Служба преподобноисповеднику Ираклию Иссык-Кульскому

 

Вечер

 

На Господи, воззвах: стихиры, глас 6. Подобен: Тридневен:

Постника доблемудраго,/ исповедника Христова,/ в годину гонений страдания приемшаго,/ восхвалим по долгу, вернии,/ преподобнаго схимонаха Ираклия,// молитвы его в помощь призывающе.

Духа Святаго плодов исполнен быв,/ благою надеждою обогатился еси/ и, о вечнем помышляя,/ страдания временная нивочтоже вменил еси, Ираклие!// Темже со дерзновением Христа исповедал еси.

Дадеся ти благодать, преподобне отче Ираклие/ не токмо иноческия подвиги подъяти,/ но и во исповедании Христа ради пострадати,/ Емуже ныне тепле молися/ Церкви нашей даровати мир// и душам нашим велию милость.

Слава, глас 8:

Преподобне отче исповедниче славне Ираклие/ ты все упование на Бога возложил еси/ и Той тя прослави во Царствии Небеснем,/ идеже со сродники нашими,/ новомученики и исповедники Российскими,/ верою, надеждею и любовию Ему угодившими,/ прославляеши Отца и Сына и Святаго Духа// Троицу Единосущную и Нераздельную.

И ныне, Богородичен:

Царь Небесный/ за человеколюбие на земли явися,/ и с человеки поживе:/ от Девы бо Чистыя плоть приемый,/ и из Нея прошедый с восприятием,/ един есть Сын, сугуб естеством, но не ипостасию./ Темже совершенна Того Бога,/ и совершенна человека воистину проповедающе,/ исповедуем Христа Бога нашего,/ Егоже моли, Мати безневестная,// помиловатися душам нашим.

 

Вход. Прокимен дне. Чтения три преподобническая.

 

Премудрости Соломоновы чтение (главы 5 × 6):

Праведницы во веки живут, и в Господе мзда их, и попечение их у Вышняго./ Сего ради приимут Царствие благолепия, и венец доброты от руки Господни,/ зане десницею покрыет я, и мышцею защитит их./ Приимет всеоружие рвение свое, и вооружит тварь в месть врагом./ Облечется в броня правды, и возложит шлем, суд нелицемерен./ Приимет щит непобедимый преподобие./ Поострит же напрасный гнев во оружие;/ споборет же с ним мир на безумныя./ Пойдут праволучныя стрелы молниины,/ и яко от благокругла лука облаков, на намерение полетят./ И от каменометныя ярости исполнь падут грады,/ вознегодует на них вода морская, реки же потопят я нагло./ Сопротив станет им Дух Силы, и яко вихор развеет их,/ и опустошит всю землю беззаконие, и злодейство превратит престолы сильных./ Слышите убо, царие, и разумейте, навыкните, судии концев земли./ Внушите, держащии множества, и гордящиися о народех язык,/ яко дана есть от Господа держава вам, и сила от Вышняго.

 

Премудрости Соломоновы чтение (глава 3):

Праведных души в руце Божией, и не прикоснется их мука./ Непщевани быша во очесех безумных умрети, и вменися озлобление исход их./ И еже от нас шествие сокрушение, они же суть в мире./ Ибо пред лицем человеческим аще и муку приимут, упование их безсмертия исполнено./ И вмале наказани бывше, великими благодетельствовани будут,/ яко Бог искуси я, и обрете их достойны Себе./ Яко злато в горниле искуси их, и яко всеплодие жертвенное прият я./ И во время посещения их возсияют и яко искры по стеблию потекут./ Судят языком, и обладают людьми, и воцарится Господь в них во веки./ Надеющиися Нань разумеют истину, и вернии в любви пребудут Ему./ Яко благодать и милость в преподобных Его, и посещение во избранных Его.

 

Премудрости Соломоновы чтение (глава 4):

Праведник, аще постигнет скончатися, в покои будет./ Старость бо честна не многолетна, ниже в числе лет исчитается./ Седина же есть мудрость человеком, и возраст старости, житие нескверное./ Благоугоден Богови быв, возлюблен бысть, и живый посреде грешник преставлен бысть./ Восхищен бысть, да не злоба изменит разума его, или лесть прельстит душу его./ Рачение бо злобы помрачает добрая, и парение похоти пременяет ум незлобив./ Скончався вмале, исполни лета долга. Угодна бо бе Господеви душа его, сего ради потщася от среды лукавствия./ Людие же видевше и не разумевше, ниже положше в помышлении таковое./ Яко благодать и милость в преподобных Его, и посещение во избранных Его.

 

На стиховне стихиры, глас 2:

Егда умалися истина в земли нашей/ и множество неверных восташа на Церковь Христову,/ в безумии своем глаголющих:/ что нам Господь есть?/ Тогда ты, преподобне отче Ираклие,/ безбожныя твоим исповеданием посрамил еси// и память их погибе с шумом.

Стих: Исповемся Тебе в правости сердца,/ внегда научити ми ся судьбам правды Твоея.

Егда прииде Господь испытати люди Своя,/ блаженна тя раба и бдяща обрете,/ смирением и добродетельми украшена,/ преподобноисповедниче Ираклие всечестне./ Темже многими тя даровании обогати// и яви нам молитвенника тепла.

Стих: Пойте Господеви, преподобнии Его,/ и исповедайте память святыни Его.

Егда обыдоша тя гонящии неправедно,/ преподобноисповедниче отче Ираклие,/ тогда поминал еси слово Господне:/ несть раб болий господа своего,/ аще Мене изгнаша и вас ижденут./ Темже, блаженства изгнанных правды ради сподобился еси// и молишися о спасении душ наших.

Слава, глас 6:

Приидите, вси вернии,/ достойно воспоим отца преподобнаго,/ сей бо, подвиг страдания и исповедничества совершив/ и последи благочестно пожив,/ Богу в мире душу предал еси/ и от сущих зде к вечным жилищем преставился еси,// идеже молится о душах наших.

И ныне, Богородичен:

Творец и Избавитель мой, Пречистая,/ Христос Господь, из Твоих ложесн прошед,/ в мя Оболкийся,/ первыя клятвы Адама свободи./ Темже Ти, Всечистая,/ яко Божии Матери же и Деве воистинну,/ вопием немолчно:/ радуйся Ангельски, радуйся, Владычице,// Предстательство и Покрове и Спасение душ наших.

 

Тропарь, глас 2:

Преподобноисповедниче отче Ираклие,/ во дни гонений безбожных на Церковь Христову/ скитания, страдания и скорби Христа ради претерпел еси,/ и ничтоже разлучи тя от любве Божия./ Таже, благочестно в мире пожив,/ свидетельствовал еси Господа Иисуса Христа,// Егоже моли спастися душам нашим.

 

Ин тропарь, глас 5:

Исповедниче Христов, преподобне отче Ираклие,/ приял бо еси крест и последовал еси Христу,/ и вся учил еси поклонятися Творцу,/ в Троице Единому Богу,/ и ныне обрел еси на небесех мзду трудов твоих,/ и пред престолом Бога Вышняго стоиши,// и молишися о душах наших.

 

На утрени

 

На Бог Господь: тропарь тойже.

 

По 1-м стихословии седален, глас 4:

Многая страдания мужественне претерпевая,/ советы безбожных разорил еси/ и, от славы постническия в славу исповедническую восходя,/ сугубым венцем от Подвигоположника увенчался еси./ Темже моли о почитающих тя.

Слава, и ныне, Богородичен:

Недвижимое утверждение веры/ и упование наше во обстояниих,/ Богородицу песньми почтим:/ радуйся, Православия ограждение,/ радуйся, земли нашея покрове,/ радуйся, Невесто Неневестная.

 

По 2-м стихословии седален, глас 7:

Кто достойную похвалу принесет подвигом твоим, преподобне страдальче Ираклие/ Воздержанием бо себе украсив,/ исповеданием Христу угодил еси,/ обаче, неключимаго раба евангельски себе помышляя,/ даже до конца живота твоего в законе Господни со смирением поучался еси.

Слава, и ныне, Богородичен:

Стена и покров еси, Владычице/ и пристанище небурное всем, в бедах сущим,/ и к Твоему заступлению с верою притекающим./ Темже и мы усердно вопием Ти:/ соблюди нас в Православии и единомыслии, Дево Пречистая.

 

Величание:

Ублажаем тя, преподобноисповедниче Ираклие,/ и чтим святую память твою,/ наставниче монахов// и собеседниче ангелов.

 

Псалом избранный:

1 лик: Терпя потерпех Господа, и внят ми, и услыша молитву мою (Пс. 39:2).

2 лик: Постави на камени нозе мои и исправи стопы моя (Пс. 39:1).

1 лик: Смирях постом душу мою (Пс. 34:13).

2 лик: Полунощи востах исповедатися Тебе, седмерицею днем хвалих Тя (Пс. 118:62, 146).

1 лик: Неправду возненавидех и омерзих, закон же Твой возлюбих (Пс. 118:163).

2 лик: Утрудихся воздыханием моим, измыю на всяку нощь ложе мое, слезами моими постелю мою омочу (Пс. 6:7).

1 лик: Исповемся Тебе в правости сердца, внегда научити ми ся судьбам правды Твоея (Пс. 118: 7).

2 лик: Избави мя от гонящих мя, яко укрепишася паче мене (Пс. 141:7).

1 лик: За словеса устен Твоих аз сохраних пути жестоки (Пс. 16:4).

2 лик: Искусил мя еси, и не обретеся во мне неправда (Пс. 16:3).

1 лик: Изведи из темницы душу мою, исповедатися имени Твоему (Пс.141:8).

2 лик: Бог мой еси Ты, и исповемся Тебе всем сердцем моим (Пс. 127:28; 137:1).

1 лик: Благо есть исповедатися Господеви, и пети имени Твоему, Вышний (Пс. 91:1).

2 лик: Исповемся Тебе в век, яко сотворил еси, и терплю имя Твое, яко благо пред преподобными Твоими (Пс. 51:11).

 

По полиелеи седален, глас 1:

Яко истинный подвижник, преподобне отче Ираклие,/ страдания и гонения от безбожных претерпел еси/ и Христа небоязненне исповедал еси./ По сих же, в мире благочестно пожив,/ яко самовидец новомучеников Российских, люди в вере утвердил еси./ Ныне же, во Царствии Божии наслаждаяйся жизни вечныя,// моли спастися душам нашим.

Слава, и ныне, Богородичен:

Едина крепкая Предстательница роду человеческому, Богородице Дево,/ непрестанно моли с новомученики и исповедники Российскими,/ Егоже родила еси паче естества Бога Слова// спасти землю нашу, в нейже имя Твое восхваляется присно.

 

Степенна, 1-й антифон 4-го гласа. Прокимен, глас 4: Честна пред Господем/ смерть преподобных Его. Стих: Что воздам Господеви о всех, яже воздаде ми. Всякое дыхание: Евангелие от Луки, зачало 64.

 

По 50-м псалме стихира, глас 6:

Преподобне отче Ираклие,/ ты первее, от страстей себе очистив,/ слезами частыми и воздыханьми многими/ дух кроток и незлобив стяжал еси/ и, послежде страдания многая претерпев/ плод исповедания принесл еси./ Ныне же, предстоя Святей Троице,/ моли, да помилует нас// по велицей Своей милости.

 

Канон, глас 6.

 

Песнь 1

Ирмос: Яко по суху, пешешествовав Израиль/ по бездне стопами,/ гонителя фараона / видя потопляема,/Богу победную песнь поим, вопияше.

Припев: Преподобне отче Ираклие, моли Бога о нас.

Страдания и подвиги твоя, преподобне отче Ираклие,/ яко трапезу духовную днесь предлагаеши/ сыном верным Церкве Русския.

Поты постническими и исповеданием Христа/ землю нашу удобрив, исповедниче Ираклие,/ к Небесным селением возшел еси.

Укрепи Господь в страданиих преподобнаго Своего Ираклия,/ да колеблемыя в вере исповеданием вразумит/ яко хотением не хотяй смерти грешных,/ но еже обратитися и живым им быти.

Богородичен: Рабское приношаю Ти моление, неразумный аз/ и к Твоему прибегаю благоутробному милосердию:/ не отвержи мене, Пречистая.

 

Песнь 3

Ирмос: Несть свят,/ якоже Ты, Господи, Боже мой,/ вознесый рог верных Твоих, Блаже,/ и утвердивый нас на камени/ исповедания Твоего.

Агнца Божия проповедая,/ страдания за Христа, яко агнец, кротко претерпел еси, преподобне отче Ираклие,/ темже о камень исповедания твоего безбожныя преткнушася.

На камени благочестия утвердився и вечнующаго наслаждения взыскав,/ непоколебим в гонениих пребыл еси, Ираклие крепкодушне./ Сего ради причастники Царствия Небеснаго и нас сотвори, поющих тя.

Во исповедание веры, яко в броню крепкую, облеклся еси, Ираклие,/ и, воин Христов непобедимый явлься,/ словом Божиим, яко мечем обоюдоострым, враги посрамил еси.

Богородичен: Дадеся нам милость Тобою, Богородице/ Царь бо и Владыка мира из Тебе воплощся,/ страсти нас ради претерпе и спасение дарова.

 

Седален, глас 4:

Ненавидящии Господа посрамил еси,/ иже хотяху тя, преподобноисповедниче Ираклие, от Христа отлучити и смерти предати./ Ты же, к Богу ум твой вперив,/ яко птица, сети ловящих избавился еси/ и в кровы Небесныя возлетел еси,/ идеже, в лице новомучеников и исповедников Российских пребывая,// молишися о спасении душ наших.

Слава, и ныне, Богородичен:

О, Всепетая Богородице Владычице,/ преподобных похвало, исповедников венче,/ Ангелы славимая и человеки воспеваемая,/ и всего мира дивная Помощнице,// избави Церковь Христову всякаго обстояния, Едина Благословенная.

 

Песнь 4

Ирмос: Христос моя Сила,/ Бог и Господь,/ честная Церковь/ боголепно поет, взывающи:/ от смысла чиста о Господе празднующи.

Узы и страдания Христа ради претерпел еси, преподобне Ираклие,/ слово бо крестное бысть тебе крепость и сила./ Темже, мучительства страстей избегнув,/ любве Божия достигл еси.

Шуия части моли избавити нас, чтущих тя, Ираклие,/ яко добре за Единаго Праведнаго пострадал еси,/ Иже венцем славы украси тя и части святых сподоби.

Терпением вооружився,/ потекл еси на предлежащий ти подвиг, преподобноисповедниче Ираклие./ Егда же безбожнии восташа, прещений их не убоялся еси/ и непоколебимь пребыл еси.

Богородичен: Древа вкушение мертва мя содела,/ жизни же Древо из Тебе явльшееся, Пречистая, воскреси мя/ и райския сладости наследника сотвори.

 

Песнь 5

Ирмос: Божиим светом Твоим, Блаже,/утреннюющих Ти души любовию озари, молюся,/ Тя ведети, Слове Божий,/ истиннаго Бога,/ от мрака греховнаго взывающа.

Яко сын дне, во свете заповедей Христовых ходил еси, отче Ираклие,/ и душу твою подвигом исповедания освятил еси,/ ныне же почести по достоянию от земных приемлеши.

Грехи юности и неведения страданием твоим, преподобне Ираклие, яко плевелы, исторгл еси,/ в юг же сея слезами божественными,/ вечныя жизни класы радостию ныне пожинаеши.

Увяде в страданиих доброта телесе твоего, преподобне,/ обаче светлость душевная благодатию Святаго Духа возсия./ Моли прилежно о почитающих тя.

Богородичен: Правду и Избавление, Христа, нам рождши, Пречистая Дево,/ естество праотца от клятвы свободила еси.

 

Песнь 6

Ирмос: Житейское море,/ воздвизаемое зря,/ напастей бурею,/ к тихому пристанищу Твоему притек, вопию Ти:/ возведи от тли живот мой,/ Многомилостиве.

Промыслом Божиим направляемь,/ на воде покойне воздержания и послушания воспитался еси, преподобне отче Ираклие,/ темже бурю безбожия во Отечестве нашем/ неврежденно преплыл еси.

Исполнися на тебе глагол Христов:/ аще Мене изгнаша и вас ижденут,/ темже, уготовав душу твою во искушение,/ многая страдания, поношения и скорби претерпел еси.

Скитания и страдания не разлучиша тя от любве Божия, Ираклие досточудне,/ помози и нам в любви пребывати/ и едиными усты и сердцем Бога славити.

Богородичен: Родила еси, Пречистая Дево, за благость Соединившагося с человеком,/ на Негоже не смеют чини ангельстии взирати./ Того моли прилежно спасти рабы Твоя.

 

Кондак, глас 2:

Яко звезда новая Церкве Русския явился еси,/ терпеливодушне Ираклие преподобноисповедниче,/ Христа Бога прославляя/ и в нощи безбожия путь верным указуя./ Темже молим тя:/ испроси нам, сродником твоим,/ в вере Православней утвердитися// и спастися душам нашим.

Икос:

Подвиги монашеския первее прием, отче Ираклие,/ таже исповеданием славным узы страстныя вконец расторгл еси,/ и, яко птица, избавлься от сети ловящих,/ высоты духовныя достигл еси и многим путь спасения показал еси.// Ныне моли спастися душам нашим.

 

Песнь 7

Ирмос: Росодательну убо пещь/ содела Ангел/ преподобным отроком,/ халдеи же опаляющее/ веление Божие/ мучителя увеща вопити:/ благословен ecu, Боже, отец наших.

Вси новомученицы и исповедницы Российстии прославляют Тя, Господи,/ с нимиже и преподобноисповедник славный Ираклий Тебе предстоит/ и молится за землю нашу.

Утеши тя Господь в день печали/ и от страданий жизни многотрудныя к Царствию Небесному возведе./ Сего ради ныне в радости прославляеши Бога отец наших.

Мужеством и крепостию душу твою украсив,/ верность Христу в житии твоем сохранил еси/ и, многия скорби претерпев, вечнаго покоя достигл еси,/ идеже прославляеши Бога отец наших.

Богородичен: Бога плотию родила еси, Всенепорочная, Единаго от Троицы,/ Емуже вси поем:/ Боже, благословен еси.

 

Песнь 8

Ирмос: Из пламене преподобным росу источил ecu/ и праведнаго жертву водою попалил ecu,/ вся бо твориши, Христе, токмо еже хотети./ Тя превозносим во вся веки.

Егоже отроцы в пещи прославиша,/ Того и ты в пламени страданий исповеда, усердно взывая:/ да благословит тварь вся Господа/ и превозносит во вся веки.

Внегда скорбети ти, услыша Господь твоя болезни/ и десною Своею рукою покры,/ еже не опалитися ти огнем искушений/ и верну до конца пребыти, взывая:/ Господа пойте и превозносите Его во вся веки.

Отца, Сына, и Духа Святаго, Троицу Единосущную и Нераздельную,/ житием твоим исповедал еси, преподобне Ираклие,/ помози и нам подвигом добрым подвизатися,/ течение жизни совершити и веру непорочну сохранити.

Богородичен: Егда приидеши во славе судити всяческим,/ десным мя овцам сопричти, Владыко, грешнаго,/ Матере Твоея мольбами,/ да Тя славлю во веки.

 

Песнь 9

Ирмос: Бога/ человеком невозможно видети/ на Негоже не смеют чини ангельстии взирати,/ Тобою же, Всечистая, явися человеком/ Слово воплощенно,/Егоже величающе,/ с Небесными вои/ Тя ублажаем.

Славу во испытаниих единому Богу воздал еси,/ преподобноисповедниче Христов приснопамятне,/ сего ради и Той тя в лице новомучеников и исповедников Российских прослави.

Нищетою вольною и страданием за Христа очистився,/ сосуд благопотребен явился еси, преподобне отче Ираклие блаженне./ Темже за землю нашу не престай молитися, приснопамятне.

Мира суетнаго удалився,/ горе сердце имел еси, отче Ираклие,/ сего ради помощь подаде ти Христос/ и терпением обогати./ Емуже ныне в радости со всеми святыми предстоиши.

Богородичен: Воистинну превышши всея твари Ты еси, Владычице,/ Бога бо, Творца всех, родила еси плотию./ Темже Тя Предстательницу имамы/ и Тобою спасение улучити надеемся.

 

Светилен:

Светодавец Христос Бог наш, исходы утра и вечера украсивый,/ Света Невечерняго тя, преподобноисповедниче Ираклие, сподоби./ Темже, во светлостех святых пребывая,/ и нас светом незаходимым просвети,// да, в радости ликующе, прославим Свет нам Показавшаго.

Слава, и ныне, Богородичен:

Дивно и неизреченно Рождество Твое, Богородице,/ Имже спасла еси род человеческий,/ темже молим Тя:/ светом незаходимым нас просвети,// да, в радости ликующе, прославим Свет нам Показавшаго.

 

На хвалитех стихиры, глас 4:

Божественным желанием распалаяся,/ мира суетнаго отреклся еси/ и, Божиим Промыслом водимь,/ Христа небоязненно исповедал еси./ Егоже ныне моли, преподобноисповедниче Ираклие,// спастися душам нашим.

Исповеданием веры истинныя/ душу твою украсил еси,/ страданием и подвиги добрыми/ правило веры и образ благочестия нам явил еси./ Темже тебе ради, преподобне Ираклие,/ Бога усердно прославляем// и молимся, спастися душам нашим.

Христовым незлобием вооружився,/ яко добр воин подвизался еси/ и, образ верным показуя,/ за гонителей молился еси./ Сего ради ныне Престолу Божию предстоиши/ и поминаеши любовию почитающих память твою,// преподобноисповедниче Ираклие.

Слава, глас 6:

Все отложив житейское попечение,/ Небеснаго Отечества возжелел еси,/ сего ради, угождая Господеви,/ в преподобии и правде подвизался еси,/ в годину же лютую чада Церкве Русския утверждая,/ венцем исповедничества украсился еси./ И ныне молишися, преподобне Ираклие, Христу Богу// о спасении душ наших.

И ныне, Богородичен, глас тойже:

Богородице, Ты еси лоза истинная,/ возрастившая нам Плод живота,/ Тебе молимся, молися Владычице,/ со страстотерпцем, и всеми святыми,// помиловатися душам нашим.

 

Славословие великое и отпуст.

 

На Литургии

 

Блаженны от канона, песни 3-я и 6-я. Прокимен, глас 7: Честна пред Господем,/ смерть преподобных Его. Стих: Что воздам Господеви о всех, яже воздаде ми? Апостол к Галатом, зачало 213. Аллилуиа, глас 6: Блажен муж, бояйся Господа, в заповедех Его восхощет зело. Стих: Сильно на земли будет семя его. Евангелие Луки, зачало 24, Причастен: В память вечную будет праведник: