Служба преподобноисповеднику Георгию Даниловскому.

 

На Господи воззвах

Стихиры, глас 2. под. «Егда от древа:»

Верою и любовию истинною  от младенства мира отреклся еси, преподобне, и, радуяся последовал еси распеншемуся Христу, образ монашеский приим  и чистоту душевную и телесную стяжав. Сего ради благодатию любве и разумения спасению притекающих к тебе послужил еси; не остави и ныне требующих помощи твоея.

Словом души управляя, любовию же семена спасительная в них влагая, Георгие преподобне, плод сторичный пожал еси; сей же Владыце твоему приносиши, радуяся, Емуже ныне предстоя,  помяни чад твоих, присно чтущих тя.

Егда во изгнаниих горьких изаточениих теснейших  мучитель безбожный суровством тя заключи,  сия вся претерпел еси,  радуяся духом, отче,  райское селение во уме обнося,  егоже ныне благолепие видети воистинну сподобился еси, Георгие блаженне,  болезней воздаяние приемля. Таможе не забуди сущих на земли чад твоих.

Слава, глас 4:

Ни глад, ни беда, ни изгнание горькое,  ни живот, ниже смерть,  любве Сотворшаго тя разлучити возмогоша, исповедниче,  темже Царство Небесное наследова,  сладость неизживающую,  и веселие, не имущее конца.  Но испроси и нам, чтущим тя,  очищение, и мир, и велию милость.

И ныне:

Иже Тебе ради Богоотец пророк Давид:

 

На стиховне:

Стихиры, глас 1. Под. «Небесных чинов радование»

Отче Георгие,  красных жития отверглся еси,  радости и веселия ангельскаго сподобляяся,  и душевною крепостию скорби мира сего нивочтоже вменив,  терпеливнейше течение живота твоего совершил еси.  Христа моли даровати нам  мир и велию милость.

Стих: Честна пред Господем  смерть преподобных Его.

Отче Георгие, Богу содействующути, яко иерей и пастырь словесных овец,  плод сторичествующий Владыце,  души привел еси спасенных словом твоим,  слезами же и болезньми сердечными.  И ныне молися даровати душам нашим мир и велию милость.

Стих: Священники Твои облекутся в правду,  и преподобнии Твои возрадуются.

Отче Георгие, изгнания еже за Христа претерпев и от земли преставився, к Небеси востекл еси ив селениих райских жити сподобился еси. Темже за нымолисядаровати душам нашим  мир и велию милость.

Слава, глас 8:

Павла божественнаго слово исполняя,  во изгнаниихтерпеливно, преподобнеГеоргие, жизнь скончалеси,  в нуждах и скорбех, отвсюдуутесняемь,  и прехождения творя, не имея где главу подклонити,  тажебезпечальное и неизменное от Бога селение и наслаждениеобрел еси.Егоже моли, блаженне, даровати нам мир и велию милость

И ныне: БезневестнаяДево:

 

Тропарь, глас 2

Издетска монашескаго жития возжелал еси,  преподобне отче Георгие,  им желюбовь Христову стяжав,  пастырь добрый многим людем явился еси,  последи же и изгнания претерпев, венцем исповедничества украсился еси.  И ныне, предстоя Престолу Святыя Троицы, непрестанно моли спасти и просветити души наша.

По 1-м стихословии, седален глас 3,

под. «Красоте девства:»

Учением словес твоих люди твоя просветил еси,  изгнанием же крест исповедничества понесл еси, блаженне,  темже ныне неизживаемую благодать приял еси  от Света Невечерняго, Христа Спаса нашего,  Егоже моли даровати нам велию милость.

Слава и ныне:

Красоте девства Твоего  и пресветлой чистоте Твоей  Гавриил удивився, вопияше Ти, Богородице:  кую достойную похвалу принесу Ти,  что же возыменуюТя,  недоумеваю и ужасаюся.  Темже, яко повелен бых, вопию Ти:  радуйся, Благодатная.

По 2-м стихословии, седален глас 4,

 под. «Светлую Воскресения проповедь:»

Священства одежду  светлейшу подвигом исповедничества соделал еси, преподобне,  на Небеса вселився, Георгие,  и Егоже возжелал еси всем сердцем твоим обретя.  Темже твою всесвященную память славим и взываем:  помяни нас, со дерзновением Богу предстояй.

Слава и ныне:

Многими прегрешеньми аз, блудный, ум помрачив,  Твоему крепкому заступлению вопию, Богородице:  души моея зеницы просвети  и покаяния светлую зарю возсияй ми,  и во оружие света облецы мя,  Богородительнице Чистая.

 

По полиелеи седален, глас 8, под. «Егда снизшед:»

На земли яко странник и пришлец был еси,  гонения и изгнания претерпев,  попечение точию о любви Христове имея,  юже стяжал еси обильно, Георгие преподобне,  молися ко Господу о спасении душ наших.

Слава и ныне:

Радуйся, Врата Царя славы,  Яже Вышний един пройде  и Едины запечатаны сохрани,  во спасение душ наших.

Прокимен: Честна пред Господем:

Евангелие: от Матфея, 43

Стихира, глас 6:

Преподобне отче Георгие,  ты от юности своея монашеское житие возлюбил еси,  и подвизався усердно,  Духа Святаго стяжал еси,  и пастырь словесным овцам был еси,  во еже ко спасению их наставляя.  Последи же скорби, изгнания и болезни претерпел еси,  имиже в Царство Небесное вшел еси,  идеже предстоя Христу  и неизреченным утешением наслаждаяся,  моли спастися душам нашим.

 

КАНОН,
глас 2

Песнь 1

Ирмос: Моисейскую песнь восприимши, возопий, душе: Помощник и Покровитель бысть мне во спасение, сей мой Бог, и прославлю Его.

Припев: Преподобне отче наш Георгие, моли Бога о нас.

Отверзи ми устне, Христе Царю, воспети угодника Твоего Георгия преподобнаго, да молитвами своими облак разорит страстей моих.

От юности возлюбил еси монашеское житие, преподобне, и верен был еси до смерти, в терпении стяжав душу твою, темже приемлеши воздаяние ныне от Христа праведнейшее.

Слава: Издетска во обитель Оптину вселився, кротость, и терпение, и смирение стяжал еси, преподобне, имиже душу к приятию дара любве Христовы уготовал еси.

И ныне: От враг видимых и невидимых избави, молимся, к Тебе прибегающих, Богородице, и разори всяк совет борющих нас, молитвами Твоими.

Песнь 3

Ирмос: Утверди мя, Господи Боже мой, да не похвалится враг мой о мне, Ты бо еси, Господи, утверждение мое, и прибежище, и сила.

Притек во обитель Оптину, духом сущих тамо преподобных отцев напитался еси, блаженне, возращая душу твою на пажитех спасительных, Георгие, таже, плод возрастив, возмогл еси ближнему помощи.

Не может град укрытися, верху горы стояй, сего ради постави тя Господь на свещнице настоятельства, и был еси пастырь добрый не иноком точию, но всем притекающим к тебе.

Слава: Настоятельствующу ти во обители Мещовстей, глад бысть на месте том; препитавал же еси алчущия люди, зря Христа в притекающих к тебе.

И ныне: Злое нападение врагов, обышедших нас, яко огнь палящее, ищущих всегда погибели нашей, Дево, росою молитв Твоих угаси.

Песнь 4

Ирмос: Пришел еси от Девы, не ходатай, ни Ангел, но Сам, Господи, воплощся, и спасл еси всего мя человека, тем зову Ти: слава силе Твоей, Господи.

Егда попусти Господь разорение жизни Отечества нашего, тогда, Георгие, в темницу заключен был еси, идеже упование на Христа возлагая, вопиял еси: слава силе Твоей, Господи.

Раны телесныя соузником твоим обязуя, Георгие, души их благодатию Христовою, радуяся, врачевал еси, взывая: слава силе Твоей, Господи.

Слава: Помянув Господь благодеяния твоя, спасе от смерти тя и соузников твоих, Георгие блаженне, уведев же тем милость Жизнодавца, возопил еси во умилении: слава силе Твоей, Господи.

И ныне: От наития избави нас, Мати Божия, и бури, и бед, Твоими молитвами, Едина Всепетая, да зовем во умилении: слава силе Твоей, Господи.

Песнь 5

Ирмос: От нощи поем Тя, Христе Боже, яко благоволением Отчим Себе во истощание положил еси нашего ради спасения.

Заключену сущу ти в темнице, Георгие исповедниче, всем в скорбех и болезнех тамо бывшим помогал еси, ныне же мзду приемлеши от Христа воздаяния.

Утесняему сущу внешнему человеку, во узах, Георгие, утешение духовное и обновление от Христа во внутреннем человеце, преподобне, радуяся приял еси.

Слава: Якоже великий во Апостолех, всем был еси вся, Георгие, в заточении горцем сущим раны телесныя и душевныя исцеляя врачеванием Христовым, блаженне.

И ныне: Молитвеннице неложная, упование христиан, Обрадованная, приими мольбы от нас, прилежно призывающих и молящихся Тебе.

Песнь 6

Ирмос: Бездна согрешений обыде мя последняя, но яко пророка Иону, Господи, возведи из истления живот мой.

Волею Господнею изшедшу ти из темницы, преподобне, во обитель Данилову вселился еси, Георгие, о нейже ныне молишися Христу Вседержителю.

Обрет, яко пристанище временное, обитель Данилову, славне Георгие, ныне же в непреходящих селениих купно с князем Даниилом на Небесех радуяся живеши.

Слава: Был еси, Георгие, притекающим к тебе во обитель Данилову путевождь ко спасению, егоже ныне улучив, молишися о нас, блаженне.

И ныне: Целомудрия Ходатаица призывающим Тя ныне явися, и от всяких избави напастей и бед молитвами Твоими, Богоневесто.

 

АКАФИСТ

 

Кондак 1

 

Избранный от Подвигоположника Господа Иисуса новый страстотерпче и молитвенниче пречудный, преподобне отче наш Георгие, обители Даниловой похвало и украшение, воспевающе честныя подвиги и еже за Христа страдания твоя, хвалебное пение приносим ти: Радуйся, преподобне Георгие, исповедниче Христов.

Икос 1

 

Ангелоподобную доброту души твоея провидев, всея твари Создатель молитву твою чистую приемлет и таинственно от мощей Игумена земли Русския Сергия путь в Оптину пустынь тебе указует, аможе всею душею устремился еси, сего ради восхваляем тя сице:

Радуйся, молитвою матере во иночество избранный;

радуйся, благодатию Божией призванный.

Радуйся, от юности мира отрекийся;

радуйся, безплотным подобен явивыйся.

Радуйся, цвете райского саждения;

радуйся, источниче сладкого утешения.

Радуйся, очищенный в горниле искушений;

радуйся, многия души приведый ко спасению.

Радуйся, преподобне Георгие, исповедниче Христов.

Кондак 2

 

Видя тя настоятель отрока еще мала суща никакоже восхоте тя во обитель прияти, обаче молитвою преподобнаго Амвросия и настоянием матери умолен, премени изволение о тебе, да поеши со иноками Богу: Аллилуия.

Икос 2

 

Разум прозорлив стяжевая, прохождаше послушания иноческия да во всяком деле исправлен будеши, паче же смирению и послушанию научишися. Да и мы, видяще от силы в силу восхождение твое, бремя суетных попечений отвергнем и тебе вопием прилежно:

Радуйся, язвы Господа на теле носивый;

радуйся, себе воли Божией покоривый.

Радуйся, покаянием очищенный;

радуйся, доброделанием освященный.

Радуйся, равноангельное житие до конца возлюбивый;

радуйся, Христа на милость преклонивый.

Радуйся, честное Святаго Духа жилище;

радуйся, Ангелов достойное увеселение.

Радуйся, преподобне Георгие, исповедниче Христов.

Кондак 3

 

Сила Вышняго укрепляше тя, блаженне, егда усмотре тя Господь достойна чина Ангельскаго, ты же, пострижение от настоятеля, яко от Христа, прием, полагал еси на сердце глаголы жизни вечныя и к небеси мысленно устремлялся еси, идеже Ангели поют Богу: Аллилуия.

Икос 3

 

Имея Господь промышление о спасении всякой плоти, постави тя настоятелем в обители Мещовстей, яве тем показуя высокия добродетели твоя, да и о братии печешися и обитель благолепно устроиши и слышиши от нас таковая:

Радуйся, обители устроителю добрый;

радуйся, душ попечителю бодрый.

Радуйся, на всяком месте Богу трудивыйся;

радуйся, тем от страстей свободивыйся.

Радуйся, пастырю, Богом поставленный;

радуйся, ныне от паствы прославленный.

Радуйся, начальником светлый образе;

радуйся, послушником кроткое украшение.

Радуйся, преподобне Георгие, исповедниче Христов.

Кондак 4

 

Бурею безбожных гонений вся Церковь Русская потрясеся, твое же попечение не токмо о братии, но и об окрестных людех бысть, егда таяся подавал еси ко двором мешцы с мукою, подвизая всех благодарне пети Богу: Аллилуия.

Икос 4

 

Слышаще близлежащия веси, яко поругание обители Мещовстей бысть и самаго тя во узах суща и от навет злокозненных смерть прияти имуща, зело печаловахуся, обаче не остави тя Господь. Но посла ти во уверение о спасении прежде почивших матерь твою и купца, егоже в жизнь вечную напутствовал еси и семью от разорения избавил еси. Тем похвальная приносим ти:

Радуйся, в слезном молении услышанный;

радуйся, милостивый, от Господа помилованный.

Радуйся, видением чудесным о спасении уверенный;

радуйся, яко добрая дела твоя не суть забвенна пред Богом.

Радуйся, молитвы сокровище неистощимое;

радуйся, любве богатство неисповедимое.

Радуйся, яко тебе ради и соузников твоих пощаде Господь;

радуйся, яко тии последи чада духовныя тебе быша.

Радуйся, преподобне Георгие, исповедниче Христов.

Кондак 5

 

Боготочнаго источника исцелений яви тя Господь в темнице, преподобне Георгие, егда хитрости врачебней обучился еси, темже сугубое избавление страждущим приношаше, душевныя раны купно с телесными врачуя, сего ради во узах сущии воспеваху: Аллилуия.

Икос 5

 

Видя тя Преосвященный Кирилл попечителя о душах изрядна, благослови на подвиг старчества, ты же изволение имел еси со страждущими в темнице до конца пребыти, да им послужиши. Мы же, произволению твоему дивящеся, вопием:

Радуйся, источниче сострадания приснотекущий;

радуйся, преподателю Тайн Христовых непорочный.

Радуйся, Божиего домостроительства соучастниче;

радуйся, славы Господни сопричастниче.

Радуйся, твердое упование в бури неверий;

радуйся, скорое утешение во тьме озлоблений.

Радуйся, нощь жития сего мудро проходивый;

радуйся, невечерний день Царствия Божия предвозвестивый.

Радуйся, преподобне Георгие, исповедниче Христов.

Кондак 6

 

Проповедника тя благочестия и духовника изрядна видя Преосвященный Феодор поручаяся из темницы тя изволяет и в обители Даниловой особо устрояет, да тамо служение твое исполниши и поют вси московскии людие: Аллилуия.

Икос 6

 

Возсия во обители Даниловой, яко светильник многосветлый, преподобный Георгий во дни великих смут и неверия, обышедших страну нашу, путь спасения всем показуя и яко кокош под криле своя птенцы собирая, да научиши их Божия Богови воздавати и веру истинную блюсти несумненно, да и мы взываем ныне:

Радуйся, на путь правый наставляяй;

радуйся, Царство Небесное возвещаяй.

Радуйся, наставниче смиренный;

радуйся, молитвенниче прикровенный.

Радуйся, любве Христовой вместилище;

радуйся, в море житейстем пристанище.

Радуйся, радости райския провозвестниче;

радуйся, избавления неложный благовестниче.

Радуйся, преподобне Георгие, исповедниче Христов.

Кондак 7

 

Хотя пастве твоей спастися и в разум совершенный приити, всем был еси кладезь премудрости и милосердия, да всех приобрящеши и ко Христу приведеши поющих: Аллилуия.

Икос 7

 

Новую воздвиг на тя напасть враг рода человеческаго, хотя разлучити тя от паствы твоея и до конца погубити, но ничтоже успе, не оставляху бо тя чада твоя на стране далече, паче же твой молитвенный покров познаваху, несть бо лишения любящим Господа, тем и мы с ними вопием:

Радуйся, отче духовный, чада твоя не оставляяй;

радуйся, молитвою нас всех заступаяй.

Радуйся, терпением укрепивыйся;

радуйся, кротостию оградивыйся.

Радуйся, любве евангельския учителю;

радуйся, целомудрия честнейший рачителю.

Радуйся, яко чада твоя Господа взыскуют;

радуйся, яко Ангели о тебе торжествуют.

Радуйся, преподобне Георгие, исповедниче Христов.

Кондак 8

 

Дивно и пречудно есть твое молитвенное служение на земли Казахской, непрестанно бо службы совершал еси и милость Божию на люди, иже дал тебе есть Господь, привлекал еси, да поем вси Богу: Аллилуия.

Икос 8

 

Весь был еси Богу освящаяся и еже со Христом быти паче всех вожделевая, темже и лишения претерпевая, страха смертнаго чужд был еси и странен на земли, к Небесному Отечеству устремляшеся, темже приими от нас таковая:

Радуйся, стяжавый благодать Святаго Духа;

радуйся, по всему Христу уподобивыйся.

Радуйся, идеже главы подклонити не имевый;

радуйся, изгнание кротце претерпевый.

Радуйся, Небесное Отечество возлюбивый;

радуйся, земное странствие добре совершивый.

Радуйся, пришельца себе помышляяй;

радуйся, в вечныя кровы душу устрояяй.

Радуйся, преподобне Георгие, исповедниче Христов.

Кондак 9

 

Всякое человеческое мудрование умолкает, егда утешение Божественное находит, тако несть нам словеси рещи о свете Фаворстем, вся небеса в праздник Преображения осиявающем, токмо тебе и дщери твоей духовней явленном поющим: Аллилуия.

Икос 9

 

Ветия многовещанныя аще и возмогли быша исчислити лишения твоя, обаче не разумеют долготерпения твоего, егда болезнь последняя найде на тя, тебе же все болезнование о чадех твоих бысть, иже купно с тобою страдаста. Тем тебе вопием:

Радуйся, паче себе ближних возлюбивый;

радуйся, мученичеством безкровным себе украсивый.

Радуйся, возстания телесныя поправый;

радуйся, Божественному безстрастию поревновавый.

Радуйся, Царствие Божие внутрь себе восхитивый;

радуйся, правды ради душу твою положивый.

Радуйся, правило веры и благочестия;

радуйся, радование Христова благовестия.

Радуйся, преподобне Георгие, исповедниче Христов.

Кондак 10

 

Спасти хотящу душу твою, весь ти путь бысть от грехов разрешати и причащати, темже и сподоби тя Господь со Святою Чашею в руку скончатися, да познают маловернии, яко честна пред Господем смерть преподобных Его, и да зовут Ему: Аллилуия.

Икос 10

 

Стена необоримая чадом твоим и по смерти являешися овогда видением сонным, овогда пришествием видимым утешаеши, во еже не быти им в сем житии многоскорбнем сирыми и унылыми, зовущим тебе:

Радуйся, обещавый услышати всех к тебе приходящих;

радуйся, даруяй исцеление болящим.

Радуйся, скорби от сердец отымаяй;

радуйся, греховную печаль потребляяй.

Радуйся, великое в бедах утешение;

радуйся, в немощех нетрудное поможение.

Радуйся, в страстном борении воззвание;

радуйся, в нерадении скорое покаяние.

Радуйся, преподобне Георгие, исповедниче Христов.

Кондак 11

 

Пение новое Церковь Русская днесь приносит, прославляя страстотерпцы и исповедники своя, святители же, монаси и мирстии, и о гресех чад своих воздыхает, да Христос Господь, зиждяй Церковь на крови мученик Своих, и наша грехи очистит и помилует всех зовущих Ему: Аллилуия.

Икос 11

 

Светильник присногорящий паки обрел еси обитель Данилову пристанищем себе, Георгие блаженне, в ней же ныне мощами почиваеши и послушаеши всех зовущих тебе:

Радуйся, в Небеснем Чертозе живущий;

радуйся, Господеви непрестанно поющий.

Радуйся, обители твоея страже неусыпающий;

радуйся, мощами в ней пребывающий.

Радуйся, яко тобою Христос прославляется;

радуйся, яко тобою преисподняя посрамляется.

Радуйся, преподобных сподвижниче;

радуйся, мученик сопричастниче.

Радуйся, преподобне Георгие, исповедниче Христов.

Кондак 12

 

Благодать испроси нам у Творца и Бога, прибегающим к покрову твоему и духовнаго твоего водительства взыскующим, во еже пети с тобою: Аллилуия.

Икос 12

 

Поюще многия подвиги твоя, преподобство вкупе с исповедничеством, духовничество с непрестанным молением, проповедничество и внутреннее безмолвие, прибегаем к действенной молитве твоей, еюже ты нас от разслабления возстави и на путь покаяния направи, ублажающих тя:

Радуйся, яко Царю Небесному предстоиши;

радуйся, яко о всех нас тепле ходатайствуеши.

Радуйся, иноком наставниче премудрый;

радуйся, послушником игумене предобрый.

Радуйся, чадом отче прелюбезный;

радуйся, просящим молитвенниче неусыпный.

Радуйся, благочестивых людей услаждение;

радуйся, монашествующих удобрение.

Радуйся, преподобне Георгие, исповедниче Христов.

Кондак 13

 

О священная главо, преподобне отче наш Георгие, Даниловския обители молитвенниче, Христа Бога от юности возлюбивый, и подвигом добрым Ему угодивый, веру же православную до смерти соблюдый, и ныне Престолу Божию предстоя, приими малое сие хваление от чтущих тя, и молися ко Господу о Церкви и Отечестве нашем, и о верою живущих в нем, да спасение улучивше, поем Ему: Аллилуия.

(Сей Кондак глаголи трижды)

Икос 1

 

Ангелоподобную доброту души твоея провидев, всея твари Создатель молитву твою чистую приемлет и таинственно от мощей Игумена земли Русския Сергия путь в Оптину пустынь тебе указует, аможе всею душею устремился еси, сего ради восхваляем тя сице:

Радуйся, молитвою матере во иночество избранный;

радуйся, благодатию Божией призванный.

Радуйся, от юности мира отрекийся;

радуйся, безплотным подобен явивыйся.

Радуйся, цвете райского саждения;

радуйся, источниче сладкого утешения.

Радуйся, очищенный в горниле искушений;

радуйся, многия души приведый ко спасению.

Радуйся, преподобне Георгие, исповедниче Христов.

Кондак 1

 

Избранный от Подвигоположника Господа Иисуса новый страстотерпче и молитвенниче пречудный, преподобне отче наш Георгие, обители Даниловой похвало и украшение, воспевающе честныя подвиги и еже за Христа страдания твоя, хвалебное пение приносим ти: Радуйся, преподобне Георгие, исповедниче Христов.

Песнь 7

Ирмос: Да преславное рождество Твое, Христе, еже от Девы, прообразиши яве, неопалимы в пещи отроки сохранил еси, песньми поющия Ти: Боже, благословен еси.

Никакоже забывал еси чад твоих, Георгие преподобне, понуждаемь пещися о них любовию Христовою, Емуже предстоя ныне, зовеши: Боже, благословен еси.

Любовь Христову в сердце твоем стяжав, чада твоя Пастыреначальнику привел еси, Георгие блаженне, Емуже о нас моляся, взываеши: Боже, благословен еси.

Слава: Отдели тя телесне от паствы твоея изгнание горькое, но духом не возмогл еси разлучитися любящих тя, Георгие славне, во еже купно с ними звати Христу: Боже, благословен еси.

И ныне: Покажи скорое Твое заступление, Мати Божия, призываем Тя от сердца, со слезами припадающе: скорби премени и обстояния разреши рабом Твоим, да поем: Боже, благословен еси.

Песнь 8

Ирмос: Древле оросившаго еврейския отроки в пламени и опалившаго халдеи преславно в нем, воспоем Господа, глаголюще: благословите и превозносите Его во вся веки.

Твердым помыслом гонения, скорби и болезни понесл еси, славне, имиже венец терпения приял еси, Георгие, ныне же, воздаянием некрадомым наслаждаяся, зовеши: Господа пойте и превозносите во вся веки.

Тесным путем шествуя, преподобне, пажитей достигл еси, блаженне, рая, небес ширших, идеже веселяся, взываеши со святыми: Господа пойте и превозносите во вся веки.

Слава: Ни скорбь, ни болезнь, ни изгнание разлучити тя не возмогоша от любве Христовы, Георгие исповедниче, в нейже ныне на Небесех живеши, вопия: Господа пойте и превозносите во вся веки.

И ныне: Да имя Твое, Богородице, на земли славословится, Иже бо из Тебе возсияв, грешником прибежище Тя дарова, Тобою бо всякое дыхание Господа поет и превозносит во вся веки.

Песнь 9

Ирмос: Тебе, мысленную и одушевленную лествицу, на нейже Бог наш утвердися, Еюже к Небеси обретохом восхождение, песньми, Богородице, величаем.

 

Зной земный понесл еси во изгнании твоем, исповедниче, алчбу и жажду претерпел еси, ныне же упасл есть тя Агнец на источницех прохладных вод животных.

Скорбел еси сердцем твоим, преподобне, слезя о чадех твоих и о мире всем, ныне же отъял есть Господь от очию твоею всяку слезу, Георгие блаженне.

Слава: Не имел еси где главы подклонити, Георгие, егда готовляшеся отшествие твое во Град взыскуемый, ныне же вселился еси во обители непреемныя.

И ныне: Нам, поющим Тя, и верою славящим, и к предстательству Твоему тепле притекающим, подаждь с Небесе разрешение лютых и мучащих страстей, да Тя непрестанно вернии величаем.

Светилен. Под. «Посетил ны есть:»

Посети тя Господь скорбным житием, Георгие, имже монашество и священство твое навершил еси место светло во Царствии Небеснем обрел еси, но молися и нам тамо быти, преподобне.

Слава и ныне:

Мольбы раб Твоих не презри, Всенепорочная, спасающи нас от бед и скробей молитвами Твоими.

 

На хвалитех

стихиры, глас 4-й  Под. «Дал еси знамение:»

Возрастил еси талант, вверенный тебе, преподобне, в терпении душу твою стяжевая,  и, сеяв со слезами, в радости ныне, отче, жнеши, многосугубное утешение и покой истинно улучив.  Но яко имея дерзновение ко Владыце,  молися о поющих тя, Богоносе Георгие.

Монашеским житием первее, послежде и страданьми богомудренно Владыце и Создателю благоугодил еси,  очищение  и душевное благородие от нас истязующему; Егоже в мир пришествие исповедуя  и веру тверду даже до конца соблюд,  дерзновение к Нему стяжал еси, темже молися о спасении чтущих тя, преподобне Георгие.

Иже Бога злочестиво отвергшия  смирением и озлоблений терпением обличил еси, истину утверждая сим преподобне,  темже был еси Христова Царствия наследник,  и радости неизреченныя,  и присносущнаго сияния,  егоже улучити и нам  Владыце молися, блаженне Георгие.

Слава, глас 6:

Весь от юности Господеви последовав,  пристрастие и любовь мирскую оставил еси, славне,  духом же горя, в монашестве богоподобное смирение стяжал еси  и наставник притекающих к тебе, отче, был еси, послежде во изгнании многи скорби и болезни претерпев,  венец нетленный от Христа приял еси,  Егоже моли спасти и просветити души наша.

И ныне: Богородице, Ты есиЛоза истинная:

На Литургии:

Блаженны от канона, пп. 3-я и 6-я.

 

Прокимен: Возвеселится праведник о Господе и уповает на Него.

Стих: Услыши, Боже, глас мой, внегда молити ми ся к Тебе.

Апостол: Рим. Зачало 99

Аллилуйя: Праведник, яко финике процветет:

Стих: Священники Твои облекутся в правду:

Евангелие: от Матфея, зачало 10

Причастен: В память вечную: