Гимнография сщмч. Михаила Вотякова пресвитера (1931)
Гимнография:
Даты:
Тропарь:
Тропарь гл. 3
Православныя веры проповедниче, Слова Божия учителю добрый, заповедей Христовых хранителю твердый, ересей зловредных и богоотступничества обличителю. Всея земли Чистопольския священное украшение. В мученическом исповедании Христа ради пострадал еси и кровьми своими землю Казанскую освятил еси. Ныне же предстоя Престолу Божию, Священномучениче Михаиле, Моли Человеколюбца Бога О прощении безчисленных прегрешений наших, да очистивше душу покаянием, обрящем наше Вечное наследие и прославим, воспевающе, Троицу Святую.
Молитва:
О святый Священномучениче Михаиле! Прославляем Тя, воспоминающе честная страдания твоя. Ты залог священства прияв, в страданиих и мучениих до конца дний своих его сохранял еси. В свете Божественной любви пред Богом и людьми все житие твоё земное пребыл еси. В мучении за Христа Бога до смерти пострадавый и землю Казанскую кровьми своими освятивый, всем нам собою образ исповедания православной веры явил еси.
И ныне молим тя, о священномучениче Михаиле, призри на паству твою, к тебе слезно прибегающую и ходатайств твоих молитвенных пред Престолом Божественныя Троицы просящую. Услыши нас, суетою мирскою отягченных и о душах своих небрежение имеющих, во гресех и беззаконии дни своя иждивающих. Молим тя, настави нас на путь истинный и Богу угодный, испроси предстательством своим у Всемилостиваго Владыки и Бога нашего, вся, яже к житию и спасению душ наших полезная и благопотребная. Буди нам скорый по Бозе споспешник: болящия исцели, немощныя подкрепи, печальныя и унылыя ободри, скорбящия утеши и поверженныя возстави, обиженныя и оклеветанныя оправди, ересьми и суевериями прельщенныя к вере православной обрати, отроки в вере, честности, богобоязности воспитати и успехи в учении им даровати помози, семейным любовь и согласие низпосли, пастырей в крепости Духа Святаго и ревности по Бозе утверди, землю нашу Казанскую светом Христовой веры просветити Милостиваго Бога умоли. Да ходатайствы твоими отверзутся очи наши сердечныя к плачу покаянному, да начнем во благочестии, целомудрии и милосердии ходити и всё житие наше земное в попечение о спасении душ наших по молитвам твоим к славе Божией обратим. Буди всем нам Пастырь истинный, скорый помощник и защититель, да тобою наставляеми и вразумляеми, прославим дивнаго во святых Своих Бога нашего – Троицу Святую и Единосущную, Отца и Сына и Святаго Духа Господа, ныне и присно и во веки веков. Аминь.
