Гимнография сщмч. Вениамина, митр. Петроградского
Служба сщмч. Вениамину, митр. Петроградскому и Гдовскому, и иже с ним пострадавшим.
На Господи, воззвах, стихиры предпразднству на 3 и святым на 5, глас 4-й:
Издетска чтению словес Божиих прилежал еси,/ неленостно поучаяся в законе Господнем,/ чистою любовию к Богу прилепился еси,/ священномучениче Вениамине,/ мучеников подвига желанием уязвился еси,/ святителю славный Церкве нашея./ Егда же приведе тя Христос ко жребию оному,/ ничтоже убоялся еси,/ обаче благодарне рекл еси:/ слава Тебе, Богу нашему, во веки веков.
Избранный народом Божиим на кафедру святителей Петербуржских,/ никогдаже покоя телеснаго имел еси,/ но во вся пределы града стольнаго стопы своя направлял еси,/ не гнушаяся единем чадом Церкве Божия,/ собирая воедино паству твою духом смирения и милосердия,/ священномучениче Вениамине, отче наш,/ не забуди и нас, но кротостию твоею посети души наша.
Яко матерь о чадех своих болезнующая,/ тако жилища убогих и незнатных посещал еси,/ совершая людем неимущим/ службы яже ко спасению потребная,/ избегая почестей мирских и славы века сего непостоянныя,/ предстоятелю Церкве Петербургския,/ образе благочестия и кротости,/ просветивый напоследок времен люди твоя/ присносущным светом евангельским.
Стезею самоотречения и любве/ в жизни земней шествовал еси/ и достигл еси Иерусалима вышняго,/ божественным светом осияваем,/ обаче и дольняго града своего славы не лишил еси,/ облагоухал еси фимиамом Православия берега Невския/ житием своим чудным уяснил еси нетленную красоту заповедей Господних.
Благородство души твоея Христос Бог провидев,/ саном архиерейским возвеличи тя,/ расширяя стадо и умножая труды твоя./ Ты же, священноначальниче Вениамине,/ на высоте сей духом смирен и неизменен пребыл еси,/ заботы о людей угнетаемых не оставляя./ И ныне молим тя, святителю чадолюбиве:/ не остави паствы твоея,/ но посети ю милосердием твоим.
Слава, глас 6-й:
Глаголет Господь во святем Евангелии:/ «Не убойтеся убивающих тело»./ Тако и ты, святе Вениамине,/ на высоту духовную восшед/ не устрашился еси угроз власти безбожныя,/ но укрепляем благодатию Духа Пресвятаго/ мученическую кончину благодарне приял еси./ И ныне молися о всех нас,/ да пребудем и мы неколебимы и тверды/ в вере Православной во вся дни живота нашего.
И ныне, догматик 6-го гласа.
Прокимен дня. Паримии священномученические.
На литии стихира храма и святым, глас 1-й:
Креста всечестнаго непоборимая сила/ укрепляше вас в подвизе вашем,/ святителю Вениамине, архимандрите Сергие, Иоанне и Георгие,/ избранни бысте яко вернии раби Христовы,/ мученицы четверочисленнии,/ во образ четвероконечнаго Креста Господня,/ освящающаго вселенныя четыре концы.
Блажен град, иже прия телеса ваша,/ и земля, иже напоена кровьми вашими,/ мученицы четверочисленнии,/ неповинно убиеннии,/ молитеся ко Творцу всяческих,/ да сохранит град и страну нашу/ в мире и благополучии/ и избавит ны от прещения Своего праведнаго.
Слава, глас тойже:
Егда на смерть шествовал еси, святителю Вениамине,/ тогда тих и спокоен был еси,/ крестным знамением ограждаяся и молитву творя,/ такожде и ты, архимандрите Сергие,/ воздыхал еси о вразех своих:/ «Прости им, Боже, не ведят бо, что творят»./ Вы же, мученицы Иоанне и Георгие,/ скорби временней предаваяся,/ в борении предсмертнем пребываху./ Ныне же вси вкупе Богови предстоят/ и молятся о душах наших.
И ныне, богородичен, глас тойже: “Се исполнися Исаиино проречение...”
На стиховне, глас 2-й:
Видя волка грядуща,/ иже восхоте власть церковную похитити,/ в бегство малодушное не обратился еси,/ архиерею доблестный,/ и кормила управления народом Божиим,/ яже вручи тебе Господь, а не человек,/ в руце чуждии не предал еси,/ и пастырь добрый показался еси,/ полагаяй душу свою за овцы своя.
Стих.
Егда нечестивых от Церкве отлучил еси,/ ревнуя о чистоте Невесты Христовой,/ тогда злобе их предан был еси,/ и смерть от рук безбожных приял еси,/ священномучениче Вениамине,/ светлая красото града нашего.
Стих.
Угроз и клеветы властей безбожных не устрашился еси,/ и во своих решениих тверд пребыл еси./ Сего ради и кончину мученическую улучил еси,/ явив христианом образ злострадания за имя Христово,/ иерарше предивне.
Слава, глас тойже:
Ведому ти на судище беззаконное,/ вси вернии сретаху тя на стогнах града Петрова,/ воспевая ти, страстотерпче новый:/ «Спаси, Господи, люди Твоя»,/ и колена своя во умилении и сокрушении сердец прекланяху.
И ныне, предпразднства.
Утреня.
На Бог Господь тропарь Кресту дважды, Слава, тропарь сщмч. Вениамину, и ныне, тропарь Кресту.
Седален 1-й.
Посрамил еси, святе Вениамине, лжеучителей нечестивых, учение Христа помрачивших и разделение в Церкви произведших. Тщетно тии склоняху тя власть архиерейскую оставити. Не устрашился еси онех угроз и прещений, обаче, десницею Божией укрепляем, тверд и непреклонен до конца пребыл еси.
Слава и ныне, богородичен:
Пресвятая Дево, Отроковице Преблагословенная, блаженна показалася еси Христа Бога рождши, блаженны Содевающаго Того воли повинующиися.
Седален 2-й.
Аще и восторжествова на время краткое неправда беззаконных, иже искаша погибели твоей, архипастырю и мучениче достославне, но вскоре память их с шумом погибе. Твое же имя, яко Истины поборника и последователя, сияет на небесех, и слава твоя во веки пребудет неизменна.
Слава и ныне, богородичен:
Пречистая Богородице, Егоже Спаса Христа неизреченно родила еси, моли со священномучеником Вениамином, во еже просветити и спасти род наш.
По полиелее седален.
Испыташа тя Господь, святителю славне, в горниле испытаний и обрете верным Себе; очисти тя, яко злато, в пещи страданий и, яко волну, убели тя; проидоша сквозе огнь и воду и обрел еси вечный покой, о каменю драгий, положенный во основание здания Церкви нашея.
Слава и ныне, богородичен:
Святейши явилася еси херувим, на земли рождшая Христа, всех Владыку, Чистая Всенепорочная Владычице.
По 50-м псалме стихира, глас 6-й:
Небеса возвеселишася во отшествии вашем,/ святителю Вениамине и архимандрите Сергие,/ Иоанне и Георгие, воини честнии Христа
Бога нашего,/ мученицы четверочисленнии./ Ныне в Царствии Небеснем неразлучны пребываете,/ молитеся ко Господу/ о единении рода христианскаго,/ о умирении и спасении душ наших.
Канон Креста на 4 и канон святым на 4, глас 8-й.
Песнь 1-я.
Кротостию боголюбивыя души твоея покорил еси паству твою, святителю Вениамине, и ея первый избранник явился еси среди прочих архиереев Петербургских.
Во утверждении твоем на кафедре столичней, святе Вениамине, глас народа глас Божий бысть: в нем бо познася и открыся о тебе благая воля Господня.
Не посрамил еси ожидания народа твоего, но во всем верен Истине оказался еси, архиерею Божий, образ совершеннаго служения Господеви православным людем являя.
Богородичен: Обрет Тя чистшу, Всечистая, всея твари, всех Зиждитель и Бог, воплотитися благоволи, из Тебе плотию человека вообразити промысливый.
Песнь 3-я.
Не токмо православныя, но и иноверныя/ притекаху к тебе, архипастырю дивный,/ покорил еси тех кротостию и чистотоюдуши твоея./ Сего ради в годину тяжкую/ прибегаху к тебе вси яко к пастырю истинному,/ взыскуя совета и утешения духовнаго.
Чистотою душевною и молитвою непрестанною к ближнему любовь искреннюю приобрел еси, святителю Вениамине, сего ради прослави тя Господь и приведе тя к веселию вечному.
Приближися к небесем чистотою, кротостию и любовию, архипастырю Петербургский, и егда прииде година тяжкая и наста времена испытания, исполнися от Бога и мужеством, и крепостию, и дерзновением.
Богородичен: Чистоты Чистое и девства Честное селение, приидите, вернии, воспоим радостными песнопеньми.
Седален.
Не хранят свещу зажженную под спудом, но износят в храмину и на подсвещнике поставляют ю, да светит всему миру. Тако просветися светом дел твоих, отче Вениамине, Церковь Российская, совершающая днесь святую память твою.
Слава и ныне, богородичен.
К Тебе прибегаем, Богородице всепетая, и Тебе припадающе молимся, Твоим ходатайством, Владычице, и молитвами Твоего угодника святителя Вениамина, милостива нам сотвори, Егоже пречисто и недоведомо родила еси, Христа Бога нашего.
Песнь 4-я.
Любовию твоею ко Христу низложил еси вся козни лукаваго и облеклся еси в броню правды, святителю Христов Вениамине, и неуязвим пребыл еси посреде всех наветов вражиих.
Не одоле нечестивых собрание, о архиерею Петербургский, непорочности души твоея, еюже препобедил еси вся полки супостат, держа в руках своих Креста победное знамение.
Мудростию свыше от Бога увенчан, архипастырю дерзновенный, неуклонно стезею правды Христовой шествовал еси и Церковь Господню во времена ненастныя по пути евангельскому направлял еси.
Богородичен: Неискусобрачно родила еси, о Дево, и по рождестве явилася еси девствующи паки. Тем немолчными гласы, радуйся, Тебе, Владычице, верою несомненною зовем.
Песнь 5-я.
Борением внутренним в темнице томим, чаше голгофской приобщился еси, егда же воле Божией всецело предался еси, абие тишиною и покоем небесным исполнился еси, мучениче добропобедный.
Во узилище суще, фиал страданий, предуготованный тебе, до конца изсушил еси, и велиих утешений и радости неизреченней от Духа Святаго удостоился еси, мучениче преславный.
Казни смертныя за имя Божие ожидая, рекл еси, иерарше досточудный: «Аз ныне радостен и покоен, якоже и всегда», проникнув духом своим в тайну мучеников Христовых.
Богородичен: О Мати Божия! Души моея озлобление исцели, рождшая Всеблагое Слово, вся облагодетельствовавшее.
Песнь 6-я.
«Христос – наша жизнь, и свет, и покой есть, с Ним всегда и везде хорошо быти», - тако и под стражей сущи, наставлял еси паству твою, отче Вениамине, приуготовляя ю к гонениям, темницам и узам.
Видя Церковь теснимую со всех сторон, святителю Христов, духом не унывал еси, твердо веруя словесем Господним, яко врата адова никогдаже одолеют Ея.
Пастырей своих назидал еси, мудре архиерею, да оставят ум свой, ученость и силу, и все упование возложат на Бога и верою неколеблемою вооружатся, яко Спаситель наш сохранит Церковь Свою нерушиму до скончания века.
Богородичен: Глаголы Гавриила, Дево Всенепорочная, ныне имуще вопием: Радуйся, Едина Мати благословенная, радуйся, Двере Правды, Солнце имущая.
Кондак.
Икос:
Яви тя Господь, святителю отче Вениамине,/ яко велие украшение града нашего,/ яко дивнаго предстателю о людех твоих,/ яко истиннаго свидетеля правды Божией,/ яко ходатая новаго,/ яко наставника заблуждшим,/ яко любве и кротости правило,/ яко светильника во тьме греховней сияющаго,/ яко мученика дерзновеннаго,/ яко исповедника твердаго,/ яко столпа неколебимаго Церкве нашея,/ яви тя Господь яко вернаго служителя Своего/ во спасение душ наших.
Песнь 7-я.
«Не аз, Вениамин немощнейший, спасаю Церковь, но сам Ею спасаюся и держуся,» - тако помышлял еси, во смирении пребывая, священномучениче, сего ради нимало страшился еси о судьбе Невесты Христовой.
Ревнителю Илии и Моисею Боговидцу поревновал еси, отче священноявленне, и ересеначальники посрамил еси.
С юных лет восхищаяся подвигом святых страстотерпцев, отче Вениамине, чаше их приобщитися желал еси. И се услыша Господь тайное воздыхание твое, и исполни боголюбивое хотение твое, и увенча тя венцем мученика.
Богородичен: Вышшая небесных божественных сил, Едина от веков Ты еси истинно: Зиждителя бо сих родила еси несказанно, Богородительнице Всечистая Владычице.
Песнь 8-я.
Монашествующих славо и похвало, иерарше досточудне, сохранил еси добре в житии твоем иночества обеты, посреде мира сияя нестяжанием, послушанием и целомудрием.
Молитвою и чистотою благодать Духа Святаго обильно стяжал еси, архипастырю духоносный, и силою Божества исполнился еси, препобеждая ею вся козни лукаваго.
«Наста время подвига, не посрамим же веры Православныя и упования нашего, яже есть надежда благ вечных,» - сими словесы укреплял еси братию твою, святителю Вениамине, исполняя долг архиерейский даже до кончины мучническия.
Богородичен: Жезл из корене Иессеева, Дево, была еси, цвет возрастивши всесильнаго Господа, нас облагодатствующаго и благодать всем подающаго, вопиющим: благословите вся дела Господня Господа.
Песнь 9-я.
Пред судилище мучителей ты предстал еси, блаженне Вениамине, ризою своею честною соузники своя закрывая, и осуждения неправеднаго тех избавити ища, себе единаго виновником церковных беспорядков объявил еси.
Исполнися правда словес апостольских во убиении вашем, мученицы четверочисленнии, яко ни скорбь, ни гонения, ни настоящая, ни грядущая не возмогут верных отлучити от любве Божия, сего ради вас ублажаем.
Духа мира сего, яже есть похоть плоти, похоть очес и гордость житейская, препобедили есте, мученицы Христовы, помозите убо и нам посреде рода невернаго отражати вся лести вражия, непрестанно ищущия погибели нашея.
Богородичен: Тя неискусомужно рождшую Жизнодавца и Спаса, вси молим прилежно, Богородицу Тя исповедающи, избавитися всякия скорби Твоими молитвами, Мати Дево.
Светилен.
«В мире скорбни будете, но дерзайте, яко Аз победих мир,» - глагола Господь учеником Своим. Сей завет Спасителев добре хранил еси, архиерею праведный, и победу Божию узрев, с нею восшел еси во светлыя чертоги Царства Небеснаго.
Слава и ныне, предпразднства.
На хвалитех, глас 8-й:
Клевету от человек беззаконных претерпел еси,/ суд неправденый и предательство лжебратий,/ священномучениче Вениамине,/ и Христу–Архипастырю уподобился еси,/ смерть прияв за Истину и други своя,/ жребия высокаго удостоился еси,/ сего ради почтиаем тя и совершаем память твою.
Иуда новый со стражею и воини к тебе пришед,/ лицемерно благословение твоего испросил еси,/ ты же, о архиерею неподкупный и прямодушный,/ не желая имети общения со слугою тьмы,/ целования лживаго не даде ему,/ и обличая нечестивое намерение его:/ «Мы же не в Гефсиманстей веси» рекл еси ему.
Обновил еси истину Евангелия смертию своею,/ святителю Христов Вениамине,/поднебесную всю непреложно убедил еси,/ яко словеса вечныя книги старения не имут,/ яко не оскуде до конца благочестие,/ яко Церковь Божия порождает верных чад Христу,/ и на подвиг мученический воздвизает их/ во времена последния, якоже и в первыя.
Не словес плетением,/ ни изысканностию слога,/ но паче простотоюи искренностию/ проповедь втоя, иерарше досточудне,/ до глубины сердец чад твоих достигая,/ веру правую в них укрепляла есть./ Сего ради усердно собирахуся вси людие/ во храм Господень на служение твое.
Слава, глас 6-й:
Жертва Богови принесостася непорочная,/ мученицы четверочисленнии,/ во освящение душ наших,/ темже прославляем Христа Бога нашего,/ давшего нам ходатаев новых,/ укрепляющих ны во исповедании веры Православныя.
И ныне, богородичен:
Владычице, приими молитвы раб Твоих...
Тропарь, глас 3
Божественным светом от юности озаряем,/мученичества возжелал еси/и по достоинству был еси Христовы Церкве архипастырь,/Петроградскую паству пасый./
На судищи безбожных лесть обличил,/столп незыблемый, светильник неугасимый явился еси,/священномучениче Вениамине,/Христа Бога моли даровати нам велию милость.
Кондак, глас 2
Яко мученик, яко верен святитель/и поборник Православия/ гордыню безбожных посекл еситы духовным мечем,/ священномучениче Вениамине,/песнословим души твоея крепкое терпение/и доблесть подвигов твоих.
Кондак 1
Избранный Христом Господом на служение Ему, с юных лет воспламенивший в сердце отрока Василия искру горения пострадать за веру православно-исповедающих Его-Христа- Спасителя мира. Самым делом послежде исполнил еси желаемое,исповедуя пред неверными и свидельствуя: "Я - за Христа". Почитая твое мужество и терпение, воспеваем ти:
Радуйся, священномучениче Вениамине, архипастырю Церкве Христовы.
Молитва
О, предивный святителю, богомудрый и всесвятый отче наш священномучениче Вениамине!
К тебе ныне прибегаем верою и любовию чтущии тя, похвалы сия приносяще от всего сердца и помышления. Молим тя прилежно, страстотерпче святый, не забуди ны к тебе усердно притекающих: утверди нас в вере святей православней, научи нас всегда творити заповеди
Божия, исцели болезни душевныя и телесныя, буди нам покровителем и прибежищем в скорбех и напастех, заступи ны от враг видимых и невидимых, да и мы богоугодне прешедше поприще сея жизни, твоим предстательством и богоприятными молитвами будем наследницы
Царствия Божия и сподобимся с тобою предстояти Престолу Царя Славы,поклоняяся Ему и воспевая во веки веков.Аминь.
Акафист священномученику Вениамину, митрополиту Петроградскому и Гдовскому.
Величание
Величаем тя,/ священномучениче Вениамине,/и чтим святую память твою:/ты бо молиши за нас/Христа Бога нашего.
Икос 1
Ангел Церкви был еси во граде святаго Петра и в севернем крае страны нашея. Христос Господь постави тя свещнице высоты служения Ему митрополии Петроградския, да спасеши стадо избранных овец Его, укрепляя их в православии, наставляя в благочестии и доброделании. Сего ради и мы, душепопечением, воспеваем тебе:
Радуйся, отрок сый Богоизбранный, мученичества возжелавый;
Радуйся, юноше Богобоязненный, путем побеждения страстей шедый.
Радуйся, в мужа возраставый, в меру возраста Христова пришедый и в добродетелех преуспевый;
Радуйся, подвигом добрым подвизавыйся, священное служение приявый.
Радуйся, апостольского служения приемниче, в сане епископа добре потрудивыйся;
Радуйся, паству твою Петроградскую от раскола обновленческаго охраняяй.
Радуйся, мужество и терпение явивый пред безбожными гонителями веры;
Радуйся, священномучениче Вениамине, архипастырю Церкве Христовы.
Кондак 2
Видя Господь в будущем тя воеводу ратоборцев за веру Христову, посла ти духа ревности по Бозе и желание в сердце твоем Богоугодное проводити житие и мученическим исповеданием веру православную соблюсти, да со страдальцы вопиеши вечно Богу: Аллилуиа.
Икос 2
Разумом свыше просвещенный и Духом Святым одаренный, сердцем же во благочестии от младости воспитан сый, радость и утешение всем был еси. Тем же приносим тебе хвалы сицевые:
Радуйся, светом благочестия от Бога озаренный;
Радуйся, учением благочестия издетства напоенный.
Радуйся, отрасле благоухающая корене духовнаго;
Радуйся, девственную чистоту от юности возлюбивый.
Радуйся, иерея Божия и благочестия родительскаго наследниче преизрядный;
Радуйся, душу свою всецело Господу посвятивый.
Радуйся, молитвою и Богомыслием ум свой в горняя вперивый;
Радуйся, священномучениче Вениамине, архипастырю Церкве Христовы.
Кондак 3
Силою Божиею укрепляемый, ангельский образ приял еси и в монашестве Вениамином- сыном десницы - наречен был еси, труды великия подъял, постом страсти плотския умертвив, и яко воин, противу князя власти воздушныя, во всеоружия Божия облеклся еси, досточудне. Светом богоразумия твоего и нас озари, да вопием купно с тобою Богу: Аллилуиа.
Икос 3
Имея благодать священства дело благовестника и инспектора добре сотворил еси в стенах Холмския семинарии со всяким долготерпением и учением наставляя, иных же ко исправлению жития словесы и делы твоим влекл еси. Почитая сия труды твоя, единодушно, едиными усты с митрополитом Евлогием, восхвалявшего тя и мы тебе вопием:
Радуйся, монашеский подвиг и иерейское служение в житии своем добре сочетавый;
Радуйся, юные души наставивый и ко Христу приведый.
Радуйся, преемниче рода священнаго;
Радуйся, искавшия спасения правым учением оглашавый.
Радуйся, житием своим сего учения не посрамивый;
Радуйся, яко праведно дадеся ти жребий пастырскаго о душах попечения.
Радуйся, неутомимый священнослужителю Господень и вся часы суток готовый пребывати в храме Божия;
Радуйся, священномучениче Вениамине, архипастырю Церкве Христовы.
Кондак 4
Бури греховныя избежав и нападения вражия бодрственным житием своим утишая, к небесным благим устремился, боголюбче Вениамине, единую же Премудрость Ипостасную взыскав, тайны богословия от Нея восприял, сего ради от архиерея Божия во архимандрита возведен, ректором духовныя Петроградския семинарии поставлен, да со всеми учащими и учащимися поеши Богу: Аллилуиа.
Икос 4
Слышаша иерархи Церкве Российския о трудех твоих неустанных, яко ангела, знамение благодати небесныя носяща, реки богомудрых словес источающа. Тем же и мы, дивяся чудному промышлению Божию, поставившему тя ректором семинарии, достохвально взываем:
Радуйся, Слова Божия богомудрый истолкователю;
Радуйся, многия и словесы и делы наставивый: "Вся возможно совершить со Христом и во имя Христово".
Радуйся, талант свой в земле не сокрывый;
Радуйся, во славу Божию и на спасение душ человеческих его употребивый.
Радуйся, смирением своим духа гордыни низложивый;
Радуйся, ратоборче доблий, полки невидимых врагов победивый.
Радуйся, терпению житием своим вся научивый;
Радуйся, священномучениче Вениамине, архипастырю Церкве Христовы.
Кондак 5
Боготечную звезду показа тя на небесех в сонме священномучеников Господь Вседержитель, зане и на земли был еси звезда светлая, Боготочною Кровию от вечныя смерти искупленныя соблюдая, егда сан епископа, викария Гдовского, приял еси, темже и ныне на небесех сияеши славою вечною и купно с лики праведных воспеваеши хвалебную песнь: Аллилуиа.
Икос 5
Видеша тя православнии людие, яко светило церковное, сияющее в просвещение народа Божия на свещнице святительского, окормлявшего Петроградскую паству, и не леностно трудившегося на спасение душ человеческих, темже и слышиши таковые тебе похвалы:
Радуйся, во епископа нареченный митрополитом Владимиром-священномучеником;
Радуйся, хиротонисанный во святительство будущим патриархом Тихоном.
Радуйся, яко притяжал еси сердца людския любве к тебе исполненныя;
Радуйся, архипастырю, "батюшкой Вениамином" с любовию в народе именуемый.
Радуйся, иго Христово благое и легкое носивый;
Радуйся, неусыпный делателю винограда небеснаго.
Радуйся, пастырский долг и апостольскую проповедь восприял во епископском служении;
Радуйся, священномучениче Вениамине, архипастырю Церкве Христовы.
Кондак 6
Проповедник учения Христова воистину явился еси, священномучениче Вениамине, егда Петроградскую митрополию вручил ти Господь, словом твоим в вере наставляя, житием во благочестии верных утверждая и всех поучая с любовию пети Богу: Аллилуиа.
Икос 6
Возсияв светом Богоразумия твоего в северном крае страны нашея, святителю Вениамине, людие бо видевше тя наставника добра Божественных учений радовахуся зело и единодушне избраша тя кормчим кафедры Петроградския. Приими и от нас, угодниче Божий, похвалы сия:
Радуйся, любимиче паствы твоея-народа Божия;
Радуйся, в хижины бедных мира сего смиренне шел еси.
Радуйся, и в святительском сане вся требы верным исполняяй;
Радуйся, в нищите их прибывающих посещавый.
Радуйся, архипастырю добрый, самоличне святым крещением многа чада Церкве породивый;
Радуйся, Божественныя Литургии предстоятелю умиленный.
Радуйся, заблудших в раскаяние приведый;
Радуйся, священномучениче Вениамине, архипастырю Церкве Христовы.
Кондак 7
Хотя Человеколюбец Господь явити в тебе истиннаго пастыря, показа тя образ стаду словесному во трудех твоих, в чистоте и кротости светлой души твоей, делы бо и словесы своими всех приводил еси ко благочестию. Сего ради и мы тебе усердно величаем и прославльшему тя Христу вопием: Аллилуиа.
Икос 7
Новаго тя ревнителя по благочестию видевше и безграничную преданность Церкве Христовы, паства Петроградская внимаше ти смиренному, простому и кроткому архипастырю верующих душ, в великом множестве наполняша храмы, идеже совершашася твои митрополичьи богослужения. Ведая близость твою ко Христу Богу, Ему же молитися не престай и о нас грешных, вопиющих ти хвалебно:
Радуйся, избранниче народа, поставленный на кафедру Петроградскую;
Радуйся, труды велия положивый ко спасению падших.
Радуйся, наставниче добрый, сущим в бедах сострадавый.
Радуйся, яко коемуждо в горестех, аки утешитель являлся еси;
Радуйся, евангельской простотой и сердечностью сияяй;
Радуйся, правил церковных нелицеприятный блюстителю.
Радуйся, по словеси апостола Петра стадо Божие пасый.
Радуйся, священномучениче Вениамине, архипастырю Церкве Христовы.
Кондак 8
Странно быша неверным и нечестивым зрети, како святитель Вениамин, сей воистину воин Христов, мужественно облекшись в броню правды и преподобие истины, внегда огненным испытанием посети Господь страну Российскую, яви досточудное терпение
и высокое благородство при изъятии безбожными церковных ценностей. Тем же и нас, рабов Божиих, соблюди от всех враг видимых и невидимых, воспевающих Богу: Аллилуиа.
Икос 8
Весь бе исполнен ревностию Илии пророка, святе Вениамине, егда узрел в келии своей обновленца Александра Введенского, аки второго Иуду с вои безбожных пришедша и лицемерно благословения просяща, благословения не дал еси, но рекл ему: "Мы не в Гефсиманском саду". Живоцерковников сборище обличи, отлучив от Церкви. Поминая твое непоколебимое стояние, воспеваем ти:
Радуйся, добрый пастырю стада Христова- паствы Петроградския;
Радуйся, святою ревностию о спасении чад Божиих пламеневый.
Радуйся, милосердствуя о голодающих добровольно, без принуждения, церковное имущество даяти предлагаяй;
Радуйся, болезнуя душею о кощунниках и святотатцах, верныя от обновленцев защищаяй.
Радуйся, единомысленный святому исповеднику патриарху Тихону и сподвижником его бывый;
Радуйся, Православия светило.
Радуйся, всякия неправды нелицеприятный обличителю;
Радуйся, священномучениче Вениамине, архипастырю Церкве Христовы.
Кондак 9
Всякие беды понесл еси, святителю Вениамине, всякие лишения, обиды и страдания претерпев, егда преемники Ирода на тя руки наложиша, и задержав, ввергли в темницу, в ней же яко и в дому Божию взывал Христу-Спасителю: Аллилуиа.
Икос 9
Витии многовещанныя не возмогут изрещи вся болезни и раны, яже ты, яко служитель Божий явил "в великом терпении, в бедствиях, в нуждах, в тесных обстоятельствах, под ударами в темнице" и ничто из сего "не возможе разлучити тя от любве Божия во Христе Иисусе". И ныне и всегда верныя чада, поем во славу наставника своего:
Радуйся, в темницу со смирением безропотно шедый;
Радуйся, любовию паствы утешенный.
Радуйся, яко море волнующееся, паства преданная ти, многотысячным собранием у суда ожидаше тя;
Радуйся, ближняя своя паче себе возлюбивый.
Радуйся, страдальцы с тобою судимыя укрепивый;
Радуйся, мучеников похвало.
Радуйся, святителей славо;
Радуйся, священномучениче Вениамине, архипастырю Церкве Христовы.
Кондак 10
Спасти хотя всякаго человека Господь Серцеведец, зря твою ревность: в юности бо ты лобызал пламенеющим сердцем первых мучеников и скорбел, яко не можеши приобщиться их славному подвигу, по исполнении времени посла ти желаемое, да и ты спостраждеши о имени Его- Христа Бога и со страдальцы воспоеши: Аллилуиа.
Икос 10
Стена невинно гонимым пастырем и миряном был еси, священномучениче Вениамине, с тобою судимыя ограждая от ложных наветов, самаго себя ставя ответственным за вся. Враги не возмогоша противостати мудрости и духу, вещающему твоими устами, егда ты изобличал их клеветы и явил радостное желание умереть за Христа. Мы же, премудрости и мужеству твоему дивящеся, со умилением взываем ти:
Радуйся, исполненный веры и силы первосвятителю града святаго Петра;
Радуйся, кроткий и дезновенный, первомученику Стефану уподобивыйся.
Радуйся, цевнице духовная, Духа Святаго исполненная;
Радуйся, архиереев богодухновенное украшение.
Радуйся, ополчатися за тя верным воспретивый;
Радуйся, до конца вспять не отвративыйся.
Радуйся, яко мученицы на небесех о терпении твоем ликоваху;
Радуйся, священномучениче Вениамине, архипастырю Церкве Христовы.
Кондак 11
Пение благодарственное и хвалебное приносим ти, сященномучениче, положившаго душу свою за други своя. Дерзновенною верою православнии исповедуем яко праведник и по смерти жив будет во веки, поя Богу: Аллилуиа.
Икос 11
Светлосиянного светильника почитаем тя, страдальче Христов, последнее слово твое с высокой мученической кафедры беззаконного суда назидает всех и потрясает своим величием. Сия твоя, священномучениче, последняя проповедь: "не знаю, что вы мне объявите в вашем приговоре: жизнь или смерть, но чтобы вы в нем не провозгласили, я с одинаковым благоговением обращу свои очи горе, возложу на себя крестное знамение и скажу: "Слава Тебе, Господи Боже, за все!". Мы же с умилением тебе воспеваем:
Радуйся, узы и темницу за Христа приявший;
Радуйся, единою святою просфорою вся темничные дни питавыйся.
Радуйся, последнее святительское благословение в темнице соузникам архимандритам
Гурию и Иннокентию давый;
Радуйся, яко во временней жизни сей, любве ради ко Господу, до конца во спасение души твоея подвизавыйся.
Радуйся, яко в нощи воскресного дня убиенный в знамение всеобщаго воскресения;
Радуйся, яко чрез страдания сподобился причастником быти вечныя славы.
Радуйся, яко во имя твое храмы Божия воздвизаются;
Радуйся, священномучениче Вениамине, архипастырю Церкве Христовы.
Кондак 12
Благодать, свыше ти данную, познавши, благоговейно лобызаем светолепное всечестнаго лица твоего изображение и умиленно вопием Христу Богу нашему: Аллилуиа.
Икос 12
Поюще твое славное и непреоборимое стояние за веру истинную, ублажаем мученическое страдание твое и приемлюще последнее писание тобою с темницы, подобно великому апостолу языков Павлу посланное учеником и сопастырем, внимаем ему, яко завещанию твоему и взываем ти:
Радуйся, яко открылась тебе возможность терпеть Христа ради;
Радуйся, яко при великих скорбех избыточествовало тебе утешение от Бога.
Радуйся, исполненный среди самых тяжких страданиях радости и внутреннего покоя;
Радуйся, за Христа претерпевший вся - темницу, суд, общественное заплевание, обречение и приговор- "повинен смерти".
Радуйся, во Христе обретший жизнь, свет и покой;
Радуйся, себе не жалевший для Церкви и забывший свой ум, ученость и давший место благодати Божией.
Радуйся, судьбу Церкви вручивый силе веры и заповедавый всем: "веры надо больше, больше надо иметь нам веры";
Радуйся, священномучениче Вениамине, архипастырю Церкве Христовы.
Кондак 13
О великий и преславный исповедниче Православия и страдальче, священномучениче Вениамине! Приими сие похвальное пение от нас, недостойных, любовию чтущих тя и твоя за Христа и Церковь Его святую страдания. Умоли венчавшего тя славою Господа ниспослати нам от бед, скорбей и болезней, обдержащих ны, скорое избавление. Буди неослабный молитвенник нам пред Престолом Всевышняго да в вечней жизни сподобимся с тобою и со всеми святыми пети Ему во веки: Аллилуиа.Аллилуиа.Аллилуиа.
(Кондак сей глаголи трижды. И паки: Икос1 и Кондак1)
