Гимнография прп. Серафима Вырицкого (1949)
Служба преподобному отцу нашему Серафиму, Вырицкому чудотворцу
ВЕЧЕР
На Господи, воззвах: стихиры, глас 5:
Радуйся, Церковь Русская, / яко в горькия годы безбожных гонений / украсилася еси сонмом новомучеников и исповедников, / иже Христу Спасу верность соблюдоша, / в нихже сияет преподобный Вырицкий Серафим, / яко яркое светило, / теплый молитвенник и добрый пастырь стада Христова.
Радуйся, Серафиме пречудный, / добрую бо куплю совершил еси в сем житии, / богатству земному никогдаже свое сердце прилагая, / от юности собирая себе сокровища нетленная, / образ добродетели в миру явился еси, / слову Господню последуя, / имение оставив и иноческое иго с супружницею восприяв, / к совершенству евангельскому скоро востекл еси.
От юности твоея послушанию навыкл еси, / и в маститей старости оное не оставил еси, / темже пастырь добрый и мудрый показався, / Духом Божиим паству твою усердно упасл еси, / волков хищных не убоявся, / душу свою за овцы полагая, / сего ради ныне ублажаешися, Серафиме пречудне.
Яко сосуд избранный Богови явился еси, преподобне Серафиме, / вся заповеди Господни добре сохраняя, / чада твоя Тому Единому угождати научил еси, / благодатию Божиею присно осияваем, / светел лицем якоже Моисей показася, / темже и всем притекающим к тебе / источник воды животныя являешися.
Радуйся, преподобне Серафиме, / яко в подвизе крепцем поста и молитвы / предстатель за всю землю Российскую явился еси, / во бдениих ко Господу руце воздевая, / ходатайствуя о избавлении от враг видимых и невидимых, / утешая и исцеляя болезнующия телом и душею, / и ныне в селениих райских водворився, / не премолчи за ны ко Господу.
Слава, глас 1:
О, дивное чудо, / во мраце безбожия и гонений на Церковь жестоких / в земли нашей процвел еси яко крин благоуханный, / пастырю духовный и чадолюбивый, / пламенный молитвенниче Вырицкий Серафиме, / во всяцем подвизе Богу угодивый, / обильно источая утешения и исцеления, / темже и ныне испроси чтущим любовию память твою, / мир и велию милость.
И ныне, Богородичен догматик: Всемирную славу:
Вход. Прокимен дне. Чтения преподобническая.
На литии стихиры, глас 5:
Радуйся, земле Петербургская, / яко ничимже меньши еси в пределех земли Российския, / се бо принесла еси Господеви велий сонм святых угодник: / праведныя иереи и святители, / священномученики и исповедники, / с нимиже и преподобнии отцы, / от нихже, яко цвет благоуханный, / да восхвалится днесь старец предивный, / чудотворец Серафим достоблаженный.
Глас 6:
Глас скорбный в Вырицкой веси слышится, / преподобный Серафим молится о братии своей, / о монасех, архиереех, священницех и мирянех, / угнетаемых и убиваемых от властей безбожных, / наипаче и о людех ослепленных неверием, / от Господа чая избавления, / егоже предзрев вопияше: / народу нашему грехи простит Господь, / и мнози людие паки обратятся к Богу, / да будет слава Ему Единому Человеколюбцу.
Облагоухал еси молитвою твоею яко фимиамом / град Петров и Вырицкую весь, / всякаго человека согревая любовию Христовою, / поучая твердой вере в Промысл Божий, / терпению и молитве непрестанной, / да Православию вернии пребудем, / твоими молитвами, Серафиме, отче наш.
Слава, глас 2:
Се, яви нам Владыка Христос милость Свою богатую, / не попусти бо оскудети преподобному до конца, / ниже праведному Своему видети истления, / се бо ныне якоже и прежде преподобный Серафим, / предстоя престолу Святыя Троицы, / тепле молится и наставляет на путь спасения достояние Господне.
И ныне, Богородичен, глас той же:
Спаси от бед рабы Твоя, Богородице, яко вси по Бозе к Тебе прибегаем, яко нерушимой стене и предстательству.
На стиховне стихиры, глас 8:
О, предивнаго чудесе, / молитвенник и постник, яко един от древних, в Лавре Александро-Невской является, / и наследник благодати преподобнаго Варнавы Гефсиманскаго бывает, / емуже возопиим: / радуйся, Серафиме, утешение наше.
Стих: Честна пред Господем / смерть преподобных Его.
О, глубина и богатство промысла Божия, / светильник веры в дальней веси от злых ветров гонений соблюдается, / и многия люди светом Христовой веры просвещает, / емуже возопиим: / радуйся, отче, утешение наше.
Стих: Восхвалятся преподобнии во славе / и возрадуются на ложах своих.
О, преславнаго чудесе, / богомудрый наставник и провидец будущих яко настоящих, Серафим Вырицкий бывает, / и обильныя дары благодати требующим источает, / емуже возопиим: / радуйся, отче, утешение наше.
Слава, глас 8:
Монахов множество, / архиерее, священницы и вси людие, / ныне сошедшеся, торжествуя и духовно веселяся, / прославим преподобнаго Серафима, / пламеннаго служителя Господня, / блажен еси Христу работав, / образ благочестнаго жительства явился еси, / миряном правило известнейшее и иноком похвало, / человеков наставниче и ангелов собеседниче, / с нимиже молися Господеви помиловатися душам нашим.
И ныне, Богородичен, глас той же:
Безневестная Дево, / Яже Бога неизреченно заченши плотию, / Мати Бога Вышняго, / Твоих рабов мольбы приими, Всенепорочная, / всем подающи очищение прегрешений, / ныне наша моления приемлющи, / моли спастися всем нам.
Тропарь, глас 4:
Яко великаго молитвенника за землю нашу / и утешителя теплаго притекающих к тебе, / ублажаем тя, вторый русский отче Серафиме, / вся бо яже в мире красная оставил еси, / всем сердцем устремился еси к чертогам сладчайшаго Христа / и в годину лютых гонений образ кротости и смирения всем был еси: / не престай и ныне молитися за ны, / да в терпении обрящем путь покаяния / и с тобою выну славим Пресвятую Троицу.
Ин тропарь, глас 8:
Крест приим свой, преподобне, радуяся, / нераздельным помыслом последовал еси Христу, / был купец еси воистину преславный, / яко не земное, но небесное сокровище стяжа / сего ради спасеся тобою мнози чада твоя, ихже возлюбил еси. / И ныне, отче наш Серафиме, молися / покаяние нам даровати и в разум истины приити.
Ин тропарь, глас 3:
Купец велик соделался еси, / преподобне отче Серафиме, / сый в мире, к многому богатству тленному / ты николиже сердца прилагал еси, / послушник истинен / и добродетелей подвижник, / егда же, вся оставль, / на крест монашества восшел еси, / дары Святаго Духа многи тебе дашася / и яко единаго от древних тя явиша / пророка, старца, / чудотворца и молитвенника, / столпа подвижником, спасения вождя. / Сего ради молим тя: / и нас премудро ко спасению управи.
Ин тропарь, глас 4:
Яко пресветлая звезда Российския земли, / возсиял еси в веси Вырицстей, преподобне Серафиме, / и, силою Святаго Духа наставляем, / светом чудес твоих страну нашу озарил еси духовно. / Темже и мы, притекающе ко гробу твоему, / умильно глаголем: / моли Христа Бога спастися душам нашим.
НА УТРЕНИ
На Бог Господь: тропарь преподобнаго дважды.
Слава, и ныне, Богородичен:
Еже от века утаенное:
По 1-й стихологии седален, глас 4:
Яко солнце возсияв, / зарями блистаеши всему миру чудесы и подвиги твоими, / преподобне Серафиме Вырицкий чудотворче, / светоносче, блаженне, / земли нашея похвало.
Слава и ныне, Богородичен, глас той же:
Под кров Твой, Пречистая Дево, / прибегающих не презри, / мольбу принеси о нас Человеколюбцу Богу, / спастися рабом Твоим.
По 2-й стихологии седален, глас 1:
Праведно на земли пожил еси, отче богоносе, / темже ныне ликуеши на небесех, / поминай ны творящия память твою, / Серафиме предивне.
Слава и ныне, Богородичен, глас той же:
Непостижно чудо зачатия, / и несказанен образ Рождества в Тебе познася, Приснодево Чистая, / ужасает ум и удивляет помышление, / слава Твоя, Богородице, всем простреся, во спасение душ наших.
По полиелеи седален, глас 8:
Страсти плотския и душевныя послушанием и подвигом утолив, / сосуд избранный мира благоуханнаго исполнь, / душу свою непорочну Богу соблюл еси, / и прием от Спаса благодать Святаго Духа / исцеляти страждущих телесы и души верных просвещати, / сего ради благодарственно вопием ти: / отче Серафиме, моли Христа Бога о спасении душ наших.
Слава и ныне, Богородичен, глас той же:
Излей, Пресвятая Дево, / от многих щедрот Сына Твоего / милости неизреченныя / на тщащихся прославляти угодники Его, / предстательствуя с сонмом их присно о спасении душ наших.
Степенна, 1-й антифон 4-го гласа.
Прокимен, глас 4:
Честна пред Господем смерть преподобных Его.
Стих: Что воздам Господеви о всех, яже воздаде ми.
Всякое дыхание: Евангелие от Матфея, зачало 43.
По 50-м псалме стихира, глас 6:
Возлюблен бысть Богом от юности твоея, / преподобне отче наш Серафиме, / еще в миру ти сущу Господу угодил еси, / наипаче же в священноиночестве Духа Святаго благодать приумножил еси, / предстателю теплый за землю нашу, / иноком жезл крепости и всем требующим чудотворный податель, / испроси и нам от Христа мир и велию милость.
Канон
преподобному Серафиму Вырицкому, глас 2,
егоже краегранесие:
Како воспоем тя по долгу, Серафиме чудне.
Песнь 1
Ирмос: Во глубине постла иногда фараонитское всевоинство преоруженная сила, воплощшееся же Слово всезлобный грех потребило есть, препрославленный Господь, славно бо прославися.
Како возможем достойно воспети твое богоугодное житие, преподобне; от юности бо Христовою любовию уязвився, огнь сей Божественный в сердце твоем невредимо соблюл и приумножил еси, темже и нам подаждь просвещение по долгу тя славити.
Ангельстии чини радовахуся, зряще твое усердие и желание послужити Богу во иночестем чине, но воля Божия бысть исперва тебе в мире благочестно пожити, созидая святыя обители и храмы, имея попечение о нищих и сирых, душу же свою уготовляя Господу в сосуд избранный.
Корыстолюбие и сребролюбие отринул еси, отче преподобне, гордаго змия смирением твоим поправ, плотская взыграния умертвил еси и житейския сласти терпением посекл еси, в радости послужил еси всем требующим твоея помощи.
Богородичен: О, Пречистая Дево Богородице, не презри нас грешных требующих Твоея помощи и заступления, буди Ходатаица о народе нашем, да покаянием обрящем отпущение грехов и живот вечный.
Песнь 3
Ирмос: Процвела есть пустыня, яко крин, Господи, языческая неплодящая церковь пришествием Твоим, в нейже утвердися мое сердце.
В мирстем житии твоем старцу Варнаве за духовным наставлением притекал еси, усердно послушание ему во всем являя, темже и сподобился еси от него благословения и даров духовных.
О убогих присно попечение имея, преподобне, не возгнушался еси послужити оным своима рукама, показуя, яко всяк человек сердцу твоему возлюблен есть.
Словеса аввы твоего Варнавы добре сохраняя, очистив ум, тело и душу, преподобне, дом был еси трисолнечнаго света, украшен добродетельми.
Богородичен: Преблагословенная, Всенепорочная Богородице Марие, Слово Божие нам рождшая, свобождшаго избранныя Своя от тленнаго мира, ихже молитвами и нас спаси.
Ин кондак, глас 5:
Уподобился еси древним отцем / и подвигом добрым подвизался еси, / благодатию Христовою просветився, / от Негоже прием дарования чудес, / недугующих исцеляти, / печальных и скорбящих утешати, / обидимых и гонимых защищати / и всем в нуждах сущим отраду / и скорое избавление подавати. / Сего ради, яко великаго чудотворца чтуще, / молим тя, чада твоя, преподобне Серафиме: / от всех бед избави нас молитвами твоими.
Ин кондак, глас 3:
Возрадуйся паки, граде святаго Петра, / и малая весе Вырица, возвеличися, / се бо светильник веры в тебе просиявает, / всеисцеляющий бальзам нам источается, / новоявленный бо великий чудотворец, / любве и покаяния наставник, / пророк и старец, / новый преподобный Серафим в тебе является.
Седален, глас той же:
Умиленным сердцем прославляем тя, добрый наш пастырю и кроткий наставниче Серафиме, буди нам скорый помощник во всех бедах и напастех и помози заповеди Господни добре сохраняти во спасение душ наших.
Слава и ныне, Богородичен:
Яко невозделанная, Дево, Лозо, краснейший Грозд прозябла еси, источающ нам вино спасения, всех веселящее души и телеса, темже, яко Вину Тя добрых, блажаще присно со ангелы вопием Ти: радуйся, Благодатная.
Песнь 4
Ирмос: Пришел еси от Девы, не ходатай, ни ангел, но Сам Господи воплощься, и спасл еси всего мя человека, тем зову Ти: слава силе Твоей Господи.
Око сердца управив ко Творцу всяческих, Серафиме, согласно с супружницею иноческий образ восприяв, претерпел еси козни гонителей, на Бога Единаго упование возлагая.
Евангелия Христова истинный послушник явился еси, преподобне, и скоро восшел еси лествицею добродетелей к совершенству, всякое послушание добре исполняя и молитву в сердце непрестанно совершая.
Монашеским добродетелем в мире навыкнув и изрядный опыт житейский имея, добрый наставник миряном и иноком показался еси, отче, сотаинник священномученика Вениамина Петроградскаго быв, от него же и посвящение иерейское приял еси.
Богородичен: Тебе, Дево, Едину вси вернии стяжахом Заступницу тверду, Ты бо Бога родила еси нам, сего ради хвалами, Чистая, Тя ублажаем, роди земнии, по глаголу Твоему.
Песнь 5
Ирмос: Ходатай Богу и человеком был еси, Христе Боже, Тобою бо Владыко, к Светоначальнику Отцу Твоему, от нощи неведения приведение имамы.
Язык человечь не возможет по долгу восхвалити труды и подвиги твоя, яже в келлии втайне совершал еси, отче преподобне, но не может укрытися светильник верху горы стоя, сего ради притекаху к тебе лаврская братия и мирстии людие, совета ради и наставления духовнаго.
Посреде бури гонений и нестроений тверд и незыблем явился еси, преподобне, очи сердца твоего выну ко Господу имея и от Него просвещение приемля творити волю святую Его.
Образ великия ангельския схимы приял еси, отче, и наречен был еси в память преподобнбго Серафима, угодника Саровского, егоже от юности всем сердцем возлюбив, потщался еси житию онаго подражати в Дусе и истине.
Богородичен: Дивно превознесеся слава Твоя, Богородице Дево, се бо во чреве Христа Бога паче слова имела еси, якоже Исаия провозгласи, и выше естества Сего, Богородительнице, родила еси.
Песнь 6
Ирмос: В бездне греховней валяяся, неизследную милосердия Твоего призываю бездну, от тли, Боже, мя возведи.
Озаряем свыше светом Христовым, богомудре, и по преселении твоем к Богу неоскудно исцеления источаеши всем с верою притекающим к тебе.
Любовь божественная, яже в души твоей, отче преподобне, попаляет духи нечистыя, темже и одержимых оными свобождает и к жизни во Христе возрождает.
Гласом тихим и кротким наставлял еси притекающия к тебе любви, смирению и молитве непрестанной, попаляющей всякий грех.
Богородичен: Ужасошася ангелов воинства и человеков роди, Всенепорочная, страшнаго и паче ума рождества Твоего, како и Дева пребыла еси, и Мати Божия быти сподобилася еси, сего ради достойно Тя вси славим.
Кондак, глас 5:
Подражая богоносному угоднику Саровскому, / Духа Святаго благодать обильно стяжал еси: / Александро-Невския лавры крине благоуханный, / Вырицкия веси похвало, / сего ради и мы тебе зовем: / радуйся, преподобне Серафиме, / милостивый наш предстателю пред Господем.
Икос
Ангелов Творец и Господь сил небесных предызбра тя от юности твоея, преподобне, быти Ему служителем верным и наставником на путь спасения притекающим к тебе, темже и мы, дивящеся величию чудес твоих, с любовию вопием ти: радуйся, яко измлада Богу послужити возжелел еси; радуйся, яко в мире пребывая, добродетельным житием Богу угождал еси; радуйся, яко был еси утешитель страждущих; радуйся, яко стяжал еси пламенную любовь ко Христу; радуйся, преподобнаго Варнавы учениче прилежный; радуйся, дивнаго Серафима подражателю усердный; радуйся, Александро-Невския лавры чудное прозябение; радуйся, веси Вырицкия Божие благословение; радуйся, скорый помощниче в скорбех и болезнех; радуйся, светильниче веры православныя и благочестия; радуйся, преподобне Серафиме, милостивый наш предстателю пред Господем.
Песнь 7
Ирмос: Богопротивное веление беззаконнующаго мучителя высок пламень вознесло есть, Христос же простре богочестивым отроком росу духовную, Сый благословен и препрославлен.
Серафиму и Варнаве преподобным подражая, святыми их молитвами укрепляем был еси, святе, темже от Бога сподобился еси пророческаго дара: грядущая народу нашему и Церкве Российстей предвозвещати.
Еленю подобно, стремяшеся душа твоя, преподобне, к горним обителем, промыслом Божиим соблюдаема от пленения безбожных, поющи: благословен еси, Боже отец наших.
Руце твои, отче Серафиме, ко Господу непрестанно воздевая, моление на камени совершал еси, подобно угоднику Божию Саровскому, поя: благословен еси, Боже отец наших.
Богородичен: Ангельския силы воспевают Тя немолчно, Богородительнице, и мы, грешнии, взывати дерзаем: наше житие, Пречистая, к Твоему всетихому пристанищу направи, Сыну Твоему зовущих: благословен еси, Боже отец наших.
Песнь 8
Ирмос: Пещь иногда огненная в Вавилоне действа разделяше, Божиим велением халдеи опаляющая, верныя же орошающая, поющия: благословите вся дела Господня Господа.
Фарисейскую гордыню отвергше, усердно приступим ко гробу твоему, Серафиме, источает бо оный неоскудную струю исцелений и пети нас воздвизает: благословите вся дела Господня Господа.
Молитвою твоею, преподобне, чудеса дивная сотворил еси: слепорожденная бо прозре, немая проглагола, одержимии же от духов злобы свобождашася, темже вси пояху: благословите вся дела Господня Господа.
Богородичен: Естество всякое обожил есть из Тебе воплощься Господь, Владычице, земных существо, поющих: благословите вся дела Господня Господа.
Песнь 9
Ирмос: Безначальна Родителя Сын, Бог и Господь, воплощься от Девы нам явися, омраченная просветити, собрати расточенная, тем всепетую Богородицу величаем.
Чисте зрети сподобился еси Царицу Небесную, преподобне, предвозвестившую Ти скорое отшествие твое от мира сего, темже духом возрадовався, Бога прославил еси.
Утверди сердца наша, отче преподобне, да в радости душевней предстоя Богу, испросим одоление на враги видимая и невидимая, и спасение душам нашим.
Душею твоею, яко огненный серафим, пламенея, научаеши нас, отче, истинней любви ко Господу, помози же нам святою твоею молитвою земный подвиг совершати, призывая сладчайшее имя Господа Иисуса.
Недостойными усты песнь тебе принесохом, преподобне, и ныне сподоби нас твоего отеческаго благословения, да делы благими прославляем Бога нашего, дивнаго во святых Своих.
Богородичен: Емуже предстоят со страхом серафими и херувими, Мати по плоти не ложно сподобилася еси быти, Всенепорочная, яко родила еси нам Бога Спасителя, Единаго от Троицы, Сына и Слова, крестом разоршаго смерть, Егоже о нас с ликом преподобных моли спастися душам нашим.
Светилен:
Благодать Святаго Духа всельшаяся в тя крин благоуханный сада Божия тя показа, Христос же ти вручи словесныя овцы Своя пасти на пажитех духовных, темже на земли добре потрудився, ныне на небесех, радуяся, живеши.
Слава и ныне, Богородичен:
Честнейши еси всея твари, Богородице Дево, Христа рождшая: Того убо моли сохранитися стаду Твоему невредиму от всякаго навета сопротивнаго.
На хвалитех стихиры, глас 4:
Притецем ныне, вси вернии, / к богоносному и преподобному отцу нашему, / преславному Серафиму Вырицкому чудотворцу, / от юности Господа возлюбившему, / и на всяко время праведно пред Ним ходившему, / молитвеннику за всю землю Русскую, / и помощнику скорому во всех скорбех и печалех.
Приидите ныне, вси вернии, / ко светильнику пресветлому, / доброму пастырю словесных овец, / предстателю теплому пред Сладчайшим Иисусом, / и ходатаю о всех скорбящих и озлобленных, / и по отшествии своем ко Господу скоро слышащему молитву / с верою и любовию просящих.
Да ликует днесь земля Петербургская, / прославляющи великаго угодника Господня, / Александро-Невския Лавры крин благоуханный, / скоро востекшаго по лествице добродетелей, / к небесному чертогу Спаса Христа / и райския обители улучившаго со всеми святыми.
Да радуется ныне земля Русская, / прославляющи Бога нашего, дивнаго во святых Своих, / веселящися о Серафиме Вырицком, / нрав кроткий имущем и уста богоглаголивая, / мудром наставнице к познанию Христа, / прозорливце и чудотворце изрядном, / и теплом ходатае о душах наших.
Слава, глас 8:
Восхвалим, вернии, дивнаго севернаго подвижника, / новаго Серафима, Вырицкаго чудотворца: / сей бо воистинну плоти и крови никакоже поработа, / Духа Божия Утешителя в души своей богатно стяжа, / дерзновенно ныне Святей Троице предстоящаго, / вкупе с Саровским Серафимом, покровителем своим, / и Варнавою, Лавры Сергиевы новою похвалою, / сего ради Бога нашего радостно возблагодарим, / пробавляющаго милость Свою на недостойныя рабы Своя, / прославляющия память преподобных Его.
И ныне, Богородичен, глас той же:
Хвалебное пение Тебе, Пренепорочная, приносим, / не презри молитвы от нечистых устен Тебе возносимыя, / очисти души и телеса нас, Тебе поющих, / благодатию Сына Твоего и Бога нашего, / ко смирению Христову направляя стопы наша, / да со преподобными отцы избегнем истления живота нашего, / но сподобимся вси Царствия Небеснаго.
Аще день постен, поем на стиховне Триоди.
Слава, глас 8:
Приидите, иночестии лицы и христолюбивии людие, / ко гробу досточестнаго отца Серафима, / днесь бо память его почитаем, / духовно торжествующе и молящеся Христу Богу нашему, / просяще грехов прощения / и душам нашим велия милости.
И ныне, Богородичен:
Владычице, / приими молитвы раб Твоих / и избави нас от всякия нужды и печали.
НА ЛИТУРГИИ
Служба преподобническая.
Акафист
Преподобному отцу нашему Серафиму, Вырицкому чудотворцу
Кондак 1
Возбранный воине Христов и Боголюбче дивный, преподобный отче Серафиме, Веры Православныя посреде мира безбожнаго светильниче, и земли Российский благодатный заступниче: чудный образ спасения во дни последния показавый, деланием сокровенным и глубоким смирением Царствие Небесное стяжавый. К твоему благопотребному предстательству ныне прибегающе, пение хвалебное приносим ти от сердец наших, любовию зовуще:
Радуйся, преподобне Серафиме, Вырицкий чудотворче.
Икос 1
Ангелоподобную красоту души имел еси, светоносне отче, сердцем пламенея ко Господу Сил, и Тому Единому в иночестем чине служити от юности восхотел еси, но отвергнув человеческое мудрование, истинное послушание Творцу своему явил еси, и путь, указанный тебе Свыше, совершил еси. Темже, Промышлению Божию о тебе дивящеся, с верою зовем ти:
Радуйся, благочестивых родителей достойный сыне:
радуйся, воспитанный в милосердии и трудех.
Радуйся, измлада всею душею Господа возлюбивый:
радуйся, Истиною просвещенный с юных лет.
Радуйся, службы церковныя благоговейный любителю:
радуйся, мира духовнаго умиленный тайнозрителю.
Радуйся, молитвы чистыя кадило благовонное:
радуйся, имеяй сердце, всецело к Богу устремленное.
Радуйся, отроком дом отеческий покинувый и кормильцем семьи ставый:
радуйся, столицы северныя отринувый соблазны.
Радуйся, схимнику лаврскому желание сердца своего поведавый:
радуйся, от него волю Божию о себе познавый.
Радуйся преподобне Серафиме, Вырицкий чудотворче.
Кондак 2
Видя Господа пред собою выну и на милость его уповая, браком законным по заповеди старчестей сочетался еси, блаженне отче, чистоту душевную и телесную усердно соблюдая. Вкупе же с благословенною супругою мысли о скоротечности жизни сея имевый, возрастал еси во всякой добродетели, непрестанно поя Господеви: Аллилуиа.
Икос 2
Разум недоумевает, отче Серафиме, како выразити во словесех веру твою и любовь ко Господу, Испытающему люди Своя; поистине праведному Аврааму подобен еси, он бо николиже усомнящеся в благости Отца Небеснаго, тако же и ты полное доверие к Богу в душе своей питал еси. Сего ради глаголем ти сицевая:
Радуйся, обетований непреложных восприятие сердечное:
радуйся, веры непоколебимыя явление многочудесное.
Радуйся, свидений Божиих хранение самозабвенное:
радуйся, исполненный за вся благодарения.
Радуйся, бояйся Господа и помняй заповеди Его:
радуйся, на всяк день поучавыйся Правде Его.
Радуйся, душу свою к терпению стяжавый:
радуйся, Царствия Божия прежде всего искавый.
Радуйся, главо союза во Христе единодушнаго:
радуйся, образе целомудрия и воздержания супружескаго.
Радуйся, кротости и тихаго нрава любомудрый носителю:
радуйся, истиннаго благочестия усердный ревнителю.
Радуйся, преподобный Серафиме, Вырицкий чудотворче.
Кондак 3
Силою Вышняго укрепляемый и советами духоноснаго старца Варнавы Гефсиманскаго наставляемый, поприще купеческое с деланием внутренним умело сопрягал еси, праведне отче, и делами милосердия, Христа ради творимыми, благословение Божие снискал еси. Покрый убо нас, обнаженных всякаго дела блага, любовию твоею, да восхвалим купно Милостиваго Бога: Аллилуиа.
Икос З
Имея сострадание сердечное, нуждающимся помогал еси, и скорбящих утешал еси, больных и сирых всячески упокоевал еси, милостиве отче, темже славу Евангелия Христова устнами благодарных тебе приумножал еси. Приими и от нас недостойных благодарственную песнь сию:
Радуйся, скорый помощниче всем в бедах сущим:
радуйся, щедрый подателю неимущим.
Радуйся, храмов и обителей тайный благотворителю:
радуйся, слабых и убогих доброхотный попечителю.
Радуйся, сословия купеческаго украшение:
радуйся, неуклонный последователю Евангельскаго учения.
Радуйся, образ и подобие Божие в ближнем возлюбивый:
радуйся, яко самому Христу всякому человеку послуживый.
Радуйся, пагубное самолюбие из сердца своего изгнавый:
радуйся, богатство тленное ни во чтоже вменивый.
Радуйся, суетных пристрастий свободивыйся:
радуйся, веру делами любве утвердивый.
Радуйся, преподобне Серафиме, Вырицкий чудотворче.
Кондак 4
Бури богоборчества, властьми самозванными в России воздвигнутаго, не убоялся еси, богоносне отче, но благодатное время исповедничества познав, потщился еси всех видимых благ отрицатися, во еже совершенным учеником Господа нарицатися, и Ему всецело ся предав, радостно вопияше: Аллилуиа.
Икос 4
Слыша о лютых гонениях и тяжких страданиих, верными за Имя Христово претерпеваемых, вслед за Апостолом помышляше, премудре: кто разлучит ны от любве Божия; ибо благоугодно Господу есть крестом избранных Своих спасати. Вемы же, отче, яко любящим Бога вся поспешествуют во благое, молим тя и нам многогрешным душеполезное от Господа испросити, да согласно поем ти:
Радуйся, веру Православную мужественно исповедавый:
радуйся, даже до смерти за Христа пострадати хотевый.
Радуйся, Царя и Отечество в трудную годину не предавый:
радуйся, безмятежную жизнь на чужбине презревый.
Радуйся, чаяний заветных сбытие улучивый:
радуйся, Христа ради с женою разлучивыйся.
Радуйся, имение свое по слову Господа раздавый:
радуйся, за Возлюбленным тобою и тя Возлюбившим последовавый.
Радуйся, злато, в горниле искушений очищенное:
радуйся, древо, при источниках вод живых насажденное.
Радуйся, скорби и испытания в богатство духа обративый:
радуйся, сокровенным подвигом в миру к монашеству себе приуготовивый.
Радуйся, преподобие Серафиме, Вырицкий чудотворче.
Кондак 5
Богосветлую звезду яви тя Господь в Лавре Александро-Невстей, преподобне отче, егда ко ангельскому чину благодать священства восприяв, души многих скорбящих и во мраце отчаяния пребывающих духом укрепил еси и светом истины озарил еси, научая премудрым судом Божиим покорятися и среди горькаго лихолетия непоколебимо пети Господеви: Аллилуиа.
Икос 5
Видевше братия и священноначалие исправное монашеское житие твое, отче, и послушания многотрудная, тобою носимая, паче же смирения глубину, мир и радость о Господе, разумели суть плоды Духа Свята, в тебе обильно прозябшия. Темже и мы, зряще духовное восхождение твое от силы в силу, тако с благоговением взываем ти:
Радуйся, плоть свою со страстьми и похотьми самоотвержением распявый:
радуйся, скверну греховную ветхаго Адама покаянием омывый.
Радуйся, благодатную силу смирения познавый:
радуйся, деланием заповедей Евангельских внутренняго человека обновивый.
Радуйся, Имя Иисуса Сладчайшаго непрестанно сердцем призывавый:
радуйся, в живое общение с Господом вступивый.
Радуйся, мир Христов, превосходяй всяк ум, наитием Духа Божия получивый:
радуйся, на земли блаженство будущаго века вкусивый.
Радуйся, Богу и ближним нелицемерно служивый:
радуйся, пред Престолом Вышняго за вся люди слезно воздыхавый.
Радуйся, Жертву Безкровную со страхом и трепетом совершавый:
радуйся, словом мудрым всех притекающих к тебе питавый.
Радуйся, преподобне Серафиме, Вырицкий чудотворче.
Кондак 6
Совершенную любовь яко венец добродетелей, яко дар Святаго Духа приемый и душу свою за ближних положити готовый, немощи немощных подъял еси, духоносне отче, и ко спасению мнози души управил еси. Твоим боголюбезньм предстательством и мы грешнии недугов многоразличных исцелевше и веру крепкую обретше, благодарственно вопием Господу: Аллилуиа.
Икос 6
Возсия в лице твоем Правда Божия и отгнася прелесть сатанинская, егда лукавии раскольники с престолов своих, яко идоли, падоша, и Лавра ига обновленческаго свободися, иноцы же вси возвеселишася. Сего ради просим тя, миротворче, раздоры и нестроения живота нашего утолити, неправды разорити, да в единодушии глаголем ти:
Радуйся, Божественныя Троицы избранниче:
радуйся, Трисолнечнаго света причастниче.
Радуйся, радостию совершенных возрадованный:
радуйся, милостию ко всякому богатый.
Радуйся, храме нерукотворенный Христа Бога нашего:
радуйся, щедротами Духа Святаго благолепно украшенный.
Радуйся, жертвенник в сердце своем соделавый:
радуйся, фимиам молитвы Господу пред Ним возносивый.
Радуйся, о заблуждающихся зело душею болезновавый:
радуйся, всем спастися и в разум истины приити желавый.
Радуйся, гордость и злобу нечестивых смирением и кротостию победивый:
радуйся, христоподражательно любити враги своя учивый.
Радуйся, преподобне Серафиме, Вырицкий чудотворче.
Кондак 7
Хотяху боголюбивые Архипастырие тебе духовником Лавры избрати, темже подвигоша тя, старче, великаго ангельскаго образа всем сердцем взыскати, душа бо твоя чистая огнем пламенныя молитвы за весь мир воспылала есть, и великую схиму яко печать совершенства от Бога прияв, с трепетом вопияше ему: Аллилуиа.
Икос 7
В дивном пророческом сне, на заре подвижничества твоего, Преблаженне, указа ти Господь путеводителя и покровителя Своего, печальника земли Российския, Преподобнаго Серафима Саровскаго: егоже именем в схиме нареченный, ты воистинну новым утешителем народу русскому явился еси. Сему благоволению Божию чудящеся, с надеждою поем ти:
Радуйся, опытный воине Христова ополчения:
радуйся, мрачных бесов горестное посрамление.
Радуйся, в куколь смирения и младенческаго незлобия облеченный:
радуйся, духовною молитвою на мысленных супостатов вооруженный.
Радуйся, к Богу о всех молитвенниче дерзновенный:
радуйся, Владычицы Державныя угодниче любезный.
Радуйся, духоносных отец сподвижниче:
радуйся, Ангелов приятный собеседниче.
Радуйся, правоверных благодатное заступление:
радуйся, блуждающих во тме безбожия светозарное наставление.
Радуйся, грешников с Богом покаянное примирение:
радуйся, источниче радости и умиления.
Радуйся, преподобне Серафиме, Вырицкий чудотворче.
Кондак 8
Странно и неудобоприятельно суетному миру слышати, како молитвами твоими, чудотворче, богатство милосердия Божия изливается на всех, с верою притекающих к твоему Небесному покровительству. Мы же, славяще Троицу Святую, Давшую ти благодать сию, радостно восклицаем: Аллилуиа.
Икос 8
Всего себе на старческое служение людем предал еси, но и духовных высот никакоже отступил еси, дивный отче, такожде чадом своим заповедал еси, о Горнем всегда помышляти и молитву Иисусову, яко благое средство спасения, усердно стяжати, еюже всякий грех в душе посекается, и дух человеческий с Духом Божиим соединяется. Под твое пречудное благословение прибегающе, доброхвальне величаем ти:
Радуйся, Горняго Иерусалима жителю:
радуйся, неизреченныя славы Спасителя мира созерцателю.
Радуйся, Богом управляемая душевная колеснице:
радуйся, Духа Утешителя сердечное вместилище.
Радуйся, от райских обителей в юдоль плачевную нисходяй:
радуйся, молитвы наша к стопам Вседержителя и Богородицы приносяй.
Радуйся, якоже отец чадолюбивый, просящим полезная подаяй:
радуйся, якоже мати нежная, в скорби утешаяй.
Радуйся, благоприятное Церкве Христовы назидание:
радуйся, неизцелимых болезней безмездное врачевание.
Радуйся, будущих судеб чудесное прозрение:
радуйся, настоящих обстояний скорое избавление.
Радуйся, преподобне Серафиме, Вырицкий чудотворче.
Кондак 9
Все силы Небесныя удивишася премудрому смотрению о тебе Вышняго, старче, мучительным бо тя недугом зряху пораженнаго, обаче промыслительно от рук безжалостных гонителей из Лавры восхищеннаго. Людие же вернии видевше тя чудно под кровом Богородицы в Вырице хранимаго, воспеваху Человеколюбца Господа: Аллилуиа.
Икос 9
Витийство человеческое умолкает пред величием подвигов твоих, преподобне, како убо старец немощный по плоти сый, и таковая творити возмогл еси; но поелику имамы богобоязненное произволение, тако благодерзостне взываем ти:
Радуйся, древних пустынников искусный подражателю:
радуйся, постническаго жития их изрядный любителю.
Радуйся, молитвенных бдений неусыпный ревнителю:
радуйся, внутренняго безмолвия и тишины ума хранителю.
Радуйся, Божественною любовию в сердце уязвленный:
радуйся, неутолимым стремлением к Господу распаленный.
Радуйся, познание Небесных тайн приявый:
радуйся, от духовных дарований паче прежняго в собственном мнении обнищавый.
Радуйся, истинным смирением добродетели своя покрывый:
радуйся, плачем покаянным плоды Божия благодати умноживый.
Радуйся, яко дева мудрая, елей радости трезвением сохранивый:
радуйся, яко невеста добрая, духовному Жениху Христу вполне благоугодивый.
Радуйся, преподобне Серафиме, Вырицкий чудотворче.
Кондак 10
Спасти Русь Святую от полчищ немецких Единаго Спасителя умолял еси, боголюбче дивный: "Иисусе Христе, Сыне Божий, помилуй мя грешнаго и мир Твой", — тако со умилением сердечным к Богу взывал еси, и сего ради старцу Саровскому подражая, новый подвиг молитвеннаго стояния на камне подъял еси. Темже тя Укрепившаго в брани Господа славим, победную песнь поюще Ему: Аллилуиа.
Икос 10
Стена бе незримая люте страждущим от войны, молитвенниче тепле, и неизсякаемыя надежды источниче, победу бо русскаго оружия пророчествовал еси, и разумом духовным смысл попущенных Богом скорбей постигая, возвратитися ко Христу народ некогда Божий призывал еси. Темже соблюди и нас неразумных от всякия вещи сопротивныя, вопиющих ти таковая:
Радуйся, чашу страданий со Отечеством земным до конца испивый:
радуйся, о помиловании России Господа просивый.
Радуйся, мученичество безкровное волею претерпевый:
радуйся, немощи естества человеческаго презревый.
Радуйся, столпе непоколебимый Православия:
радуйся, пламенный проповедниче веры и покаяния.
Радуйся, крепосте неприступная, неприятеля устрашающая:
радуйся, надеждо несумненная, верных окриляющая.
Радуйся, земли Российския молитвенное ограждение:
радуйся, от враг видимых и невидимых досточудное избавление.
Радуйся, воинству христолюбивому Богом дарованное поможение:
радуйся, душ и телес наших живительное орошение.
Радуйся, преподобне Серафиме, Вырицкий чудотворче.
Кондак 11
Пение коленопреклоненное приносим ти, преподобне отче, ублажающе многотрудное земное житие твое, ты же не преставай молитися за ны ко Господу: да дарует нам грехов оставление, страстей же одоление, во всяцей добродетели утверждение и мира душевнаго сохранение, и сподобит нас недостойных вкупе с тобою во Царствии Небеснем благодарственная восклицати: Аллилуиа.
Икос 11
Светозарнаго провозвестника сущим во тме безбожия зрим тя, всеблаженне отче, духовное бо возрождение России провидел еси, и к сыновом сынов с отеческою любовию обращаяся, твердо веры Православныя держатися завещал еси. Мы же, словесы твоими просвещаеми, со слезами умиления взываем ти:
Радуйся, Божественнаго Солнца луче:
радуйся, причастниче славы Предвечнаго Царя.
Радуйся, милосердия светило, согревающее души:
радуйся, духовнаго пробуждения заря.
Радуйся, звездо путеводительная в Царствие Небесное:
радуйся, светлый облаче, покрываяй жаждущих спасения.
Радуйся, росо благодатная, пажить греховную утоляющая:
радуйся, радуго многоцветная, сердца наша веселием исполняющая.
Радуйся, свет мира, имже мнози человецы просвещаются:
радуйся, молние огнезрачная, еюже козни вражия разрушаются.
Радуйся, чистоты сердечныя зерцало:
радуйся, совершенства христианскаго красото.
Радуйся, преподобне Серафиме, Вырицкий чудотворче.
Кондак 12
Блаженную кончину течения твоего, богомудре отче, молением благоговейным ко Всемилостивей Владычице мира предварил еси, Та бо, явственне посетивше тя во славе Своей, отшествие близкое на небо десницею указа тебе. Киими похвалами нам грешным достойно венчати тя, Царицы Небесе и земли избранниче, ныне со лики ангельскими воспевающа: Аллилуиа.
Икос 12
Поюще Дивнаго во святых Своих Бога, веруем вседушно, яко много может молитва праведнаго ко благосердию Владыки, и сего ради просим тя, приснопамятный отче Серафиме, буди о нас ходатаем теплым у Престола Пресвятыя Троицы, вопиющих ти сице:
Радуйся, пламенным серафимом тезоименитый:
радуйся, старчества духоноснаго восприемниче великий.
Радуйся, нивы Христовы неустанный возделателю:
радуйся, мира Божия в души человеческия насадителю.
Радуйся, сокровище благодати неистощимое:
радуйся, милости глубино неизмеримая.
Радуйся, чудотворений тонкое благоухание:
радуйся, желаний Божественных исполнение.
Радуйся, Русския Православныя Церкве новое украшение:
радуйся, велие к Богу, Прославльшему тя, за Русь многострадальную дерзновение.
Радуйся, рода христианскаго благомощное заступление:
радуйся, почитающим тебе ходатаю вечнаго спасения.
Радуйся, преподобне Серафиме, Вырицкий чудотворче.
Кондак 13
О, преславный и досточудный угодниче Божий Серафиме, приими усердное сие моление наше, от любве душевныя тебе возносимое, и умоли Всеблагаго и Всемилостиваго Господа избавитися нам всякаго зла и напасти, да благочестне в веце нынешнем поживем и блаженство живота вечнаго молитвами твоими обрящем, о тебе же благодарственно воспевающе Господеви: Аллилуиа, Аллилуиа, Аллилуиа.
Сей кондак глаголи трижды. По сем икос 1 и кондак 1.
