Гимнография свт. Николая исп., митр. Алма-Атинского
Гимнография:
[Служба] [Великое бдение] [Бдение] [Полиелей] [Славословие] [«на 6»] [«на 4»] [Тропарь] [Кондак] [Молитва] [Канон] [Акафист]
Даты:
Великое бдение (с малой вечерней):
Служба иже во святых отцу нашему Николаю, митрополиту Алма-Атинскому и казахстанскому, исповеднику
На малой вечерни.
На Господи, воззвах: стихиры поем на 4, глас 8-й
Прежде век Сый, Боже,/ времена и веки сотворивый/ и вся в мудрости Твоей устроивый,/ Церковь на земли противу зла воинствующую/ многоразличною благодатию Твоею облагодетельствовал еси,/ даровав в последния сия времена Казахстанской митрополии,/ дивнаго иерарха и исповедника,/ Николая, новаго чудотворца,/его же память днесь благочестно совершающе,/ всесвятое Имя Твое поем и славим.
От века и до века Ты еси, Царю и Господи,/ Пресущественное Естество, в Троице певаемое Ипостасей,/ преестественно Себе даровавший присно тя вожделевшему,/ исповеднику Твоему Николаю,/ Казахстанския митрополии священноначальнику,/ их же и паству свою Тя, Присносущнаго, знати научи,/ его же молитвами,/ неизреченнаго зрения Твоего сподоби ны, Человеколюбче.
Триипостастный, Владыко,/ Отче, Сыне, и Душе Святый,/ Едино Божество и Царство,/ от небесных чинов ангельских воспеваемый,/ приими и наше из глубины сердца приносимое Тебе благохваление/ и мольбами святителя и исповедника Твоего Николая,/ подаждь и нам в сонме ликующих угодников и ангелов Твоих/ воспевати Тя во веки.
Слава, глас 2-й
Возсия днесь память,/ Казахстанскаго чудотворца/ святителя Николая,/ просвещающа и вразумляюща благочестивых собрание,/ иже во всем житии бысть непоколебимый столп благочестия,/ нищих защититель и болящих немздоприемный врач,/ к свету богопознания всех приводяй,/ да из глубины души в радости вопиют:/ Боже наш Триипостастный,/спаси души наша благоволением Твоим,/ да величаем Тя во веки.
И ныне. Богородичен глас тойже.
На стиховне стихиры, глас 5-й
Приидите, христоименитии людие,/ восхвалим христоподражательнаго отца и пастыря нашего,/ небесное добродетелей богатство на земли стяжавша/ и горняго Отечества о Христе Духом Святым достигша,/ иже молит Всесвятую Божественную Троицу,/ спастися душам нашим.
Стих: Священницы Твои облекутся в правду,/ и преподобнии Твои возрадуются.
Святаго Православия проповедниче,/ Христа Бога, во плоти пришедша грешныя спасти,/ во вся концы Казахстанския митрополии вествовал еси/ и в скорбех и печалех чад церковных пребывающих,/ благодатию Божиею, в тебе сущею, исцелял еси./ Тем же молим Тя, святителю Николае, исповедниче Христов,/ молися Господеви,/ паству твою неодоленну в злоключениях сотворити/ и небеснаго блаженства сподобити.
Стих: Блажен муж, бояйся Господа,/ в заповедех Его восхощет зело.
Любви Божественней всем сердцем и душею соединился еси,/ временная и тленная вся презрел еси./ Безбожие и обновленческое злочестие искореняя,/ утверждал еси народы во истиннем благочестии пребывати,/ да в скоротечнем земнем житии евангельскою правдою поживше,/ Отечества Горняго унаследят./ Тем же непрестай о нас Небеснаго Домовладыку молити,/ да предстательством Пречистыя Матери Своея,/ подаст нам в скорбех утешение и исправление жития,/ и всерадостнаго века наследие.
Слава и ныне, Богородичен глас тойже
Тропарь, глас 7-й
Яко светозарное светило,/ лучами Божественных дарований сияющее,/ яви тя Солнце Правды Христос Бог наш,/ тьму безбожия и злонравия далече отгоняюща,/ и зарями богопознания осияюща вопиющих верно:/ Радуйся, святе Николае,/ Христов исповедниче и Казахстанский чудотворче.
Слава и ныне, Богородичен: глас тойже:
На Велицей вечерни
Блажен муж: 1-й антифон.
На Господи, воззвах: стихиры на 8, Глас 4-й
Семя благодати Божия,/ благонравием родительским всеянное в сердце твоем,/ соблюл еси боголюбиве/ и от юности всею душею и крепостию твоею Христу прилепился еси,/ злостраданием и темничным томлением,/терпением и кротостию,/ и молитвами непрестанными Тому угодил еси,/ и ныне усердно Господу помолися,/ спастися душам нашим.
Отрясл еси, яко ленностный сон, мирская треволнения/ и Божию указанию последуя,/ иноческих ради доблестей/ в преславную Нилову пустынь пришел еси./ В ней же, иго Христово на рамо восприим,/ желательно Тому сораспялся еси,/ Помошницу имея Того Рождшую Приснодеву Всемирную Заступницу,/ Николая чудотворца имя, яко миро, свыше излиянное, прияв,/ в житии твоем сему уподобился еси/ и ныне с ним молися о нас Господеви,/ спастися душам нашим.
Во благочестии угодникам Божиим ревностно подражая,/ в мале был еси верен/ и великия чести архиерейския благодати удостои тя Господь,/ о спасении душ людских вручая тебе попечение,/ еже благоплодно в самоотверженном житии совершив, вшел еси в радость Господа Своего,/ идеже предстоя Ему с соборы святых/ моли, спастися душам нашим.
На тебе, святе, утвердися истина Господня,/ усты пророка предреченная:/ праведник, яко финикс процветет/ и яко кедр, иже в Ливане,умножится./ Тем же, яко древо благосеннолиственное и многоплодное/ в Церкви явился еси,/ источая притекающим к тебе благодати Божия струю животочную/ и моляся о спасении душ наших.
Божественною благодатию Святаго Духа просветився,/ святителю Николае преславне,/ в гонениях от безбожных венец чистаго исповедничества за Христа доблественне стяжав,/ сликовен новомученником Российским явился еси,/ с ними же, по отшествиии престолу Владычню предстоя,/ несозданным Светом Трисолнечным озаряем,/ молися Господеви спастися душам нашим.
От земных на небесная,/ яко небопарный орел, пречудне, востекл еси,/ но и паству твою благодатными дарами не оставил еси,/ в Царстве неизреченныя славы Божия/ со дерзновением сию воспоминаеши/ и молишися спастися душам нашим.
Просветися житие твое/ христоподражательными светлостьми,/ лжеименнаго разума тьму отгоняя./ Тем же, яко светозарное светило Казахстанския митрополии явился еси,/ святителю и исповедниче Христов Николае,/ верныя ко обретению Царства Божия право путеводя,/ вселился еси, идеже сияет Свет Единосущныя Троицы./ Темже светозарную твою память совершающе, приснопамятне,/ ходатая и заступника тя почитаем.
По достоянию о тебе радуется/ мучеников и исповедников светоявленное собрание,/ небесных чинов лики,/ апостолов и святителей огнезрачное сословие,/ преподобных богоносцев полче/ и священныя митрополии твоея паства/ восхваляюще Триединаго Бога, дивнаго во святых Своих/ и вопиюще тебе таковая:/ Радуйся, святе Николае,/ Христов исповедниче и Казахстанский чудотворче.
Слава, глас 8-й:
Весь исполнен быв любве Божественнныя,/ явился еси Святаго Духа нерукотворенный храм,/ дарами благодати преукрашенный:/ душу бо твою за врученное ти стадо, полагая/ и всем духовне во всем угождая,/ не своея, но ближняго пользы искал еси,/ да всяко некия спасеши./ Не забуди ныне и нас, в добродетели убогих/ и твоего наставления ищущих, да зовем ти:/ Радуйся, святе Николае, Христов исповедниче/ и Казахстанский чудотворче
И ныне, Богородичен, глас тойже:
Царь Небесный за человеколюбие на земли явися/ и с человеки поживе,/ от Девы бо Чистыя плоть приемый/ и из Нея прошедый с восприятием,/ Един есть Сын, сугуб естеством,/ но не Ипостасию./ Темже, совершенна Того Бога/ и совершенна Человека воистинну проповедающе,/ исповедуем Христа Бога нашего:/ Егоже моли, Мати Безневестная,/ помиловатися душам нашим.
Вход. Прокимен дне. И чтения.
Притчей чтение (главы 10, 3 и 8):
Память праведнаго с похвалами,/ и благословение Господне на главе его. / Блажен человек, иже обрете премудрость, / и смертен, иже уведе разум. / Лучше бо сию куповати,/ нежели злата и сребра сокровища. / Честнейшая же есть камений многоценных,/ все же честное недостойно ея есть./ Долгота бо дней и лета живота в деснице ея,/ в шуйце же ея богатство и слава. / От уст ея исходит/ правда,/ закон же и милость на языце носит./ Послушайте убо мене, о чада, / честная бо реку, / и блажен человек, иже пути моя сохранит: / исходи бо Мои—исходи живота,/ и уготовляется хотение от Господа. / Сего ради молю вас / и предлагаю мой глас сыновом человеческим, / яко аз, премудрость, устроих совет / и разум, и смысл аз призвах. / Мой совет и утверждение,/ мой разум, моя же крепость. / Аз мене любящия люблю, / ищущии же мене обрящут благодать./ Разумейте убо, незлобивии, коварство,/ ненаказаннии же, прилагайте сердца./ Послушайте мене и паки, честная бо реку,/ и отверзу от устен правая,/ яко истине поучится гортань мой,/ мерзки же предо мною устны лживыя. / С правдою вси глаголы уст моих: /ничтоже в них стропотно, ниже развращенно. / Вся права суть разумевающим / и проста обретающим разум./ Научаю бо вас истине,/ да будет о Господе надежда ваша, /и исполнитеся Духа.
Премудрости Соломоновы чтение (глава 10):
Уста праведнаго каплют премудрость, / устне же мужей мудрых ведят благодать./ Уста мудрых поучатся премудрости,/ правда же избавляет от смерти. / Скончавшуся мужу праведну не погибнет надежда, / сын бо праведен рождается в живот / и во благих своих плод правды обымет./ Свет праведным всегда/ и от Господа обрящут благодать и славу./ Язык мудрых добрая свесть,/ и в сердце их почиет мудрость./ Любит Господь преподобная сердца,/ приятни же ему вси непорочнии в пути./ Мудрость Господня просвещает лице разумнаго./ Постигает бо желающия ю,/ прежде даже, разумети ю, / и удобь узрится от любящих ю./ Утреневавый к ней не утрудится,/ и бдяй ея ради вскоре без печали будет./ Яко достойных ея сама обходит ищущи, / и во стезях ея является им благоприемне. / Мудрости никогдаже одолеет злоба. / Сих ради и рачитель бых доброты ея/ и возлюбих ю, и поисках от юности моея./ И взысках невесту привести себе, / яко всех Владыка возлюби ю./ Таинница бо есть Божия хитрости / и обретательница дел его. / Труды ея суть добродетели,/ целомудрию же и разуму та учит, правде и мужеству, / ихже потребнее ничтоже есть в житии человеком./ Аще же и многаго искусства желает кто, / весть древняя и быти хотящая разсмотрит. / Свесть извития словес и разрешения гаданий,/ знамения и чудеса проразумеет и сбытия времен и лет,/ и всем советник есть благ,/ яко безсмертие есть в ней и благославие во общении словес ея./ Сего ради беседовах ко Господу и помолихся Ему, / и рех от всего сердца моего: / Боже отцев и Господи милости, / сотворивый вся словом Твоим / и мудростию Твоею устроивый человека,/ да владеет бывшими от Тебе тварми,/ и да управит мир в преподобии и правде. / Даждь ми Твоему престолу приседящую премудрость/ и не отлучи мене от отрок Твоих,/ яко аз раб Твой и сын Рабыни Твоея./ Посли ю с Небес от святаго жилища Твоего/ и от Престола славы Твоея,/ да сущи со мною научит мя,/ что благоугодно есть пред Тобою./ И наставит мя в разум и сохранит мя в славе своей./ Помышления бо смертных вся боязлива/ и погрешительна умышления их.
Премудрости Соломоновы чтение (глава 4):
Похваляему праведнику возвеселятся людие,/ безсмертие бо есть память его,/ яко от Господа познавается и от человек,/ и угодна Господеви душа его./ Возлюбите убо, о мужие, мудрость и поживете,/ восхощите ея и наказами будете,/ начало бо ея любы и соблюдение закона. / Почтите премудрость, да во веки царствуете. / Возвещу вам и не скрыю от вас тайн Божиих: / яко Той мудрости Наставник есть и мудрых Исправитель, / и всякому смыслу и делу Хитрец./ И всем смыслом научит мудрость,/ есть бо в ней дух разумен и свят и сияние света присносущнаго / и образ благости Божия./ Та други Божия и пророки устрояет,/ благолёпнейши же есть солнца и паче всякаго сотворения звезд,/ свету сосуждаема, обретается первейши. / Та угождающих ей от болезней избави и настави на стези правыя,/ даде им разум имети свят и сохрани я от ловящих и подвиг крепок подаде им. / Да разумеют вси, яко сильнейши всего есть благочестие/ и никогдаже преможет злоба мудрости,/ ниже прейдет злыя обличающи суд./ Рекоша же в себе, помысливше неправедно:/ насильствуем праведному и не пощадим преподобства его, / ни усрамимся седин старости многолетны./ Будет бо нам крепость закон и уловим праведнаго, / яко неугоден нам есть и противится делом нашим / и поносит нам отпадение закона / и обличает нам согрешения наказания нашего./ Возвещает нам разум имети Божий/ и отрока Господня себе именует. / Бысть нам на обличение помышлением нашим, / и тяжек нам есть и видим, / яко неподобно иным житие его и изменены стези его, / в поругание вменихомся ему / и удаляется от путей наших, яко от нечистот, / и блажит последняя праведных./ Увидим убо, аще словеса его истинна суть,/ искусим яже сбываются ему./ Руганием и мукою истяжем его,/ да разумеем кротость его / и искусим беззлобство его, / смертию безобразною осудим его,/ будет бо посещение от словес его./ Сия помыслиша и прельстишася, / ослепи бо я злоба их / и не разумеша таин Божиих, / и не разсудиша, яко Ты еси Бог Един,/ живота имеяй и смерти власть, / и спасаяй во время скорби, и избавляяй от всякаго зла. / Щедр и Милостив и дая преподобным Своим благодать,/ и Своею мышцею гордым противляяся.
На литии стихиры, глас 1-й:
Радостно днесь ликовствует богоспасаемый град Алма-Ата/ и с ним вси концы священныя Казахстанския митрополии соторжествуют,/ память совершающе Боголюбезнаго святителя и исповедника Николая,/ узы и темницы за Христа мужественне претерпевшаго,/ и соборища нечестивых себе отлучившаго,/ на небеси днесь со Христом, Царем вечным, царствующа,/ и на земли благодатию Христовою чудодействующа./ Темже, к честней раце его верно притекающе,/ исцеление душам и телесам нашим улучаем/ и, светом богопознания просвещаеми, глаголем:/ сподоби нас даров небесных, святе,/ и христоименитое православных стадо твое сохрани,/ спасение подавая душам нашим.
Приидите восхвалим всечестнаго архипастыря/ и богоноснаго отца нашего,/ венцем чистаго исповедничества преукрашеннаго/ и Христу Подвигоположнику нашему во славе незаходимей предстояща,/ в сонме светозарных избранников присно радующася./ Тем же, на земли память его восхваляюще, во умилении воспоим:/ Радуйся, служителю Божий, гонения правды ради смиренно претерпевый;/ Радуйся, розго винограда Христова, мног плод в пособие православным творящая;/ Радуйся, града Алматы славо и ограждение;/ Радуйся, всех градов и весей Казахстанский неусыпный страже и теплый хранителю;/ Радуйся, святе Николае,/ Христов исповедниче и Казахстанский чудотворче.
Днесь вернии, всепразднственно ликовствуем,/ во псалмех и песнех Господеви поюще/ и чтуще Того служителя благоприятна,/ добродетельми сияюща и сердца наша небесными зарями просвещающа,/ и единомудренно воспевающе того, песнь тако рцем:/ Радуйся, архипастырю благосердый,/ любовию и кротостию вся покрываяй;/ Радуйся, Владыко прелюбимый, бедствующия защищаяй;/ Радуйся, милостивый скорбящим помощниче./ Радуйся, ищущим спасения готовый споспешниче;/ Радуйся, святе Николае, Христов исповедниче и Казахстанский чудотворче.
Слава, глас 6-й:
Имуще сердце твое, яко добрую почву,/ к восприятию семене Слова Божия всегда отверстым,/ неуклонно шел еси по стопам Христа, зовуща:/ аще, кто хощет в след Мене идти,/ да отвержется себе и возмет крест свой,/ и в след Мене да идет./ И венцем добропобедным чистаго исповедничества от Него украшенный,/ Того, яко Подвигоположника и Судию,/ яко Мздовоздаятеля и яко Милостива,/ моли спастися душам нашим.
И ныне, Богородичен или Крестобогородичен, глас той же:
Что зримое видение,/ еже Моима очима видится, о Владыко?/ Содержай всю тварь, на древо воздвижен быв,/ и умираеши, всем подавая жизнь,/ Богородица, плачущися, глаголаше,/ егда узре на Кресте возносима/ из Нея неизреченно возсиявшаго/ Бога и Человека.
На стиховне стихиры, глас 2-й.
Яко, Богом данный,/ от родителей Феодосием нареченный,/ тезоименитому мученику в истом исповедании Христа Бога подражал еси,/ и премногая дарования Божественная стяжав,/ у престола огнезрачнаго Святыя Троицы предстоиши,/ моляся о спасении нашем.
Стих: Праведник, яко финикс процветет, яко кедр иже в Ливане умножится.
Яко миро, свыше излиянное,/ имя новое во иночестве восприял еси,/ пророчески на служение твое указующее, святе Николае исповедниче Христов,/ и народа множества/ христоподражательною кротостию и любовию в послушание Богу преобрел еси,/ со апостолы и Николаем Угодником/ в невечернем дни Царствия Божия, радуяся, водворяешися,/ моляся о спасении нашем.
Стих: Насаждени в дому Господни/ во дворех Бога нашего процветут.
Видяще, в немногих храмех,/ подобно оазисам в бескрайней безбожия пустыне стоящих,/ паству твою у источников истиннаго богопочитания пиющую воду живу,/ усердно сию посещал еси,/ апостолом Христовым соревнуя,/ назидая в вере, укрепляя в надежде и утверждая в любви./ И по отшествии твоем в небеснем всевеселом воздаянии пребывая,/ наследие твое не оставил еси,/ моляся о спасении душ наших.
Слава, глас 3-й:
Церкви Христовы столпе непоколебимый,/ отеческих преданий истинный хранителю,/ веры православныя исповедниче благочестивый,/ Казахстанския митрополии похвало и утверждение, святе Николае,/ всех нас, память твою светоявленную совершающих,/ поминай богоприятными твоими молитвами,/ да прославим Спаса, тя прославившаго,/ дивнаго во святых Своих, Бога нашего.
И ныне, глас той же, Богородичен:
Призри на моления Твоих раб, Всенепорочная,/ утоляющи лютая на ны возстания, всякия скорби нас изменяющи: / Тя бо Едино твердое и известное утверждение имамы/ и Твое предстательство стяжахом,/ да не постыдимся, Владычице, тя призывающии,/ потщися на умоление Тебе верно вопиющих:/ Радуйся, Владычице, всех Помоще, Радосте и Покрове/ и Спасение душ наших.
Или Крестобогородичен, глас той же:
Видящи Тя распинаема Христе,/ Тебе рождшая, вопияше:/ что странное еже вижу таинство, Сыне Мой?/ Како на древе умираеши, плотию повешен,/ Жизни Подателю?
Тропарь, глас 7-й
Яко светозарное светило,/ лучами Божественных дарований сияющее,/ яви тя Солнце Правды Христос Бог наш,/ тьму безбожия и злонравия далече отгоняюща,/ и зарями богопознания осияюща вопиющих верно:/ Радуйся, святе Николае,/ Христов исповедниче и Казахстанский чудотворче.
На Бог Господь, тропарь глас – 7-й:
По 1-м стихословии, седален глас 1:
Адаманта веры благоразумнаго, страдальца Христова и исповедника доблественнаго, днесь вернии благоговейно любовию почтим, великаго во смирении иерарха, кроткаго во архиереях святителя, неумолкаемаго Евангельския благодати провозвестника, призывающа нас внити в радость Господа Своего и пети Тому научающа: прославляяй святых Своих, Господи, слава Тебе.
Слава, и ныне, Богородичен, глас 1-й:
Из Тебе, Пречистая Богородице, возсия нам Жизнодавец и Господь всех, не оставль Отеческих недр, сниде на землю и спасение роду человеческому дарова и от тли на нетление возведе зовущия: Радуйся, Всенепорочная Дево Богородице, Надеждо и Предстательство Тебе поющих.
По 2-м стихословии седален, глас 5-й:
Обновленческаго суесловия возгнушався, истинным последовал еси Евангельским заповедем, преблаженне святителю Николае, богомудре, и митрополию Казахстанскую во отеческом древнем благочестии утвердил еси, да христоименитых людей множество во единодушии православно славят Троицу Единосущную, Юже моли спастися душам нашим.
Слава, и ныне, Богородичен:
Имамы Тя к Богу истинную Предстательницу, раби твои, Всенепорочная, дерзновение бо к Нему, яко к Сыну Своему, имаши. Темже со архангелом вопием Ти верно: Благословен, Пречистая , Плод чрева Твоего.
Величание:
Величаем тя, Христов исповедниче, святителю Николае, и чтим болезни и труды твоя, имиже трудился еси во благовестии Христове.
Псалом избранный:
По полиелее седален; глас 4-й:
Весь еси, блаженне отче, в вышних присно во обителех райских, в селениях праведников водворяешися, но и нас, паству твою, со страстьми и похотьми и духами злобы поднебесными непрестанно брань ведущую, не оставляеши, и, тебе тепле почитающия, наставляеши к разуму Божественному и деланию усердному заповедей Христовых, и всякая благополезная прошения наша исполняеши, подвизая пети тебе: Радуйся, святе Николае, Христов исповедниче и Казахстанский Чудотворче.
Слава, и ныне, Богородичен:
Едина верным заступление явилася еси, Всенепорочная, от Твоих бо Приснодевственных кровей воплотися Слово Божие, советом Отчим и, земная с небесными совокупив, в древнее отечество земнородным вход устрои.Сего ради молим Тя, Всеблагая, не лишенны нас сотвори Сына Твоего и Бога нашего царствия, яко да поем Твое величие.
По 50-м псалме стихира глас 6-й.
Веселися и красуйся град Алма-Ата/ торжествуй и радуйся Казахстанская митрополия / светло совершая благолепную память архипастыря своего,/ Христова исповедника блаженнаго Николая, / скорбящим сострадательнаго утешителя, / обидимых теплаго заступника,/ болящих безмездна врача, веры и благочестия образа чиста,/ молящегося о спасении душ наших.
К А Н О Н .
Припев: Святителю и исповедниче Христов Николае, моли Бога о нас.
П е с н ь 1-я
Ирмос: Поим Господеви,/ проведшему люди Своя сквозе Чермное море,/ яко Един славно прославися.
Песньми прехвальными восхвалим, вернии, всеславную память исповедника Христова и архипастыря нашего Богоноснаго святителя Николая, Подвигоположника Сладчайшаго Господа Иисуса, величающе.
Любовию христоподражательною во изгнании, правды ради, победил еси беззаконнующих неистовство и напасть, и явился еси добропобедный исповедниче Христов, приснопамятне Николае, отче наш блаженне.
Великая сила благодати Божия в великих лишениях, прещениях же и глумлениях от безбожных тобою, страдальче, наследована бысть, ею же в земном служении твоем и по отшествии в небесные кровы верным токи целебныя источаеши, святе Николае, Казахстанския митрополии Похвало и Украшение.
Богородичен: Милостива мне, Всемилостивая Мати, Сына Твоего и Бога нашего сотвори, Пренепорочная, в судный день страшнаго мя осуждения избавляющи.
П е с н ь 3-я
Ирмос: Ты еси утверждение/ притекающих к Тебе, Господи,/ Ты еси Свет омраченных,/ и поет Тя дух мой.
Вседержителя силою духовною укрепляемь, мудре, в кротости и смирении вся злоключения терпя, крепость злобы древняго злоначальника низложил еси, Христа поя во веки.
Исповедничества чистаго и доблестнаго венцем преукрашенный во страданиях твоих, апостольских учений и отечественных догмат хранитель верный в Церкви явился еси, рассеянныя чада церковныя во едино стадо собирая, да в скорбех и радостех Христа поют во веки.
Яко же солнце незаходимое, лучами любве Божия сияющее, явился еси страждущим чадам церковным, яростию бури безбожнаго злочестия по обширным просторам Казахстанским рассеянным. Их же сердца и души духовно возгревая подвизал еси, хвалебно пети Христа во веки.
Богородичен: Изми мя, Всенепорочная, грехов лютых бури и вихря помыслов нещадно уму моему находящих избави мя, Пречистая.
Седален, глас 8-й.
Чистотою душевною и телесною сияя, терпением в гонениях и лишениях мужествовав, прегордаго Велиара главу сокрушил еси, ни ласками, ни ложными прещении, ни благовидными предлогами богоборцев ни себе, ни паству твою обманути не попустил еси, Богомудре, святую веру непорочно храня, и Богу до конца угодил еси. Сего ради от Него чудесы при жизни и нетлением по смерти почтен еси, яко причастник Божия Благодати.
Слава, глас той же:
Во святительстве исповеднически благочестно пожил еси, словесныя Христова стада овцы словом увещавая и делом назидая, и во изгнании неправедном, благодаряще Бога и огнем любве неугасимыя к Нему пламенея победоносным венцем от Христа Подвигоположника достойне увенчан, молися паствы твоея спасти люди, любовию память твою почитающия.
И ныне, Богородичен:
Человек враждующих озлобления и демонская злоухищренная стреляния угосила еси, Всенепорочная, ходатайством твоим благомощным к Сыну Твоему и Богу нашему, тако и нам, во обстояниях невидимыя брани сущим, душам спасение и телесное здравие подаждь, присно блажащим Тя и добротолюбием воинствующим во славу Рождшагося от Тебе.
П е с н ь 4-я
Ирмос: Услышах, Господи,/ смотрения Твоего таинство,/ разумех дела Твоя, и прославих Твое Божество.
Жизнь твоя, вся духу Божию всецело открытая, разруши лукавых духов и безбожных хулителей хитросплетения тщетныя и путь прав многим, ищущим спасения яви.
Благаго Бога во всем житии твоем подражатель явился еси, священноначальниче и исповедниче Христов Николае, милость и любовь нелицемерныя и ко всем равныя Духом Святым стяжал еси, поминая и творя реченное: возлюбиши искренняго своего, яко сам себе.
Изволением Божиим и избранием святейшего Патриарха Алексия архипастырем Казахстанския митрополии, поставляешися досточудне и наставник, иже ко спасению, пастве твоей многострадальней во утешение даруешися, непрелестным путем верности Святей Невесте Божией церкви Христовой, вводя стадо твое во ограду Небесную.
Богородичен: Яко же престол огнезрачен, носиши Солнце Правды, Богоблагодатная Владычице, Его же моли спасти мя, греховною тьмою о блаженнаго.
П е с н ь 5-я
Ирмос: От нощи неведения/ Боговедением просветивый концы,/ просвети мя утром человеколюбия Твоего, Господи.
Обновленцев, одержимых лестию всеведения и гордынею усовершенствования церкви, яко волки, во облике овец пришедшия, прозрел еси, к свету отцепреданныя православныя веры паству твою наставлял еси Богомудре, за еже и страдания претерпел еси, и от Бога, яко исповедник истинен, прославлен еси, святе Николае.
Благочестия рвением распалаемь, поругания и досады, заточения и изгнания претерпел еси, поминая Господа и Спаса неповинныя страсти, нашего ради спасения претерпевшаго. Сего ради того помощию победил еси враги видимыя и невидимыя на тя вооружившиеся, ухищрения тех сокрушил еси и паству твою во правоверии утвердил еси, собою образ показуя, и путь ко спасению возвещая и от злых пременение подавая.
Непрестанно врученное ти наследие церковное в Духе Святом о Христе поучая, на живоносных закона Божия и любве пажитях словесное стадо твое упасл еси и богоприятным молитв твоих кадилом вся пределы Казахстанския облагоухал еси, да явится во стране сей благоприятен плод спасительнаго сеяния Христова и пшеница добрая усокровиществуется во хранилища Небеснаго Домовладыки.
Богородичен: Предстательницу непостыдну и Заступницу тверду имуще Тя, Пречистая, неудобства всякого избавляемся и печали, и огорчения.
П е с н ь 6-я
Ирмос: Молитву пролию ко Господу/ и тому возвещу печали моя,/ яко зол душа моя исполнися/ и живот мой аду приближися,/ и молюся, яко Иона:/ от тли, Боже, возведи мя.
Кротких глагол твоих вещании и образом добродетельнаго жития твоего, святе, обширная паства твоя поучашася в Духе Божественном тобою мертвой убо быти греху, живой же Господеви, да и на небеси в блаженней вечности с тобою в радости Божественней водворится, священнотаинниче.
По стопам апостолов Христовых непорочно ходяща, зряху тя духовныя чада твоя, священноначальниче Николае, отче наш, и пророчества дар в тебе видяще и сокровище исцелений недугов душевных и телесных, тя знающе с верою и любовию притекаху к тебе, яко врачу скоромилостиву.
В преддверии испытания Церкви своея устрояет тя Господь архиереем быти, святителям древним земли русския добрыми и благими нравы подобна, да, егда буря безбожия, попущением Его, сокрушати будет видимые и незримые храмы, на песце самомнения и превозношения сооруженныя, утвердиши в терпении иже на недвижемем камени веры тверды и смирения духовное свое строение возвигоша.
Богородичен: Буря безмерных согрешений смущает помраченный ум мой, Богоневестная Дево, и во глубину отчаяния погрузити тщится. Но ты, Всеблагая и Многомилостивая яко благих виновная, даждь ми тихия покаяния пристани благоуспешно достигнути.
Кондак, глас 8-й.
Избранный от Предвечнаго Архиерея и Церкви Зиждителя, данный Казахстану ходатаю изрядный и заступниче пречудный, святителю Николае, ублажая подвиги и труды твоя, любве ради Господа тобою подъятыя, восхваляем дивнаго во святых Своих Бога нашего, давшаго тебе благодать величия Своего и научившаго нас любовию пети тебе: Радуйся, святе Николае, Христов исповедниче и Казахстанский чудотворче.
И к о с :
Пение благодарственное Пресвятей Троице вси православные, на обширных Казахстанских просторах живущия, взывают, яко благоволи даровати нам тебе, святе, пастыря добра и молитвенника благомощна, и притекающе к раце святей твоей, усердно просят: моли о нас Всеблагаго Бога, да, яко Судия и Мздовоздаятель праведнейший, не отвратит лица Своего от нас недостойных, присно согрешающих и преогорчевающих благоуторобие Его, но, яко Отец чадолюбивый накажет ны зде, во временнем житии нашем, да, отвергше тленная и временная, обрящем нетленная и вечная, благодарне вопиюще тебе таковая:
Радуйся, яко адамант точилом язв и болезней испытанный.
Радуйся, яко злато в горниле огненных искушений очищенный.
Радуйся, прещений лютых не убоявыйся.
Радуйся, и самыя смерти не устрашивыйся.
Радуйся, странствия Владычня и безсмертныя трапезы Его приобщивыйся.
Радуйся, яко звездо лучезарная, над Казахстанскою страною возсиявый.
Радуйся, во вся концы ея свет благодати Божия пролиявый.
Радуйся, благий вертоградарю, сад веры благочестивыя во стране сей насадивый.
Радуйся, поточе сладости, водою благочестия паству твою напоивый.
Радуйся, миром Христовым и богоприятных молитв твоих кадилом просторы Казахстанския облагоухавый.
Радуйся, яко Божию изволению последуя, инославныя мусульмане тебе со усердием служаху.
Радуйся, яко и ты онем любовию теплою всегда благодеял еси.
Радуйся, святе Николае, Христов исповедниче и Казахстанский чудотворче
П е с н ь 7-я
Ирмос: От Иудеи дошедше, отроцы/ в Вавилоне иногда/ верою Троическою в пламень пещный попраша, поюще:/ отец Боже, благословен еси.
В гонениях лютых искушен быв, по слову апостольскому, искушаемым Богодарованный помощник явился еси, многострадальне. Иереям, в темнице смертною мукою томящимся, в сонном видении представ, утешение и ободрение духовное и телесное подал еси, наставляя их со упованием пети: отец наших Боже, благословен еси.
Фарисейскаго обновленческаго нечестия отвергшися, Христово смирение всегда во уме и сердце твоем имел еси и единство церковное нерушимо хранил еси, священноначалию истинному всегда сыновнее послушание воздавая, тем же и нас в кротости и смирении утверди, да до скончания жития своего сынами и дщерьми Единыя, Святыя, Соборныя, Апостольския Церкви Христовы будем и блажества вечнаго с тобою, пастырю наш, наследницы явимся, поюще: отец наших Боже, благословен еси.
Человеколюбцу Богу прилежно молитвы вознося Заступницу Усердную рода христианского Матерь Божию всегда помощницей имея, ищущим избавления от телесных недугов прежде духовную пищу предлагал еси, наставляя из глубины души радостно пети: отец наших Боже, благословен еси.
Богородичен: Пресвятая Дево и Пренепорочная Мати, Бога плотоносна на спасение мира рождшая, от грехов всяческих и скорбных обстояний, яко Скоропослушница чтущия Тя спасая, о Тебе вопиющия: отец наших Боже, благословен еси.
П е с н ь 8-я
Ирмос: Седмерицею пещь/ халдейский мучитель/ Богочестивым неистовно разжже,/ силою же лучшею спасены, сия видев,/ Творцу и Избавителю вопияше:/ отроцы благословите,/ священницы, воспойте,/ людие, превозносите во вся веки.
С ревностью равноапостольною разсеянную по казахстанским просторам боголюбивую паству твою посещая, непрестанно во благочестии сию наставлял еси и в терпении утверждая, научал едиными усты и единым сердцем воспевати: отроцы благословите, священницы воспойте, людие, превозносите Христа во веки.
Щедраго и всемилостиваго Господа рабе благий и верный и служителю благоприятный был еси, присноблаженне святителю и исповедниче Христов Николае. Научи и нас, в добродетели убогих, течение жития своего в трезвении, послушании и благочестии проходити, в чистоте сердца принося хвалебную песнь: отроцы благословите, священницы воспойте, людие, превозносите Христа во веки.
Богородичен: Тя, красную Палату и всечестный Сосуд всех Царя, Пресвятая Владычице, воспеваем, спасеннии Тобою, Дева Чистая, да и нас храмы быти нерукотворенны и с Тебе Рождшемуся и очистившему всякую скверну и злобу сопротивную явиши поющия: отроцы благословите, священницы воспойте, людие, превозносите Христа во веки.
П е с н ь 9-я
Ирмос: Устрашися всяк слух/ неизреченна Божия снизхождение,/ яко Вышний волею сниди даже и до плоти,/ от девическаго чрева быв Человек,/ Темже Пречистую Богородицу, вернии, величаем.
Постничества и воздержания правило нерушимо храня, непрестанно молитвою и чистотою сердца Христа Распята и Воскресша в себе живуща со Отцем и Духом Святым имел еси и во ограду избранников Пречистыя Матери Его себе вчинил еси, блаженне Николае. Темже по отшествии твоем Всеблагая Вратарница, двери райския верным отверзающая, во Иерусалим новый и вечный вход отверзла ти, да со всеми святыми Единосущныя Троицы державу поеши радостно во веки.
Легко, яко орел, крылома веры чистыя и благочестия непорочнаго небесную высоту достигл еси, Богоносе отче Николае, почесть горния славы прияв от Судии Праведнейшаго и Мздовоздаятеля. Но, любве ради несокрушимыя к пастве твоея, показа нам Господь цельбоносныя мощи твоя, источаюшия исцеления с верою к ним приходящим. Тем же молим, помяни нас, верою и любовию чтущих тя, да выну всесветлую и всечестную пямять твою достойно ублажаем.
Аще и малое от убогаго усердия приносимое тебе ныне, святе, благохваление приими, яко же две лепты оныя вдовицы прият Христос Господь, и нелишенны нас сотвори твоих благодеяний и даров и прегрешениям нашим прощение у Господа испроси, да тя прославим, милостиве, во веки.
Богородичен: Пощади и помилуй падшее создание Твое, Спасе, Рождшую Тя Матерь сохранив неврежденну, и благомощными ея молитвами, егда сядиши судити всяческим, вечнаго осуждения избави мя, яко Безгрешен и яко Милостивый Бог и Человеколюбец.
Светилен, глас 7-й :
Боготочною кровию, на Кресте излиянною, и тою искупившаго падшее создание Свое от греха, проклятия и вечныя смерти, верою зря волею распеншагося за ны Владыку и Подвигоположника нашего и усердне к Нему любовию горя, всем житием твоим провещал еси: мне, еже жити – Христос, а смерть - приобретение Христа, Ему же на небесех во славе вечней предстоя, моли спастися благочестно ти воспевающим: Радуйся, святе Николае, Христов исповедниче и Казахстанский чудотворче.
Слава, и ныне, Богородичен.
По Бозе упование имуще на Тя, Пречистая Богородице, молимся Ти прилежно, ко иже из Тебе Рождшемуся мольбами, невредимы сохрани нас и спаси души наша.
На хвалитех стихиры, глас 2-й
Киими похвалами/ воспоем в добродетелях преславна иерарха,/ венцем чистаго исповедничества украшеннаго,/ болезнующих телом и душею покаянием врачующа,/ милостями и человеколюбием дарованными от Бога,/ Его же непрестанно подражая,/ молит подати нам велию милость.
Киими песненными добротами/ восхвалим архипастырских исправлений красоту./ Столпа Церкви непоколебима,/ Православия исповедника истиннаго,/ богоподражательным своим житием Казахстанския митрополии просветившаго концы,/ его же, яко вернаго служителя прослави Христос Бог,/подающий нам велию милость.
Киими благогласными словесы/ ублажим богоноснаго святителя и отца нашего Николая,/ за Христа мужественна страдальца,/ за паству свою дерзновенна ходатая,/ безбожия и злонравия обличителя,/ чудеса преславна силою Божиею совершающа/ и подающа от Христа Бога велию милость
Слава, глас 4-й:
Евангельских учений рачителя/ и страстем невинным Христа, Агнца Божия, подражателя,/ днесь обстояще священную раку,/ токи благодати приемлем независтно/ и, верою торжествующе, благодарне к нему взываем, глаголюще:/ Радуйся, Христов исповедниче, святе Николае,/ яко во тленнем сем житии/ нетленная благодати Божия/ в делании заповедей Христовых приобщивыйся/ и со апостолы, пророки, мученики и иерархи/ в Небеснем Царстве сликовствующим явивыйся,/ молися Господеви непрестанно/ благословение и мир Отечеству нашему даровати/ и душам нашим велию милость.
И ныне, Богородичен, глас тойже :
Богородице, всех Царице,/ православных христиан Похвало и непостыдное Упование еретичествующих раскольническая шатания разори,/ и благодатию Сына Твоего озари сердца,/ под вседержавный покров Твой притекающих.
Славословие великое. Тропарь.
Слава и ныне, Богородичен , глас 7:
Яко нашего воскресения сокровище,/ на Тя надеющиеся, Всепетая,/ от рова и глубины прегрешений возведи,/ Ты бо повинныя греху спасла еси,/ рождшая Спасение наше,/ Яже прежде рождества Дева, и в рождестве Дева,/ и по рождестве паки пребываеши Дева.
Отпуст.
Тропарь:
Тропарь
Яко светозарное светило, лучами Божественных дарований сияющее, яви тя Солнце Правды Христос Бог наш, тьму безбожия и злонравия далече отгоняюща, и зарями богопознания осияюща вопиющих верно: Радуйся, святе Николае, Христов исповедниче и Казахстанский чудотворче.
Кондак:
Кондак
Избранный от Предвечнаго Архиерея и Церкви Зиждителя, данный Казахстану ходатаю изрядный и заступниче пречудный, святителю Николае, ублажая подвиги и труды твоя, любве ради Господа тобою подъятыя, восхваляем дивнаго во святых Своих Бога нашего, давшаго тебе благодать величия Своего и научившаго нас любовию пети тебе: Радуйся, святе Николае, Христов исповедниче и Казахстанский чудотворче.
Молитва:
М о л и т в а
О предивный Человеколюбца Господа и Спаса нашего Сладчайшаго Христа Иисуса подражателю и стада словесных овец, от Него попечению твоему врученнаго, добрый пастырю!
Ты в житии твоем многоразличныя козни лукавых человек и духов тьмы испытал еси и благодатию Божиею, от матерних пелен тобою усердно в чистоте хранимою, явно тех победил еси. И нас, в добродетели убогих, сетей бесовских избави, да всегда во всем житии нашем делом, словом, умом и помыслы сердец наших, верно и непорочно послужим Единому Своему Владыце и Богу, яко и обещалися есмы при купели своего крещения Тому благоугождати. Ты паче всех земных благ Сладчайшаго Господа возлюбил еси и Тому чрез все житие добре последовал еси, угодникам Его всеусердно подражая, Божественными учении и благодатию не свою токмо душу питающи, но и множество людей от тьмы неверия и лжеименнаго разума к Несозданному свету Единосущныя Троицы привел еси. Сия добре ведуще, молим тя, испроси у Христа Бога благодать просвещающую и освещающую нас, да ею осеняеми, в вере и благочестии, в подвизех любве и самоотвержения поживем и неленостно потщимся служити ближним в их нуждах и обстояниях, да предстательством твоим сподобимся непреткновенно кратковременное странствие жития нашего совершити и в мире и покаянии града вечныя радости Иерусалима Небеснаго достигнути и тамо, с тобою и всеми святыми, непрестанно воспевати Троицу Нераздельную, Едино Божество, Отца и Сына и Духа Всесвятаго, во веки веков. Аминь.
Акафист:
Акафист иже во святых отцу нашему Николаю, митрополиту Алма-Атинскому и Казахстанскому, исповеднику
Икос 1
Ангелов Творец и человеков спасения Совершитель, благоплодную чистоту твою душевную и телесную провидев, избра тя из начала Ангелом и предстоятелем быти Церкви Казахстанския, да посреде многомятежныя бури безбожия явит тя веры чистыя исповедника непоколебима и добродетелей христианских древо благосеннолиственное, рассеянныя чада церковныя ко благоутишной пристани Божественныя Тройческия любве собирающа. За еже благодарне взываем ти таковая:
Радуйся, Бога Отца Безначальнаго благоговейный служителю. Радуйся, Ипостаснаго Бога Слова неумолчный провозвестниче. Радуйся, Бога Духа Всесвятаго избранное жилище. Радуйся, Живоначальныя Троицы носило и похваление. Радуйся, узы и темницы за исповедание Христа восприявый. Радуйся, исповедованием святым соборища нечестивых отлучивыйся. Радуйся, гордыню бесовскую и самочиние во обновленчестве прозревый. Радуйся, то, яко богопротивное хуление отвергший. Радуйся, послушание сыновнее к исповеднику Патриарху Тихону присно хранивый. Радуйся, богозаповеданное единство церковное, яко святыню нерушимо соблюдый. Радуйся, Богомудраго старца Патриарха Сергия собеседниче и сподвижниче. Радуйся, Боголюбезнаго Патриарха Алексия ревностный сослужителю и сотаинниче.
Радуйся, святе Николае, Христов исповедниче и Казахстанский чудотворче.
Кондак 2
Видяще тя, блаженне, от матерних пелен Богу возложена и из млада благодати Утешителя Духа Истины взыскующа, прославляем Бога, вся потребная ко спасению и наследию блаженства вечнаго нам подающаго, поя Ему: Аллилуия.
Икос 2
Разум свой непрестанно горе к престолу Пресвятыя Троицы вознося, светом истиннаго богопознания душу твою исполнил еси, имже и врученное ти стадо словесных Христовых овец просвещал еси. За еже приими от нас похвалы сия:
Радуйся, в светозарный день Пасхи Христовы, яко сын радости и утешения рожденный. Радуйся, от благочестивых родителей Феодосием, яко Богом данный, нареченный. Радуйся в купели крещения во Христа облеченный. Радуйся, печатию Духа Святаго во святем помазании таинственне запечатленный. Радуйся, благочестием и молитвами родителей в творении заповедей Господних утвержденный. Радуйся, яко соблюл еси Божественное семя, благонравием родительским всеянное в сердце твоем. Радуйся, повелением Божиим в Преславную Нилову пустынь вселивыйся, да добродетелей сокровище преобрящеши. Радуйся, имя Николая Чудотворца, яко миро свыше излиянное, во иночестве воспреемый. Радуйся, волею твердою воли своея совлекшийся и всего себе воле Божией предавый. Радуйся, совершенным послушанием росою Святаго Духа пламень страстей угасивый. Радуйся, чистотою сердца твоего Сладчайшего Господа Иисуса созерцавый. Радуйся, внутреннею красотою Креста Христова душу твою озаривый.
Радуйся, святе Николае, Христов исповедниче и Казахстанский чудотворче.
Кондак 3
Силу, данную ти свыше, к служению апостольскому тя призывающую, в хиротонии у раки цельбоносных мощей Черниговскаго святителя и чудотворца Феодосия сердцем кротким и смиренным восприял еси, радуяся. И Подвигоположника Христа Иисуса без боязни и страха ложнаго чисте в роде сем, прелюбодейнем и грешнем, исповедал еси, непрестанно воспевая Ему: Аллилуия.
Икос 3
Имуще сердце твое, яко добрую почву, к восприятию благаго семене Слова Божия всегда отверстым, вся мира сего красная ни во что же вменив, неуклонно шел еси по стопам Христа, зовуща: аще кто хочет в след Мене идти, да отвержется себе и возьмет крест свой, и в след мене да идет. Сего ради ублажаем тя похвалы сими:
Радуйся, любезная и красная мира сего презревый. Радуйся, небесная и нетленная сокровища вожделевый. Радуйся, тесный путь спасения от юности возлюбивый. Радуйся, силою свыше на подвиг крестоношения облеченный. Радуйся, мучений от нечестивых за исповедание истиннаго Бога не устрашивыйся. Радуйся, жизнь твою за веру отеческую положити не отрекийся. Радуйся, страданий за веру и Церковь, яко сокровища всебогатаго взыскавый. Радуйся, с веселием уготовавыйся к принятию ран за Христа. Радуйся, в разоренной обители Саровской заточения и лишения лютая радостне претерпевый. Радуйся, сия, яко сладостнейшее келейное послушание преподобному Серафиму восприявый. Радуйся, Христа в непосрамленном уповании своем споборствующа себе обретый. Радуйся, венец чистаго исповедничества стяжавый.
Радуйся, святе Николае, Христов исповедниче и Казахстанский чудотворче.
Кондак 4
Буря бесовския ярости, грехов ради и охлаждения христианския любве в роде человеческом, попущением Божиим превеликою силою устремися на Церковь Русскую, да слабоверныя и малодушныя, иже на песце самоугодия воздвигоша храмины душ своих, сокрушит, а иже на недвижимем камени веры и долготерпения духовное строение свое во благочестии, Богу содействующу, созидают подвигнет громогласне в веселии духовнем пети: Аллилуия.
Икос 4
Слыша и видя премногую твою добродетель и непоколебимую верность Святей Церкви, яко злато чистейшее в гонениях лютых возсиявшия, многострадальная паства, на безкрайних Казахстанских просторах, яко на едину от многих Голгоф Святыя Руси возшедшая, со благодарением всеблагому Божию смотрению, тако о ней благоволившему, во умилении и радости единем сердцем и едиными усты среташа тя звании сими:
Радуйся, яко адамант точилом язв и болезней испытанный. Радуйся, яко злато в горниле огненных искушений очищенный. Радуйся, прещений лютых не убоявыйся. Радуйся, и самыя смерти не устрашивыйся. Радуйся, странствия Владычня и безсмертныя трапезы Его приобщивыйся. Радуйся, яко звездо лучезарная, над Казахстанскою страною возсиявый. Радуйся, во вся концы ея свет благодати Божия пролиявый. Радуйся, благий вертоградарю, сад веры благочестивыя во стране сей насадивый. Радуйся, поточе сладости, водою благочестия паству твою напоивый. Радуйся, миром Христовым и богоприятных молитв твоих кадилом просторы Казахстанския облагоухавый. Радуйся, яко Божию изволению последуя, инославныя мусульмане тебе со усердием служаху. Радуйся, яко и ты онем любовию теплою всегда благодеял еси.
Радуйся, святе Николае, Христов исповедниче и Казахстанский чудотворче.
Кондак 5
Боготочною кровию, на Кресте излиянною, и тою искупившаго падшее создание Свое от греха, проклятия и вечныя смерти, верою зря волею распеншагося за ны Владыку и Подвигоположника нашего и усердне к Нему любовию горя, всем житием твоим провещал еси: мне, еже жити – Христос, а смерть – приобретение Христа, Ему же непрестанно воспевал еси: Аллилуия.
Икос 5
Видевше, в немногих храмах, подобно оазисам в бескрайней безбожия пустыне стоящих, паству твою у источников истиннаго богопочитания и благочестия пиющую воду живу, апостолам Христовым соревнуя, силою Божиею превозмогая немощи и болезни твоя, благовременне и безвременне усердно сию посещал еси, назидая в вере, укрепляя в надежде и утверждая в любви. Сего ради вернии научишася воспевати тебе таковая:
Радуйся, Евангелия Царства Небеснаго проповедниче благогласный. Радуйся, винограда Христова делателю неутомимый. Радуйся, богомудрыми твоими словесы многи в разуме просвещаяй. Радуйся, благодати Апостольския наследниче, от адовых уз тайнодейственне нас свобождаяй. Радуйся, архипастырю благосердый, любовию и кротостию своею вся покрываяй. Радуйся, Владыко прелюбимый, бедствующия защищаяй. Радуйся, милосердия неисчерпаемое сокровище. Радуйся, ищущим спасения готовый споспешниче. Радуйся, милостивый скорбящим помощниче. Радуйся, обилием любве твоея вся удививый и многия друзи себе стяжавый. Радуйся, пастве твоея пособниче богодарованный. Радуйся, яко тобою Имя Пресвятыя Троицы в Казахстанстей стране прославляется.
Радуйся, святе Николае, Христов исповедниче и Казахстанский чудотворче.
Кондак 6
Проповедует богоспасаемый град Алма-Ата и богохранимый Казахстан тя, духоносе, пастыря добра, душу свою за наследие Христово положившаго и дарами чудодейственныя благодати от Небеснаго Домовладыки прославленнаго, и научает верныя пети всех благих подателю Богу: Аллилуия.
Икос 6
Возсия свет твоих добродетелей и Христоподражательныя любве твоея всем ищущим спасения вечнаго и путем скорбным и тернистым со упованием и непреклонною верою в силу Божию, в немощи человеческой совершающуюся, шествующим. Иже, благодаряще Бога, даровавшего им зрети в тебе благодать, юже апостол языков Павел исповеда, вопия: вся могу о укрепляющем мя Христе Иисусе, во умилении возглашают ти таковая:
Радуйся, тезоименному мученику Феодосию в твердом исповедании веры во всем житии твоем подражавый. Радуйся, Николаю Угоднику в простоте и кротости соревновавый. Радуйся, сего по Бозе и Богородице перваго заступника рода христианскаго быти почитавый. Радуйся, купно с ним Христоподражательным смирением и любовию победителем народа явивыйся. Радуйся, соименный храм его, посреде бури безбожнаго мятежа устоявший, во граде Алма-Ате благолепно обновивый. Радуйся, невесту прекрасную, Варвару великомученицу, всеблагоговейно почитавый. Радуйся, у рацы цельбоносных мощей ея во время молитвы от внезапныя смерти избавленный. Радуйся, в похвалу и честь ея престол благодати во граде Алма-Ате воздвигнувый. Радуйся, древнюю икону ея Божиим изволением чудесно обретый и в кафедральном храме поставивый. Радуйся, у нетленных мощей Святителя Иннокентия во граде Иркутске служа, твердости веры и ревности Божия научивыйся. Радуйся, добродетелей дивнаго чудотворца Черниговскаго Феодосия равночестное проявление. Радуйся, яко их же на земле в молитвах призывал еси, на небесех ныне в лице собеседников своих имееши.
Радуйся, святе Николае, Христов исповедниче и Казахстанский чудотворче.
Кондак 7
Хотя человеколюбец Господь преудобренную токами крови новомучеников Российских Казахстанскую землю явити доброплодною нивою евангельского сеяния, дарова тя, блаженне, христоименитым людем страны сия в помощь, покров и защиту, да житию твоему подражая, ученми твоими назидаеми и благомощными молитвами твоими сохраняеми в радости поют Богу: Аллилуия.
Икос 7
Новаго тя гражданина Иерусалима Небеснаго познаша духовныя чада твоя, егда чистою и боголюбезною душею твоею возшел еси в небесныя кровы, идеже Всеблагая Вратарница, двери райския верным отверзающая, Пречистая Матерь Господа Небеси и земли ввела тя в светозарный круг друзей Христовых, за благоуханныя молитвы твоя непрестанно возносиши за почитающих любовию святую память твою и благодарне вопиющих:
Радуйся, час отшествия твоего к Богу предузнавый. Радуйся, прежде онаго радости Святыя Пасхи на земли духовне насытивыйся. Радуйся, явлением преподобных Антония и Феодосия Печерских пред кончиною твоею утешенный. Радуйся, во время молитвы дух твой в руце Божии предавый. Радуйся, нищетою духовною царство Божие стяжавый. Радуйся, кротости ради богоблаженную землю обетования унаследовавый. Радуйся, уничижением в кратковременном житии славу вечную восприявый. Радуйся, яко исповеда Тя Христос пред Отцем Своим Небесным. Радуйся, яко и пред ангелы Своими Господь сил прославил тя. Радуйся, яко Честнейшую Херувимов и Славнейшую без сравнения Серафимов Деву Богородицу с лики сил небесных воспеваеши. Радуйся, на небеси присно торжествуяй. Радуйся, на земли преславно чудодействуяй.
Радуйся, святе Николае, Христов исповедниче и Казахстанский чудотворче.
Кондак 8
Странное и преславное торжество явися в престольном граде Алма-Ате, егда многотрудное тело твое, к месту упокоения рукама иереевыма, яко по воздуху носимое, посреде безчисленнаго моря людскаго прощальное шествие совершаше, научая верных единодушно претворяти надгробное рыдание в хвалебную песнь Богу: Аллилуия.
Икос 8
Весь исполнен быв любве Божественныя, явился еси Святаго Духа нерукотворенный храм, дарами благодати преукрашенный: душу бо твою за врученное ти стадо, полагая и всем духовне во всем угождая, не своея, но ближняго пользы искал еси, да всяко некия спасеши. Не забуди ныне и нас, в добродетели убогих и твоего наставления ищущих, да зовем ти:
Радуйся, служителю Божий, гонения правды ради смиренно претерпевый. Радуйся, розго винограда Христова, мног плод в пособие православным творящая. Радуйся, благовестителю света Христова, омраченная очеса и сердца народа просвещаяй. Радуйся, провозвестниче Благодати, сумняшихся в вере словом Божиим утверждаяй. Радуйся, пастырю Богомудрый, православное юношество ко спасению наставляяй. Радуйся, молящихся тебе дарами Духа Святаго обогащаяй. Радуйся, молитвою твоею по воздуху плавающих от внезапныя смерти сохраняяй. Радуйся, от губительных землетрясений избавляяй. Радуйся, града Алма-Аты славо и ограждение. Радуйся, всех градов и весей Казахстанских страже неусыпный и теплый хранителю. Радуйся, яко имя твое по всей стране нашей от конца в конец прославляется. Радуйся, яко чудесы твоими инославные к православию обращаются.
Радуйся, святе Николае, Христов исповедниче и Казахстанский чудотворче.
Кондак 9
Весь еси, блаженне отче Николае, в вышних присно во обителех райских, в селениях праведников водворяешися, но и нас, паству твою, тебе тепле почитающую, не оставляеши, наставляя к разуму Божественному и деланию усердному заповедей Христовых и всякая благополезная прошения наша исполняеши, подвизая нас пети хвалебную песнь Богу: Аллилуия.
Икос 9
Ветия многовещанныя превзошел еси духовною силою кротких вещаний твоих, святе, неустанно пастве твоей проповедуя Христа Распята и Воскресша, Ему же подражая, сию други своими величал еси, увещая всякому греху умирати, живым же во исполнении заповедей Божиих быти. Мы же, благоуветливый глас словес твоих благодарным сердцем объемлюще, вопием тебе таковая:
Радуйся, алтаря Господня непорочный служителю. Радуйся, благолепия церковнаго усердный рачителю. Радуйся, преданий апостольских верный хранителю. Радуйся, добрых нравов и любве к Богу и ближним насадителю. Радуйся, селения Господня – храмы святые паче всех селений земных возлюбивый. Радуйся, Божественныя службы и Христова учения паче всех деяний взыскавый. Радуйся, послушанием и смирением врага рода человеча победивый. Радуйся, агнче незлобиве, никому же зла за зло воздававый. Радуйся, веры православныя благовестниче усерднейший. Радуйся, Церкве Христовы учителю изряднейший. Радуйся, звездо пресветлая, к Солнцу Правды Христу Иисусу всех путеводящая. Радуйся, свеще неугасимая, у престола Господа славы присно горящая и нас огнем любве Божия воспламеняющая.
Радуйся, святе Николае, Христов исповедниче и Казахстанский чудотворче.
Кондак 10
Спасти хотя души человеческия, благое иго Христово и легкое бремя Его вседушевно на себе восприял еси, богоносе. В гонениях же многих верность и твердость в терпении проявил еси, да сам, искушен быв, сможеши искушаемым нам помощи, да и мы принесем Христу плод веры в добродетели, в добродетели же разум, в разуме же воздержание, в воздержании же терпение, в терпении же благочестие, во благочестии же братолюбие, в братолюбии же любовь, и воспоем Ему: Аллилуия.
Икос 10
Стена твердая и прибежище благоутишное всем с молитвою теплою и верою несомненною к заступлению твоему притекающим явился еси, ищущим спасения токи благодати Божия источая, от них же пролей и мне струю приснотекущую, яко да и аз со всеми воспою ти:
Радуйся, Бога истиннаго служителю. Радуйся, бесов прогонителю. Радуйся, ненадежных надеяние. Радуйся, отчаявающихся утверждение. Радуйся, даром прозрения наделенный. Радуйся, силою Божиею преславно чудодействуяй. Радуйся, немощей душевных и телесных целителю скоромилостивый. Радуйся, нераскаянных грешников из глубины погибели изымаяй. Радуйся, оставленных врачами на своя руце принимаяй. Радуйся, врачу безмездный туне врачевания всем подаваяй. Радуйся, в сонном видении иереев, в темнице страждущих, утешивый. Радуйся, добрыми твоими делы вся ко прославлению Отца Небеснаго призываяй.
Радуйся, святе Николае, Христов исповедниче и Казахстанский чудотворче.
Кондак 11
Пение благодарственное Пресвятей Троице вси православные, на обширных Казахстанских просторах живущия, взывают, яко благоволи даровати нам тебе, святе, пастыря добра и молитвенника благомощна, и притекающе к раце святей твоей, усердно просят: моли о нас Всеблагого Бога, да, яко Судия и Мздовоздаятель праведнейший, не отвратит лица Своего от нас недостойных, присно согрешающих и преогорчевающих благоутробие Его, но, яко Отец чадолюбивый накажет ны зде, во временнем житии нашем, да, отвергше тленная и временная, обрящем нетленная и вечная, со всеми святыми поя Ему: Аллилуия.
Икос 11
Светозарное светило, лучами христианских добродетелей сияющее, явился еси, небо церковное украшая, богомудре, и всем, блуждающим во тьме неверия, сомнения, маловерия и нечестия луч надежды на спасение подаваяй и к Солнцу Правды Христу Иисусу путеводяй, да во свете заповедей Его со всеми верными веселыми ногами шествуя, радостне тебе воспоют:
Радуйся, выну себе быти служителя Христова исповедовавый. Радуйся, исповеданием сим веселие Церкви Святей даровавый. Радуйся, в вертограде Господни от утра до вечера жизни твоея добре потрудивыйся. Радуйся, яко град, верху горы стояй, не могий укрытися. Радуйся, во многотруднем телеси велию силу духа явивый. Радуйся, крест богоугоднаго жития до конца в терпении понесый. Радуйся, в крестоношении твоем залог вечнаго блаженства восприявый. Радуйся, сего ради славу Триединаго Божества лицом к лицу на небеси узревый. Радуйся, благодатию Духа Святаго тело твое просветивый. Радуйся, тоюжде благодатию и по смерти нетленным его сохранивый. Радуйся, прославлением мощей твоих всех нас радости духовныя преисполнивый. Радуйся, нетлением мощей твоих зарю общаго воскресения нам показавый.
Радуйся, святе Николае, Христов исповедниче и Казахстанский чудотворче.
Кондак 12
Благодатию Божиею в непрестанном творении заповедей Христовых обогативыйся, по отшествии твоем от земных наипаче к трисолнечному престолу Троицы Пресвятыя приближивыйся, но и от паствы твоея духом любве не отступивый, и во вся концы Казахстанския страны животочная токи благодати Божия источаеши, вдыхая в сердца верных хвалебную песнь: Аллилуия.
Икос 12
Поем твердую веру и несокрушимое терпение твое, величаем равноапостольныя труды благовестия твоего, ублажаем блаженную кончину твою, славим сострадание и скорое заступление и помощь твою, чтим святую память твою и воспеваем ти похвальная сия:
Радуйся, благочестия святоотеческаго изящный подражателю. Радуйся, веры православныя дивное украшение. Радуйся, яко Иов многострадальный, всего себе воле Божией предавый. Радуйся, яко праотец Авраам, несумнену веру во всех испытаниях показавый. Радуйся, яко Даниил, муж желаний, премудрость Божию разумети вожделевый. Радуйся, яко Илия фесвитянин, молитвою теплою дождь от зноя страждующим низведый. Радуйся, яко Елисей, сугубую благодать от Бога восприявый. Радуйся, яко боговидец Моисей, чистым сердцем Бога зревый. Радуйся, яко богоглаголивый Исаия, тайны Божия верным возвестивый. Радуйся, Давидово покаяние явивый и проповедовавый. Радуйся, имже человеколюбец Христос прославися. Радуйся, имже зловредный велиар посрамися.
Радуйся, святе Николае, Христов исповедниче и Казахстанский чудотворче.
Кондак 13
О, пастырю наш предобрый, кротостию и смирением в сети любве Божия души людския уловляяй, приими малое сие благодарение, в похвалу тебе приносимое, и непрестани присно ходатайствовати о нас пред Отцем нашим Небесным, да, избывше в житии сем хитросплетенных сетей вражиих и прелести бесовския, воздушных мытарств князя злобы и вечныя геенны огненныя избавимся и сподобимся в небесных селениях с тобою и всеми святыми пети Богу: Аллилуия.
Трижды.
Икос 1
Ангелов Творец и человеков спасения Совершитель, благоплодную чистоту твою душевную и телесную провидев, избра тя из начала Ангелом и предстоятелем быти Церкви Казахстанския, да посреде многомятежныя бури безбожия явит тя веры чистыя исповедника непоколебима и добродетелей христианских древо благосеннолиственное, рассеянныя чада церковныя ко благоутишной пристани Божественныя Тройческия любве собирающа. За еже благодарне взываем ти таковая:
Радуйся, Бога Отца Безначальнаго благоговейный служителю. Радуйся, Ипостаснаго Бога Слова неумолчный провозвестниче. Радуйся, Бога Духа Всесвятаго избранное жилище. Радуйся, Живоначальныя Троицы носило и похваление. Радуйся, узы и темницы за исповедание Христа восприявый. Радуйся, исповедованием святым соборища нечестивых отлучивыйся. Радуйся, гордыню бесовскую и самочиние во обновленчестве прозревый. Радуйся, то, яко богопротивное хуление отвергший. Радуйся, послушание сыновнее к исповеднику Патриарху Тихону присно хранивый. Радуйся, богозаповеданное единство церковное, яко святыню нерушимо соблюдый. Радуйся, Богомудраго старца Патриарха Сергия собеседниче и сподвижниче. Радуйся, Боголюбезнаго Патриарха Алексия ревностный сослужителю и сотаинниче.
Радуйся, святе Николае, Христов исповедниче и Казахстанский чудотворче.
Кондак 1
Избранный от Предвечнаго Архиерея и Церкви Зиждителя, данный Казахстану ходатаю изрядный и заступниче пречудный, святителю Николае, ублажая подвиги и труды твоя, любве ради Господа тобою подъятыя, восхваляем дивнаго во святых Своих Бога нашего, давшаго тебе благодать величия Своего и научившаго нас любовию пети тебе: Радуйся, святе Николае, Христов исповедниче и Казахстанский чудотворче.
Молитва
О предивный Человеколюбца Господа и Спаса нашего Сладчайшаго Христа Иисуса подражателю и стада словесных овец, от Него попечению твоему врученнаго, добрый пастырю! Ты в житии твоем многоразличныя козни лукавых человек и духов тьмы испытал еси и благодатию Божиею, от матерних пелен тобою усердно в чистоте хранимою, явно тех победил еси. И нас, в добродетели убогих, сетей бесовских избави, да всегда во всем житии нашем делом, словом, умом и помыслы сердец наших, верно и непорочно послужим Единому Своему Владыце и Богу, яко и обещалися есмы при купели своего крещения Тому благоугождати. Ты паче всех земных благ Сладчайшаго Господа возлюбил еси и Тому чрез все житие добре последовал еси, угодникам Его всеусердно подражая, Божественными учении и благодатию не свою токмо душу питающи, но и множество людей от тьмы неверия и лжеименнаго разума к Несозданному свету Единосущныя Троицы привел еси. Сия добре ведуще, молим тя, испроси у Христа Бога благодать просвещающую и освещающую нас, да ею осеняеми, в вере и благочестии, в подвизех любве и самоотвержения поживем и неленостно потщимся служити ближним в их нуждах и обстояниях, да предстательством твоим сподобимся непреткновенно кратковременное странствие жития нашего совершити и в мире и покаянии града вечныя радости Иерусалима Небеснаго достигнути и тамо, с тобою и всеми святыми, непрестанно воспевати Троицу Нераздельную, Едино Божество, Отца и Сына и Духа Всесвятаго, во веки веков. Аминь.
