Гимнография Сщмч. Илариона, архиеп. Верейского
Память празднуем 15/28 декабря
Слу́жба
Священному́ченик
НА МА́ЛЕЙ ВЕЧЕ́РНЕ
На Го́споди, воззва́х: стихи́ры на 4, глас 6:
Егда́ Бо́жиим попуще́нием прии́де на Це́рковь гоне́ние лю́тое, воздви́же тя Госпо́дь, Иларио́не, Це́ркве непоколеби́мый сто́лпе, му́чеников украше́ние, сосу́де честны́й Ду́ха Свята́го.
Егда́ любы́ и ве́ра оскуде́сте, и преда́ния оте́ческая забве́на бы́ша, Иларио́не богому́дре, твои́м богосло́вием тьму лжеуче́ния разсе́ял еси́, святы́х отце́в насле́дниче.
Егда́ во́лны ересе́й Це́рковь Бо́жию тща́шася потопи́ти, ты, Иларио́не, о́гненная словеса́ испуща́я, хитросплете́ния богобо́рцев разруши́л еси́.
Егда́ шата́ния и волне́ния смуща́ша Це́рковь Бо́жию, твои́ми труды́ и моли́твами, Иларио́не, Це́рковь в безбо́жнем ми́ре утверди́л и упра́вил еси́.
Сла́ва, глас тойже:
Кто возмо́жет восхвали́ти тя, избра́нниче Бо́жий и Це́ркве Христо́вы служи́телю, ересе́й обличи́телю и раско́лов искорени́телю, ты бо коле́блющыяся вразумля́яй, и заблу́ждшыя на путь и́стинный наставля́яй, враго́м Христо́вым противоста́, зло́бу диа́волю посрами́л еси́ и Христа́ му́жески испове́дал еси́, Того́ моли́ спасти́ся душа́м на́шим.
И ны́не, Богоро́дичен, глас то́йже:
Богоро́дице Де́во Чи́стая, Ты бо Це́ркве Христо́вы Покро́ве, покры́й нас от вся́каго зла и обстоя́ния, сохраня́ющи чту́щыя Тя.
На стихо́вне стихи́ры, глас 4:
До́блестный святи́телю, свята́го Патриа́рха Ти́хона сподви́жниче, ласка́тельства безбо́жник возненави́дел еси́ и собла́зны их отве́ргл еси́, я́ко адама́нт на суди́лищи непра́веднем стоя́, злострада́ния темни́чная претерпева́я, вене́ц побе́дный стяжа́л еси́.
Стих: Мно́ги ско́рби пра́ведным, и от всех их изба́вит я Госпо́дь.
Увы мне, ка́ко возглаго́лю? Краса Солове́цкая пору́гана бысть. Но ты, архиере́ю Бо́жий, ме́рзость запусте́ния в свя́то ме́сто претвори́л еси́, легео́ны бесо́вския прогоня́я, егда́ во у́зах в нощь святы́я Па́схи возгласи́: да воскре́снет Бог и расточа́тся врази́ Его́.
Стих: Уста́ пра́веднаго поуча́тся прему́дрости, и язы́к его́ возглаго́лет суд.
Прему́дрый наста́вниче па́стырей, в Солове́цких мра́зех па́стырски подвиза́лся еси́, разбо́йники на стезю́ покая́ния направля́я, отсту́пники святы́я ве́ры обличи́л еси́, малоду́шныя утеша́я, изнемога́ющыя укрепля́я, Христо́вы о́вцы от во́лка мы́сленнаго спасл еси́.
Сла́ва, и ны́не, Богоро́дичен, глас то́йже:
Мари́е Ма́ти Пастыренача́льни
Тропа́рь зри на вели́цей вече́рни.
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры на 8, глас 1.
О, священному́ченич
Днесь ра́дуется оби́тель Сре́тенская, такова́го иму́щи помо́щника и засту́пника, Иларио́на чу́днаго, ты бо, святи́телю Иларио́не, еретико́в и богобо́рцев из оби́тели прогна́, труды́ же твои́ми оби́тель просла́вив. Бу́ди нам храни́тель и моли́твенник, сопроти́вныя отгоня́я и наставля́я ны Правосла́вно Святу́ю Тро́ицу почита́ти.
О, богому́дре Иларио́не, благода́тию Свята́го Ду́ха ра́зум просвети́вый, совопро́сники лука́выя опрове́ргл еси́, и́стину Правосла́вия утвержда́я. Где прему́др, где кни́жник, где совопро́сник ве́ка сего́? Сло́вом о Кресте́ ты посрами́л еси́ му́дрость ми́ра.
А́гнцу Бо́жию уподо́бився, беззло́бно темни́чная страда́ния претерпе́, угро́зы и поноше́ния, глад, мраз и боле́зни: за враги́ твоя́ моля́ся, Иларио́не, кро́тко ду́шу Христу́ пре́дал еси́.
И́ны стихи́ры, глас 4:
От Бо́га обогаще́н чистото́ю душе́вною, по́стническими по́двиги благода́ть Свята́го Ду́ха стяжа́л еси́, доброде́тели люби́телю и греха́ потреби́телю, земны́й а́нгеле и небе́сный челове́че.
От ю́ности Христа́ возлюби́л еси́, вся кра́сная ми́ра сего́ оста́вив, Иларио́не сла́вне, любы́ небе́сную позна́, в лик и́ночествующих всели́лся еси́, Бо́гу угожда́я.
О́чи серде́чнии просвети́л еси́, блаже́нне Иларио́не, те́мже богосло́вие твое́ от благоче́стия изы́де, но́вый Златоу́ст яви́лся еси́, и́стину церко́вную утвержда́я и вся ве́рныя ко спасе́нию наставля́я.
Ви́дя я́ко враг ро́да челове́ча на страну́ Росски́йскую ополчи́ся, Це́ркви Бо́жия сокруша́я и лю́ди Ру́сския истребля́яй, тогда́ боле́знуя со слеза́ми, влады́ко Иларио́не, взыва́ ты к Росси́йским уго́дником о спасе́нии наро́да Бо́жия.
Сла́ва, глас 8:
Прииди́те лю́дие Моско́встии, священному́ченик
И ны́не, Богоро́дичен, глас то́йже: Царь Небе́сный:
Вход. Проки́мен дне. И чте́ния.
На лити́и стихи́ры, глас 5:
Днесь лику́ет Собо́р новому́чеников Росси́йских, имы́й таковы́й столп непоколеби́мый, Иларио́на архиере́я всесла́внаго, свята́го Ти́хона сподви́жника.
О, владыко́ Иларио́не, стяжа́в ра́зум церко́вный, ты, отце́м после́дуя, о Це́ркви богосло́вствова: се́рдце очи́стив по́двигом, о лю́дех боле́знова: враго́м Це́ркве противоста́, ве́рныя ча́да окормля́я и на путь И́стины наставля́я. Ны́не предстоя́ Святе́й Тро́ице, моли́ся о всех нас.
Сла́ва, глас 1:
По и́мени твоему́, Иларио́не, и житие́ твое́ бысть: душе́вную тишину́ стяжа́л еси́, бу́рю бо стра́стных по́мыслов ути́шил еси́, чи́стым се́рдцем Бо́га позна́л еси́. Всегда́ ра́дуяся, о всем благодаря́, ны́не Христу́ предстои́ши.
И ны́не, Богоро́дичен, глас то́йже:
Ра́дуйся, Богоро́дице Чи́стая, церко́вная похвало́, сто́лпе де́вства. Прему́дрости прия́телище, две́ре спасе́ния. Не оста́ви нас во тьме неве́дения пребыва́ющих, просвети́ на́ша разу́мная очеса́ серде́чная и сподо́би ны узре́ти свет Ца́рствия Небе́снаго.
На стихо́вне стихи́ры, глас 6.
Дар благода́ти Боже́ственныя прия́т, Иларио́не, избра́нниче Бо́жий, взем Крест, Христу́ после́дова, вся су́етная ми́ра отве́ргл еси́, жи́зни же ве́чныя взыска́л еси́, ны́не со все́ми святы́ми на Небесе́х лику́еши.
Стих: На Тя, Го́споди, упова́х, да не постыжу́ся во век.
Все упова́ние на Бо́га возложи́л еси́, во́ли Бо́жии после́дуя, жезл архипа́стырский я́ко крест в годи́ну гоне́ний прия́л еси́, к му́ченичеству ра́ди Христа́ уготовля́яся, Того́ пред мучи́телями испове́да и страда́ния претерпе́, предстои́ши ны́не, Иларио́не, ра́дуяся, Христу́, со святы́м патриа́рхом Ти́хоном.
Стих: Весели́теся о Го́споде и ра́дуйтеся, пра́веднии, и хвали́теся, вси пра́вии се́рдцем.
Духо́вным весе́лием всегда́ испо́лнен, Иларио́не ди́вный, ве́тхаго челове́ка в себе́ распя́л еси́ и Христу́ в се́рдце пребыва́ти дал еси́, пасха́льныя ра́дости прича́стниче, Све́та Невече́рняго зри́телю, моли́ Христа́ Бо́га, да сподо́бимся и мы ра́дости ве́чныя улучи́ти.
Сла́ва, глас 5:
Ка́ко нарече́м тя, святы́й влады́ко? Глубины́ ли церко́вныя таи́нника, богосло́ва ли преизя́щнаго, церко́внаго благоле́пия люби́теля, му́дрости оте́ческия рачи́теля, пропове́дника златослове́стнаг
И ны́не, Богоро́дичен, глас то́йже:
Ра́дуйся, Преблагослове́нн
Тропа́рь, глас 4-й
Во́ине Христо́в Иларио́не, сла́во и похвало́ Це́ркве Ру́сския, пред ги́бнущим ми́ром Христа́ испове́дал еси́, кровми́ твои́ми Це́рковь утверди́ся, ра́зум Божестве́нный стяжа́л еси́, лю́дем ве́рным возглаша́ше: без Це́ркве несть спасе́ния.
НА У́ТРЕНИ
По 1-м стихосло́вии седа́лен, глас 6:
Ста́рческих седи́н не дости́гнув, му́дрость ста́рческую стяжа́л еси́ и Бо́га че́стным ра́зумом позна́л еси́, помози́ и нам прича́стники Боже́ственныя прему́дрости соде́латися.
Сла́ва, и ны́не, Богоро́дичен:
О, Пресвята́я Де́во, Цари́це Небе́сная, из Тебе́ воплоти́ся Боже́ственное Сло́во, и Челове́к бысть, и на земли́ поживе́, и на Кресте́ у́мре, и тридне́вно воста́, и взы́де на Небеса́, и Ду́ха Свята́го посла́, да мир обожи́тся.
По 2-м стихосло́вии седа́лен, глас 4:
Днесь мона́хов мно́жества наста́вника тя велича́ют, святи́телю Иларио́не, наипа́че же и́ноцы оби́тели Сре́тенския, кре́пкаго моли́твенника и пред Бо́гом те́плаго хода́тая иму́ще тя. Ты бо в годи́ну гоне́ний и ерети́ческих нападе́ний и вся́ческих треволне́ний оби́тель Сре́тенскую окорми́л еси́.
Сла́ва, и ны́не, Богоро́дичен:
Пресвята́я Богоро́дице, Заре́ Све́тлая Трисия́тельнаго Све́та, Тобо́ю гра́ды и оби́тели утвержда́ются, ко́зни вра́жия посрамля́ются, сердца́ ве́рных чистото́ю и любо́вию просвеща́ются, супоста́ты низлага́ются, пода́ждь и нам побе́ды на враги́ и спаси́ ду́ши на́ша.
По полиеле́и седа́лен, глас 5:
Воспои́м, ве́рнии, досто́йно священному́ченик
Сла́ва, и ны́не, Богоро́дичен, глас 1:
Ма́ти Бо́жия и Де́во, в рождестве́ де́вство сохра́ншая, не оста́ви ны́не ны немощству́ющия, от бед и боле́зней сохрани́ и моли́твами Твои́ми изба́ви от сме́рти ду́ши на́ша.
Степе́нна, 1-й антифо́н 4-го гла́са.
Проки́мен, глас 4: Возвесели́тся пра́ведник о Го́споде и упова́ет на Него́.
Стих: Го́сподь просвеще́ние мое́ и Спаси́тель мой, кого́ убою́ся?
Вся́кое дыха́ние: Ева́нгелие от Матфе́я, зача́ло 36.
По 50-м псалме́ стихи́ра, глас 6:
Бу́ри бед и напа́стей волну́ют мо́ре жите́йское, враг ро́да челове́ча я́ко волк зло́бный и́щет, кого́ поглоти́ти: увы́ мне, умно́жишася беззако́ния и оскуде́ любы́: не́мощен те́лом и душе́ю, взыва́ю к тебе́, влады́ко Иларио́не: бу́ди ми помо́щник и засту́пник, изцели́ мя и вразуми́, на путь спасе́ния напра́ви и научи́ во́лю Бо́жию твори́ти.
Кано́н Богоро́дицы на 6 и свята́го на 8.
Кано́н свята́го, глас 6.
Песнь 1
Ирмо́с: Волно́ю морско́ю Скры́вшаго дре́вле гони́теля мучи́теля, под земле́ю скры́ша спасе́нных о́троцы; но мы, я́ко отрокови́цы Го́сподеви пои́м, сла́вно бо просла́вися.
Иларио́не, всечестны́й влады́ко, по и́мени твоему́ вои́стинну житие́ твое́ бысть, тишину́ бо моли́твенну внутрь себе́ имы́й, ра́дость пасха́льную всем яви́.
Ле́сть гони́телей твои́х отве́ргнув, муче́ния лю́таго не убоя́ся, Христа́ пред судия́ми непра́ведными му́жески испове́да, в темни́цу заключе́н и пострада́, сла́вою небе́сною просла́вися.
А́нгелов собесе́дниче, Иларио́не преподо́бне, в оби́тели Се́ргиевой, в до́ме Живонача́льныя Тро́ицы поживе́, посто́м и моли́твою ду́шу очи́стив, богове́дение стяжа́л еси́.
Ре́вность по Бо́зе имы́й, ерети́ческих мудрова́ний терпе́ти не возмо́же, богобо́рцев cло́вом обличи́л еси́, из оби́телей и хра́мов их изгоня́я, мно́гих к покая́нию и спасе́нию приве́л еси́.
Богоро́дичен: Ины́я по́мощи не и́мамы, ра́зве Тебе́, Влады́чице, Ты нам помози́ мо́ря жития́ сего́ пучи́ну я́ко по су́ху проити́ неискуше́нно от злых.
Песнь 3
Ирмо́с: Тебе́, на вода́х Пове́сившаго всю зе́млю неодержи́мо, тварь ви́девши на Ло́бнем ви́сима, у́жасом мно́гим содрога́шеся, несть Свят, ра́зве Тебе́, Го́споди, взыва́ющи.
От Творца́ наделе́н доброде́телей чистото́ю, Иларио́не ди́вный, де́вственниче душе́ю же и те́лом, не пожела́ тва́ри порабо́тати па́че Творца́, на грех вооружи́ся, на земли́ невеще́ственное житие́ показа́л еси́.
Небе́сный челове́че, земны́й А́нгеле, Иларио́не прему́дре, Се́ргию преподо́бному в по́двизех подража́, Серафи́му свято́му о спасе́нии Руси́ моля́шеся, Иоа́нна Богосло́ва я́ко богосло́в преиску́сный покрови́теля имы́й.
А́гнцу Бо́жию подража́я, Иларио́не святы́й, кро́тостию, смире́нием и терпе́нием, па́че же любо́вию преукраше́н быв, мучи́телей твои́х прости́л еси́, я́ко дре́вле Бог твой и Спаси́тель.
Стяжа́ дар Ду́ха Свята́го, Сы́ну, Крест взем, после́дова, Отца́ Небе́снаго во́лю исполня́я, Иларио́не блаже́нне, Тро́ицы Святы́я и́стинный почита́телю.
Богоро́дичен: Ле́ствице Небе́сная, Е́юже сни́де Бог, Пресвята́я Богоро́дице, до́лу лежа́щее естество́ на́ше к Небеси́ возво́диши, те́мже Тя любо́вию непреста́нно велича́ем.
Седа́лен, глас 7.
Егда́ прорече́нное возлю́бленным ученико́м и Богосло́вом соверши́шася, и анти́христы мно́зи приидо́ша в мир, ты, Иларио́не, архиере́ю и друг Христо́в, в темни́це заключе́н быв, не восхоте́л еси́ предте́че анти́христову поклони́тися, я́коже му́ченицы святи́и не возжела́ша же́ртву и́дольскую принести́. Ны́не же злу в ми́ре умно́жившуся, зна́мения гро́зная зрим, тру́сы, глад и мор по всей вселе́нней, близ есть при две́рех со апо́столом рече́м. Потщи́ся у́бо, святы́й Иларио́не, и помози́ нам моли́твами твои́ми стре́лы вра́жия отрази́ти и ко́зни диа́воли разори́ти, Еди́наго Христа́ распя́таго вы́ну очесы́ у́мными зре́ти и Тому́ из глубины́ серде́чныя взыва́ти: ей, гряди́, Го́споди Иису́се.
Сла́ва, и ны́не, Богоро́дичен:
Предста́тельнице и моли́твеннице на́ша, Пресвята́я Влады́чице, умоли́ Сы́на Твоего́ и Бо́га, егда́ ся́дет Он суди́ти живы́м и ме́ртвым, да прости́т Он грехи́ и беззако́ния на́ша, да не лиши́т ны Ца́рствия Небе́снаго.
Песнь 4
Ирмо́с: На Кресте́ Твое́ Боже́ственное истоща́ние прови́дя Авваку́м, ужа́сся вопия́ше: Ты си́льных пресе́кл еси́ держа́ву, Бла́же, приобща́яся су́щим во а́де, я́ко Всеси́лен.
Апо́стол но́вый яви́лся еси́ в безбо́жнем ми́ре, Иларио́не Богому́дре, Христа́ Кре́стное истоща́ние пропове́дал еси́, та́йну Це́ркве позна́л еси́ и коне́чныя судьбы́ тва́ри уясни́л еси́.
Ве́лия та́йна есть Це́ркве Неве́сты Христо́вы, я́коже Боже́ственнии Апо́столи веща́ше, тоя́ глубину́ ты, Иларио́не, чи́стым се́рдцем узре́л еси́ и богосло́вскими словесы́ провозгласи́л еси́.
Небе́сныя любве́ да́ра удосто́ен был еси́, Иларио́не, Бо́га Тро́ицу, И́же есть любы́, испове́дал еси́ и о Це́ркви Святе́й, и́же есть любве́ едине́ние, богосло́вствовал еси́.
Адама́нт ве́ры быв, оте́ческих заве́тов храни́телю, святи́телю Иларио́не, ве́трами лука́вых уче́ний несмуща́емь пребы́л еси́, Богоро́дицу Чи́стую я́ко Де́ву и Ма́терь просла́вил еси́.
Богоро́дичен: Голго́фстей ка́зни предстоя́щи, Ма́терь Бо́жия ско́рбно взыва́ше: увы́, Сы́не Мой! Ка́ко на Кресте́ ви́сиши, зе́млю на вода́х пове́сивый? Извести́ из а́да земноро́дныя и мир обожи́ти на зе́млю Ты соше́л еси́.
Песнь 5
Ирмо́с: Богоявле́ния Твоего́, Христе́, к нам ми́лостивно бы́вшаго, Иса́ия, Свет ви́дев невече́рний, из но́щи у́треневав взыва́ше: воскре́снут ме́ртвии, и воста́нут су́щии во гробе́х и вси земноро́днии возра́дуются.
О, Иларио́не, святы́й влады́ко, помози́ нам нощь безлу́нную жития́ сего́ ско́рбнаго в терпе́нии и покая́нии без поро́ка прейти́, и ра́дости Све́та Невече́рняго сподо́битися.
Христо́вым па́стырем па́стырь был еси́, Иларио́не, до́брый, и наста́вник терпели́вый, не то́кмо в богосло́вии, но и в доброде́тели их наставля́ше, благода́тию, тебе́ от Бо́га да́нною, ду́ши воскреша́я.
Ра́достию духо́вною всегда́ укра́шен был еси́, Иларио́не, ше́ствова путе́м те́сным и приско́рбным, всех уча́ Христу́ сраспина́тися, в поста́х и моли́твах подвиза́тися, ско́рби и нужду́ без ро́пота терпе́ти, да́бы воскресе́ния ра́дости не лиши́тися.
И́ноцы оби́тели Сре́тенския днесь ра́дуются, прославля́юще архипа́стыря Иларио́на сла́внаго, почита́теля Де́вы и Ма́тере Го́спода, сре́тившаго ико́ну Ея́ чудотво́рную Влади́мирскую, в пра́здник в оби́тель приноси́мую, и за то гоне́ния от безбо́жник претерпе́вшаго.
Богоро́дичен: Сла́вим Тя неумо́лчно, Влады́чице, и ко ико́не Твое́й святе́й Влади́мирстей припа́даем, взыва́юще: изведи́ град Москву́, его́же ты от враго́в дре́вле спасла́ еси́, из пучи́ны грехо́вныя, и огради́ оби́тель Сре́тенскую от всех наве́тов вра́жиих, и спаси́ ду́ши на́ша.
Песнь 6
Ирмо́с: Ят бысть, но не удержа́н в пе́рсех ки́товых Ио́на: Твой бо о́браз нося́, страда́вшаго и погребе́нию да́вшагося, я́ко от черто́га от зве́ря изы́де. Приглаша́ше же кустоди́и: храня́щии су́етная и ло́жная, ми́лость сию́ оста́вили есте́.
Ты, Честны́й влады́ко, патриа́ршеству Ру́сскою Це́рковию су́етно оста́влену, от ю́ности ско́рбен бысть, из глубины́ душе́вныя взыва́ше: да преложи́тся плач на ра́дость правосла́вным лю́дем, Патриа́рха вновь обре́тшим.
О, влады́ко Иларио́не, предстоя́ собору́ муже́й церко́вных, сло́вом твои́м, му́дростию и благода́тию растворе́нным, ты призва́ их свя́то патриа́ршее ме́сто в собо́ре Успе́нстем пу́сто не оста́вити.
Всечестна́я дво́ице, святы́й Ти́хоне, Патриа́рше и испове́дниче, блаже́нный Иларио́не, сподви́жниче того́ и му́чениче, о́браз вы Христа́ ра́спята в ми́ре сем яви́ла еста́.
А́нгели и Арха́нгели ны́не на Небесе́х ликовству́ют, ви́дяще два земны́я А́нгела, Ти́хона и Иларио́на, Це́рковию прославля́емая.
Богоро́дичен: Ра́дуйся, Цари́це Небе́сная, Це́ркве Сто́лпе непоколеби́мый, патриа́рхов правосла́вных похвало́, оби́телей святы́х неруши́мая стено́, гра́да на́шего и страны́ утвержде́ние.
Конда́к, глас 6
Иларио́не, священному́ченич
И́кос
От Боже́ственныя му́дрости твоея́, Иларио́не святы́й, испо́лни ум мой помраче́нный и стра́стный, я́ко да воспою́ житие́ твое́, доброде́тели и по́двиги твоя́, с ве́рными взыва́я: ра́дуйся, моли́твенниче наш преблаги́й, ра́дуйся, богосло́ве вдохнове́нный, ра́дуйся, глубину́ та́инства Це́ркве пости́гший, ра́дуйся, в Це́ркви еди́ной путь спасе́ния возвести́вший, ра́дуйся, хитросплете́ния лука́вых совопро́сников посрами́вший, ра́дуйся, еретики́ хи́щныя молниено́сно победи́вший, ра́дуйся, патриа́ршества кре́пкий защи́тниче, ра́дуйся, оте́ческих заве́тов ве́рный храни́телю, ра́дуйся, Христа́ и́стинное испове́дание, ра́дуйся, за Це́рковь же́ртвенное заколе́ние. Ра́дуйся, Иларио́не, Це́ркве на́шея сла́во и утвержде́ние.
Песнь 7
Ирмо́с: Неизрече́нное чу́до, в пещи́ Изба́вивый преподо́бныя о́троки из пла́мене, во гро́бе мертв бездыха́нен полага́ется, во спасе́ние нас пою́щих: Изба́вителю Бо́же, благослове́н еси́.
А́ще бы не му́жество твое́, священному́ченич
Труды́ твоя́, Иларио́не, вку́пе с Патриа́рхом твои́м Богому́дрым Ти́хоном, ми́лость Бо́жию привлеко́ша и чу́до неизрече́нное сотвори́ша: еретики́ я́ко дым исчезо́ша, и уста́ви церко́внии возстано́влени бы́ша, ве́рнии же восклица́ху: Бо́же, благослове́н еси́.
Наста́вник бысть мона́хом оби́тели Сре́тенския, Иларио́не архипа́стырю, из тоя́ же ты еретики́ изгна́вши, храм ико́ны Влади́мирския па́ки освяти́л еси́. Та́мо же и ны́не и́ноцы взыва́ют: Изба́вителю Бо́же, благослове́н еси́.
Иларио́не святы́й, оби́тели Сре́тенския сла́во, сподо́би нас, немощны́х и гре́шных, моли́твами твои́ми от пла́мене страсте́й изба́витися и от искуше́ний невреди́мы сохрани́тися, Го́сподеви взыва́юще: Бо́же, благослове́н еси́.
Богоро́дичен: Кто Тебе́ не просла́вит, Пресвята́я Де́во, Ты бо роса́ духо́вная, грехо́вный пла́мень угаша́ющая и ве́рныя благода́тию исполня́ющая, к Тебе́ Благослове́нней вопие́м: изба́ви нас огня́ ве́чнаго осужде́ния и спаси́ ду́ши на́ша.
Песнь 8
Ирмо́с: Ужасни́ся боя́йся не́бо, и да подви́жатся основа́ния земли́: се бо в мертвеце́х вменя́ется в Вы́шних Живы́й, и во гроб мал странноприе́млет
Ду́ху ми́ра се́го по́честь не возда́, Еди́наго Бо́га почита́тель пребы́л еси́, Иларио́не всесла́вне, ны́не Влады́ке всех предстои́ши. Его́же, о́троцы, благослови́те, свяще́нницы, воспо́йте, лю́дие, превозноси́те во вся ве́ки.
Вои́стинну вся власть тьмы на Це́рковь Ру́сскую ополчи́ся: оба́че ты, Иларио́не, ду́хом кре́пкий, сего́ не убоя́лся. Христа́ му́ченически испове́дал еси́. Мы же, моли́твами твои́ми огражда́еми, Царя́ Небесе́ и земли́ сла́вим. Его́же, о́троцы, благослови́те, свяще́нницы, воспо́йте, лю́дие, превозноси́те во вся ве́ки.
О, свяще́нная и спаси́тельная нощь Па́схи, егда́ ты, святи́телю Христо́в, во у́зах Солове́цких возгласи́: да воскре́снет Бог! Его́же, о́троцы, благослови́те, свяще́нницы, воспо́йте, лю́дие, превозноси́те во вся ве́ки.
О, земле́ Солове́цкая, возра́дуйся ны́не и возвесели́ся: сла́ва бо твоя́, Иларио́н преди́вный с со́нмом новому́чеников, на небесе́х за Русь Святу́ю мо́лит ны́не Царя́ Сла́вы. Его́же, о́троцы, благослови́те, свяще́нницы, воспо́йте, лю́дие, превозноси́те во вся ве́ки.
Богоро́дичен: Пресвята́я Де́во, на Небеса́ к Сы́ну Твоему́ взошла́ еси́ и ско́рбныя земли́ не оста́вила еси́. Покры́й честны́м Твои́м омофо́ром оби́тели и гра́ды на́ша, жизнь ве́чную подаю́щи всем воспева́ющим Тя.
Песнь 9
Ирмо́с: Не рыда́й Мене́, Ма́ти, зря́щи во гро́бе, Его́же во чре́ве без се́мени зачала́ еси́, Сы́на: воста́ну бо и просла́влюся, и вознесу́ со сла́вою непреста́нно, я́ко Бог, ве́рою и любо́вию Тя велича́ющия.
Егда́ во враче́бнице темни́чней Петро́ва гра́да огне́вицею те́ло твое́ пали́мо бе, душа́ твоя́ я́ко на вода́х упокое́ния, ра́достию испо́лнися, сете́й кня́зя ми́ра сего́ избе́гнув, и ко Христу́ отходя́.
Иларио́не сла́вне, ты Христа́ небоя́зненно испове́дал еси́, муче́ния за Него́ претерпе́л еси́ и кончи́ны блаже́нныя сподо́бился еси́. Те́мже и мы к тебе́ взыва́ем: моли́ Ми́лостивнаго Бо́га, да пода́ст и нам преставле́ние безболе́зненно и живо́т ве́чный.
А́нгельское пе́ние и благове́ст пасха́льный слы́шаша дру́зи твои́ и сро́дницы, егда́ душа́ твоя́, Иларио́не, чи́стая на не́бо восхо́д соверша́ше.
Те́ло твое́ многоболе́зненно
Богоро́дичен: Ма́ти Безневе́стная, не лиши́ нас Твоего́ заступле́ния, умоли́ Милосе́рднаго Судию́ оправда́ти ны, ве́рою и любо́вию Тя велича́ющих.
Свети́лен:
Вси святи́и Це́ркве Ру́сския ны́не ра́достно торжеству́ют, священному́ченик
Сла́ва, и ны́не, Богоро́дичен:
Пресвята́я Богоро́дице, Кра́сное Селе́ние Бо́га и Сло́ва, помози́ нам, Ми́лостивая, моли́твами Твои́ми терпе́ние и упова́ние стяжа́ти, и спасе́ние улучи́ти.
На хвали́тех стихи́ры на 4, глас 8:
Не отве́ргл ли Бог прему́дрость ми́ра сего́; тебе́ же дарова́на бысть му́дрость кре́стная и благода́тная, во след отце́м сле́довати и и́стину Це́ркве возвеща́ти. Учи́телю и́стиннаго богосло́вия, просвети́ на́ша помраче́нныя ду́шы, в ра́зуме церко́внем утвержда́я.
На суди́лищи безбо́жнем стоя́, Христа́ му́жески испове́дал еси́, Иларио́не священному́ченич
Ле́ностию, уны́нием и разслабле́нием от диа́вола бори́ми, к тебе́ Иларио́не, взыва́ем: моли́, влады́ко, Ще́драго Бо́га, да пода́ст Он нам благода́тныя си́лы Ему́ усе́рдно рабо́тати и Це́ркви Святе́й неуста́нно служи́ти, я́коже ты неусы́пно труди́лся еси́ ра́ди бла́га церко́внаго.
На Крест Христо́в взира́я, распя́лся еси́, Иларио́не, ми́ру, оскорбле́ния и боле́зни в терпе́нии поне́сл еси́: укрепи́ и ны на пути́ кре́стнем, во е́же ми́ру в нас ра́спяту бы́ти, и моли́ Христа́ Бо́га сердца́ на́ша любо́вию к Нему́ просвети́ти.
Сла́ва, глас 6.
Се́рдце очи́стив по́двигом, бла́га ми́ра сего́ презира́я, Христа́ пред безбо́жники испове́дав и Его́ ра́ди пострада́в, благода́ть Свята́го Ду́ха стяжа́л еси́, Иларио́не священному́ченич
И ны́не, Богодичен, глас то́йже:
Богоро́дице, Ты еси́ Тро́ическаго Сове́та Таи́нница, сподо́би и ны Тро́ицу Святу́ю в житии́ настоя́щем просла́вити, и све́том Трисия́тельным осия́ни ста́ти, и жи́зни ве́чныя приобщи́тися.
НА ЛИТУРГИ́И
Блаже́нны от кано́на, пе́сни 3-я и 6-я.
Проки́мен, глас 1: Уста́ моя́ возглаго́лют прему́дрость, и поуче́ние се́рдца моего́ ра́зум.
Стих: Блаже́н муж, ему́же не вмени́т Госпо́дь греха́.
Апо́стол ко Евре́ем, зача́ло 318.
Аллилу́ия, глас 1: Терпя́ потерпе́х Го́спода, и внят ми, и услы́ша моли́тву мою́.
Стих: Мужа́йтеся, и да крепи́тся се́рдце ва́ше, вси упова́ющии на Го́спода.
Ева́нгелие от Иоа́нна, зача́ло 36.
Прича́стен: В па́мять ве́чную бу́дет пра́ведник, от слу́ха зла не убои́тся.
Моли́тва
О вели́кий уго́дниче Бо́жий и пресла́вный чудотво́рче, святи́телю Иларио́не! От да́льних и бли́жних гра́дов и ве́сей соше́дшеся, во е́же на ме́сте по́двигов твои́х помоли́тися и многоцеле́бныя мо́щи твоя́ облобыза́ти, из глубины́ се́рдца взыва́ем к тебе́: жезло́м бла́гости, я́коже па́стырь до́брый, упаси́ заблу́ждшыя о́вцы ста́да Христо́ва, во дворы Госпо́дни сия́ всели́, огради́ нас от собла́зна, ересе́й и раско́лов, научи́ во стра́нствии су́ших го́рняя му́дрствовати: разсе́янный ум наш просвети́ и на путь и́стины напра́ви, охладе́вшее се́рдце согре́й любо́вию ко бли́жнему и ре́вностию ко исполне́нию веле́ний Бо́жиих, грехо́м и нераде́нием осла́бленную во́лю на́шу оживотвори́ благода́тию Ду́ха Всесвята́го: да твоему́ па́стырскому гла́су после́дующе, сохрани́м в чистоте́ и пра́вде ду́ши на́ша, и та́ко, Бо́гу помога́ющу, Небе́снаго Ца́рствия дости́гнем, иде́же ку́пно с тобо́ю воспросла́вим пречестно́е и великоле́пое и́мя Отца́ и Сы́на и Ду́ха Свята́го во ве́ки веко́в. Ами́нь.
Месяца декемврия в 15-день
Священномученика Илариона,
архиепископа Верейскаго
На малой вечерни
На Господи, воззвах: стихиры на 4, глас 6:
Егда Божиим попущением прииде на Церковь гонение лютое, воздвиже тя Господь, Иларионе славне, Церкве непоколебимаго столпа, мучеников украшение, сосуд честный Святaго Духа.
Егда любы и вера оскудеша и предания отеческая забвена быша, Иларионе богомудре, писании твоими тьму лжеучений обличил еси, святых отцев наследниче.
Егда волны ересей Церковь Божию обуреваху, ты, Иларионе, богомудрыми словесы тех свирепство утишил еси.
Егда неистовии богоотступницы смущаху Церковь Божию, ты, священномучениче Иларионе, верность первосвятителю Тихону неколеблемо сохранил еси, благий образ всем подавая.
Слава, глас тойже:
Кто возможет восхвалити тя, избранниче Божий и Церкве Христовы служителю, ересей обличителю и расколов искоренителю, ты бо, колеблющияся вразумляяй, и заблуждшия на путь истинный наставляяй, врагом Христовым противостав, злобу диаволю посрамил еси и Христа мужески исповедал еси, Того моли спастися душам нашим.
И ныне, Богородичен, глас тойже:
Богородице, Дево Чистая, Церкве Христовы покрове, покрый нас от всякаго зла и обстояния, сохраняющи чтущия Тя.
На стиховне стихиры, глас 4:
Доблестный святителю, святaго патриaрха Тихона сподвижниче, ты лесть безбожных возненавидел еси, и соблазны их обличил еси, и, судище неправедное претерпевaя, венец победный стяжал еси.
Стих: Многи скорби праведным, и от всех их избавит я Господь.
Егда святыня соловецкая поругана бысть, ты, архиерею Божий, мерзость запустения в свято место претворяя, во узах в нощи Святыя Пасхи возгласил еси: да воскреснет Бог и расточатся врази Его.
Стих: Уста праведнаго поучатся премудрости, и язык его возглаголет суд.
Премудрый наставниче пастырей, во отоцех соловецких заточение претерпевая, разбойники на стезю покаяния направил еси, отступники святыя веры обличил еси, малодушныя утешил еси, изнемогающия укрепил еси. Темже и исповедник Христов истинный явился еси.
Слава, и ныне, Богородичен, глас тойже:
Марие, Мати Пастыреначальника, буди пастырем православным Помощница, Церкве Христовы несокрушимая Стена, сохраняющи от раздоров и нестроений, наипаче же от злобы безбожия и лютых ересей.
Таже Ныне отпущаеши: Трисвятое, по Отче наш:
Тропарь, глас 4:
Святителю Христов Иларионе,/ славо и похвало Церкве Русския,/ разум божественный стяжав,/ пред безбожники Христа дерзновенно исповедал еси,/ Егоже ради страдания претерпевая,/ людем верным возглашал еси:/ без Церкве несть спасения.
На велицей вечерни
Блажен муж: 1-й антифон. На Господи, воззвах: стихиры на 8, глас 1:
О, священномучениче Иларионе, ревнителю патриаршества истинный, первосвятителю Тихону помощник верен был еси, Церковь Божию соблюдaя во дни искушений и гонений. Темже вопием ти: радуйся, святителю Христов, Церкве Православныя ревностный поборниче.
Днесь радуется обитель Сретенская, имущи святыя мощи Илариона чуднаго, егоже память светло празднующи, хвалебно воспевает: радуйся, святителю Христов, Церкве Православныя ревностный поборниче.
О, богомудре Иларионе, благодатию Святаго Духа просвещенный, истину Православия утверждая, лукавыя изобличил еси и словом крестным безумие мира сего посрамил еси. Сего ради взываем ти: радуйся, святителю Христов, Церкве Православныя ревностный поборниче.
Агнцу Божию в терпении подражая, беззлобно темничная страдания, прещения и поношения, глад, мраз и болезни претерпел еси и, за враги моляся, Иларионе святе, кротко душу Христу предал еси. Сего ради ублажаем тя: радуйся, святителю Христов, Церкве Православныя ревностный поборниче.
Ины стихиры, глас 4:
От Бога обогащен чистотою душевною, постническими подвиги благодать Святаго Духа стяжал еси, добродетели любителю и греха победителю, земный Ангеле и Небесный человече.
От юности Христа возлюбив, вся краcная мира сего оставил еси, Иларионе славне, и, высшаго любомудрия взыскуя, в лик иночествующих вселился еси, земный Ангеле и Небесный человече.
Очи сердечнеи писании Божественными просветил еси, блаженне Иларионе, темже, в богословии Православия высоту показуя, свидетель верен явился еси, и, каноны церковныя утверждая, вся ко спасению наставил еси, земный Ангеле и Небесный человече.
Видя яко безбожных множество на веру Христову ополчися, церкви святыя сокрушая и люди православныя истребляя, тогда со слезами к угодником земли нашей о спасении народа Божия взывал еси, святителю Иларионе, земный Ангеле и Небесный человече.
Слава, глас 8:
Приидите, людие вси, священномученику Илариону верно поклонимся, и, тому подражающе, все упование на Христа возложим, и нечестия мирскaго отвергнемся, в вере же и чистоте пребудем, поработаем Господеви и Его Церкви Святей, скорби и болезни до конца претерпим. Ты же, святый Иларионе, моли Христа Бога, да простит нам грехи наша и Царствия Небеснаго сподобит.
И ныне, Богородичен догматик, глас тойже: Царь Небесный:
Вход. Прокимен дне. И чтения.
На литии стихира священномученика, глас 5:
Днесь ликует Собор новомучеников Церкви Русския, имея в себе священномученика всеславнаго, исповедника непоколебимаго, Илариона архиерея богомудраго и молитвенника теплаго о душах наших.
О, святителю Иларионе, ты, во всем божественным отцем последуя, о Церкви неложно богословствовал еси, сердце добрым подвигом очистив, о людех болезновал еси и, врагом Церкве противостав, колеблемыя утвердил еси. Темже ныне Святей Трoице предстоя, молися о душах наших.
Слава, глас 1:
По имени твоему, Иларионе блаженне, и житие твое бысть: посреде бо мятежа мирскаго, тишину Христову стяжал еси, всегда радуяся и о всем благодаря, чистым сердцем Бога познал еси и ныне молишися о душах наших.
И ныне, Богородичен, глас тойже:
Радуйся, Богородице Чистая, церковная Похвало, Столпе девства, премудрости Приятелище, Двере спасения. Не остави нас во тьме неведения пребывающих, просвети наша очеса сердечная и сподоби ны узрети свет Царствия Божия.
На стиховне стихиры, глас 6:
Дар благодaти Божественныя приял еси, Иларионе, избранниче Божий, крест бо взем, Христу последовал еси и, жизни вечныя взыскуя, вся суетная мира отвергл еси. Ныне же со всеми святыми на небесех ликуя, молися о душах наших.
Стих: На Тя, Господи, уповах, да не постыжуся во век.
Воле Божией последуя, жезл архипастырский, яко крест, в годину гонений приял еси и, к мученичеству за Христа уготовляяся, Того пред безбожными дерзновенно исповедал еси. Ныне же со всеми святыми на небесех ликуя, молися о душах наших.
Стих: Веселитеся о Господе и радуйтеся, праведнии, и хвалитеся, вси правии сердцем.
Духа Святаго исполненный, Иларионе дивный, посреде страданий и мрака неверия, пасхальныя радости причастник явился еси и свет невечерний зрети от Бога сподобился еси. Ныне же со всеми святыми на небесех ликуя, молися о душах наших.
Слава, глас 8:
Како наречем тя, священномучениче преславне? Веры ли Православныя ревнителя? Богослова ли преизящнаго? Устроения ли церковнаго рачителя? Мудрости ли отеческия хранителя? Проповедника ли дерзновеннаго? Ангелов ли небесных собеседника? Недоумевaет ум именовaти тя, ты бо еси Церкве Русския утверждение, страны нашея слава и мучеников похвала.
И ныне, Богородичен, глас тойже:
Радуйся, Преблагословенная Владычице, Сын бо Твой из мертвых восста и нам дарова живот вечный.
Тропарь писан на на малой вечерни.
На утрени
На Бог Господь: тропарь дважды. Слава, и ныне, Богородичен, глас тойже.
По 1-м стихословии седален, глас 6:
Мудрость честну не многими леты, но скорбьми и страданьми стяжал еси, Иларионе святе, и Бога чистым разумом познал еси, помози и нам причастники Божественныя премудрости соделатися.
Слава, и ныне, Богородичен, глас тойже:
О, Пресвятaя Дево, Царице Небесная, из Тебе воплотися Божественное Слово, и Человек бысть, да мы обожимся.
По 2-м стихословии седален, глас 4:
Днесь обитель Сретенская светло торжествует, крепкаго молитвенника и пред Богом теплаго ходатая тя имущи, святителю Иларионе, ты бо в годину гонений и еретических нападений обитель сию добре упасл еси.
Слава, и ныне, Богородичен, глас тойже:
Пресвятая Богородице, Заре светлая Трисиятельнаго Света, Тобою грады и обители утверждаются, советы вражия посрамляются, сердца верных чистотою и любовию просвещаются, супостаты низлагаются. Подаждь и нам победы на враги и спаси души наша.
Величание:
Величаем тя, священномучениче Иларионе, и чтим честная страдания твоя, яже за Христа претерпел еси.
По полиелеи седален, глас 5:
Воспоим, вернии, священномученика архиепископа Илариона, за Церковь душу свою положившаго, Христова воина славнаго, егоже днесь Русь святая достохвально величает.
Слава, и ныне, Богородичен, глас 1:
Мати Божия и Дево, в рождестве девство сохраншая, не остави нас немощствующих, от бед и болезней сохрани и молитвами Твоими избави от смерти души наша.
Степенна 1-й антифон 4-го гласа. Прокимен, глас 4: Проидохом сквозе огнь и воду/ и извел еси ны в покой. Стих: Разжегл ны еси, якоже разжизается сребро. Всякое дыхание: Евангелие от Матфеа, зачало 36.
По 50-м псалме стихира, глас 6:
Буря напастей смущает мя, яко умножишася беззакония и оскуде любы, сего ради взываю к тебе, святителю Иларионе: буди ми помощник и заступник, исцели и вразуми мя и на путь спасения направи, и научи волю Божию творити.
Канон Богородицы со ирмосом на 6 и святаго священномученика Илариона на 8, егоже краегранесие: Илариона славнаго Христова ратника воспеваем. Глас 6.
Песнь 1
Ирмос: Волною морскою скрывшаго древле гонителя мучителя под землею скрыша спасенных отроцы: но мы яко отроковицы, Господеви поим, славно бо прославися.
Иларионе, всечестный святителю, по имени твоему и житие твое бысть, тишину бо молитвенную внутрь себе имея, радость пасхальную всем явил еси.
Лесть гонителей твоих отвергнув, мучения лютаго не убоялся еси, святе, Христа же пред судиями неправедными мужески исповедав, славою небесною прославился еси.
Ангелов собеседниче, Иларионе преподобне, во ограде дома Живоначальныя Трoицы, пожил еси, идеже постом и молитвою душу очистив, боговедение стяжал еси.
Ревность по Бозе имея, святителю, богоборцев словом обличал еси, такожде и еретических мудрований не терпя, нечестивыя из обителей и храмов изгонял еси, кающияся же ко спасению приводил еси.
Богородичен: Иныя помощи не имамы, разве Тебе, Владычице, Ты нам помози моря жития сего пучину яко по суху проити неискушенно от злых.
Катавасия: Отверзу уста моя:
Песнь 3
Ирмос: Тебе на водах повесившаго всю землю неодержимо, тварь видевши на лобнем висима, ужасом многим содрагашеся, несть свят, разве Тебе, Господи, взывающи.
От юности чистоту возлюбив, Иларионе дивный, девственник душею и телом пребыл еси и, не пожелав поработати твари паче Творца, на земли невещественное житие показал еси.
Небесный человече, земный Ангеле, Иларионе премудре, святым отцем житием последуя, за Христа душу твою положил еси и земли Русския украшение явился еси.
Архиерею Божий, Иларионе святе, кротостию, смирением и терпением, паче же любовию преукрашен был еси, сего ради за мучителей твоих молился еси, Христу Богу подражая.
Святаго Духа дар стяжав, Сыну Божию, крест взем, последовал еси, и волю Отца Небеснаго исполнил еси, Иларионе блаженне, Трoицы Святыя истинный почитателю.
Богородичен: Лествице Небесная, Еюже сниде Бог, долу лежащее естество наше к небеси возводиши, темже Тя, Пресвятая Богородице, любовию непрестанно величаем.
Седален, глас 7:
Священномучениче славне Иларионе, архиерею и друже Христов, ты, в темнице заключен быв, не восхотел еси слугам антихристовым поклонитися, якоже и мученицы древле не возжелаша жертву идольскую принести. Сего ради помози нам молитвами твоими стрелы вражия отразити и козни диавольския разорити, единаго же Христа распятаго выну очесы умными зрети и Тому из глубины сердечныя взывати: Господи, Иисусе Христе, помилуй нас.
Слава, и ныне, Богородичен, глас тойже:
Предстательнице и Молитвеннице наша, Пресвятая Владычице, умоли Сына Твоего и Бога, егда сядет судити живым и мертвым, да простит грехи и беззакония наша, и сподобит ны Царствия Небеснаго.
Песнь 4
Ирмос: На Кресте Твое Божественное истощание провидя Аввакум, ужасся вопияше: Ты сильных пресекл еси державу, Блаже, приобщаяся сущим во аде, яко Всесилен.
Апостольское слово исполняя, в безбожнем мире Христа проповедал еси, Иларионе богомудре, и Церковь Его от волков, расхищающих ю, неусыпно охранял еси.
Велика тайна есть Церкве, яко невесты Христовы, юже ты, Иларионе, чистым сердцем узрел еси и ясно провозгласил еси.
Небесныя любве дара удостоен быв, Иларионе, Бога Трoицу во Единице, Иже есть Любы, исповедал еси и о Церкви Святей, яже есть любве единение, богословствовал еси.
Адамант веры быв и отеческих заветов хранитель, святителю Иларионе, лукавыми учении не смущаемь, Богородицу Чистую, яко Деву и Матерь, прославил еси.
Богородичен: Голгофе предстоящи, Матерь Божия скорбно взываше: увы Мне, Сыне Мой! Како на Кресте висиши, землю на водах повесивый? Како страсти терпиши, пришедый спасти мир?
Песнь 5
Ирмос: Богоявления Твоего, Христе, к нам милостивно бывшаго, Исаия свет видев невечерний, из нощи утреневав взываше: воскреснут мертвии, и востанут сущии во гробех, и вси земнороднии возрадуются.
О, святителю Христов Иларионе, помози нам нощь жития сего скорбнаго в терпении и покаянии без порока прейти, и радости света невечерняго сподобитися.
Христовым пастырем правило был еси, Иларионе, и наставник терпеливый, не токмо словом, но и делом образ им показуя, и благодатию, тебе от Бога данною, укрепляя.
Радости духовныя исполнен, Иларионе, шествовал еси путем тесным и прискорбным, всех уча Христу сраспинатися, дабы с Ним воскреснути.
Иноцы обители Сретенския днесь прославляют архипастыря Илариона, служителя благоговейнаго Девы Пренепорочныя, славу Владимирскому образу Ея достойно воздавшаго и тем прещения безбожных презревшаго.
Богородичен: Славим Тя немолчно, Владычице, и ко иконе Твоей Владимирстей припадаем, взывающе: покрый град Москву от тьмы греховныя и безбожныя и спаси души наша.
Песнь 6
Ирмос: Ят бысть, но не удержан в персех китовых Иона: Твой бо образ нося, Страдавшаго и погребению Давшагося, яко от чертога от зверя изыде, приглашаше же кустодии: хранящии суетная и ложная, милость сию оставили есте.
Ты, иерарше честный, о устроении Церкве Русския ревнуя, из глубины душевныя Христу Богу взывал еси: Господи, чин патриарший возстави и единомыслие в Церкви соблюди.
О, Иларионе блаженне, ты, Собору мужей церковных предстоя, мудрым словом, благодатию растворенным, призвал еси их патриаршеством Церковь Русскую паки украсити и по достоянию возвеличити.
Всечестный Иларионе святителю, верный сподвижник Тихона патриарха явился еси, Церковь от безбожных властей и раздирающих хитон Христов доблественне охраняя.
Архиерея достославнаго Илариона Верейскаго днесь, вернии людие, благочестно восхвалим, той бо град Москву от поновляющих и изменяющих чин церковный огради и верных в благочестии утверди.
Богородичен: Радуйся, Царице Небесная, Патриархов православных Похвало, обителей святых нерушимая Стено, града же первопрестольнаго и страны нашея Утверждение.
Кондак, глас 2:
Славу мира сего оставив, Христу доблественне последовал еси и, святительское служение восприим, венцем мученичества украсился еси, и ныне, Престолу Божию предстоя, молися, Иларионе, иерарше премудре, спастися душам нашим.
Икос:
Светом божественныя мудрости, Иларионе святый, исполни ум мой помраченный, да восхвалю житие твое, взывая сице:
Радуйся, Христа Бога верный служителю;
радуйся, Церкве Его истинный исповедниче.
Радуйся, юных добрый наставниче;
радуйся, Слова Божия изрядный проповедниче.
Радуйся, верным путь спасения возвестивый;
радуйся, хитросплетения суетная посрамивый.
Радуйся, патриаршества ревнителю;
радуйся, отеческих заветов дивный хранителю.
Радуйся, Иларионе, Церкве нашея славо и украшение.
Песнь 7
Ирмос: Неизреченное чудо, в пещи избавивый преподобныя отроки из пламене, во гробе мертв бездыханен полагается, во спасение нас поющих: Избавителю Боже, благословен еси.
Аще не явилася бы велия ревность новомучеников Церкви Русския, погибла бы вера Православная во отечестве нашем. Ты же, святителю Иларионе, с ними страдания претерпевая, взывал еси: Избавителю Боже, благословен еси.
Труды и подвиги, священномучениче Иларионе, богоугодне понесл еси, имиже разорители Церкве Христовы посрамлены быша, вернии же восклицаху: Избавителю Боже, благословен еси.
Наставник монахом быв, Иларионе святе, ты во время лихолетия обитель Сретенскую от нечестивых защищал еси. И ныне тамо мощами почиваеши, иноков ея научая взывати: Избавителю Боже, благословен еси.
Иларионе святе, Церкве Русския похвало, сподоби нас, немощных и грешных, молитвами твоими от пламене страстей избавитися и от искушений невредимы сохранитися, Господеви взывающе: Избавителю Боже, благословен еси.
Богородичен: Кто Тебе не прославит, Пресвятая Дево, Ты бо еси Роса небесная, греховный пламень угашающая и верныя благодатию исполняющая. Темже Тебе вопием: избави нас вечнаго осуждения и спаси души наша.
Песнь 8
Ирмос: Ужаснися бояйся небо, и да подвижатся основания земли: се бо, в мертвецех вменяется в вышних Живый, и во гроб мал странноприемлется: Егоже, отроцы, благословите, священницы, воспойте, людие, превозносите во вся веки.
Агнца Божия возлюбив и духа мира сего отвергнув, единаго истиннаго Бога служитель пребыл еси, Иларионе славне, ныне же на Небеси Владыце всех предстоиши. Егоже, отроцы, благословите, священницы, воспойте, людие, превозносите во вся веки.
Внегда вся власть тьмы на Церковь Русскую ополчися, тогда ты, Иларионе, духом крепкий, Христа исповедати не убоялся еси. Егоже, отроцы, благословите, священницы, воспойте, людие, превозносите во вся веки.
О, священная и спасительная нощь Пасхи, егда ты, святителю Христов, во узах соловецтих возгласи: да воскреснет Бог! Егоже, отроцы, благословите, священницы, воспойте, людие, превозносите во вся веки.
Соловецкая земле многострадальная, возрадуйся и возвеселися: Иларион бо предивный с сонмом новомучеников на небесех за Русь Святую молит ныне Царя Славы. Егоже, отроцы, благословите, священницы, воспойте, людие, превозносите во вся веки.
Богородичен: Пресвятая Дево, на Небеса к Сыну Твоему возшла еси и нас, сирых, на земли не оставила еси; покрый честным Твоим омофором обители и грады наша, жизнь вечную подающи всем воспевающим Тя.
Песнь 9
Ирмос: Не рыдай Мене, Мати, зрящи во гробе, Егоже во чреве без семене зачала еси Сына: востану бо и прославлюся, и вознесу со славою, непрестанно, яко Бог, верою и любовию Тя величающия.
Егда во врачебнице темничней Петрова града огневицею тело твое палимо бяше, душа твоя, яко на водах упокоения радостию исполнися, и, сетей князя мира сего избегнув, ко Христу отыде.
Воине Христов, Иларионе славне, ты Господа в житии твоем небоязненно исповедав, кончины блаженныя сподобился еси. Темже взываем: моли милостиваго Бога, да подаст нам во истинней вере живот свой скончати.
Ангельское пение и звон пасхальный друзи твои и сродницы, услышавше, возрадовашася, Иларионе, уразумеша бо, яко душа твоя чистая на небо восход совершаше.
Егда тело твое многоболезненное во гробе положено бысть, чада твоя духовная со слезами к тебе взываху: молися о нас, праведниче, у престола Господня.
Богородичен: Мати Безневестная, не лиши нас Твоего заступления, умоли Милосердаго Судию оправдати ны, верою и любовию Тя величающих.
Светилен:
Вси святии Церкве Русския ныне торжествуют светло, священномученика и архиерея Илариона зряще, с ними Трoице Божественней молитвенно предстоящаго.
Слава, и ныне, Богородичен:
Пресвятая Богородице, дивное селение Бога и Слова, помози нам, Милостивая, молитвами Твоими терпение и упование стяжати, и спасение улучити.
На хвалитех стихиры на 4, глас 8:
О, преславне святителю Иларионе, учителю истиннаго богословия, тебе от Бога дарована бысть мудрость благодатная, во след отцем шествовати и истину Церкве возвещати. Сего ради просвети души наша помраченныя, в разуме церковнем утверждая.
О, предивне священномучениче Иларионе, на судищи безбожнем стоя, ты Христа мужески исповедал еси и верныя в подвизе укрепил еси, темже помози и нам в житии Христу последовати, да не посрамлени будем на судищи Божием.
О, достохвальне архиерею Христов Иларионе, благодатныя силы исполнен, образ истиннаго пастыря явил еси, и о единстве церковнем неусыпно ревновал еси, темже буди и нам пастырь добрый и к любви истинней настави.
О, Иларионе, священномучениче добле, ты, на Крест Христов взирая, миру сему распялся еси, оскорбления и болезни смиренно претерпевая. Темже моли Христа Бога укрепити ны на пути крестнем и сердца наша светом неприступным просветити.
Слава, глас 6:
Сердце добрым подвигом предочистив, блага мира сего презрел еси, Иларионе священномучениче, и Христа пред безбожники небоязненно исповедав, благодать Святаго Духа стяжал еси. Темже имый дерзновение ко Христу Богу, моли Того спастися душам нашим.
И ныне, Богородичен, глас тойже:
Богородице, Ты еси Лоза истинная, возрастившая нам Плод Живота, Тебе молимся, молися, Владычице, со святыми апостолы и священномучеником Иларионом, помиловати души наша.
На Литургии
Блаженна от канона святаго, песнь 3-я и 6-я. Прокимен, глас 1: Уста моя возглаголют премудрость, и поучение сердца моего разум. Стих: Услышите сия вси языцы, внушите вси живущии по вселенней. Апостол ко Евреем, зачало 318. Аллилуиа, глас 1: Терпя потерпех Господа, и внят ми, и услыша молитву мою. Стих: Мужайтеся, и да крепится сердце ваше, вси уповающии на Господа. Евангелие от Иоанна, зачало 36. Причастен: В память вечную:
Тропарь, глас 4-й
Воине Христов Иларионе,│ славо и похвало Церкве Русския,│ пред гибнущим миром Христа исповедал еси,│ кровьми твоими Церковь утвердися,│ разум Божественный стяжал еси,│ людем верным возглашаше:║ без Церкви несть спасения.
Кондак, глас 6-й
Иларионе, священномучениче Христов,│ служителей грядущаго антихриста не убоялся еси,│ Христа мужески исповедал еси,│ за Церковь Божию живот твой положи.│ Красо новомученик Российских,│ Руси святыя похвало,║ ты Церкве нашея слава и утверждение.
