерпл еси мудрость старческую/ во всем Христови поработився/ и иповедническим житием Того прославив/ монахом образ был еси/ и старцев Оптинских сожитель// с нимиже Христа Бога моли непрестанно о всех нас.

И ныне, Богородичен, глас тойже

Еже от века утаенное...

На утрени

По 1-м стихословии седален, глас 8

Распяв постнически плоть всеславне, первее, и еретическия потщался еси заградити безбожныя уста, и молитвами победил еси демонския полчища мужественне, темже венцем вышняго звания венчался еси Никоне преподобне, моли Христа Бога спастися душам нашим.

Слава, и ныне

Егоже сходи искони дней вечных, Сего воплощаема во утробе Девической видела еси,егда Матери Господа Своего нарекла еси Деву, целовавшую тя, с Неюже молися праведная Елисавето, да спасет души наша.

По 2-м стихословии седален, глас 8

Веры явился еси поборник победоносный, и отеческих преданий блюститель быв, непреклонен явился еси на ласкательства мучителей богоборных, и исповеданием правым, паству твою утвердив, сего ради яко каменя тя Церкви прославляем Никоне всечестне, моли Каменя веры Христа Церковь Русскую в православии утвердити и спасти души наша.

Слава, и ныне

Закона исполнение Тя, Отроковице, главизну всего пророчествия Захариезря, познавше вопия: благословен, Пречистая, плод Твоего чрева, яко посети и сотвори избавление людем своим, и дарова нам велию милость.

По полиелее седален, глас 8

Воспитан был еси старцами Оптинскими, и Божественным Духом просвещен, дерзновенный проповедник явился еси православнаго предания, и монашествующих кроткий наставник и пастве твоей добрый пастырь быв, и мучителя посрамил еси беззаконнующа, темже на изгнание неправедное осужден был еси, Никоне преподобне, Христа Бога моли, грехов оставление подати, чтущим любовию святую память твою.

Слава, и ныне

Богородицу Тя исповедуем Владычице, Сыном Твоим рождшимся от Тебе, спасшиеся грешнии раби, Бога бо непостижимо родила еси, Кровию Своею очищающаго нас от всякаго греха, и в райское веселие приводящаго, Егоже с Тобою восхваляем, веселящеся.

Стихира по 50-м псалме, глас 6

Возсия днесь светоносная память твоя отче преподобне/ озаряюща землю Русскую/ тьму безбожия потребляюще/ и утверждающе церковныя столпы/ сердца верных просвещающа светлостию словес твоих/ и еретичествующих лица помрачающа/ яко сугубую благодать унаследовав старцев твоих/ ихже и житию поревновав/ доблемудрый исповедник Оптинский явися/ Никоне богоблаженне// моли о душах наших.

Канон преподобнаго глас 8, егоже краегранесие:

Яко благославную свирель тя, Никоне, воспою

Песнь 1

Ирмос: Поим Богу от горькия работы фараоновы избавльшему Израиля и огненным столпом и светлым облаком наставльшему яко прославися.

Преподобне отче Никоне, моли Бога о нас

Явися красота церковная, память исповедника оптинскаго облиста концем, Христова благодать торжествует песненно, православным украшаяся исповеданием того.

К поприщу приступив неослабным умом, преподобне, неподдатлив явився на прилоги демонския, на страсти добльствовав и низложив, яко победы тезоименит, Никоне.

Оптинская слава, старчества печать, образ монашествующим и постником правило, в песнех да восхвалится днесь, Никон преподобный, о душах наших теплый молитвенник.

Богородичен: Без семени зачала еси, безболезненно роди, млеком воздоила еси Слово воплощенное, Мариам Боголепная Девице; Твоя певцы от бед спасай, присно.

Песнь 3

Иромос: Утвердися сердце мое во Господе, вознесеся рог мой в Бозе моем, расширишася на враги моя уста моя, возвеселихся о спасении Твоем.

Лучезарная память Никона преподобнаго приспе, рождество препровождающе Предтечево, и светится обоюду и провозвещает концем, Христово домостроительство всеспасительное.

Ангел оптинский тя наречем, и труба исповедания благознаменитая, и монашествующих предводителю и низложитель бесов, богопроповедниче Никоне всечестне.

Горнее мудрование возлюбив, страстей и помыслов триволнения уклонился еси, в скиту Оптинском безмолвно возобитал еси, славне, отонудуже и почерпл еси, тайны неизреченныя веры.

Богородичен: Огнь Божественный во утробе прияла есть; и не опалися но паче украсися естество человеческое, темже Тя Богорадованная, яко одушевленный Божий престол поем; иже на Херувимех почивающего.

Седален, глас 8

Победив постническими борениями злокозненнаго, и безбожныя уста исповеданием правым заградив, старчества Оптинскаго был еси столп светозарнейший и новомучеников Российских благовонный цвет; с нимиже предстоя престолу Царя славы Христа, молися о чтущих тя, Никоне преподобне, и любовию зовущих: радуйся отче, яко победы тезоименит.

Слава Предтече, глас 8

Захариин плод, неплодныя цвет родися днесь...

И ныне, Богородичен

Обновила еси Чистая Божественным Рождеством Твоим, истлевшее во страстех земнородных мертвенное существо, и воздвигла еси вся от смерти к животу нетления. Темже Тя по долгу блажим вси Дево Пренепорочная, якоже прорекла еси.

Песнь 4

Ирмос: Твое вочеловечение, еже прежде век предопределил еси, в последняя благоволил еси совершити, Господи, услышах и страхом воспевах.

Светоч веры явился еси православныя, Никоне священне, в нощи безбожия присно светяй, зарю бо Духа всю в сердце приим, и возблистал еси светолучными проповеданьми.

Любви отеческой исполненный сый, павству твою грееши яко доилица, и посещаеши всегда, и храниши я от лютых враг.

Апостольски ревнуя преподобне, волки мысленныя гониши от стада твоего, и безбожныя уста заграждаеши, и хлебы боговедения питаеши присных чад.

Богородичен: Вседетельный Дух найде на Ея Всенепорочная, и Слово Божие в Тя вселися, и плоть бысть несказанно, пребыв неизменен.

Песнь 5

Ирмос: Вскую мя отринул еси, от лица Твоего, Свете Незаходимый и покрыла мя есть чуждая тьма, окаяннаго, но обрати мя к свету заповедей Твоих, пути моя направи, молюся.

Никона вси похвалим песненно, Оптинскаго старчества светлый венец; яко послушания рачителя, и яко постников похвалу, яко орган сладкогласный, сердца верных веселящий.

Учениче благопослушный явился еси Никоне, Варсанофия старца твоего всю мудрость сердцем приим, и яко финикс процвел еси преподобием и правдою, и плоды разсуждения собрал еси.

Юношеские стремления презрел еси преподобне, щитом веры оградився,и мечь молитвы взем, стрелы сокрушил еси стрельца лукаваго, и посекл еси терния страстей.

Богородичен: Солнце Славы с плотию носящи, мысленный явилася еси облак, Богородице, озаряющаго всю тварь светом Божественныя благодати.

Песнь 6

Ирмос: Очисти мя спасе, многа бо беззакония моя, и из глубины зол возведи молюся, к Тебе бо возопих, и услыши мя, Боже спасения моего.

Веры православной утверждения и Церкви нерушимая стена, бысть исповедание твое Никоне всечестне, и монашествующим щит, и пастве твоей ограждение.

Искус послушания прошед, старчества благодать унаследовав, солнце рассуждения явился еси в безбожной нощи, вся наставил еси на стези спасения, и заблудшия овцы во ограду Церкви воротил еси.

Рачением распалився преподобне, темничныя узы в биссер многоценный вменил еси, и бесчестия в похвалу, и злоключения в венец многоплетенный, имиже и почестей небесных достигл еси.

Еже страдати за Христа вожделевый, и душу за овцы положити хотяй, во изгнание, я ко на заклание веден был еси Никоне, идеже и воспел еси славу Христовых страстей.

Богородичен: Лествице Иаковля была еси Дево, Еюже сниде Христос, в плоть оболкийся от кровей твоих Чистая, и в горния взыде, идеже и спосади нас на Всевышний Престол.

Кондак, глас 1

Сердце яко скрижаль богописанну стяжал еси/ ум якоже небо ясное/ резцом послушания красоту монашества изобразив/ и Славу Божию твоим исповеданием возвестив/ Никоне отче преподобне/ Оптиной Пустыни хвала и утверждение/ молися богогласе спастися всем/ благочестно тя почитающим.

Икос

Твоих глаголов вкусивше отче, яко сладкий тя плод послушания дерзаю воспети, но яко дел отнюдь не имея, медью звенящей являюся, и яко воздух биях обретаюся, но обаче на твою помощь надеяся любовию тебе зову: радуйся, исповедников столп крепкий; радуйся, Церкви немолчная уста; радуйся, поток мутнаго безбожия изсушивый; радуйся, яко монашествующих утвердивый; радуйся, послушания светлая стезя; радуйся. добропобедная Оптинская труба; радуйся, молитвы негасимый светильник; радуйся, кадила благовонный фемиам; радуйся, Никоне богогласе, молитвениче о всех благочестно тя почитающих!

Песнь 7

Ирмос: Божия снисхождениея огнь устыдився в Вавилоне иногда. Сего ради отроцы в пещи радованною ногою, яко во цветнице ликующе пояху: благословен еси, Боже отец наших.

Течение совершив неукоризненно, и веру соблюл еси непреложну, нечестивыя обличил еси соборища, Никоне богомудре, и предание отеческое утвердил еси, Бога отцев наших.

Яко благочестия проповедник, гоним Иисуса ради бываеши, и яко благовестник сый, Слово Божие во устех твоих не вяжется, но достигаеши Архангельска и утверждаеши малодушныя, и концы земли Русския просвещаеши.

Новомучеников ты Российских цвете, и старчества Оптинскаго венечник пресветлый, в твоей памяти светло ликующих посети, и от бед избави Никоне преподобне, и страстей треволнения свободи, вопиющих: Боже благословен еси.

Богородичен: Изцели язвы души моея Владычице, и ума исправи движения, к воплем из Тебе воплощегося Слова Бога отцев наших.

Песнь 8

Ирмос: Мусикийским органом согласующим, и людем безчисленным, покланяющимся образу в Деире, три отроцы не повинувшеся, Господа воспеваху, и славословяху во вся веки.

Каплями твоих слез угасил еси угли греховныя, и страданьми твоими утвердил еси люди в вере колеблемыя, и во изгнаниии доблествовав мудре, проповеданием, и по конце точиши исцелений пучину, притекающим к тебе.

Оптинская созвучная свирель был еси, сострадальцам твоим, Никоне, и пастырям, Исаакию мученику славному и старцу Нектарию, и яко единомудренно подвизастеся, в горнем согласно поете Христа во вся веки.

Непоколебимая вера твоя, славы яви тя нестерпимой причастника, темже и враги безплотныя низложил еси, и еретичествующих уста словом истины заградил еси, православя Христа во вся веки.

Елеем Духа помазан быв, сердца умягчил еси безблагодатныя, и веру всеяв и исповеданием возрастив, и умножил еси чада церковныя, Никоне старче богоблагодатный.

Богородичен: Всенепорочная Мати Дево, Света жилище явилася еси нас ради из Тебе явившагося, Егоже моли непрестанно, просветити мысли наша, благочестно Тя поющих во вся веки.

Песнь 9

Ирмос: Да умолчит еретиков собрание, не истинно Богородицу исповедающих Тя, ибо свыше Тя пророцы проповедаша, Матерь быти Божию, и Ходатаицу рода нашего. Тем Тя, Дево, величаем.

Отцев Оптинских славу тя зрим, и новомучеников Росскийских украшение, подвиги постническими цветуща, и венцем увенчанна исповедническим, Никоне всечестне, в горнем ныне живуще не забуди тя величающим.

Светиши на церковней высоте, страстотерпческими сияя добротами, и Божественными лучами молитв твоих, озаряеши всех притекающих к тебе верою и любовию тя величающа.

Предстояще Престолу Судии всех Царя, мольбу принеси о земном твоем отечестве, и демонския разори полчища, и безбожную тьму потреби, силою тебе содействующа Всесвятаго Духа.

Обитель твою покрывай и тя славящия в ней спасай от бед и искушений демонских, и в век века Православие утверди, Христа величати тебе прославльшаго.

Богородичен: Южика Твоего Дево рождество чтим и Никона исповедника божественнаго преставление прославляем темже с ними молися скит Предтечев и обитель Оптинскую избавити от нахождений вражиих, и еретичествующих возстание в конец низложи, не почитающих Твоего святолепнаго образа.

Светилен

Течение красных твоих ног Никоне преподобне, возвратив к шествию небесному, возшел еси радуяся, и Троице представ, гласы трисвятыми поя Ю со отцы Оптинскими; сего ради пресвященную твою память верою празднуем и молим, страстей ны избави, твоими предстательствы.

Слава Предтече

Предтечево днесь радостотворное рождение сетование решит отча безгласия и рождшия неплодство, возвещает же настоящую радость и веселие, темже и вся тварь светло тя празднует.

И ныне, Богородичен

Премудрость ипостасную, и Слово присущное, и Врача душ и телес рождшая, гноения и рану души моея изцели лютыя и временныя, и сердца моего устави болезни, Дево.

Стихиры на хвалитех, глас 8, подобен: О, Преславнаго чудесе!

О, Преславнаго чудесе/ явися красота монашества/ Церкви незыблемое утверждение/ послушания стезя предельная/ старцев оптинских богодухновенная песнь:/ приемник даров сыноположения/ Никон благопослушный ученик/ иже точит цельбы обильныя/ любовию празднующим память его.

О, Преславнаго чудесе/ любве ради Христовы/ вся яже на земли презрел еси/ Никоне преподобне/ в скиту Оптинстем вселился еси/ и старцами богомудрыми воспитався/ столп православия явился еси/ и монашествующих утверждение./ Темже молися Христу даровати душам нашим велию милость.

О, Преславнаго чудесе/ цвете монашескаго веселия/ новомучеников Русских благовонный фимиам/ инокующим кроткий наставник/ исповедников ритор божественный/ трубо оптинская/ Никоне всеблаженне/ твою память благочестно почитающих/ моли избавити от бед и скорбей грядущих на вселенную.

Сия стихира в Пинеге, идеже покоятся мощи преподобнаго, поется на Славе

Возрадуйся граде Пинего/ восплещи рекою вкупе/ подвигнися богоспасаемая паства торжествующе/ глас хваления возвыси Богу/ прославляя светлаго подижника благочестия/ Никона старца Оптинскаго/ иже края твоего достиже/ и огласи божественным проповеданием воздух твой/ подвиги благочестия бесовскую прелесть потребив/ и удобрив землю мощьми благодатными/ в Небесный град преселился есть/ и градодержцем незримым твоим явився/ темже в недрах своих имуще таковое многоценное сокровище/ яко основание непоколебимо/ реки исцелений точаще обильно/ воспой ликующе:/ слава Тебе Боже Всещедрый/ во святых Твоих почивающий.

Слава глас тойже

Приидите празднолюбивых собори/ песньми яко трубы воспоем Никона божественнаго/ Церкви Русской украшение/ старцев зерцало святолепное/ иноков степень высокая/ исповедников Оптинских светозарную звезду/ иже облистает лучами истины вся верныя/ и благодатию утешает сердца./ Темже к нему сице возопиим:/ приближися к нам сущим во тьме смертней/ и просвети чада твоя/ любовию поющих рождество Предтечево/ и верою празднующих святое твое преставление.

И ныне глас тойже

Спаса, Богомати во утробе, Дево, носящи/ Слова Безначальнаго/ Елисавети позналася еси Пророчице/ и дом уяснившая Захариин/ иже Иоанна родил есть./ С нимиже молися спастися душам нашим.

Тропарь: 

 

Тропарь святому преподобноисповеднику Никону, старцу Оптинскому глас 2:

Предстоя Престолу Божию, / яко един от избранных, / помяни в святых твоих молитвах / и нас недостойных, / чтущих память твою, / отче наш Никоне, приснопамятный.

 

Ин тропарь, глас тойже, творение новосвященномученика Василия Оптинского:

Отрасле святая лозы старческой, / простершаяся до севера и моря, / плодами исповедничества украшенная / и венцем мученичества венчанная, / преподобне отче Никоне, / слава Оптины и похвало, / упование наше и утверждение, / не забуди убогих твоих, / призывающих имя твое святое.

Молитва: 

 

Молитва

О, Никоне свещенне, о преподобне наш авва, старчества Оптинскаго светлый венец и новомучеников Русских благовонный цвете! Ты первее постническими трудами душу твою очистив, демонския ополчения посрамил еси, послушанием, яко быстротечную лествицею на верхи добродетелей достигл еси и веры благославный исповедник явився. В годину же гонений безбожных терпением мужески облекся еси, и яко пастырь добрый и яко истинный сын старцев Отптинских люд страждущий принимал и утешал еси. Сего ради от богоборных многия скорби претерпев, и во изгнание осужден был еси, но якоже тогда от паствы твоей духом не отлучився, но пастырскую свирелию молитв твоих добре упасл еси овцы твоя, сице и ныне, не отступай от чад твоих духом твоим, но присно с нами пребывай, да укрепляемы тобою, веру истинно сохраним и заветы Оптинских старцев вседетельне исполним.

Паче же моли Всеблагаго Господа нашего Иисуса Христа, да утвердит в Православии Церковь нашу, Отечество и люди, да сохранит обители монашеския, верныя обетом иноческим, да дарует нам прощение грехов и покаяние истинное, да очистившися тем, возлюбим еже есть едино на потребу: прилеплятися Христу Богу и Спасу нашему всем сердцем, всем помышлением, всею волею и всем чувством ничтоже любя от похотей мира сего и тако от сетей миродержителя тьмы века сего избавляющеся, во смирении воспоем и прославим всесвятое имя Отца и Сына и Святаго Духа ныне и присно и во веки веков. Аминь.

 

Молитва преподобному Никону, написанная в Пинеге

О преподобне отче наш Никоне, исповедниче Христов. К тебе, яко скорому помошнику И теплому молитвеннику мы немощнии и недостойнии прибегаем и усердно молим: по данной тебе от Бога благодати помози нам волю Господню в смирении творити, веру православную крепко содержати и достойны быти твоего от нас молитвенного к Богу предстательства и в час смертный заступи нас молитвами твоими. Буди Пинежского края Российския страны крепкий заступниче, и мы предстательством твоим сподобимся обетованного Царства небеснаго; умоли, угодниче Христов, всеблагаго Бога даровати нам оставление всех содеянных нами, от юности до настоящего дне и часа делом, словом и помышлением согрешении и исходатайствуй нам невозбранный вход в Царствие Небесное, да прославляем от ангел купно с тобою Отца и Сына и Святаго Духа, и твое милостивное предстательство во веки веков. Аминь.

Акафист: 

 

Акафист преподобному и богоносному отцу нашему Никону исповеднику Оптинскому

 

Кондак 1

Избранный исповедниче оптинский, благодати старческой наследниче, воине духовный и монахов изрядный наставниче. Похвальная приносим тебе пение. Ты же, яко имея ко Христу велие дерзновение, молися о нас, любовию тебе зовущих: радуйся, исповедниче Христов, Никоне богомудре.

Икос 1

От младенства твоего тайну Воскресения постигнувый, егда умершу ти, отче мудре, молитвами матери твоей паки к жизни возвратился еси. Сего ради таковому чуду удивившеся, велегласно тебе зовем:

Радуйся, молитвами матери от уст адских восхищеный;

Радуйся, радость воскресения еще в младенстве познавый;

Радуйся, твоим благочестием смерти жало притупивый;

Радуйся, твоими чудодействы о животе вечнем возвестивый;

Радуйся, дважды избегнувый смерти горчайшия;

Радуйся, сладости райския сугубо ныне причащаешися;

Радуйся, велегласная труба воскресения;

Радуйся, сладкозвучный органе безсмертия;

Радуйся, исповедниче Христов, Никоне богомудре.

Кондак 2

Мир оставил еси, отче богомудре, и в Скит Оптинский вселивыйся, ко Христу любовию распалаем, яко горлица пустыннолюбивая в жертву живу принесл еси себе, словесным служением взывая: Аллилуиа.

Икос 2

Под криле богомудраго Варсонофия притекл еси, яко млеком словесным старческим окормлением от него воспитавыйся, в мужа возраста духовнаго достигл еси, темже твое боголюбие похваляем глаголя сице:

Радуйся, яко орля, духовную весну иский;

Радуйся, от зимы мирских страстей отбегий;

Радуйся, солнцем Праведным согрет быв лучами;

Радуйся, звезды мысленныя постигнути желавый;

Радуйся, под крила мудрости старческия притек;

Радуйся, тою мудростию окрилен быв, в горнее потек;

Радуйся, небомудренное житие в Скиту обретый;

Радуйся, похотений юношеских избегий;

Радуйся, исповедниче Христов, Никоне богомудре.

Кондак 3

Кладезь мудрости в Скиту обрет, преподобне отче, писменник быв великого старца. В писменах бо его сладость почерпл еси благодатных словес, жажду духовную утоляя, Богу благодарне взывая: Аллилуиа.

Икос 3

В сотаинники своя избра тебе богомудрый старец Варсонофий, души твоея провидевый богоразумную доброту, яко явишися приемник благодати старчестей. Сего ради воспеваем тебе похвальная:

Радуйся, приемниче даров сыноположения;

Радуйся, ко отеческия любве сыновнее явив любление;

Радуйся, сотаинниче премудрый богомудраго старца;

Радуйся, непорочный агнец Варсонофиева стада;

Радуйся, овен, пасущийся на пажити учений;

Радуйся, елене, стремящийся ко воде упокоения;

Радуйся, послушниче прилежный старческих волений;

Радуйся, ревновавый Ангелам прямым произволением;

Радуйся, исповедниче Христов, Никоне богомудре.

Кондак 4

Якоже дождь на землю жаждущую, тако сниде на тя старческое окормление, темже изнесе земля сердца твоего цветы прекрасныя благочестия, и фимиам благодарения принесл еси Христу, поя молитвенно Ему: Аллилуиа.

Икос 4

Послушанием окрылився, преподобне, плоть увядил еси и духом якоже крин во юдоли пустынной процвет. Целомудрием и чистотою украсился еси, богоблаженне. Сего ради песенный исплетеся тебе венец:

Радуйся, добродетели целомудрия благоухан­ный крине;

Радуйся, монашеских чинов благовонный шипок;

Радуйся, многосветлая свеща проповедания;

Радуйся, многоплетенный венец богомыслия;

Радуйся, розга апостольскаго предания;

Радуйся, грозде Владычния любве;

Радуйся, яко тобою девственныя лицы украшаются;

Радуйся, яко тобою иночестии чины утверждаются;

Радуйся, исповедниче Христов, Никоне богомудре.

Кондак 5

Исповеднический богосветлый венец тебе, отче Никоне, предрече богомудрый старец Варсонофий, иже узами и страдальческою смертию яко камением честным обложен. Ты же, велелепой красоте его дивяся, Христу венчающему тя возопив: Аллилуиа.

Икос 5

Печали исполнися сердце твое, отче Никоне, егда старец твой завистию диавола от обители изгнан быв. Обаче осиротел еси токмо лицем, а не сердцем, яко союзом любве к старцу привязан быв. Сего ради сыновнюю твою любы похваляюще, сице тебе вопием:

Радуйся, послушания рачителю известнейший;

Радуйся, своея воли отсекателю прилежнейший;

Радуйся, непоколебимый исполнитель воли старца бывый;

Радуйся, пламенеющую любы ему явивый;

Радуйся, отчесыновний союз любве показавый богоподражательне;

Радуйся, любвеобильный приемник явивыйся старческия благодати;

Радуйся, яко ни гонение, ни смерть разлучи тя от любве твоего старца;

Радуйся, яко и по смерти с нимже в райских селех водворяешися;

Радуйся, исповедниче Христов, Никоне богомудре.

Кондак 6

Якоже в сладости райстей в вертограде Оптинстем пожил еси, отче Никоне, плодами наслаждаяся старческого окормления. Темже благоискусно к подвигам исповедническим уготовивый себе, поя избавителю всех Богу: Аллилуиа.

Икос 6

Яко кедр ливанский возрасл еси во обители оптинстей, егоже не поколеба буря безбожия, молитвою бо досязал еси небеси и смиренномудрие, яко корень, воглубил еси в души. Сего ради в тени поучений твоих покоящеся, похвальная тебе зовем:

Радуйся, неувядаемая отрасль оптинского старчества;

Радуйся, цветоносная ваия предпасхального страдания;

Радуйся, плоде сладчайший старческого окормления;

Радуйся, благоуханный крине нового исповедания;

Радуйся, яко терноносный шипок был еси для безбожных мучителей;

Радуйся, яко медоточная розга был еси алчущим истины;

Радуйся, яко тобою уничижися гордость безбожия;

Радуйся, яко тобою возвысися вера православная;

Радуйся, исповедниче Христов, Никоне богомудре.

Кондак 7

Жертву безкровную в Казанстей церкви совершив последнюю, отче Никоне, егда безбожниками затворенни быша храми вси, и сам себе уготовил еси быти жертвою одушевленною, Христу пожершемуся нас ради вопиюща: Аллилуиа.

Икос 7

В темницу мрачную ввергоша тя мучители, яко надеяшася поколебати крепость твоея души, ты же яко адамант пребыл еси непоколебим, поя благодарно псалмы, темже узилище темничное яко райская широта вменися тебе. Сего ради великодушию души твоей дивяся, похвальная тебе зовем:

Радуйся, узы темничныя в бисеры себе вменивый;

Радуйся, похвалу Павлову себе усвоивый;

Радуйся, апостольских преданий верный блю­стителю;

Радуйся, благовестниче Христов всерачительный;

Радуйся, по вся дни по глаголу Павла умиравый;

Радуйся, Бога Жива в себе стяжавый;

Радуйся, яко добр воин Христов злопострадав верно;

Радуйся, яко подвигом исповедническим подвизався законно;

Радуйся, исповедниче Христов, Никоне богомудре.

Кондак 8

Из темницы изшел еси яко от брачнаго чертога, виссон праведности носяй, венцем верности от Христа увязлся еси, Никоне добропобедне, и страданьми исповедания украсился еси, поя Богу: Аллилуиа.

Икос 8

Гонение тебе приключися, яко ветренная буря, скорбными обстояньми от обители изгнан быв, в лодии телесней легце приминул еси бурю безбожия и блаженной пристани Христа ради гонимых достигл еси. Сего ради яко тихия волны приступают к тебе хвалы сии:

Радуйся, лодии церковныя изрядный управителю;

Радуйся, богодохновенное ветрило тихих молитв;

Радуйся, от потопления греховнаго спасый овцы Христовы;

Радуйся, от раскола церковнаго избавивый паству твою;

Радуйся, яко псалмопением обезгласил еси трубы безбожия;

Радуйся, яко в пристанище безстрастия достигл еси;

Радуйся, яко немокренно шествие твое бысть в море житейстем;

Радуйся, яко слезы страждущих в плач по Бозе претворил еси;

Радуйся, исповедниче Христов, Никоне богомудре.

Кондак 9

Слово Божие по глаголу апостольскому во устех невяжется, обаче во вся концы вселенныя бо оно сообщается. Сице слово на тебе сбышася, отче Никоне, яко по широте земли Русстей промчася богокрасное исповедание твое, в немже пел еси Христа, зовый: Аллилуиа.

Икос 9

Страны северныя достигл еси, отче богоносе, и подвиг странничества усугубил еси на Архангельстей земли, житие показав равноангельное, многострадальне отче. Сего ради слышиши сия похвалы:

Радуйся, яко многи скорби претерпел еси несмущенным духом;

Радуйся, яко поношение приял еси ради Господа Иисуса;

Радуйся, на земли скитаяся, небо обретый отверсто;

Радуйся, землю освятивый, в гроб зашед безвестно;

Радуйся, яко равноангельную восприял еси славу;

Радуйся, яко посрамил еси безбожия державу;

Радуйся, страннолепно на земли житие скончавый;

Радуйся, на небеси новое житие начавый;

Радуйся, исповедниче Христов, Никоне богомудре.

Кондак 10

Яко Божественною утварью, исповеданием твоим Церковь Русская украсися, и чин иноческий светоносным просветися благочестием твоим. Сего ради яко свещник тя зрим, отче Никоне, богоразумием на тверди церковней сияющим, и от души прославльшему тя Христу поем: Аллилуиа.

Икос 10

Пастырскою свирелию исповедания твоего заградил еси уста безбожия и овцы разсеянныя стада Христова на пажити благочестия воспитал еси. Темже в кров твоего пастырского прибегающе заступления, от души умильно тебе вопием:

Радуйся, раскола церковнаго верный устранителю;

Радуйся, единства духовнаго богомудрый подателю;

Радуйся, яко пастырь сый добрый, за овцы словесныя душу положивый;

Радуйся, яко агнец сый непорочный, мечем девства сласть любодейства заклавый;

Радуйся, яко старческим окормлением люди озлобленныя утешил еси;

Радуйся, яко богомудрыми советы свет во тьме духовней возвестил еси;

Радуйся, башня крепкая православных догматов;

Радуйся, труба благозвучная благочестивых нравов;

Радуйся, исповедниче Христов, Никоне богомудре.

Кондак 11

Благоухание Христово бысть житие твое, отче Никоне, в стране Российстей, испущаяй арараты богомудрых речений твоих и воней в смерть твое исповедание познася, имже прозябения безбожнаго неверия увядил еси. Сего ради неумолкаемую песнь стяжал еси к Богу, поя Ему: Аллилуиа.

Икос 11

Сердце яко скрижаль богописану стяжал еси, отче Никоне, ум якоже небо ясное, резцем послушания красоту монашества изобразив и Славу Божию твоим исповеданием возвестив. Сего ради Оптиной пустыни явился еси похвала и утверждение, в нейже услыши приносимыя тебе песнопения:

Радуйся, исповедников Российских звезда светозарная;

Радуйся, монашествующих кроткий утешителю;

Радуйся, сыне старческих благословений;

Радуйся, наставниче богомудрых речений;

Радуйся, некрадомое сокровище оптинских преданий;

Радуйся, скрижале, писанная богомудрыми отцами;

Радуйся, яко отраду подаеши во узилищах сущим;

Радуйся, яко сшественник бываеши гонимым ради Господа Иисуса;

Радуйся, исповедниче Христов, Никоне богомудре.

Кондак 12

Постное течение совершив, житие монашеское украсил еси исповеданием, добропобедне Никоне, и лествицею добродетелей небесный обретый восход, скончал еси страдальчески шествие твое, Богу со многим дерзновением представ, песнь преславную поя: Аллилуиа.

Икос 12

Яко кимвал доброгласный житие твое явися, добродетельми красно бряцающее, и яко труба богогласная исповедание твое, добропобедне Никоне, познася. Мы же, яко дел отнюдь не имуще, медию звенящею токмо являемся, и яко воздух бия обретаемся, обаче на помощь твою надеющияся, любовию тебе зовем:

Радуйся, православия тимпан звоногласный;

Радуйся, Церкви немолчныя и сладкия уста;

Радуйся, кифара старческих поучений;

Радуйся, кротости песнь ко иноческим ушесам;

Радуйся, яко сыне громов, благовествовал еси Евангелие;

Радуйся, яко глас, вопиющий в пустыне, проповедал еси нам покаяние;

Радуйся, яко тобою побеждаем супротивныя полчища;

Радуйся, яко тобою сликовствуем новомученическому воинству;

Радуйся, исповедниче Христов, Никоне богомудре.

Кондак 13

О Никоне треблаженне, яко путь на земли добре скончав и веру соблюд, и течение твоих красных ног возвратив к небесному шествию. Исправи наша стези к деланию заповедей Божественных, да мимоходим сетей диавольских, но за вся преключшееся смиренномудренно поем Богу: Аллилуиа.

О Никоне треблаженне, яко блаженства гонимых за Истину вкусивый и предание святых отцев исповеданием утвердивый, утверди ны шествовати узким путем, да совлекшеся похотей житейских, чисти предстанем Христу, светильницы исповедания имуще горящими, вопиюще: Аллилуия.