Гимнография сщмч. Андроника, архиеп. Пермского
Слу́жба свято́му священному́ченику Андрони́ку, архиепи́скопу Пе́рмскому и Кунгу́рскому
НА МА́ЛОЙ ВЕЧЕ́РНИ
На Го́споди, воззва́х: стихи́ры хвалитны с утрени,
глас 4; Слава, глас 1.
На стихо́вне стихи́ры с литии, глас 3; Слава, глас 7.
НА ВЕЛИ́ЦЕЙ ВЕЧЕ́РНИ
На Го́споди, воззва́х: стихи́ры, глас 8.
Премудрости буйство избрав / суемудрие мира посрамил еси / священномучениче Андрониче / серафимам подражая богу выну предстоя / ангельскому житию издетска ревнуя // смертию любовь ко Христу венчал еси.
Вития богопросвещенный / огнь пылающий / святителю Андрониче / вземши меч духовный / еже есть глагол Божий / апостолом подражавый / заблуждших к свету обратил еси / советы нечестивых обличил еси / победителю мужей зовем ти: // моли Христа Бога просветитися нам.
Делателю праведный / жатву обильную принесл еси / святителю Андрониче / немощи немощных на раменах ношаше / любовию и страхом к единению призываше / истинныя веры столпе обрелся еси. / Темже вопием ти: // моли Христа Бога помиловати нас.
Отче Андрониче / чистоты сердца хранителю / отеческих преданий ревнителю / соблазнства мира побеждая / простотою жития к следованию за Христом привлекая / странник и пришлец бывая / к тихому пристанищу притекл еси. // Моли Христа Бога спастися нам.
И́ны стихи́ры, глас 5:
Гробницам мученическим притекая / обретшееся в италийской стране иногда / на путь страдальчества готовишася Андрониче. / Зря же гробом повапленным уподобльшихся / от неистовства позорищ / к потаенному сердца человеку призывал еси / мы же одебелевшие душою взывам ти: // неотступным буди ходатаем за нас пред Богом.
Земли Российския печальниче, / пастырю добрый, / любящий отец чад церковных, / грозный обличителю гонителей неправедных / святый священномучениче Андрониче, / кормчий верный к тихому пристанищу, / молим тя, грехми обремененныя: // неотступным буди ходатаем за нас пред Богом.
Мук грядущих мирно ожидая / кротостию и твердостию безумствующих устрашая / Христу послушлив даже до смерти быв, святителю Андрониче. / Справедливо ли слушать вас более, нежели Бога – / беззаконнующим рекл еси / и за овцы душу твою положил еси / мы же память твою совершающе зовем ти: // неотступным буди ходатаем за нас пред Богом.
Аще от земных трудов и упокоился еси, / и не обретеся мощи твои, святителю Андрониче, / но сирых твоих чад не оставил еси, / в горних селениих водворившеся, / на землю нашу во страстех влающуюся / Божие благословение призываеши. Мы же благодарственно вопием ти: // радуйся, угодниче Господень всехвальный.
Сла́ва, глас 6:
Неблазненное житие скончавая / кровьми украсился еси святителю Андрониче, / жертвою благоугодной принеслся еси / за беззакония людстии / живым был погребен еси / от юности Христу спогребшийся / Егоже непрестанно моли, вопием ти, // да избавит нас от тли омертвелых.
И ны́не, праздника или Богоро́дичен, глас то́йже: Кто Тебе не ублажит:
Вход. Проки́мен дне. И чте́ния три му́ченическия.
На литии́ стихи́ры, глас 3:
Приидите, прославим вернии / светозарную звезду возсиявшую / Андроника всехвальнаго / святителя изряднаго / во апостольстве потрудившагося / в преподобии подвизавшагося / в мученичестве просиявшаго // молящегося о душах наших.
Притецыте, осетинския пастырие / верни японстей страны / новгородския и сибирския людие / православныя Пермския и всея Российския земли / воспоим заступника нашего / воина Христова святителя / пастыря и мученика новаго // молящегося о душах наших.
Сла́ва, глас 7:
Светом невечерним просвещен, / светло незаходимое восшел еси, святителю Андрониче, /тьму ярящуюся разгоняя; / ныне же, Отцу Светов предстоя, // поминай поющих тя, всечестне.
И ны́не, праздника или Богоро́дичен, глас то́йже:
Под кров Твой, Владычице:
На стихо́вне стихи́ры, глас 2:
Органе громогласный / небеснаго жительства проповедниче / священнотаинниче Андрониче / Христов добрый оружниче / мужей неразумных победителю / и к покаянию неослабный путевождь // моли даровати нам велию милость.
Стих: Праведник яко финикс процветет, // яко кедр, иже в Ливане, умножится.
О вышних пещися научая, / земная мудрования оставив, / ризы убеленные истка себе, святителю премудрый. / Нам же в срамные рубища грехов облеченных / и на вечерю господню войти не дерзающим, // моли Христа Бога даровати мир и велию милость.
Стих: Насаждении в дому Господни, // во дворех Бога нашего процветут.
Тесными враты следуя, / язвы Господа на теле всяк день нося /отеческую любовь источал еси святителю Андрониче. / Ныне же с горними силами ликовствуя // моли даровати нам мир и велию милость.
Сла́ва, глас 6:
Веселый нрав юности скорбми умертвив, / на рамена поношение Христово вземши / немощь естества превозмогая / к веселию вечному востекл еси, святителю Андрониче. / Учителю благочестия, / дерзновенный проповедниче, / неключимых рабов наставниче, // испроси нам мир и велию милость.
И ны́не, праздника или Богоро́дичен, глас то́йже.
Тропа́рь, глас 5:
Меч духо́вный взем священному́чениче, / за Це́рковь и Оте́чество во́инствовал еси́; / и ду́хом пламене́я богому́дре, / любо́вь Христо́ву стяжа́л еси́. / Жизнь у́бо вре́менную ни во что вмени́в, / в же́ртву себе́ прине́сл еси́. / Мы же, гре́шнии, мо́лим тя, святи́телю Андрони́че, // неотсту́пным бу́ди хода́таем за нас пред Бо́гом.
НА У́ТРЕНИ
По 1-м стихосло́вии седа́лен, глас 2:
Мудрым рыбарем подражая, / работу гибнущую оставив, / от сетей вражиих избавься, славнее Андрониче, / ловитву добрую сотворил еси // сетию благодати Христовой.
Сла́ва, и ны́не, праздника или Богоро́дичен.
По 2-м стихосло́вии седа́лен, глас 2:
Правды алчущи Божией, / двизания плоти умертвил, блаженне Андрониче, / росою благодати небесной орошаем, / процвел еси яко крин благоуханный // алчущих слова напитавая.
Сла́ва, и ны́не, праздника или Богоро́дичен.
По полиеле́и седа́лен, глас 6:
Веруя возглаголал, святителю: / воскреснет Россия, в безбожии гибнущая, / возвратится ко Христу заблуждшее чадо. / Тою же надеждею нас укрепляя, / примирению озлобленных учил, блаженне, / и к Церкви Святей прилеплятися заповедал, / идеже сам с небесными силами ныне совокупився, // поминай нас, чтущих память твою.
Сла́ва, и ны́не, праздника или Богоро́дичен.
Степе́нна, 1-й антифо́н 4-го гла́са.
Проки́мен, глас 4: Честна́ пред Го́сподем // смерть преподо́бных Его́.
Стих: Что возда́м Го́сподеви о всех, я́же воздаде́ ми.
Вся́кое дыха́ние: Ева́нгелие от Луки, зача́ло 67: Рече Господь: не бойся малое стадо:
По 50-м псалме́ стихи́ра со стиховны, глас 6:
Веселый нрав юности:
Кано́н Богоро́дицы на 6 и свята́го на 8.
Кано́н свята́го, глас 6, егоже краегране́сие:
Огненнаго Андроника песньми восхвалим. Глас 4.
Песнь 1
Ирмо́с: Волною морскою / Скрывшаго древле / гонителя мучителя, / под землею скрыша спасенных отроцы: / но мы, яко отроковицы Господеви поим, // славно бо прославися.
Отверзи, Господи, сердце мое теплохладное, / просвети ум мой непокоривый / и язык безсловестный разреши от уз нечистоты / к похвалению немощнаго воздвизая молитвами угодника Твоего Андроника.
Господеви работать измлада возжелев блаженнее, / ко храму Божию якоже елень на источницы водныя устремлялся еси / и нас, Тебе празднующих водою животворною напои.
На иноческий подвиг Кронштадтским пастырем благословен, / проразумно победитель мужей нареклся еси Андрониче; / в ангельском же чине неустанно подвизаясь, / по имени и житие стяжал еси.
Богоро́дичен: Его же трепещет всякая тварь / во чреве Твоем прияла еси Дево Богоневесто неизреченно; / да воспримет и исцелит естество мое падшее.
Песнь 3
Ирмо́с: Утверди, Господи, на камени заповедей Твоих подвигшееся сердце мое, яко Един Свят и Господь.
На труды апостольские призываем, / яко ангел в Вифлееме иногда благовествующе, / пастырем явился в Осетинской стране, блаженне, / Христово пришествие, спасение и мир человекам возвещаяй.
На будущие страдания и скорби уготовляему, / Рим подобаше ти видети, преподобне, / идеже у гробниц первомучеников огнем божественным распалался / и Павловы болезни и труды поминая / хождению по путем Божиим научался еси.
Афинеев благонравие в оскудении видя / об утверждении Руси Святой помышлял еси Андрониче. / Егда же виде латинян яко на зрелище в храм грядущих, / недоуменно пребывая, разгорячение крови их яко смоковницу безплодную вменял еси.
Господней десницею якоже Авраам в земли чуждей водимый / к апостолу Японии святителю Николаю управлен быв премудре; / идеже благодати Божией обильно содействующей дивяся / в непрестанных трудах благовестия и болезнех обрелся еси Андрониче.
Богоро́дичен: Ослепленнаго житейскими сластьми / неключимаго раба и лукаваго / утверди во стезях Твоих ходити, Владыко Христе Боже наш, / молитвами Рождшия Тя.
Седа́лен, глас 4:
Духом уст воинствуя, / непорочным житием яко щитом огражден, / пламень огненный в скудельнице сердца нося, / во брани креплий явился еси, священномучениче Андрониче, / отечество в верности Православию выну утверждая.
Сла́ва, и ны́не, праздника или Богоро́дичен,
глас то́йже:
Дево Всепетая, / Лествице Умная, / скорбящих всех Помоще, / Стено Нерушимая, / в печалех и бедах Утешительница, / скорый Покров и Заступница / взыщи погибающих нас в беззакониих.
Песнь 4
Ирмо́с: Услы́ша проро́к / прише́ствие Твое́, Го́споди, и убоя́ся: / я́ко хо́щещи от Де́вы роди́тися, / и челове́ком яви́тися, и глаго́лаше: / услы́шах слух Твой, и убоя́хся, // сла́ва си́ле Твое́й, Го́споди.
Архиерейством почтен быв, славне, / яко пастырь добрый плакаше с плачущими и радовашеся с радующимися / в Японстей стране в домы на всяк день входя / яко по пропастем распуженные овцы собирая.
Новгородскую землю в удел святительский прияв, / пределы ея обхождаше, преподобне, / Христу главу не имущему где подклонити, последуя, / нравы исправляя, страсти и пороки обличая, / младенцев взращать в вере научая / – все добре, творил еси.
Делатель винограда Божия истинный ты еси Адрониче / волчцы бо и тернии огнем словес евангельских посекая, / не давал сна очима и веждома твоим дремания / к покою горних селений влекомый.
Богоро́дичен: Рождество Твое Пречистая Дево изъяснить всяк ум не может: / како на руках носиши Егоже десницею мир носим; / како питаеши о всей твари Промышляющаго.
Песнь 5
Ирмо́с: От нощи утренююща, Человеколюбче, просвети, молюся, и настави и мене на повеления Твоя и научи мя, Спасе, творити волю Твою
От юности чистоту сердца супружницею избрав, преподобне, / монашеский образ взыскав / истинный ревнитель иноческих правил обрелся еси, славне.
Ночными бдении пред Божественной службой, / постом и воздержанием, смиренной усердной молитвою / и простотою словес Твоих / житие нескверное Богу угодное приносил Андрониче.
Истину возлюбив паче мира сего / и богатства его яко уметы вменяя, блаженне, / чресла препоясав и земныя славы бегая / к славе небесней простираясь сокровищницу Духа наполнял еси.
Богоро́дичен: Кто не прославит рождества Твоего Богоневесто, / токмо возлюбивый тму века сего; / Тобою бо явися нам благодать, просвещающая вся концы.
Песнь 6
Ирмо́с: Обыде мя бездна последняя греховная, пожре мя множество зол моих, и, стеня, вопию Ти, Боже мой: яко пророка Иону, избави, Многомилостиве.
Архиерею изрядный / на престоле святителя Стефана возжен был еси, святильниче святый, / идеже много потрудишася о просвещении Пермской страны / теплую веру возгревая, храмы возводя; / пастырей и учителей словесных пестун, / сирых и убогих питатель явился славне.
Печалуя об оскудении веры / и ослеплении умов, гордостию помраченных, / оледеневшие сердца благодатными словесы твоими пробуждал, / нерадящих о спасении взыскивал, / непокоривыя к послушанию приводил, Андрониче, / бедствующия люди к покаянию призывая.
Еретическия и безбожныя новыя учения / от врага спасения навеваемыя обличая / и тем губительных волков, расхищающих стадо посрамляя, / к пажитям Христовым чад церковных упасл еси святителю премудрый.
Богоро́дичен: Сластьми греховными в погибель погружаемых / и от треволнения житейскаго моря потопляемых / не презри, Владычице Богородице, призывающих Тя всем сердцем / на милости Твоя уповающих.
Конда́к, глас 4:
Я́коже апо́стол сла́вный Па́вел, / простото́ю себе́ укра́сил еси́; / по́честей и сла́вы избега́я, / в чистоте́ пред Бо́гом подвиза́лся еси́; / архипа́стырство тя́жкое пронесы́й, / му́ченическим венце́м увенча́н // Небе́сному ны́не Архиере́ю предстои́ши.
И́кос:
А́нгелом Церкви нашея нареченный, / Ея же ради и живот твой положил еси, святителю, / в сонме новомучеников Российских ныне просиявый / приими от нас, подвиги твоя и теплое предстательство поминающих, похвалу сию: / радуйся, Божий избранниче, священная главо; / радуйся, добропобедный о Христе воинниче. / Радуйся, странниче смиренный; / радуйся, Небеснаго Иерусалима взыскателю. / Радуйся, горним силам в любви уподобивыйся; / радуйся, отечество земное в сердце свое вместивый. / Радуйся, в ризу убеленную одеявшийся; / радуйся, в подвизех и страданиих победивый. / Радуйся, святителю Андрониче, Христовы Церкви велелепое украшение.
Песнь 7
Ирмо́с: О́троцы в Вавило́не / пе́щнаго пла́мене не убоя́шася, / но посреде́ пла́мене вве́ржени, ороша́еми поя́ху: // благослове́н еси́ Го́споди, Бо́же оте́ц на́ших.
Нарече тя огнь пылающий / собор отцев, иже в Москве собранный; / серафимски бо к Богу любовию пламенея, / отечество земное возвратитися к Каменю, / егоже отвергли зиждущии новое царство / звал Андрониче, вопия: / благословен еси, Господи, Боже отец наших.
Мятежи, насильства и разграбления храмов безбожными чинимыя не терпя, / на страже веры став, славнее, / увещавал беззаконнующих непрестанно, / святительским своим омофором от посягательств Церковь, вверенную ти покрывая.
Истине ревнуя, прелесть рая земнаго отвергнув, / безбожия лжу, беззаконие и безстудие мужественно обличал еси, премудре, / Небеснаго Царствия проповедниче быв воспевая: / благословен еси, Господи, Боже отец наших.
Богоро́дичен: Высшая всякия твари явилася еси, Богорадованная Владычице, / чистотою Твоею кивотом священным соделавшаяся / и огнь Божества неопально приимшая.
Песнь 8
Ирмо́с: За законы отеческия блаженнии в Вавилоне юноши, пребедствующе, царюющаго оплеваша повеление безумное, и, совокуплени имже не сваришася огнем, Державствующему достойную воспеваху песнь: Господа пойте, дела, и превозносите во вся веки.
Оком духовным страдание и смерть свою провидя, / тих и мирен пребывал еси, блаженне, / даже до крове уготовляяся в истине стояти взывая: Господа пойте, дела, и превозносите во вся веки.
Скорбями яко злато в горниле искушен быв, Андрониче, / кормчий непристашен корабля церковнаго / зело обуреваемаго житейским морем явился еси вопия: / Господа пойте, дела, и превозносите во вся веки.
Христу подобясь во Иерусалим на страсть Грядущему, славнее, / безумие гонителей посрамляя / торжество веры Православныя знаменовал еси, / егда во дни Пасхи на крестный ход множество народа собрал еси / единеми сердцем и усты воспевающих: / Господа пойте, дела, и превозносите во вся веки.
Богоро́дичен: Выну зовем Ти со архангельским гласом: / радуйся, Богоблагодатная Богородице Дево, / и под кров Твой прибегаем / яко скорой Помощнице во всяком обстоянии.
Песнь 9
Ирмо́с: Безсе́меннаго зача́тия Рождество́ Несказа́нное / Ма́тере безму́жныя нетле́нен Плод: / Бо́жие бо Рожде́ние обновля́ет естества́. / Те́мже Тя вси ро́ди, / я́ко богоневе́стную Ма́терь, // правосла́вно велича́ем.
Апостольство и святительство проняся, / в преподобии и правде пожив, / во сто крат уплодоносился еси Владыце, славне, / в последняя же и мученичества сподобльшися.
Люте озлобленыя гонители страшишася благоухания словес твоих, Андрониче, / со оружием и дрекольми тысящным войском нощию тя обступиша; / нечестием же своим обличаемы, / беззаконный суд вне града спешиша учинити.
Исполнившуся празднику Вознесения Господня, / преисполнен елеем добродетелей явился еси священномучениче, / приятие Духа Небеснаго ожидая / в горняя селения к Небесному Отечеству духом возносился еси / прах клевет и поруганий безумствующих от одежд убеленных оттрясая.
Богоро́дичен: Моления сия наша не презри, Пренепорочная, / но Сыну Твоему и Богу принеси, Всемилостивая, / да спасет нас от огня вечнующаго предстательством Твоим / и святаго отца нашего Андроника.
Свети́лен:
Светом Невечерним просвещен, / светило незаходимое восшел еси, Андрониче, / тму ярящуюся разгоняя; / ныне же, Отцу Светов предстоя, / поминай поющих тя, всечестне.
Сла́ва, и ны́не, Богоро́дичен:
Светом девства, Чистая, преукрасившися, Матерь Света соделалась, Богородице Дево; о всех молиши Сына твоего и Бога нашего спастися, просвети, взываю Ти, и тьму мою, Владычице.
На хвали́тех стихи́ры на 4, глас 4.
Како восхвалю тя, славне, / по имени жительство стяжавшаго / мужей победителю / святителю Андрониче / любовию сердца ко Христу привлекшаго, / скорбящих утешителю, / озлобленных примирителю // о всякой душе попечителю неустанный.
Киими похвалами воспою тя, / огнь пылающий нарекшийся, / вертоградарю изрядный, / евангельское семя обильно возрастивый / тернии и волчцы пламенем словес посекий / плод явивый благий // Андрониче добрый пастырю наш.
Авраамски пешпшествовав иногда / куплю добрую дея / многоценный бисер стяжал еси, святителю. / С мудрыми девами сопричтен / верный рабе явился Владыце, / тяготу дневнаго зноя понесший // поминай воспевающих тя, достославне.
Изнемогает скудный ум / и язык гугниво хвалити тя, / вития благолюбивый, / доблемудренный наставниче, / святителю отче Андрониче, // ходатаю усердный о душах наших.
Сла́ва, глас 1.
Страсти воюющия победив, / соблазнства море преплывая, / на вольную страсть взыде святителю, / Христу последуя. / Безгласен яко агнец был еси, / егоже глас пробуждаше от сна греховнаго. / Священнотаинниче Андрониче, // моли от страстований лютых сохранитися нам.
И ны́не, праздника или Богоро́дичен, глас то́йже:
Дево Всепетая:
НА ЛИТУРГИ́И
Блаже́нны от кано́на, пе́сни 3-я и 6-я.
Проки́мен, глас 7: Восхвалятся преподобнии во славе, // и возрадуются на ложах своих.
Стих: Воспойте господеви песнь нову:
Апо́стол ко евреем, зача́ло 334.
Аллилу́ия, глас 2: Священницы Твои облекутся в правду:
Ева́нгелие от Луки́, зача́ло 67.
Прича́стен: В па́мять ве́чную бу́дет пра́ведник:
Тропарь, глас 5:
Меч духовный взем, священномучениче, за Церковь и Отечество воинствовал еси; и духом пламенея, богомудре, любовь Христову стяжал еси. Жизнь убо временную ни во что вменив, в жертву себе принесл еси. Мы же, грешнии, молим тя, святителю Андрониче, неотступным буди ходатаем за нас пред Богом
Кондак, глас 4:
Якоже апостол славный Павел, простотою себе украсил еси; почестей и славы избегая, в чистоте пред Богом подвизался еси; архипастырство тяжкое пронесый, Небесному ныне Архиерею предстоиши.
Моли́тва
О священная главо, святый священномучениче Андрониче, архиереев удобрение и молитвенниче о земле нашей дивный! Ты, вся красная мира сего ни во что же вменивый, и, по слову Господню, душу твою за други твоя положивый, помози нам, в расслаблении сущим, и теплохладностию сердечною обдержимым! Укрепи расслабленная колена сердец наших и настави нас на путь покаяния и крестоношения. Напоивый землю нашу Пермскую честною твоею кровию, не остави нас сирых, чад твоих, буди нам заступник и ходатай пред Престолом Вседержителевым. Сугубый венец – святительский и мученический – от Господа приемый, укрепи нас пред лицем грядущих испытаний. Собери нас, расточенных, под единою главою – Христом, Коему слава, честь и поклонение подобает со Отцем и Святым Духом, ныне и в безконечные веки. Аминь.
Акафист Священномученику Андронику, архиепископу Пермскому и Кунгурскому
Кондак 1
Избранный ревнителю о Церкви и воине Христов, дивный защитниче земли нашея российския, мучением за веру житие твое увенчавый. Восхваляя явившего тя Господа, воспеваем ти со умилением: Радуйся, святителю Андрониче, Христовы Церкве велелепое украшение.
Икос 1
Ангелом Церкве нашея нареченный, за нее же живот свой положил еси, светло сияеши среди новомучеников российских. Мы же, зряще велия труды твоя и теплое предстательство за нас пред Господем, вопием ти тако:
Радуйся, Божиим избранием, священная главо;
радуйся, ратоборче о Христе добропобедный;
радуйся, горением духа прославленный;
радуйся, ко Господу в ризе белой представленный.
Радуйся, любовию к Церкви пламеневый;
радуйся, Отечество в сердце свое восприемый;
радуйся, ревностию твоею Богу угодивый;
радуйся, в подвизех и страданиих победивый.
Радуйся, святителю Андрониче, Христовы Церкве велелепое украшение.
Кондак 2
Видев чудную благодать Православия, издетска во храме Господнем приметатися возлюбил еси. И святынею церковною воспитанный, выну взывал еси: Аллилуиа.
Икос 2
Разумением словес Господних умудряясь, от юности твоея чистотою и благочестием запечатлелся еси. Духом ко Христу воспаряя, о горнем наипаче помышлял еси. В трудех убо телесных смиряясь, родителей своих почитал еси. Темже мы, постигая велие усердие твое о Господе, воспеваем:
Радуйся, измлада Христа возжелавый;
радуйся, града Небеснаго взыскавый;
радуйся, живот свой Христу посвятивый;
радуйся, Тому единому себе предавый.
Радуйся, похотений юности избегавый;
радуйся, целомудрие, яко сосуд драгий, пронесший;
радуйся, в доброделании благоухавый;
радуйся, богомыслисм освященный.
Радуйся, святителю Андрониче, Христовы Церкве велелепое украшение.
Кондак 3
Силою Божиею укрепляем, учению духовному изрядно прилежал еси; изначала во граде святем Ярославле, по летех немнозех в обители преподобнаго Сергия. Скудость во всем, яко жребий от Господа, со смирением претерпевая, с благодарностию взывал еси Богу: Аллилуиа.
Икос 3
Имея в делех ученических преуспеяние, молитвою теплою ко Христу подвизался еси. Со любовию к раце мощей преподобнаго прибегая, желанием иночества возгорелся еси. Сего ради во младости своей ангельский постриг прияв, к Богу единому рачение имел еси. Мы же, грешнии, зовем ти:
Радуйся, преподобным Сергием невидимо наставленный;
радуйся, от юности твоея иноче вдохновенный;
радуйся, подвижниче богобоязненный;
радуйся, молитвою и постом украшенный.
Радуйся, иночество, яко велий дар приемый;
радуйся, в усердии к Богу не оскудевавый;
радуйся, заповеди Того в сердцы своем написавый;
радуйся, Царства Небеснаго вожделевый.
Радуйся, святителю Андрониче, Христовы Церкве велелепое украшение.
Кондак 4
Бурею лютых скорбей претерпевая, житие твое свято скончал еси, веру велию сохранив. Сего ради и ныне, яко кадило благовонное, приносиши молитвы Жизнодавцу Богу, выну взывая Ему: Аллилуиа.
Икос 4
Слышав словес божественных премудрость, апостольский подвиг восприяти восхотел еси. Священнейшему Павлу соревнуя, язычников светом Христовым просвещал еси. Богу укрепляющу, вдал еси себе трудом непомерным. Дивящеся таковому твоему тщанию, воспеваем ти сице:
Радуйся, творец слова бывый;
радуйся, апостолом подражавый;
радуйся, алчущих правды ухлебивый;
радуйся, жаждущих напоивый.
Радуйся, сердце свое пастве отворивый;
радуйся, жертвы духовны Богу возносивый;
радуйся, ни единожды возроптавый;
радуйся, тяготы немощных на себе носивый.
Радуйся, святителю Андрониче, Христовы Церкве велелепое украшение.
Кондак 5
Божественным желанием горя, в страну японскую стопы твоя управил еси. Апостолу страны сея, святителю Николаю, усердно споспешествуя, Православие в земли чуждей утверждал еси, подвизая паству воспевати Богу: Аллилуиа.
Икос 5
Видя отпадение от Церкве людей японских, в вере неукорененных, любовию отеческою сих объял еси. В домы пасомых во всякий день входя, за Божия посланника принимаем был еси. Ты же, Царствия Небеснаго сподобившийся, услыши нас, поющих ти таковая:
Радуйся, во оружие света облекшийся;
радуйся, в благовестии труды многия положивый;
радуйся, подвигом добрым подвизавыйся;
радуйся, сонмы словом истины напитавый.
Радуйся, стези правы ногама своима прошедый;
радуйся, Христа пред людьми исповедавший;
радуйся, жития со святыми удостоенный.
Радуйся, святителю Андрониче, Христовы Церкве велелепое украшение.
Кондак 6
Проповедником богоносным яви тя Господь народу Своему. Служение безупречно совершая, высоко имя Христово пронесл еси, научая верных воспевати Богу: Аллилуиа.
Икос 6
Воссиял еси светло в земли Российстей, блаженне, егда течение в стране японстей скончавша святый град Тихвин прием тя архипастырем своим. И тамо вселившись, богомудре, преизлиха Христу работал еси, укрепляя себе молитвами пред чудотворною иконою Богоматере Тихвинскою, от паствы же благодарныя слышав:
Радуйся, во образ верующим представый;
радуйся, радость о Господе имеющий;
радуйся, всяк день благообразно ходящий;
радуйся, от чистого сердца паству свою возлюбивший.
Радуйся, от всякия неправды себе очистивший;
радуйся, умом искусным награжденный;
радуйся, дух премудрости получивший;
радуйся, слово истины право правящий.
Радуйся, святителю Андрониче, Христовы Церкве велелепое украшение.
Кондак 7
Хотение единое имел еси, богомудре, еже сохранитися от врагов и утвердитися Церкви Православней и Отечеству нашему. Сего ради и вдал еси себе подвигом достохвальным, да всяк живый воспоет Господу со умилением: Аллилуиа.
Икос 7
Новаго угодника Божия разумеша тя христоименитии людие земли пермския, егда на высокую кафедру святителя Стефана взошел еси, блаженне. И нас сподоби зрети святость твою богоприятную и достойно возглашати ти:
Радуйся, Господа в сердцы своем освятивый;
радуйся, плод богатый Церкви нашей принесый;
радуйся, Христову учению повиновавыйся;
радуйся сокровище себе на небесех скрывавый.
Радуйся, храмину свою на камени создавый;
радуйся, от благаго сокровища благое износивый;
радуйся, всего себе правде поработивый;
радуйся, узкими враты на небеса возшедый.
Радуйся, святителю Андрониче, Христовы Церкве велелепое украшение.
Кондак 8
Странствие земное преподобно совершил еси, священномучениче, молитве теплой предаваясь, скудость паче богатства возлюбив, отверзая щедрую руку твою лишенным. Обители иночестия устроящася тщанием твоим, да вси вернии вкупе быша воспевали неусыпно Богу: Аллилуиа.
Икос 8
Вся боголюбивая паства твоя, святителю, видяше тя, яко ангела светла, усердно посещающа пределы архипастырства своего, славу земную ни во что вменивша, простоту же наипаче возлюбивша, апостольскою ревностию пламенеюща, от млада до велика всех ко Христу зовуща. Темже ублажаем тя, дивна Христова труженика:
Радуйся, стадо Божие усердно посещавый;
радуйся, ни единаго от паствы отяготивый;
радуйся, ни сребра, ни злата стяжавый;
радуйся, нищетою Христовою обогативыйся.
Радуйся, служение беспорочно совершивый;
радуйся, от всякия скверны себе очистивый;
радуйся, от плотских похотей огребавыйся;
радуйся, иноческаго духа не угасивый.
Радуйся, святителю Андрониче, Христовы Церкве велелепое украшение.
Кондак 9
Всякое естество ангельское возрадовася, видя тя ко Престолу Зиждителеву возносима. Тамо и ныне молишися, святителю, о нас неустанно, воспевая Богу немолчными усты: Аллилуиа.
Икос 9
Витии многовещании недоумеют изглаголати веру и терпение святых. И ты, избранниче Христов, всего себе Спасителю предавая, пред кончиною твоею от скорби к скорби шествовал еси, упованием на Господа возрастая. Темже достоин еси песнь слышати сию:
Радуйся, во Христа облекийся;
радуйся, о Господе до смерти претерпевый;
радуйся, воле Божией до конца повиновавыйся;
радуйся, смиренниче велий, Спасителем вознесенный.
Радуйся, искушение веры своея приемый;
радуйся, троическим желанием освященный;
радуйся, Отца Небеснаго прославивый;
радуйся, мзду совершенну от Бога получивый.
Радуйся, святителю Андрониче, Христовы Церкве велелепое украшение.
Кондак 10
Спасительное иго Христово подъяв, от силы в силу восходил еси. Грядущее, яко настоящее постигая, к покаянию всех призывал еси, с чистым сердцем воспевая Богу: Аллилуиа.
Икос 10
Стено Православия и лика святительскаго похвало, на Соборе Церковнем сугубым поборником истины обрелся еси. Сего ради огнем пылающим тя нарекоша. Мы же, недостойнии, приносим ти песнь сию:
Радуйся, яко добрый строитель Благодати Божия, служивый;
радуйся, яко един от древних боголюбием вооруживыйся;
радуйся, душу свою во благия дела предавый;
радуйся, милосердия исполненный.
Радуйся, горение духа своего умноживый;
радуйся, страсти различныя им попаливый;
радуйся, для всех грехов умерый;
радуйся, в радость Господню возведенный.
Радуйся, святителю Андрониче, Христовы Церкве велелепое украшение.
Кондак 11
Пение благоговейное подобает приносити ти, блаженне, зане и ныне печалуешися о Церкви Православней, о земли нашей Российстей, да всяк просвещенный истиною достойно воззовет Богу: Аллилуиа.
Икос 11
Светоподательна светильника тя суща, восхотеша врази разлучити с паствою твоею, низвести с кафедры святителя Стефана. Ты же, беззлобия ревнителю, о вразех молился еси. Сего ради, дивящеся терпению твоему богоприятному, воспеваем ти таковая:
Радуйся, преизлиха долготерпевый;
радуйся, гонивших тя благословивый;
радуйся, безбожных много обличавый;
радуйся, уста львовы заградивый.
Радуйся, с кротостию противныя наставлявший;
радуйся, в скорбех о Господе возмогавший;
радуйся, исповедником Христовым нареченный;
радуйся, в день посещения Бога прославивший.
Радуйся, святителю Андрониче, Христовы Церкве велелепое украшение.
Кондак 12
Благодать дивную приял еси от Бога, святителю Андрониче: лютыя скорби со смирением претерпевати, заблуждшия пути Христову наставляти, верным рабом Господним и в обстояниих быти, воспевающим Ему: Аллилуиа.
Икос 12
Поюще твою чудную любовь о Христе, величаем тя, блаженне, яко благосердаго предстателя о нас пред Господем и возлагашаем ти сице:
Радуйся, яко ученицы Христовы, гонениям повергавыйся;
радуйся, мыслями о страданиих вооруживыйся;
радуйся, убивающих тело не убоявыйся;
радуйся, любовию совершенною страх изгонивый.
Радуйся, яко воин Христов, злопострадавый;
радуйся, душу свою ради Господа погубивый;
радуйся, яко овца посреде волков, посланный;
радуйся, в покой Божий восхищенный.
Радуйся, святителю Андрониче, Христовы Церкве велелепое украшение.
Кондак 13
О, всехвальный исповедниче Христов и страдальче, святителю благомощный Андрониче! Приими пение наше всеумиленное, приносимое из сокрушенных сердец, и умоли Всевышняго милостиво внимати покаянным нашим молитвам, да, очищеннии и совершеннии, вкупе с тобою воспоем Богу в Царствии Славы: Аллилуиа.
Сей кондак глаголи трижды, посем Икос 1 и Кондак 1.
