Гимнография прписп. Варсонофия (Юрченко) архимандрита, Херсонского
Гимнография:
Даты:
Бдение (с литией):
НА ВЕЛИЦЕЙ ВЕЧЕРНЕ
Стихиры на Господи воззвах, глас 4:
Егда Божественное звание, прииде на тя, / богомудре отче Варсонофие,/ тогда вся мирская мудрования оставив,/ Вышних взыскуя,/ невозвратно Христу последовал еси,/ крест священничества на рамо взем,/ вкупе со иными священномучениками,/ яко верный пастырь стада Христова,/ в служении и окормлении паствы ревностно подвизался еси./ Темже ныне достойно со святыми наставники твоими/ Троицу воспеваеши присно,/ Юже моли даровати спасение верою чтущим тя.
Егда Божественное рачение найде на тя,/ блаженне отче Варсонофие,/ тогда Святым Духом движимь,/ Христа пред отступники исповедал еси,/ заточение, изгнание и болезни многия претерпел еси,/ бодрость духа и сострадание к ближним во всяких обстояниях сохраняя,/ к полку новомучеников и исповедников волею сопричислился еси,/ с нимиже ныне вкупе пред Лицем Божиим предстоиши во славе / и молиши даровати Православныя веры утверждение/ и душам нашим спасение.
Егда Божественное желание достиже тя,/ преславне отче Варсонофие,/ тогда вся мирская оставив,/ неведущим Бога проповедал еси,/ от тьмы тех к свету богоразумия наставляя,/ клевету и иныя козни вражеския поправше,/ молитвами и поучении храмы душевныя неустанно созидаше./ Темже и венцем небесным / Христос, Емуже неленостно поработал еси, венча тя;/ Егоже моли спасти и просветити души наша.
Слава, глас 6:
Днесь созывает нас преподобнаго отца и исповедника торжество,/ приидите убо, празднолюбцы,/ светло празднуем память его, глаголюще:/ радуйся, светильниче многосветлый,/ возводя ко Христу множества просвещенных тобою;/ радуйся, града Херсона и всея земли нашея похвало и удобрение,/ и всех верных благоутишное пристанище и крепосте;/ радуйся за Христа претерпети узы и раны сподобивыйся,/ с Нимже ныне присно пребываеши в радости,/ Егоже моли, отче благомудре Варсонофие,/ избавити ны от видимых и невидимых враг / и спасти души наша.
И ныне, глас 6:
Кто Тебе не ублажит, Пресвятая Дево,/ кто ли не воспоет Твоего пречистаго Рождества?/ Безлетно бо от Отца возсиявый Сын Единородный,/ Той же от Тебе, Чистая, пройде,/ неизреченно воплощься:/ естеством Бог Сый,/ и естеством быв Человек нас ради;/ не во двою лицу разделяемый,/ но во двою естеству/ неслитно познаваемый./ Того моли, Чистая Всеблаженная,/ помиловатися душам нашим.
Стихиры на литии: Глас 1:
Силе благодати от уст твоих исходящей,/ вси внимающии словесем твоим дивляхуся,/ и тобою проповедуемому Христу от души вероваша,/ Егоже моли, премудре отче Варсонофие,/ спастися всем нам, священное твое торжество совершающим.
Божие величие богодухновенно воспев,/ к познанию во Святей Троице Единаго Бога многих богоотступных сынов привел еси,/ потрудитися над преображением своея души понуждая:/ аще вся силы направити ко очищению сердца потщитеся, - рече,/ - чада Божия возлюбленнии наречетеся./ Темже и мы, духовныя чада твоя/ яко наставника благочестия, любовию воспевающе,/ со умилением молим тя:/ научи ны выну пред лицем Божиим ходити.
Слава, глас 6:
Наста, исповедниче Варсонофие,/ всечестное и преславное торжество / в прославлении твоем со всеми святыми Русские земли./ И ныне вкупе с ними молися ко Господу,/ спастися душам нашим.
И ныне, глас тойже:
Предвозвествует Гедеон зачатие,/ и сказует Давид рождество Твое, Богородице:/ сниде бо, яко дождь на руно,/ Слово во чрево Твое,/ и прозябла еси безсеменне,/ Земле святая,/ мира спасение Христа Бога нашего, Благодатная.
Стихиры на стиховне, глас 8:
Даждь ми светозарную благодать,/ от Божественнаго свыше промышления,/ избежати страстей омрачения/ и пети усердно твоего, преподобне отче и исповедниче,/ жития красная исправления.
Стих: Честна пред Господем/ смерть преподобных Его.
Апостольских деянияй ревнителю,/ землю Херсонскую яко жребий приемши,/ святым крещением людие многия/ из тьмы и бездны безбожия/ к свету спасительному извел еси.
Стих: Блажен муж, бояйся Господа,/ в заповедех Его восхощет зело.
Послушания усердный подвижник,/ выю свою подконив окормлению наставников своих,/ духовне тя породивших,/ и восприят в помощь на супротивника глубочайшее смирение,/ имже разруши козни вражия:/ ничтоже бо может враг на смиренныя.
Слава, глас 4:
Взыскующих Христа окормитель и кормчий,/ столп Православия и веры поборник,/ ты, старче богомудре Варсонофие,/ апостольски взывал еси:/ ничтоже ны разлучит от любве Божия;/ худшее, братие, покорим лучшему/ и плоть поработим духу./ Темже явися светильник Церкви,/ не под спудом, но на свещнице поставлен,/ да прославят Бога вси видящии дела твоя.
И ныне, глас тойже:
Ни слово, ни разум,/ ни всякая мудрость человеческая/ Твое не возмогут рождество разумети/ и воспети достойно,/ но страхом приклоншеся/ ужасаемся величию Твоему, Непорочная.
Тропарь, глас 8:
Православия ревнителю, / ересей и расколов богомудрый обличителю, / Церкви Святыя изящное украшение, / притекающим к тебе верный предстателю и заступниче,/ преподобне отче наш, Варсонофие, / молися ко Господу Спасу нашему / землю Херсонскую и всю страну нашу от всяких бед и зол избавити, / умирити мир и спасти душы наша.
Ин тропарь, глас 2:
В молитвах теплый заступниче / и просящим скорый послушателю,/ отче исповедниче Варсонофие,/ приими моление наше, / и Христа Бога моли помиловати нас,/ тя во святых прославляющих.
НА УТРЕНИ
По 1 стихословии седален:
В духе Евангельских заповедей воспитав свою душу, явился еси делателем неленостным на ниве Христовой, избранниче Божий, преподобне отче Варсонофие, все упование на Единаго Бога возложив, благодатию тебе данною преуспел еси во учении и доброделании.
Слава и ныне, Богородичен:
Обновила еси, Чистая, божественным рождеством Твоим истлевшее страстьми земнородных мертвенное естество: и воздвигла еси вся от смерти к жизни нетления. Темже Тя по долгу блажим вси, Дево Препрославленная, якоже прорекла еси.
По 2 стихословии седален:
Мужественное показал еси души твоея мудрование, человеческое разумение оставль, Высшей Премудрости ум, волю и чувство покорил еси; темже вшедше в Небесная, просвети, отче, благодарным сердцем тя восхваляющия.
Слава и ныне, Богородичен:
Ужасно чудо зачатия, и несказанен образ рождества в Тебе познася Приснодево Чистая, ужасает мой ум, и удивляет помышления; слава Твоя, Богородице, во всех простреся, ко спасению душ наших.
По полиелеи седален:
Евангельское учение о Царствии Божии, иже внутрь души человечестей должно утвердитися, неразумеющим ясно изъяснил еси, стрелами глагол твоих поражая ленивыя и теплохладныя; воздвигни и ны подвизатися во брани невидимой.
Слава и ныне, Богородичен:
Настави ны на путь покаяния, уклоняющияся присно к злым беспутием, и преблагаго прогневляющия Господа, неискусобрачная Благословенная Марие, прибежище отчаянных человеков, Божие обиталище.
Прокимен: Честна пред Господем/ смерть преподобных его.
Стих: Что воздам Господеви о всех, яже воздаде ми.
Евангелие: от Матфея. зач. 43
По 50 псалме стихира, глас 6:
Преподобне отче,/ во всю землю изыде вещание исправлений твоих:/ темже на небесех обрел еси мзду трудов твоих,/ демонская разорил еси полчища,/ и ангельския достигл еси чины,/ ихже житию непорочно поревновал еси./ Дерзновение имея ко Христу Богу,/ мир испроси душам нашим.
Канон, глас 8.
Песнь 1
Ирмос: Воду прошед яко сушу,/ и египетскаго зла избежав,/ израильтянин вопияше:/ Избавителю и Богу нашему поим.
Вразуми мя от Божественнаго свыше промышления воспети тя достойно, преподобне отче Варсонофие, исповедниче.
Приклоншеся Христовым Божественным законом, сладостей стремления от млада отвратившеся, всякую добродетель всеблагоговейно, яко едину, исправил еси.
Всем сердцем притекл еси Христу, изначала спасительный узкий путь избравше, и пустынных отец житию поревновавше, чисте совершающе Единаго Учителя Божественныя заповеди.
Богородичен: Светлый Тя и святый храм Владыки всех, Богоотроковице, с лики безплотных воспеваю радостно, без истления Бога Слово Рождшую.
Песнь 3
Ирмос: Ты еси утверждение притекающих к Тебе, Господи,/ Ты еси свет омраченных,/ и поет Тя дух мой.
Сияние святости преподобных отец, яко свет фаворский пронзи сердце твое огнем Божественным, егоже потщався не угасити, но на свещнице возвыси, даже и дальния страны изгнания свет той достигл еси.
Вслед Христа последовал еси радующеся, носящи крест свой на раме, исповедниче прехвальне; мучителей бо не убоявся, силою Креста укрепляемь.
Землю Херсонскую яко апостольский жребий приемши, Христа проповеданием, неустанною молитвою и подвиги исповедническими собор новомучеников и исповедников Русских светолепно украсил еси.
Богородичен: Надеждо и Предстательство Тебе поющих, яко Владычица Чистая, Пречистая Богородице Дево, едина Всепетая, моли во еже спастися нам.
Седален, глас 8:
Молитвами твоими, отче преподобноисповедниче Варсонофие, возстави ум и волю, помраченнии страстьми, да в разум приидем и завет со Христом нелицемерным покаянием обновим.
Богородичен:
Непостижимаго Бога, Сына и Слово, несказанно паче ума Рождшая, моли, Заступнице наша, Богородице, согрешений дати нам прежде конца прощение и Царствия Небеснаго достигнути.
Песнь 4
Ирмос: Услышах, Господи,/ смотрения Твоего таинство,/ разумех дела Твоя,/ и прославих Твое Божество.
Яко соние, яко цвет, время жития течет, что всуе мятемся? - вопрошаеши отче, ко обновлению души силою покаяния призывающе.
Востаните, трезвитеся, близ при дверех Судия есть, - взывал еси, старче богомудрый, ко отвращающимся от благочестия, - да не изыдите осуждени в муку вечную.
Последующе наставлению твоему, отче, смирением потщимся изменити душу, - истинное бо смирение сетей свободно лукаваго.
Богородичен: Ни слово, ни разум, ни мудрость человеческая не возмогут Твое рождество разумети, Непорочная, но спасаемии Тобою радостно вопием: слава Воплощшемуся от Тебе.
Песнь 5
Ирмос: Утренююще вопием Ти/, Господи, спаси ны:/ Ты бо еси Бог наш,/ разве Тебе иного не вемы.
Рассеяннаго жития моего губительное течение исправи, отче богомудре Варсонофие, покаяния бо и трезвения ты еси таинник и делатель на ниве Христове преизрядный.
Имея тя помощника, отче, неленностно потрудимся, братие, приуготовим ся вечности, законы Царствия Небеснаго: Богообщения, любви и чистоты - молитвою, незлобием и целомудрием, в сердце утвердим.
Преподобне Варсонофие, отеческая похвало, не престай моляся, предстоя Троице Пребожественней, даровати разум, и силу зрети, и побеждати страсти душевныя, предстателя тя божественнаго призывающим.
Богородичен: Неизмерна глубина любве и милосердия Твоего, Мати Божия и человеческаго рода Заступнице верная, не остави до конца в бездне прельщений погибающих, ко пристанищу спасительному таинств церковных направи.
Песнь 6
Ирмос: Молитву пролию ко Господу,/ и Тому возвещу печали моя,/ яко зол душа моя исполнися,/ и живот мой аду приближися,/ и молюся, яко Иона:/ от тли, Боже, возведи мя.
Содержим аз есмь бурею и треволнением согрешений, но сам мя, наставниче, якоже и паству твою в бедственныя времена упасл еси, силою молитв твоих ко пристанищу Божественнаго покаяния возведи.
Обратися, покайся, открый сокровенная, глаголи Богу, вся ведущему, тайная твоя, да подаст ти силу победити плотския страсти, - тако заповеда творити старец богомудрый.
Егоже возлюбил еси, Егоже возжелел еси, Егоже ради гонения претерпел еси, исповедниче отче Варсонофие, моли ныне Христа от незаходимых глубин греха и отчаяния нас избавити.
Богородичен: Пречистая Владычице, Богородительнице, Надеждо к Тебе притекающих и Пристанище сущих в бури, Милостиваго Создателя и Сына Твоего умилостиви молитвами Твоими.
Кондак, глас 4:
Яко пресветлая звезда/ в земли Херсонстей возсиял еси, преподобне, / и Богом укрепляемь,/ узы и страдания за веру Православную претерпел еси. / Темже усердно молимся тебе: / научи нас, отче, твоему богоразумию / и уврачуй недуги наша душевныя и телесныя, / да во умилении зовем ти: / радуйся, исповедниче Христов, преподобне отче наш Варсонофие.
Икос:
Возлюбив, преподобне, Христовы Божественныя заповеди, и возненавидев мира сего наслаждение, пришел еси усердно к Тому, и был еси светильник, просвещая концы блистанием духовным; тем, припадая, молим тя: просвети наши очи душевныя, воспети твоя подвиги, пощение, и бдение, и слезы, болезни и измождение тела, блаженныя ради будущия жизни, еяже ныне наслаждаешися, преподобне отче наш Варсонофие.
Ин кондак, глас 8:
Огнь святости отцев преподобных преобрази душу твою,/ образ жизни духовныя от них восприял еси,/ и потрудился еси, возводя вся к Божественней высоте./ Яко злато в горниле страданий очищен,/ земли Херсонския украшение явился еси;/ темже молим тя:/ молитвами твоими от всяких ны бед спасай, да зовем ти:/ радуйся, преподобне отче Варсонофие богомудре.
Песнь 7
Ирмос: От Иудеи дошедше отроцы/, в Вавилоне иногда,/ верою Троическою пламень пещный попраша, поюще:/ отцев Боже, благословен еси.
Яко дерзновение имый ко Господу, исповедниче и преподобне, разрешение от уз лицемерия, тщеславия, самомнения помози обрести молитвами твоими, да сокрушенным сердцем воспоим: благословен еси, Господи, Боже отец наших.
Яже в мире мужественно поправше временная вся, бодрствовал еси в молитве, богоносне отче, ныне же ликуеши с воинствы Ангельскими, воспевающе: благословен еси, Господи, Боже отец наших.
Добродетельною твоею силою, верою крепкою, терпением многим, светоносне отче, приятелище был еси Святаго Духа, вопиюще сице: благословен еси, Господи, Боже отец наших.
Богородичен: Яко роса найде на Тя Дух Свят, и не опали чрева Твоего, Пречистая, огнь Божества, и роди Сына - всех Бога, Емуже поем: благословен еси, Господи, Боже отец наших.
Песнь 8
Ирмос: Богоглаголивии отроцы в пещи,/ со огнем пламень попирающе пояху:/ благословите дела Господня Господа.
Сиянием добродетелей озаривше ум, Варсонофие славне, благоугодну жертву Богови - словесное служение принесл еси, благодарно поя: благословите вся дела Господня Господа.
Скорбною и тесною шествовав стезею, Небесныя достигл еси жизни нескончаемыя, идеже Свет безконечный есть Христос, со Ангелы поеши: благословите вся дела Господня Господа.
Буди, отче честный, заступник непобедим, избави от отчаяния и малодушия, укрепи в преданности воле Божией мольбами твоими ко Господу, поющих: благословите вся дела Господня Господа.
Богородичен: Поем Тя, величаем Тя, покланяемся Ти, Пречистая, яко Безначальныя Троицы породила еси Единаго Христа Бога, темже отверзла еси нам, сущим на земли, Небесная.
Песнь 9
Ирмос: Устрашися всяк слух/ неизреченна Божия снисхождения,/ яко Вышний волею сниде даже и до плоти,/ от Девическаго чрева быв человек:/ темже Пречистую Богородицу, вернии, величаем.
Виждь скорби душевныя, милосердый пастырю, совесть оскверненну и стенание сердца, виждь самомнением лукавым утесненную душу и воздвигни ю ко исправлению ходатайствы твоими ко Господу.
Славы текущия и тленныя возгнушався, богомудре, славу и жизнь наследовал еси блаженную; Христа моли сохранити верность Ему и нам, совершающим ныне всесвятую память твою.
Радости исполни сердца наша, богоблаженне отче, во еже пети и славити прославльшаго тя Христа Жизнодавца, Егоже непрестанно величаем.
Богородичен: Радуйся, Богоприятная утробо, радуйся, Престоле Господень, радуйся, Мати жизни нашея, Тя непрестанно величаем.
Светилен:
Благодатию, дарованною тебе, многия ко Христу привел еси, новомучеников всесветлому лику ревнующи, Христов избраниче Варсонофие, землю Херсонскую Божественным словом возделавше, семена веры насадив, приносиши плоды Ему и до ныне.
Богородичен: Радуйся, Престоле огнезрачный, радуйся, светильниче свещеносный, радуйся, горо освященная, ковчеже Жизни, Святая Святых превысшая.
На хвалитех, глас 5:
Во всяком обстоянии, болезни и печали/ предавати себе в руце Господни заповедал еси,/ и призывати Заступницу усердную со угодники Божии;/ ныне же тя прославляюще в лице святых,/ отче преподобне Варсонофие, молим:/ простри руку помощи всем просящим ю.
Укрепляйте души ваша,/ за скорби благодаряще Златоустаго гласом,/ - и действенно познаете силу в немощи совершающуюся,/ - глаголы сими и молитвою твоею крепкою/ изнемогающих в терпении возставлял еси,/ любовию движимь, старче.
Неизбежный путь скорбей пройдем с верою несумненною/ и преданностию Спасителю нашему,/ молитвенника тя имея, светоносне отче, Варсонофие, исповедниче,/ ведуще, яко претерпевши Голгофу,/ достигнем и светлыя некончаемыя радости Воскресения.
Слава: глас 8:
Приидите вси вернии,/ восхвалим единаго от собора новоисповедников Русския земли, / сквозе огнь гонений пронесшаго любовь Христову,/ силою духа превозмогшаго немощи плоти,/ пастыря мудраго и старца прозорливаго,/ проповедника, молитвенника и чудотворца,/ благодаряще Всесильнаго Бога,/ даровавшаго нам, якоже и в древняя времена,/ сего несокрушимаго ревнителя Православия,/ надежнаго защитника, и крепкаго предстателя, и помощника: / святаго Варсонофия преподобноисповедника.
И ныне, глас тойже:
Владычице, приими молитвы раб Твоих,/ и избави нас/ от всякия нужды и печали.
НА ЛИТУРГИИ
Прокимен: Восхвалятся преподобнии во славе/ и возрадуются на ложах своих.
Стих: Воспойте Господеви песнь нову, хваление Его в церкви преподобных.
Аллилуиа, гл.6: Блажен муж бояйся Господа, в заповедех Его восхощет зело.
Стих: Сильно на земли будет семя его.
Апостол: Еф. зач.233
Евангелие: Лк. зач.64
Причастен:
Радуйтеся, праведнии, о Господе,/ правым подобает похвала./ Аллилуиа
Тропарь:
Тропарь, глас 8:
В тебе, отче, известно спасеся еже по образу. Приим бо Крест, последовал еси Христу, и дея учил еси презирати убо плоть, приходит бо, прилежати же о души вещи безсмертней. Тем же и со ангелы срадуется, преподобне Варсонофие, дух твой.
Тропарь, гл. 8
Православия ревнителю, ересей и расколов богомудрый обличителю, Церкви Святыя изящное украшение, притекающим к тебе верный предстателю и заступниче, преподобне отче наш, Варсонофие, молися ко Господу Спасу нашему землю Херсонскую и всю страну нашу от всяких бед и зол избавити, умирити мир и спасти души наша.
Кондак:
Кондак, глас 2:
Яко постника благочестна и искусна, и страдальца произволением честна, Церкви Христовыя пастыря доброго, в песнех достойно восхвалим Варсонофия приснохвальнаго, земли Херсонския украшение, и молитвенника о душах наших.
Кондак, гл. 4
Яко пресветлая звезда в земли Херсонстей возсиял еси, преподобне, и Богом укрепляемь, узы и страдания за веру Православную претерпел еси. Темже усердно молимся тебе: научи нас, отче, твоему богоразумию и уврачуй недуги наша душевныя и телесныя, да во умилении зовем ти: радуйся, исповедниче Христов, преподобне отче наш Варсонофие.
Молитва:
Молитва
О Благоблаженне и преподобне отче наш Варсонофие, пастырю добрый и истинный строителю винограда Христова, исповедников славо, преподобных сподвижниче, праведным совесельниче, православным людем наставниче и уставов Церковных хранителю, ныне на небеси Святей Троице со всеми Святыми предстояй! Молимся тебе, яко чадолюбивому отцу нашему, и от сердца с любовью вопием: о преподобне отче Варсонофие, поминай стадо твое, еже мудре собрал и сохранил в годину лютых испытаний от неверия, ересей и расколов; соблюди твоими молитвами православную паству, и не презри нас чтущих пречестную и многорадостную твою память. Сохрани град наш, храмы и страну нашу, от враг видимых и невидимых. Очисти наша согрешения и отжени от нас облак страстей и искушений, просвети наша душевныя очи, смысл очисти и разум освяти. Моления наши ходатайственне всех Творцу и Избавителю, в Троице поклоняемому Богу нашему принеси, яко да согрешений наших оставление улучим, благодатию и Человеколюбием Господа и Бога нашего Иисуса Христа, с Ним же Отцу и Святому Духу слава подобает, ныне и присно и во веки веков. Аминь.
Молитва вторая
О, великий угодниче Христов, пастырю добрый и истинный, преподобне отче наш Варсонофие! Призри на ны скорою твоею помощию и умоли Человеколюбца Бога, да не осудит нас грешных по беззакониям нашим. Сохрани нас твоим заступлением от облежащаго ны суе¬мудрия и неверия, и, яко пастырь добрый, упаси заблудшия овцы стада Христова и во дворы Господни сия всели. Огради нас от соблазнов, ересей и расколов и настави твердо в вере Православней подвизатися. Потщися, скорый о нас предстателю, благоприятным твоим ходатайством умолити Господа, да уврачует Своею благостию болезни наша душевныя и телес¬ныя, согреет сердца наша любовию друг ко другу и сотворит ны братолюбны и единомысленны. Испроси у Бога и всего потребнаго для жития нашего: земли плодородия, благорастворения воздухов и мирнаго устроения. Страну нашу, град сей, и вся грады и страны христианския сохрани предстательством твоим от огня, потопа, труса, вражескаго нашествия и внутренних нестроений. И тако, твоими молитвами вспомоществуеми, мирно и благочестно житие наше поживем и достигнем онаго Иерусалима Небеснаго, идеже ты ныне в неизреченней сияеши славе, и купно с тобою и со всеми святыми прославим в Троице славимаго Бога, Отца и Сына и Святаго Духа ныне и присно, и во веки веков. Аминь.
Акафист:
Акафист преподобному Варсонофию Херсонскому исповеднику
Кондак 1
Избранный исповедниче и предивный угодниче Христов, скорый помощниче и молитвенниче наш, богоблаженне Варсонофие, похвальная восписуем ти, восхваляюще подвиги и страдания твоя. Ты же, яко имеяй дерзновение ко Господу, молися о нас с верою и любовию тебе зовущих: Радуйся, преподобне отче Варсонофие, земли Херсонския радосте и украшение.
Икос 1
Ангельскую чистоту от юности своея возлюбил еси, преподобне, и яко утренняя заря возсиял еси в подвизех поста и молитвы, богоугодным житием своим тьму грехов¬ную разгоняя и многия люди светом Божия познания просвещая. Мы же, благодаряще Господа, даровавшаго нам толикаго молитвенника и наставника, приносим ти благохваления сицевая: Радуйся, Херсонскаго края добро¬плодное прозябение. Радуйся, богобоязненных родителей радование и утешение. Радуйся, измлада благоговением украшенный. Радуйся, во благочестии воспитанный. Радуйся, в Законе Господни непрестанно поучавыйся. Радуйся, во славу Божию радостно потрудивыйся. Радуйся, преподобне отче Варсонофие, земли Херсонския радосте и украшение.
Кондак 2
Видя Господь, яко ты, святе, издетска во храме Божием приметатися возлюбил еси, научи тя благо¬угождению истинному, да возможеши достойно и праведно воспевати ангельскую песнь: Аллилуиа.
Икос 2
Разумением словес Господних умудряяся, Божественную премудрость постигал еси, отче Варсонофие, да возможеши и иных ко Христу привести и многих на путь спасения наставити. Темже и мы, разумеюще велие усердие твое о славе Божией, воспеваем ти: Радуйся, житию безплотных поревновавый. Радуйся, подвигом древних отцев подражавый. Радуйся, делателю винограда Христова избранный. Радуйся, благодатию Духа Святаго осиянный. Радуйся, света Христова блаженный носителю. Радуйся, христианских добродетелей неустанный насадителю. Радуйся, преподобне отче Варсонофие, земли Херсонския радосте и украшение.
Кондак 3
Силою Божиею укрепляемь и Духом Святым наставляемь, Варсонофие богомудре, в Лавре Кие¬во-Печерстей подвизался еси, благочестивым житием своим сияя яко светило лучезарное, и всех подвизая славити Бога, взывающи: Аллилуиа.
Икос 3
Имея веру несумненну и помысл чист, вся красная мира сего презрел еси, преславне, и Господеви послужити желая, вся тяготы и лишения с любовию восприял еси, да не возобладает плоть над духом твоим. Темже добродетельми украшенный, аки звезда путеводная светиши всем, вопиющим ти: Радуйся, вся красная мира сего ни во что же вменивый. Радуйся, в пещерах Лаврских райскую сладость вкусивый. Радуйся, от юности иноческаго жития возжелавый. Радуйся, вся мирская возненавидев, во след Христу последовавый. Радуйся, похоти греховныя в себе умертвивый. Радуйся, постом и воздержанием плоть твою духови покоривый. Радуйся, преподобне отче Варсонофие, земли Херсонския радосте и украшение.
Кондак 4
Бурею волнений житейских не смутился еси, преподобне, обаче вся мирская оставль, тесным и многотрудным путем к Царствию Небесному шествовал еси, верою мужественно вся стрелы вражия сокрушая, Богу же поя: Аллилуиа.
Икос 4
Слышав, богоизбранне Варсонофие, в Евангелии глас Спасителя взывающ: «Иже хощет по Мне идти, да отвержется себе, и возмет крест свой, и по Мне грядет», - отверглся еси себе, и взем на рамо крест твой, шествовал еси по стопам Христовым невозвратно. Сего ради похвальная вопием ти: Радуйся, любовь мирскую любовию Божиею в себе победивый. Радуйся, крепчайшую паче огня оную любовь явивый. Радуйся, в усердии к служению Богу не оскудевавый. Радуйся, заповеди Того в сердце своем написавый. Радуйся, Единаго Христа всею душею возлюбивый. Радуйся, в иночестем житии многих братий утвердивый. Радуйся, преподобне отче Варсонофие, земли Херсонския радосте и украшение.
Кондак 5
Боготечною стезею в тихое пристанище спасения устремився, преподобне, молитвам и посту прилежал еси, плоть свою всячески смиряя и о мире моляся, Христу же непрестанно поя: Аллилуиа.
Икос 5
Видя Господь желание твое еже спасению ближних послужити, изведе тя, отче Варсонофие, из разоренныя Свято-Григориевы обители и от погибели спасе тя. Обаче враг рода человеческаго паки козни тебе сотвори: от безбожных бо в темницу затворен был еси, святе, в нейже мужественно скорби вся претерпевая, за врагов твоих молился еси. Сего ради зовем ти: Радуйся, очи сердца твоего непрестанно к Богу устремлявый. Радуйся, верою крепкою чад своих укреплявый. Радуйся, пред Господем день и нощь в молитвах предстоявый. Радуйся, в тяжких страданиях на Него все упование возлагавый. Радуйся, яко за гонящих тя Господеви молился еси. Радуйся, яко веру во Христа неврежденну сохранил еси. Радуйся, преподобне отче Варсонофие, земли Херсонския радосте и украшение.
Кондак 6
Проповедником ревностным Православныя веры и истиннаго жития во Христе Иисусе явился еси, преславне Варсонофие, егда бо из темничнаго заточения изведен был еси, не преставал еси наставляти чад твоих. Темже многих обратил еси ко Христу Жизнодавцу, благодарственно поя Ему: Аллилуиа.
Икос 6
Возсиял еси яко светило богосветлое, преблаженне Варсонофие, тьму расколов и ересей светом истиннаго богопознания разгоняя и научая, яко Церковь Православная суть врачебница духовная, всех ко спасению приводящая. Сего ради со умилением вопием ти: Радуйся, многия скорби и мучения за имя Христово претерпевый. Радуйся, крест Христов безропотно нести вожделевый. Радуйся, стадо Христово, тебе вверенное, неврежденным сохранивый. Радуйся, расхитити его врагом и в погибель ввергнути не попустивый. Радуйся, право исповедати веру Христову научивый. Радуйся, заблудших на путь спасения наставивый. Радуйся, преподобне отче Варсонофие, земли Херсонския радосте и украшение.
Кондак 7
Хотение едино всегда имел еси, отче Варсонофие, да чада Церковная в мире и благочестии пребывают, сего ради благовествовал еси неустанно Слово Христово, да вси любят друг друга и единым сердцем и едиными усты вопиют Богу: Аллилуиа.
Икос 7
Дивно и пречудно пред всеми служение твое бысть, святе, всякое же нечестие, и беззаконие, и лживыя учения обличал еси, от народа же за сие любим и почитаем был еси: вся бо назидал еси во спасение. Мы же, таковому ревностному служению твоему подражати желая, глаголем сия: Радуйся, службы Божия благоговейно совершавый. Радуйся, в молитве непрестанно пребывавый. Радуйся, умилению чад твоих научавый. Радуйся, миром и любовию сердца верных наполнявый. Радуйся, злочестия и неприязни искоренителю. Радуйся, мира и незлобия учителю. Радуйся, преподобне отче Варсонофие, земли Херсонския радосте и украшение.
Кондак 8
Странно бе суетному миру видети, яко во плоти ангельское воистину житие пожил еси, преподобне: от юности бо твоея Христа тепле возлюбив, тому до старости маститыя, яко добр делатель, неленостно поработал еси, темже и с возженным светильником души твоея сподобился еси внити в чертог Небеснаго Домовладыки, идеже со всеми святыми присно поеши Ему: Аллилуиа.
Икос 8
Весь Богу освятился еси, отче смиренномудре, и еже со Христом быти паче всего вожделел еси. Темже ни угрозы, ни прещения, ни заточения темничныя не можаху разлучити тя от любве Божия. Укрепляй и нас молитвами твоими, отче все¬блаженне, да и мы возможем тебе в сем подражати, со умилением взывая сице: Радуйся, спасению многих добре послуживый. Радуйся, от сердца чиста паству свою возлюбивый. Радуйся, во благовестии Христове труды многия подъявый. Радуйся, тяготы немощных на себе носивый. Радуйся, в служении Богу усердно прилежавый. Радуйся, града Небеснаго всею душею взыскавый. Радуйся, преподобне отче Варсонофие, земли Херсонския радосте и украшение.
Кондак 9
Все множество ангельское и человеческое удивися терпению твоему и незлобию, исповедниче Христов, егда праведна тя зряще и о благочестии чад Божиих ревнующа, многажды клеветаша на тя лютии безбожницы, хотяще многими скорбями, уничижениями и гонениями поколебати тя. Ты же вся сия мужественне претерпевая, тверд, яко адамант, пребывал еси, непрестанно взывая Богу: Аллилуиа.
Икос 9
Витии многовещании недоумеют достойно изглаголати крепости души твоея, достославне Варсонофие, терпением бо твоим всех удивил еси и веру во Христа в сердце твоем до конца соблюл еси. Темже и Господь храняше тя, Своего угодника, укрепляя в страданиях многих. Прими же от нас, отче блаженне, похвалы сия: Радуйся, яко многолетния заключения благодушно претерпел еси. Радуйся, яко биения за Христа безропотно переносил еси. Радуйся, в злостраданиях мужест¬во сохранивый. Радуйся, и в заточении Господеви верно послуживый. Радуйся, яко за врагов твоих кротко молился еси. Радуйся, сего ради примером для верных был еси. Радуйся, преподобне отче Варсонофие, земли Херсонския радосте и украшение.
Кондак 10
Спастися всем нам помози, угодниче Божий, умири души наша и помяни всех, веру и любовь к тебе имущих, имя твое молитвенно на помощь призывающих и на поклонение святым твоим мощем приходящих, да избавлени тобою от бед и напастей, вопием Богу, тобою нам благодеющему: Аллилуиа.
Икос 10
Стена и покров еси всем прибегающим к твоему заступлению, преблаженне Варсонофие, темже и нас, немощствующих грехи многими, защити молитвами твоими, со усердием вопиющих тебе таковая: Радуйся, взыскующим Царствия Божия добрый наставниче. Радуйся, в междоусобии сущим мира проповедниче. Радуйся, помощь духовную и исцеления верным подаваяй. Радуйся, страждущих, болящих и немощных утешаяй. Радуйся, яко образом смирения и кротости разъяренныя люди укрощаеши. Радуйся, яко молитвою и упованием на Господа противу врага ополчатися нас научаеши. Радуйся, преподобне отче Варсонофие, земли Херсонския радосте и украшение.
Кондак 11
Пение всякое не довлеет к прославлению многих трудов твоих, отче Варсонофие, имиже не точию верныя, но и неверныя удивляеши; веруем же и уповаем, яко твоими молитвами и во мраце беззакония сущии из тьмы и сени смертныя изыдут, и с нами купно прославльшему тя Богу воззовут: Аллилуиа.
Икос 11
Светозарное светило ты еси, отче великоимените Варсонофие, в земли бо Херсон¬стей благодатию и чудесы сияеши и честными мощами твоими источаеши множество исцелений всем с верою и любовию к тебе притекающим. Темже, яко теплому о нас предстателю и чудотворцу, вопием ти: Радуйся, страны нашея богодарованный хранителю и заступниче. Радуйся, о граде сем усердный молитвенниче и ходатаю. Радуйся, иночествующих добрый наставниче и руководителю. Радуйся, всех верных чад Церкви Христовы добрый пастырю и учителю. Радуйся, исцеления и благодатную помощь скоро подаваяй. Радуйся, притекающих к тебе от бед и напастей сохраняяй. Радуйся, преподобне отче Варсонофие, земли Херсонския радосте и украшение.
Кондак 12
Благодать спасительную и велие предстательство твое пред Богом ведуще, просим тебе прилежно, отче преподобне: молися за ны ко Всемилостивому Спасу, да управит Церковь Свою Святую, сохраняюще ю от ересей и расколов, град наш от бед и напастей да сохранит, и вся ны в любви и единомыслии да соблюдет, да, прославляюще Божие человеколюбие, воспоем Ему: Аллилуиа.
Икос 12
Поюще дивное и богоугодное твое на земли житие и на небеси прославление, веруем, отче Варсонофие, яко с нами неотступно пребываеши и молишися о нас, тебе зовущих: Радуйся, яко ревностным служением твоим многую славу на небеси стяжал еси. Радуйся, яко претерпевый до конца, венец нетленный от руки Вседержителя приял еси. Радуйся, яко явлением честных мощей твоих верных возвеселил еси. Радуйся, яко прославлением твоим Церковь Христову украсил еси. Радуйся, скорый в бедах и напастех наш заступниче. Радуйся, теплый о нас к Богу молитвенниче. Радуйся, преподобне отче Варсонофие, земли Херсонския радосте и украшение.
Кондак 13
О великий угодниче Христов и предивный исповедниче, отче Варсонофие, скорый помощниче всем в скорбех и напастех обретающимся! Моли Христа Бога, да молитвами твоими от враг видимых и невидимых нас сохранит, и всех помилует и спасет, да предстательством твоим сподобимся благую часть спасаемых от Бога получити и Христа во славе узрети, воспевая со всеми избранными ангельскую песнь: Аллилуиа.
(Этот кондак читается трижды, затем Икос 1 и Кондак 1)
