Гимнография свт. Луки исп., архиеп. Симферопольского (1961)
СЛУЖБА И АКАФИСТ СВЯТИТЕЛЮ ЛУКЕ, ИСПОВЕДНИКУ, АРХИЕПИСКОПУ КРЫМСКОМУ
НА ВЕЛИЦЕЙ ВЕЧЕРНИ
На “На Господи воззвах”: стихиры на 8, глас 4.
Святителю Луко, Крымстей земли похвало, Церкве Православныя удобрение, веры жертва священная, исповедников честное и светоносное украшение, врачу благий и милостивый: моли от болезней и бед избавитися верою творящим всечестную память твою.
Исповедник священен, и святитель благоприятен, и архипастырь истинен Крымстей пастве, благочестия степень, столпе и утверждение Церкве, святителей доброта, источник исцелений, Луко, был еси. Темже тя ублажаем песньми духовными и божественное твое днесь совершаем торжество.
Божественный глас егда услышал еси, блаженне Луко, тогда, крест твой взем, последовал еси Христу и, любовию к Нему распалаемь, исповедник мужествен и святитель богомудрый был еси. Темже и райския селения наследовал еси Христу, Емуже трудился еси, Тому молися спасти и просветити души наша.
Ины стихиры. Глас 8.
С похвалами память твоя сотворяется светло, Святителю Луко, и радости наполняет православная чада земли нашея, яко правду возлюбльшаго, и многия подвиги твоего исповедничества архипастырь богомудрый явился еси и ныне благолепия красоту Небесного Царствия лицем к лицу зриши, пребогате.
Богомудре святителю отче Луко, имея душу милостивну, православною мудростию сияющую, любовь нелицемерную и сердце мужественно, апостолу Луке уподобился еси, во изгнаниих терпеливо пребывая, в нуждах и скорбех неоскудно утесняемь и прехождения присно творя, ныне же безпечальное и неизменное от Бога обрел еси селение и наслаждение.
Святителю Христов Луко, многи беды подъял еси в юзилищах заключаем, приобщающеся болезнем и напастем: прелести зиму теплотою Божественныя благодати разорил, и ныне ко Христу незаходимому сиянию вселился еси, молися даровати душам нашим мир и велию милость.
Слава, глас 8:
Святителю отче Луко пречудне, служителю Таин Божественных, делателю винограда Христова, веры утверждение, Церкве Православныя столпе непоколебимый, источниче исцелений обильный, Крымстей пастве теплый предстателю, моли спастися душам нашим.
И ныне, Богородичен, глас тойже:
Царь Небесный за человеколюбие на земли явися и с человеки поживе, от Девы бо Чистыя плоть приемый и из Нея прошедый с восприятием, Един есть Сын, сугуб естеством, но не Ипостасию. Темже, совершенна Того Бога и совершенна Человека воистинну проповедающе, исповедуем Христа Бога нашего: Егоже моли Мати Безневестная, помиловатися душам нашим.
Вход. Прокимен дне. И чтения.
1. Притчей чтение: “Память праведнагос похвалами, и благословение Господне на главе его...” (1-я святителю единому).
2. Премудрости Соломоновы чтение: “Праведницы во веки живут, и в Господе мзда их...” (2-я исповедникам).
3. Премудрости Соломоновы чтение: “Праведных души в руце Божией...” (1-я исповедникам).
На Литии стихиры, глас 6:
Иже благодатию Божественнаго Духа собрании днесь христолюбцы, лик составльше, поем песнь нову, память сотворяще святителя и исповедника Луки, и вси сошедшеся Спаса величаем и торжества виновнику молебне рцем: яко имый дерзновение у Царя Славы, моли избавитися вреда всякаго от души славящих тя.
Просветися житие твое добродетельными светлостьми, верныя просветил еси и тьму нечестия разгнав, истинное явился еси светозарное солнце, святителю преблаженне Луко, и ныне вселился еси, идеже сияет Свет Невечерний, и сын дне благодатию Духа Святаго быв, Темже светоносное твое прославление усердне совершающе, исповедниче, любовию почитаем.
Слава, глас 8:
Украшена добродетельми духовными, святителю исповедниче Луко, прослави тя Господь Бог житием и даром целения недугов. Днесь, блаженне, и нас молитвами твоими соблюди от всяких грехопадений, празднующих святую память твою, и со страхом и любовию припадающих к твоему гробу, и образ подобия твоего любезно целующих, не престай моляся за православныя люди, яко да Милостивый Господь спасет души наша.
И ныне, Богородичен, глас тойже:
Безневестная Дево, яже Бга неизреченно заченши плотию, Мати Бога Вышняго, Твоих рабов мольбы приими, Всенепорочная, всем подающи очищение прегрешений, ныне наша моления приемлющи, моли спастися всем нам.
На стиховне стихиры, глас 1:
Похвала еси земли Крымстей и граду Симферополю утверждение, щит и победа на сопротивныя, и всем нам помощник и заступник, и молитвенник о душах наших.
Стих: Уста моя возглаголют премудрость и поучение сердца моего разум.
Небесный круг звездами украшается, твой же ум, святителю Луко, Божественными просвещеньми облистаем, множества добродетелей собра тебе. Темже богоглаголивым языком своим, яко водою животворною Духа, напаяеши сердца, истаявша грехми, от глубины отчаяния возведи, премудре, Божие милосердие сим возвещая.
Стих: Услышите сия вси языцы, внушите вси живущии по вселенней.
Приидите вси людие, возрадуемся и возвеселимся днесь, в честный сей день прославления великаго угодника святителя Луки, славу и хвалу Богу воздадим, Давшему нам таковаго к Нему предстателя и молитвенника.
Слава, глас 6:
Днесь воистину подобает совершатися духовному торжеству, и славе, и хвале к Богу приноситися во святем храме сем, всем же радоватися духовне и веселитися, зря сего своего святителя Луки, в толицей славе у Бога пребывающа, и мощми своими верныя люди просвещающа. Сего ради ликуй и все православное множество, яко дарова нам Господь таковаго к Нему предстателя и молитвенника.
И ныне, Богородичен:
Богородице, Ты еси лоза истинная, возрастившая нам Плод Живота, Тебе молимся: молися, Владычице, со святителем Лукою помиловати души наша.
На благословении хлебов тропарь святителя дважды и Богородице Дево единожды.
Тропарь, глас 1:
Возвестителю пути спасительнаго, / исповедниче и архипастырю Крымския земли, / истинный хранителю отеческих преданий, / столпе непоколебимый, православия наставниче, / врачу богомудрый святителю Луко, / Христа Спаса непрестанно моли, / веру непоколебиму православным даровати / и спасение, и велию милость.
НА УТРЕНИ
На “Бог Господь” тропарь святителя дважды.
Слава и ныне, Богородичен глас 1:
Гавриилу вещавшу Тебе, Дево, радуйся, / со гласом воплощашеся всех Владыка / в Тебе, Святем Кивоте, / якоже рече праведный Давид, / явилася еси ширшая Небес, / поносивши Зиждителя Твоего: / слава Всельшемуся в Тя: / Прошедшему из Тебе: / слава Свободившему нас Рождеством Твоим.
По стихословии, седален, глас 3:
Новый светильник Церкви Христовой явился еси, Святителю Луко, и молитвенник теплый, яко и по смерти неотступно нас посещаеши. Темже и припадаем к тебе, святый угодниче Божий, моли о нас, любовию память твою почитающих, да избавимся от всех бед и напастей, и спасение улучим молитвами твоими.
Слава и ныне, Богородичен:
Богорадованная Владычице, святителем удобрение, праведным утверждение и верным всем похвало, спаси ны от бед, и скорбей, и лютых прегрешений предстательством и молитвами Твоими.
Седален 2-й из общей Минеи.
ПОЛИЕЛЕЙ
Величание: Величаем тя, исповедниче Христов святителю отче наш Луко, и чтим святую память твою ты бо молиши за нас Христа Бога нашего.
Псалом избранный: Услышите сия вси языцы...
По полиелеи седален, глас 4:
Всечестная и светоносная твоя память, Святителю Луко, радости всех исполни и веселия духовнаго, темже сошедшеся христоименитии людие, любовию восхваляюще труды твоя во святительстве и терпение в исповедничестве, милосердие к страждущим и исцеление от болезней, славим прославльшаго тя Господа. Егоже моли спасти всех любовию тя почитающих.
Слава и ныне, Богородичен:
Под кров Твой прибегаем, Пречистая Дево: мольбу убо принеси о нас к Человеколюбцу Богу, спастися рабом Твоим.
Степенна, 1 антифон 4-го гласа.
Прокимен, глас 1: Уста моя возглаголют премудрость, и поучение сердца моего разум.
Стих: Услышите сия вси языцы, внушите вси живущии по вселенней.
Евангелие от Иоанна, зач.35, от полу.
По 50-м псалме стихира, глас 6:
Тя ходатая и молитвенника благоприятна имамы, святителю отче наш Луко, ты бо молиши за вся православныя люди, яко да избавимся от недугов душевных и телесных, от бед и скорбей, и от всякаго навета вражия. Тем прославляем твою святую и честную память, зовуще: не престай молитися о душах наших.
Канон Пресвятей Богородице со ирмосом на 6.
Канон святителю на 8, егоже краегранесие:
СВЯТИТЕЛЮ ЛУКЕ УСЕРДНОЕ ПРИНОШЕНИЕ. Глас 8.
Песнь 1.
Ирмос: Дивному Богу величия принесем, и великолепно с нами да воспоет земля и небо ясно славу Его.
Святительский престол во граде Симферополе украсил светло, в немже пожив, яко Ангел, святым житием и учением Божественным освятил еси люди, да вси приносят величия Божия и поют славу Его.
Вседержителя и Господа о нас моли, святителю Луко, даровати нам оставление прегрешений, да с тобою дивному Богу величия принесем, и воспоем славу Его.
Явился еси ныне в памяти твоей Крымстей пастве, исповедниче Христов, столп непоколебимый и стена нерушимая, болящим утешение, грешников споручниче. Богу величия принося и воспевая славу Его.
Богородичен: Тя призывающим спасительное еси пристанище и покров, Богородительнице Пречистая, темже от души призываем Тя тепле: Владычице, спаси ны и научи нас дивному Богу величия приносити и воспевати славу Его.
Песнь 3.
Ирмос: Уподоби мя, Христе, умно горе Сионстей, возвысивый и утвердивый в надежди о Тебе и искапавый росу благодати, Человеколюбче.
Источил еси, святителю, учения реки благодатныя и всяку душу благочестивых напоил еси, многия исцелил еси и о всех усердне молился, да искапает росу благодати Своея Человеколюбец.
Труды твоими, яко добрый пастырь, святителю Луко, указал еси людем путь в Царство Небесное и за подвиги твоя от Бога венчан славою на небеси, Егоже моли, да ниспослет и нам росу благодати Своея, Человеколюбец.
Егда волею Божиею изгнание в Сибирь и темницы, и многия скорби наидоша на тя, тогда терпением мужемудренно вся победил еси, исповедав Христа, и моля Его, да источит на всех росу благодати Своея, яко Человеколюбец.
Богородичен: Любити убо Тя, Пречистая Богомати, и песнию прославляти Тебе научает нас великий Архангел и звати, Богоневесто, еже радуйся, яко Господь с Тобою: радуйся, Радосте Ангелов и всех человеков.
Седален, глас 8:
Ко Господу имея очи сердечныя, святитель явился еси Богоподобен и Крымскую паству преславно упасл еси, отгоняя полки безбожных палицею словес Божественных, темже по кончине благодать достойно наследовал еси, святителю блаженне. Сего ради вопием ти: моли Христа Бога грехов оставление даровати чтущим всечестную память Твою.
Слава и ныне, Богородичен:
Тя пристанище, и стену, и прибежище, и надежду, и покров, и заступление теплое обретше вернии, к Тебе притекаем и вопием прилежно, и зовем верно: помилуй, Богородице, уповающих на Тя и от прегрешений избави.
Песнь 4.
Ирмос: Всел еси на кони, апостоли Твоя, Господи, и приял еси рукама Твоима узды их, и спасение бысть еждение Твое верно поющим: слава силе Твоей, Господи.
Юже стяжал еси честною Твоею Кровию, Церкве Твоея, Христе, чада утверди и направи на путь мира, тако воздыхал еси к Сыну Божию, святителю отче наш Луко, преподобныя своя руце о пастве воздеюща.
Любы николиже отпадает, глаголет Божественный Дух устами апостола Павла. В твоих деннонощных трудах исцелений недужных, любовь твоя известися, угодниче Христов, и сию проявил еси в милосердии, непрестанно вдов питая и сирых, и немощных.
Ученьми, мудре святителю, стадо твое утвердил еси в вере и доброделанием твоим Церкви был исповедник и учитель Луко.
Богородичен: Крепость наша Ты еси, Пречистая Богомати, Твоими бо мольбами и святителя Луки, избавихомся вси от страстей, и бед, и обстояний, и недугов многообразных, Спасу Христу зовуще: слава силе Твоей, Господи.
Песнь 5.
Ирмос: Повеления Твоя просвещением, Христе Боже, яко Благ, показал еси, зане, Светодавче, от нощи утренююще, славу возсылаем.
Единицу несозданную богословил еси Троицу Святую Бога нашего и человеческаго естества состав в духе, душе и теле священными богословии твоими научил еси.
Умом чистым и писании духовными назидал еси, Богоглаголиве Луко, образ был еси всей богоданной пастве твоей, словом и житием, любовию, верою и чистотою.
Смотрением Божиим и святительским благословением рукою моею приносимое тебе и твоим трудом похваление, святителю Луко, не отрини, но приими и моли Христа Бога, да избавит мя шуияго стояния и сподобит Небеснаго Царствия Своего.
Богородичен: Едина Чистая, Богородительнице, не презри молений раб Твоих, приими сия молитвы ради угодника Твоего святителя Луки, и принеси ко престолу Сына Твоего, да спасет души наша.
Песнь 6.
Ирмос: Отвергл мя еси во глубины сердца морскаго, и видех чудеса Твоя, Господи.
Ризную худость имел еси, пребогате, вся бо своя неимущим раздавал, сироты и вдовыя питая, рачитель же сый Милостиваго Спасителя Христа быв.
Духовныя жизни всем людем страны нашея учитель был, благочестием украшаяся, гордыню посекл еси, блаженне, духовным мечем, пастыри назирая и утверждая.
На пажити Божественней труждаяся, архиерей сый, архипастырем нашим в молитвах способствуй, да право правят слово истины, Церковь Православную огради, страну нашу сохрани, веру в нас умножи, да славим Христа во веки.
Богородичен: Отроковице Богоизбранная, восхваляем Тя вси и верно молимся, Дево Марие: моление наше приими и прошения исполни.
КОНДАК, глас 1:
Якоже звезда всесветлая, добродетельми сияющи, / был еси святителю, / душу же равноангельну сотворил, / сего ради святительства саном почется, / во изгнании же от безбожных много пострадал / и непоколебим верою пребыв, / врачебною мудростию многия исцелил еси. / Темже ныне честное тело твое от земленных недр обретенное дивно / Господь прослави, / да вси вернии вопием ти: / радуйся, отче святителю Луко, / земли Крымстей похвало и утверждение.
ИКОС:
Исповедании священными подобствовав, сеятель был еси духовных добродетелей, нечестия же явился искоренителю, святителю Луко прехвальне, яко архипастырь и учитель жизнь совершив, к Небеси востекл еси и венец неувядаемый от Господа приял. Сего ради вопием ти: Радуйся, отче Святителю Луко, земли Крымстей похвало и утверждение.
Песнь 7.
Ирмос: В начале землю основавый и Небеса словом утвердивый, благословен еси во веки, Господи, Боже отец наших.
Елеем любве твоея помазал еси люди, иго Христово на рамо взем, последовал еси стопам Его, Святительски потрудился, слово Божие возвестил да прославляют верныя чада Сотворшаго вся, поя Господеви: благословен еси во веки Боже отец наших.
Пастырь добрый словесному стаду твоему, святителю Луко, был еси, душу твою за овцы положити готовый: темже и явился еси обидимым заступник непреоборимый, правды же ревнитель неустрашимый, сильных мира сего с любовию обличая и пасомых своих отечески вразумляя и наставляя, да верно воспевают Господа, Бога отец наших.
Радовахуся людие града Симферополя, зряще тебе светлостию сана святительскаго облечена и престолу благодати Божией предстояща, усердно о пастве молящагося. И, по апостолу, вся всем быв, да всех ко Христу приведеши и купно со всеми вопиеши: благословен еси во веки, Господи, Боже отец наших.
Богородичен: Радости Подательнице, Богородительнице Пречистая, верою славящия и от души поющия Тя, радости неизреченныя исполни и Света Невечерняго сподоби, Дево Богоблагодатная, Владычице.
Песнь 8.
Ирмос: Покрываяй водами превыспренняя Своя, полагаяй морю предел песок и содержай вся, Тя поет солнце, Тя хвалит луна, Тебе приносит песнь вся тварь, яко Содетелю всех во веки.
Имя твое, святителю Луко, якоже благоухание рая Божия по лицу всея земли нашея обносится, услаждая сердца верующих и призывая в радости духовней воспевати Содетеля всех во веки.
Ныне ни в зерцалех, ни в гаданиих добрых, лицем же к лицу Христа Господа зриши, вопия радостно тя Прославльшему Содетелю всех во веки.
О, иерарше Богомудре, священное скончал еси течение, священнейшую жизнь твою священнейше совершив, радуяся и воспевая освящающаго Содетеля всех Бога во веки.
Богородичен: Шедше путем Божественных заповедей Сына Твоего, Богомати, и Тя Заступницу и Предстательницу имея, весь род человеческий Твоим Рождеством от праотча падения востает и от клятвы праматерния избавляется.
Песнь 9.
Ирмос: Благословен Господь, Бог Израилев, воздвигнувыи рог спасения нам в дому Давидове, отрока Своего, в них же посети нас Восток с высоты и направил ны есть на путь мира.
Евангелие Христово проповедав, мудре Святителю, дело Божие на земли совершив и сподобившись приятия Святых Таин Христовых, о Бозе почил еси.
Ныне с Вышними Воинствы моли, угодниче Христов, Человеколюбца даровати притекающим к предстательству твоему оставление грехов и жития исправление.
И по смерти, яко жив сый, благодатию Божиею с нами пребываеши, святителю Луко, пастырь добрый нам являешися, твердо стояти в православней вере укрепляя и в добродетельней жизни наставляя.
Богородичен: Еже радуйся, со Архангелом зовем Ти, Чистая, яко Царя Небеснаго родила еси, Дево Богородице, и молим Тя: избави ны, рабы Твоя вечныя смерти.
Светилен:
Святитель и исповедник явился еси, Луко преславне, страстей Христовых раны нося. Плотию, аще и почил еси, но духом жив сый, в Царствии невечернем со Христом царствуеши и присно молишися Ему о верою и любовию тя величающих.
Слава и ныне, Богородичен:
Вышних чиноначалий Превышшая сущи, нас нижних, неотступай, но присно с нами буди, свобождающи от всяких наветов, Твою бо, Владычица, крепкую о нас помощь видяще, никтоже востанет на ны.
На хвалитех стихиры, глас 1:
Веселися и торжествуй земле Крымская, имея мощи святителя Луки, иже днесь предстоит Невечернему Свету - Христу, зрит неизреченную Его доброту и присно молит даровати душам нашим мир и велию милость.
Красуйся и ликуй, граде Симферополе, торжествуйте вси
православнии, зряще честныя мощи святителя Луки, источающия исцеления всем, притекающим к ним с верою и воспевающих Христа, подающаго нам мир и велию милость.
Во храме Святыя Троицы, идеже лежат ныне мощи твоя, исцеления подаются всем человеком, верою притекающим к раце твоей, всеблаженне святителю Луко. Темже и мы молим тя: моли спастися душам нашим.
Слава, глас 8:
Святителю отче Луко, ты Евангельски Господа возлюбил, Божественное Его иго на рамена своя взял еси и крест исповедничества, яко легкое Его бремя понесл еси, архипастырский подвиг совершив, и был еси управлен в Царствие Небесное. Темже непрестанно Христа моли спастися душам нашим.
И ныне, Богородичен:
Владычице, приими молитвы раб Твоих и избави нас от всякия нужды и печали.
Славословие великое.
НА ЛИТУРГИИ
Блаженны от канона, песни 3-я и 6-я.
Прокимен, глас 1: Уста моя возглаголют премудрость, и поучение сердца моего разум.
Стих: Услышите сия, вси языцы, внушите вси, живущии по вселенней.
Апостол ко Евреем, зачало 318.
Евангелие от Матфея, зачало 11.
Причастен: В память вечную будет праведник, от слуха зла не убоится.
