Гимнография преп. Германа (Гомзина) схиигумена, Зосимовского (1923)
Тропарь, глас 8:
Неусыпный молитвы ко Христу ревнителю, подвигоположнику святыя пустыни искренне подражавый, обновителю и устроителю ея благолепия, богомыслие и старчество тамо насадивый, добродетельми многими, яко ризою украшенный, постническое житие явивый, преподобне отче Германе, приими нас, чтущих любовью честную память твою, да отвергнем льстивую прелесть мира сего теплым предстательством твоим у Престола Вседержителя.
Кондак, глас 6:
В преподобстве и правде мужественно пожив, пустынножителю, отче Германе, многим путь ко спасению, яко звезда яркая, озарил еси, всем был для всех, служа Богу и людем.
Молитва
О, блаженне отче Германе! Земли Владимирския преславная похвало, дивный и чудный угодниче Христов, иноков украшение! Зря обитель Зосимову, зрак свой обновившую, также и святые мощи твоя в той обретенныя, радуемся ея восходу новому, стопами многих подвижников освященною.
И ныне, по ряду достойно воспоим тя, отче Германе, яко строителя обители мудраго, наставника монахов неусыпнаго, ревностнаго общего жития насадителя, непрестанныя молитвы учителя, изографа святых икон искуснаго, весь путь твой многотрудной жизни восхваляя, о времени буйном, яко горниле огненном, в последняя твоя лета воздыхал еси, пастырски о нем болезнуя.
Преподобне авва Германе! Благодатию свыше одеянный и обогащенный, молися о всех нас, грешных людях, в скорбях и болезнях угнетаемых, в страстях и многих грехах одолеваемых, да озарит свет покаяния и исправления прежней жизни ко спасению душ наших, ко умирению во вражде сущего мира, яко и во дни жития твоего в сем добром деле много пособствовал еси, новаго человека во Христе созданнаго проповедуя.
О, святый отче! Велие дерзновение имея пред Всемилостивым Спасом и Его Пречистой Материю, не забуди нас, меньших и недостойных чад твоих, в молении твоем, предстательствуй о всех нас, с любовию чтущих светлую память твою, в Церкви нашей дивно прославленней, яко новое светило в хвалу и вечное благодарение Благодетеля и Питателя жизни нашея, в Троице покланяемаго Бога, Отца и Сына и Святаго Духа. Аминь.
