Гимнография сщмч. Аркадия, еп. Бежецкого (1937)
Гимнография:
Даты:
Тропарь:
Тропарь, глас 4:
От юности Церковь яко невесту себе предобручи, / проповеданием твоим велелепно украшенную, / за нюже страдальчествовати по Христе изволив, / не изнемогл еси крепостию, полагая душу за други своя. / Темже и по страданиих мнозех / паки к гонителем самовластно приходиши, / да в животе и смерти твоей возвеличится Христос, // священномучениче Аркадие славне.
Кондак:
Кондак, глас тойже:
Нравом кроток и сердцем милостив, / во образ Спасов священномучениче Аркадие, / истощи себе щедротами убогих, / любы же Христова паче обогати тя, / не истощаваемая в заточениих, ниже в гонениих, / сия любы на Голгофу русскую возведе тя, / да и славу воскресения улучиши / с новомученики российскими // в Церкви торжествующей во веки.
Молитва:
Молитва
О священномучениче Аркадие, пастырю добрый словесных овец! Ты образ Христов в себе ясно яви, грады и веси словом Божиим оглашая, нищия и вдовицы питая, люди расточенныя во едино братство Христово собирая, малодушныя и унылыя возставляя и к подвигу исповедания веры укрепляя. Егда же прииде на землю Российскую огненнаго испытания час, тогда мнози от путей правых заблудиша, перваго образа добрóту в себе погубиша, паче же зверообразни явишася. Ты же, архиерею честный, по пророчеству блаженныя старицы, не на кафедру церковную, но на Голгофу русскую смиренно возшел еси, да светит оттоле свет твой пред человеки, да паче возсияет в тебе образ Христов, яко злато, огнем страдания очищéно. Ныне же в небесней славе Престолу Божия предстоя, потщися, святителю, послужити Господеви, да услышит молитвы твоя и дарует Святей Церкви мир и тишину, архиереом право правити слово истины, священническому чину бодрость со молитвою, христианом же православным ревность о благочестии и честнем богоугоднем житии, да во всех прославится имя Святыя Троицы во веки. Аминь.
