Гимнография сщмчч. Прокопия, архиеп. Херсонского, Иоанна Скадовского
Служба свщмч. Прокопию
НА ВЕЛИЦЕЙ ВЕЧЕРНИ
Стихиры, гл.6
Прехвальнии новомученицы и исповедницы Русстии,/ восхваляем вы с любовию,/ вас бо не потопила вода безверия, / ни буря ярости беззакония,/ ни ветры ересей погибельных,/ но Духом Святым просвещеннии,/ яко жертвы непорочныя Царю Славы принесостеся./ Емуже молитеся о душах наших.
Прокопие священномучениче,/ в лике новомученик прославленный,/ гласом немолчным паству наставлял еси,/ от волков хищных и наемник лукавых защищал еси,/ душу твою полагая за овцы, яко пастырь добрый./ И ныне Христу молися,/ даровати душам нашим мир и велию милость.
Всехвальне Прокопие новомучениче,/ за чистоту души твоея,/ увенча тя Владыка венцем славы вечныя,/ прияв твоя страдания и смерть,/ яко жертву всесовершенну./ Темже и во светлостех небесных ныне ликовствуеши,/ Христу молящеся, / о спасении тя призывающих.
Слава, глас 4:
Отрасле благочестиваго рода,/ Дарами Святаго Духа преизобильно украшенный,/ служителю Христов Прокопие,/ на ниве Господней потрудился еси,/ плод сторицею во ученицех принесл еси./ Ты бо молитвою недуги душевныя и телесныя исцелял еси,/ Прокопие, исповедниче,/ и богодухновенными возгремел еси глаголы/ сораспятися призывая Христу,/ и яве образ тебе самаго предлагая.
И ныне, Богородичен, глас тойже:
Иже Тебе ради богоотец пророк Давид / песненно о Тебе провозгласи, величия тебе Сотворшему: / предста Царица одесную Тебе. / Тя бо Матерь, Ходатаицу живота показа, / без отца из Тебе вочеловечитися Благоволивый Бог: / да Свой паки обновит образ, истлевший страстьми, / и заблуждшее горохищное обрет овча, / на рамо восприим, к Отцу принесет, / и Своему хотению, / с Небесными соединит Силами, / и спасет, Богородице, / мир, Христос имеяй велию и богатую милость.
Вход. Прокимен дне. И чтения 3:
Деян. Зач. 10;
Деян. Зач. 11;
Деян. Зач. 12.
На литии стихиры, глас 1:
Прокопия священномученика,/ приидите вернии вси почтим,/ пеньми и песньми духовными,/ сей бо мужеством препоясася,/ исповедник был еси крепок;/ и мучения венец светел восприим благодатию,/ Христа прославил еси.
Цвете еси прекрасный, Прокопие богомудре,/ ты бо храмы душевныя чад своих созидая;/ егда же время приспе, душу твою за овцы положил еси,/ яко пастырь добрый и исповедник, кровь твою честную за Христа излиял еси;/ темже от Вседержителевы руки подвигов почесть прияв,/ украсился еси неувядаемаго цвета сиянием.
Слава: глас 8:
В небесный вшед Чертог/ багряницею украшен,/ и Троице с велиим сонмом новомучеников и исповедников ныне предстоиши,/ Прокопие многострадальне,/ мы же днесь, память твою светоносную совершающе,/ прославльшаго тя Господа величаем.
И ныне, Богородичен, глас тойже:
Приидите, людие, / ублажим Заступницу усердную рода христианскаго,/ се бо предстоит Престолу Царя славы/ и со слезами молит о земнем уделе Своем,/ с Неюже вкупе и собори святых новомучеников вопиют немолчно:/ Владыко Христе, спасе землю Русскую.
На стиховне, глас 4:
Исповедник и священномученик явился еси,/ Прокопие славне,/ во изгнании и темнице паству твою наставлял еси,/ и мучением сияя, ангелом уподобился еси./ Темже тя чтим и любовию празднуем / светоносную память твою.
Стих: Праведник яко финикс процветет, яко кедр, иже в Ливане, умножится.
Православныя веры ревнителю,/ богословия догматов и святоотеческаго учения проповедниче и исполнителю,/ и Божественныя службы пламенный служителю,/ плоды трудов твоих Христу принесл еси,/ Емуже и до смерти последовал еси./ Егоже ныне зриши в сиянии славы вечныя,/ священномучениче Прокопие.
Стих: Насаждении в дому Господни, во дворех Бога нашего процветут.
Не скорбети, но радоватися повелел еси чадом твоим,/ Прокопие блаженне,/ егда призва тя Господь последовати Ему страданием;/ аще гоним и истязуем бе,/ всего себе в руце Владычни предаяй,/ телесныя раны превозмогаяй / силою вседетельною Духа.
Слава, глас 8:
Кровию обагрив твою священную одежду,/ вшел еси во Святая Святых,/ свят быв, Прокопие славне,/ мужественно страдания и смерть за Христа приял еси,/ лесть и неистовство богоборческое поправше,/ врага победил еси;/ темже молим тя:/ укрепи молитвами твоими души наша.
И ныне, Богородичен, глас тойже:
Призри на моления Твоих раб, Всенепорочная,/ и всякия скорби избави землю Русскую,/ дом Твой нареченную/ и кровьми новомученик освященную./ Да не постыдимся, Владычице Державная,/ Тя призывающии,/ Ты бо еси православных помощь,/ радость и покров/ и спасение душ наших.
Тропарь, глас 1
Светильник всесветлый во граде Херсоне явился еси,/ пастырю добрый, священномучениче Прокопие./ Любовь и милосердие в сердцах верных насаждая,/ твердо стояти во исповедании веры Православныя призывал еси./ Темже со пресвитером Иоанном за Христа пострадал еси,/ и ныне купно с ним на небеси престолу Божию предстоя,/ моли Милостиваго Бога/ отечество наше в Православии и благочестии утвердити,/ мир Церкви даровати/ и душам нашим велию милость.
НА УТРЕНИ
По первом стихословии седален, глас 6:
Отвергнувся себе, ярем делания пастырскаго мужественно подъял еси, не убоявся прещения власти богоборческия, чадолюбиве отче и исповедниче Христов; ни гонения бо, ни темница не возможе отлучити тя от служения сего.
Слава и ныне, Богородичен:
О Всепетая Дево, Тя вемы Покров земли Русския, Тебе бо, грешнии, имамы предстательство, Тебе стяжахом в напастех спасение, Едину Всенепорочную.
По втором стихословии, седален, глас 2:
О благолепии храма и Божественныя службы благоговейнаго совершения ревнуя, наставник и учитель благославный многих явился еси, Прокопие достохвальне, к познанию неизреченныя сладости жизни вечныя возводя послушная чада твоя.
Слава и ныне, Богородичен, глас 2:
Молитвеннице Теплая, Заступнице рода христианскаго,/ приими моления раб Твоих/ и осени Русь Православную покровом Твоея благости.
По полиелеи седален, глас 2:
Светло торжествующе празднуем память твою,/ отче Прокопие священномучениче,/ и верою исполняемся,/ яко не оставляеши паствы твоея своим попечением;/ предстояще незримо со Ангелы и всеми святыми,/ моление сие приемлеши,/ предстательствуя о спасении поющих тя.
Слава и ныне, Богородичен, глас 2:
Молитвеннице Теплая, Заступнице рода христианскаго,/ приими моления раб Твоих/ и осени Русь Православную покровом Твоея благости.
Прокимен, глас 4:
Проидохом сквозе огнь и воду,/ и извел еси ны в покой.
Стих: Разжегл ны еси, якоже разжизается сребро.
Всякое дыхание:
Евангелие от Матфея, зачало 36.
По 50-м псалме стихира, глас 6:
Сосуд священ Духа Святаго ты был еси,/ от корене праведнаго плод совершен,/ Прокопие священномучениче,/ чада твоя любовию Христовою возлюбил еси,/ и за тех душу свою положил еси, взывая:/ Господи, ихже дал еси мне, сохранил есть,/ да не погибнут.
КАНОН СВЯТАГО, глас 2
Песнь 1
Ирмос: Грядите людие:
Престолу ныне предстоя Христову, яко архиерей и мученик преславный, Прокопие всечестне, приими молитвы наша с любовию тебе возсылаемыя.
Плод благославен древа праведнаго прозябл еси, избранниче Божий, от источника святости отеческия питаемь, подвигом исповедническим достойно трапезе райския принеслся еси.
Дар Богу, всеблаженне, себе самаго принесл еси, житием многотрудным и честным страданием, священномучениче Прокопие.
Богородичен: Бога без семени рождшая, паче ума человеча, Дево Пречистая и Мати; Егоже моли помиловати поющих Тя.
Песнь 3
Ирмос: Утверди нас в Тебе Господи:
Миром помазания духовнаго украшен, Прокопие славне, добре священствовал еси, жезлом веры отгоняя ересей ловитвы и сохраняя стадо словесное от волков губящих е.
Нощь отгнал еси суетства, богоглаголиве отче, блистании премудраго проповедания, и верных мысли просветил еси.
Возносимую презрел еси зиму безбожия, возлюбив учения святых отец догматы, теплотою Божественнаго Духа невредимо сердца чад твоих соблюл еси.
Богородичен: Утверждение буди и прибежище, и покров Дево Пречистая, верою к Тебе прибегающим, и любовию воспевающих Рождшагося из Тебе.
Седален, глас 3:
В незлобии Христу подражавый, истязания и раны от безбожных лютых кротко претерпел еси, Стефана первомученика гласом моляся за обидящих тя, Прокопие многострадальне.
Слава, и ныне, Богородичен, глас 3:
Не имамы инаго прибежища, разве Тебе, Богородице,/ Отечества нашего усердная Заступнице:/ всяк бо, почитаяй Тя, надежду обретает.
Песнь 4
Ирмос: Услышах, Господи, славное Твое смотрение:
Паству твою премудро наставляя, богословия поборник явился еси, священнодейственне путеводящь добродетельных, Прокопие, деяний.
Тайны горняго мира чрез участие в богослужении познавати учил еси, богомудре отче, прилеплятися же всем сердцем небесным покровителем нашим и тем приуготовитися вечности.
Утеснил еси нечестие, святче, пространством истиннаго благочестия, и пути в сие ведущия, показал еси, спасая души, потопляемыя прелести богоборчества водами.
Богородичен: Просвети, Пречистая, омраченную душу мою светом Твоим, яже Свет рождшая Един Ипостасный.
Песнь 5
Ирмос: Света Подателю:
На Древе Простершемуся волею подобяся, Егоже милосердию подражая, Евангельски молил еси: Отче Благий, ихже дал еси мне, сохрани, да никтоже от них погибе.
Смиряяся оскорбляемь, темницы и изгнания горечь претерпел еси, темже блаженную улучил еси, многострадальне, славу и светлость.
Душа твоя крепкая козни вражеская низложи, мрак неверия и лукавствия разгнася твердейшею верою твоею, Прокопие всехвальне, архиереев похвало.
Богородичен: Иже образ Ипостаси Отчи, из Тебе прият смешение Богородительнице, и истлевший образ прослави, и сего нова сотвори.
Песнь 6
Ирмос: В бездне греховней:
Падшаго естества возношение, Духом укрепляемь, поправ, мужественно облеклся еси багряницею нетления, Прокопие священномучениче: темже прославляемь Ангелы и человеки.
Кровию страдания, блаженне, освятил еси землю, духом же на Небеса возшед, присовокупися гласу святых новомучеников, воспевающих Святую Троицу.
Молитва святыя души твоея прията бысть, яко кадило, отче: в воню благоухания духовнаго, Возсиявшаго от Девы исповедуя.
Богородичен: Вземлющаго грехи всего мира, Христа заченши, Пречистая, не престай просящи грехов прощения воспевающим Тя.
Кондак, глас 4
Во святителех благочестно пожив,/ и мучения путь прошед,/ безбожия силу побеждая,/ поборник быв Херсонстей пастве, богомудре./ Темже тя почитающе, тако вопием/: от бед избави нас присно твоими мольбами,/ отче священномучениче Прокопие.
Икос
К высшему подвигу мученичества устремися, Прокопие преславне, яко всесожжение Божественное и жертва живая принеслся еси Спасу всех. Темже вопием ти: Радуйся, исповедническаго подвига сияние прославивый; радуйся, мученический крест во дни гонений на Церковь избравый. Радуйся, Христа распинаемаго паче жизни временныя возлюбивый; радуйся, темницу, страдания и смерть за Него претерпевый. Радуйся, паству Христову, вверенную тебе, от расхищения соблюдый; радуйся, и во изгнании сирых чад твоих не оставивый, пламенною молитвою от звероуловления тех оградив. Радуйся, со иереем Иоанном за веру Христову и смерть приявый. Радуйся, теплый предстателю наш пред Богом, отче священномучениче Прокопие.
Песнь 7
Ирмос: Образу златому:
Не поклонився, священномучениче, делом рук беззаконных, претерпе поношения, и заточение, и раны, чистоту веры Православныя непоколебимо исповедал еси.
Святых жития не токмо умом познавати учил еси, житием бо твоим и деяньми тех подвиги проповедуя, Божественным разумом души пасомых просвети.
Глагол твоих вещание и святоотеческих преданий сила обтече, богодухновенне отче, землю Русскую, иссохшую от зноя гонений и нечестия, напаяя сию Божественною благодатию.
Богородичен: Радосте скорбящих и отчаянных, Ты еси Мати Преблагая, Спаса рождшая рода нашего.
Песнь 8
Ирмос: В пещь огненную:
Ни темница, ни ярость мучителей, ни страдания, ни даже смерть не возмогли разлучити тя от любве Божия, но тою укрепляяся, воспевал еси: благословен Бог отец наших.
Возмогл еси Божиею вседетельною силою богоборческия прелести вселукавое мудрование, страстотерпче, победити, и венец нетленный от всех Владыки прияти, поя: благословен Бог отец наших.
Воистину блажен ты, Прокопие многострадальне, ибо сподобился еси соделатися общником страстей Христовых, себе самаго в дар Зиждителю принося, вопиял еси: благословен Бог отец наших.
Богородичен: Столп крепости тверд, и Хранительницу, и Заступницу стяжавше Тя верою поющии: благословен Бог отец наших.
Песнь 9
Ирмос: От Бога Бога Слова:
Возвышен явился еси страдании честными, приял еси венцы победы, священномучениче, и ныне в лике новомученик и исповедник Русских предстояще Божественному Престолу, радуешися вечною радостию.
Наставниче и молитвениче наш, отче Прокопие, со иереем Иоанном, сподвижником твоим, и новомученики прииди, стани с нами; днесь бо празднуем честную память вашу.
Верою просящия тя спасай от всякия беды, Прокопие блаженне, во Отечествии Небеснем пребываеши бо присно, яко мученик непобедим.
Богородичен: Ты Едина Богу всяческая мудростию создавшему, Мати позналася еси Неискусобрачная, Дево Пречистая. Темже Тя Ангели и человецы песньми величают.
Светилен:
Одежды твоя, Прокопие досточудне, кровию обагришася, страданием светло просветися лик твой, темже Христос венцем мученическим увенча тя.
Слава, и ныне, Богородичен:
О Тебе мы хвалимся, Богородительнице,/ и к Богу Тя имамы Предстательство,/ простри руку Твою необоримую/ и сокруши враги Церкве Русския.
На хвалитех, стихиры на 4, глас 4:
Отче всемудре Прокопие,/ сквозе бурю безумнаго неистовства / к тихому пристанищу таинств церковных / всепобеждающею Божественною силою / Христово стадо, вверенное ти, направил еси./ Темже воспевающе, молим тя:/ помози и нам не погибнути / во страстей пучине.
Кто изглаголет страдания твоя,/ егда виде Церковь Святую попираему,/ чада же ея расхищаемии,/ тогда яко светильник Божественный и подражатель святых, / на крове проповеда,/ еже слыша в сердце Духу глаголему;/ страдальческое избрал еси житие,/ священства одежду обагрив кровию,/ мучениче непобедиме Прокопие.
Предстателю Церкве Русския,/ священномучениче Прокопие всехвальне,/ выну зряй Лице Господа на Небесех,/ не презри ни единаго/ от малых чад ея,/ но радостно покаяние наше приими/ и моли присно/ сыновом русским спастися.
Слава, глас 8:
Срадуйтеся нам Ангельския чины и святии вси,/ днесь бо празднуем память священномученика Прокопия,/ кровию Царствия вечнаго достигшаго,/ веруем, яко духом вкупе с нами пребывая,/ моление сие приимет и Христу принесет,/ ходатайствуя о спасении нашем.
И ныне, глас тойже:
О, преславнаго чудесе!/ Небесе и земли Царица,/ от святых сродников наших умоляемая, до ныне землю Русскую покрывает/ и лика Своего изображении милостиво обогащает./ О Владычице Державная!/ Не престани и на будущее время/ во утверждение на Руси Православия/ милости и чудеся изливати до века. Аминь.
НА ЛИТУРГИИ
Прокимен, глас 7:
Честна пред Господем/ смерть преподобных Его.
Стих: Что воздам Господеви о всех, яже воздаде ми.
Апостол, к Римляном, зачало 99
Аллилуия, глас 6:
Священницы Твои облекутся в правду и преподобнии Твои возрадуются.
Стих: Бог нам прибежище и сила, Помощник в скорбех, обретших ны зело.
Евангелие, от Луки, зачало 106.
Причастен:
В память вечную будет праведник.
Тропарь, гл. 1
Светильник всесветлый во граде Херсоне явился еси, пастырю добрый, священномучениче Прокопие. Любовь и милосердие в сердцах верных насаждая, твердо стояти во исповедании веры Православныя призывал еси. Темже со пресвитером Иоанном за Христа пострадал еси, и ныне купно с ним на небеси престолу Божию предстоя, моли Милостиваго Бога отечество наше в Православии и благочестии утвердити, мир Церкви даровати и душам нашим велию милость.
Кондак, гл. 4
Во святителях благочестно пожив, и мучения путь прошед, безбожия силу побеждая, поборник быв Херсонстей пастве, богомудре. Темже тя почитающе, тако вопием ти: от бед избави нас присно твоими мольбами, отче священномучениче Прокопие.
Молитва
О, преславный священномучениче Прокопие, страстотерпче непреодоленный, Архиерею Божий и о Церкви Херсонстей ходатаю! Призри на моление нас, почитающих святую память твою и испроси нам у Христа Бога прощения грехов наших, да не до конца прогневается на нас Господь: согрешихом бо и недостойнии явихомся милосердия Божия. Моли о нас Господа, да ниспослет мир на грады и веси наша, да избавит нас от нашествия иноплеменников, междоусобныя брани и всяких раздоров, и нестроений. Утверди, священномучениче всеблаженне, веру и благочестие во всех нас, и да избавит нас Господь от ересей, расколов и всякаго суеверия. О милостивый наш предстателю! Молися за ны ко Господу, да сохранит нас от глада и всяких болезней, и да подаст вся на потребу человеком полезная. Наипаче же да сподобимся молитвами твоими Небеснаго Царствия Христа Бога нашего, Емуже честь и поклонение подобает со Безначальным Его Отцем и Пресвятым Духом, ныне и присно и во веки веков. Аминь.
Акафист священномученику Прокопию Архиепископу Херсонскому
Кондак 1
Избранному на жертвенное служение Богу, ныне у Престола Вседержителя предстоящему священномученику Прокопию благодарственное приносим пение. Ты же, яко имеяй велие дерзновение ко Господу, ограждай нас от всяких зол и обстояний молитвами твоими, да зовем ти: Радуйся, священномучениче Прокопие, Херсонскаго края светильниче неугасимый.
Икос 1
Ангели на небеси возрадовашася зело рождшемуся тебе, святителю Прокопие, в праздник Рождества Христова. Ты бо младенческим гласом восхвалив Богомладенца Иисуса, верно послужил еси Ему ангельским житием своим. Мы же, видя тя, яко избран сосуд благодати Божественныя, вопием ти: Радуйся, в день Рождества Иисусова преславно рожденный. Радуйся, со ангельскими чинми Христа восхваляяй. Радуйся, Духа Святаго честное вместилище. Радуйся, законов Божиих благое хранилище. Радуйся, правде Христовой усердно послуживый. Радуйся, службою своею Христа ублаживый. Радуйся, житием своим ангелом подражавый. Радуйся, во Царствии Божии награду стяжавый. Радуйся, священномучениче Прокопие, Херсонскаго края светильниче неугасимый.
Кондак 2
Видя велие усердие к познанию богословия, дарова тебе Господь, отче Прокопие, разумети Писания Божественная. Ты же, в сердце своем словеса Христа нося: "Иже сотворит и научит, сей велий наречется в Царствии Небеснем", потщался еси поученьми твоими и примером добрым люди в вере Христовой утвердити, научая непрестанно пети: Аллилуиа.
Икос 2
Разумом, данным тебе от Бога, уразумел еси добре, блаженне Прокопие, яко в мире неудобь обрящеши спасение. Сего ради брака уклонился еси, единому Господеви благоугоджати хотя. Мы же, умиляяся иноческим подвигом твоим, яко ангелу поем ти: Радуйся, явивыйся ангельским силам светлое уподобление. Радуйся, пребывати во святости имевый велие произволение. Радуйся, душу свою от соблазнов усердно хранивый. Радуйся, в сердце своем Иисуса с любовию носивый. Радуйся, чистоту в житии твоем многоскорбнем всегда соблюдавый. Радуйся, помыслы суетныя и неполезныя далече от себе отгнавый. Радуйся, верность Христу присно сохранявый. Радуйся, душу свою от пристрастий земных удалявый. Радуйся, священномучениче Прокопие, Херсонскаго края светильниче неугасимый.
Кондак 3
Силу Вышний дарова тебе на служение в Церкви, священномучениче Прокопие, ты бо добре потрудился еси в земли Томстей и Иркутстей, и многия подвиги тамо подъял еси, непрестанно помощи у Господа прося, и воспевая Ему: Аллилуиа.
Икос 3
Имущи душу твою присно к Богу любовию пламенеющую, сан священства приял еси, святе Прокопие, и помощию Божиею вспомоществуемый, усердно служил еси алтарю Господню. Мы же, прославляюще подвиги твоя, похвальная восписуем ти: Радуйся, пред алтарем Господним Богу обрученный. Радуйся, во священстве благодатию дивно почтенный. Радуйся, священством твоим Христу славно угодивый. Радуйся, вся службы со страхом и благоговением совершавый. Радуйся, пред всеми Христа исповедавый. Радуйся, Царствие Небесное от Него наследовавый. Радуйся, о душах наших молитвенниче усердный. Радуйся, на суде Господнем защитниче наш верный. Радуйся, священномучениче Прокопие, Херсонскаго края светильниче неугасимый.
Кондак 4
Буря ярости воздвижеся на Церковь Христову, егда безбожницы восхотеша разрушити ю. Ты же, святителю Христов, Архиепископом в земли Херсонстей от Господа поставлен был еси, да пасеши словесное стадо, от хищных волков сохраняя е, с ним же благодарственно взывал еси укрепляющему тя Христу Богу: Аллилуиа.
Икос 4
Слышаще и видяще православнии людие равноангельное житие твое, священномучениче Прокопие, притекаху к тебе послушати словеса твоя, да водимии тобою, праведнаго жития достигнут. Мы же, видяще тя украшена смиренномудрием и кротостию Христовою, с радостию зовем ти: Радуйся, Апостолом на небеси сопричастниче. Радуйся, Христовым святителем сопрестольниче. Радуйся, благодетелю наш, предстательством твоим Царствия Небеснаго нас сподобляющий. Радуйся, молитвами твоими от ада преисподняго души наша спасающий. Радуйся, молящийся о всех, в помощь тя призывающих. Радуйся, слышащий всех, к тебе с надеждою взывающих. Радуйся, паству Херсонскую, в гонениях сущую, верною Христу сохранивый. Радуйся, стаду своему словесному рассеятися не попустивый. Радуйся, священномучениче Прокопие, Херсонскаго края светильниче неугасимый.
Кондак 5
Боготечную звезду яви тя Господь граду Херсону, святителю Прокопие, ты бо поучении своими паству твою наставлял еси, да вси единым серцем и едиными усты взывают Спасителю Богу: Аллилуиа.
Икос 5
Видя, священномучениче Христов, како врази Церкви Православныя на агнцы твоя ополчахуся, вся силы своя полагал еси да ни един не отпадет от стада твоего. Сего ради и пострадал еси, яко добрый пастырь, душу свою за словесныя овцы полагая. Сего ради приими от нас сие усердное славословие: Радуйся, всех противников на пути к Царствию Небесному победивый. Радуйся, блаженный небожителю, вечных благ наслаждаяйся. Радуйся, Самаго Христа Бога вождем к Небесному Отечеству имевый. Радуйся, светильниче пресветлый на Церковней свещнице поставленный. Радуйся, твердый столпе Православия, имже Святая Церковь красуется и укрепляется. Радуйся, тобою бо слово Христово: "Претерпевый до конца, той спасен будет" исполняется. Радуйся, за терпение твое нетленный венец на небеси прияти сподобивыйся. Радуйся, благами небесными за скорби земныя утешающийся. Радуйся, священномучениче Прокопие, Херсонскаго края светильниче неугасимый.
Кондак 6
Проповедником воли Божией был еси, священномучениче Прокопие, егда вместо смерти тебе предстоящия на Соловки сослан был еси. Ты же, яко ангец кроткий, страдания вся за Христа беззлобно претерпевал еси, воспевая усердно Богу: Аллилуиа.
Икос 6
Возсиял еси, яко лучезарное светило, горением любве твоея ко Господу, архиерею Божий, тако и чада твоя духовная любити Господа и уповати на Него научал еси. Приими же и от наших любящих сердец похвалы сия: Радуйся, праведному Иову усердный подражателю. Радуйся, о нас пред Богом верный предстателю. Радуйся, терпением своим мучителей удививый. Радуйся, праведным житием твоим многих ко Господу обративый. Радуйся, пред всеми небоязненно Христа исповедавый. Радуйся, Царствие Небесное верностию Христу унаследовавый. Радуйся, ныне на небеси Бога о нас умоляющий. Радуйся, яко искусный кормчий, к вечному блаженству нас приводящий. Радуйся, священномучениче Прокопие, Херсонскаго края светильниче неугасимый.
Кондак 7
Хотяще вечное спасение получити, всеблаженне Прокопие, Господу нашему во всем подражал еси, скорбным путем к Царствию Небесному шествуя: взем иго Христово на себе и смирению и кротости научивыйся у Него, обрел еси покой души своей, присно зовущей Творцу: Аллилуиа.
Икос 7
Новое гонение воздвиже на тя, священномучениче славне, враг рода человеческаго, егда паки гонители Церкви удалиша тя от паствы твоея на Соловки и по сем на Урал. Ты же, многия скорби перенеся в краях дальних, присно в молитвах благодарил еси за вся Благодетеля Бога. Мы же, похваляя страдания твоя, взываем ти: Радуйся, вся искушения в житии твоем добре претерпевый. Радуйся, купно со Христом на Голгофу свою твердо шедый. Радуйся, голод и мраз, и иныя страдания до конца мужественно претерпевый. Радуйся, присно пребывати со Христом восхотевый. Радуйся, светлою свещею во мраце греховнем светящий. Радуйся, яко светильник в Церкви Православней горящий. Радуйся, терпению нас научающий. Радуйся, всех от погибели адския молитвами твоими спасающий. Радуйся, священномучениче Прокопие, Херсонскаго края светильниче неугасимый.
Кондак 8
Странником и пришельцем в мире сем был еси, святе Прокопие. Господь же, любящия Его любяй, тако устрои, яко да и в заточении Службу повершати возможеши, и сим многих утешиши, вразумиши и наставиши, благодаря за вся благодеяния Христа Бога, и воспевая Ему усердно: Аллилуиа.
Икос 8
Всем сердцем своим и душею возносивыйся ко Господу, егда в заточении службы церковныя совершал еси, святителю Прокопие. Мы же, за таковое твое твердое исповедание Православныя веры ублажая тя, возсылаем ти усердное хваление: Радуйся, добрый пастырю, ищущих спасения. Радуйся, образе кротости, смиренномудрия и терпения. Радуйся, гонящим тя, вся прощавый. Радуйся, паству Херсонскую в тяжких лишениях не оставивый. Радуйся, и ныне со усердием ей помогаяй. Радуйся, преодолевати вся препоны вражия ю научаяй. Радуйся, верный о нас пред Богом заступниче. Радуйся, теплый о нас пред Спасителем нашим молитвенниче. Радуйся, священномучениче Прокопие, Херсонскаго края светильниче неугасимый.
Кондак 9
Всякое естество удивися твоему, священномучениче Прокопие, славному подвигу: ты бо, плоть распяв со страстьми и похотьми, молитвою неустанно отгонял еси вся напасти и искушения, от духов лукавых исходящия. Мы же, тобою научаеми стойко претерпевати вся лишения Христа ради, с тобою купно взываем Ему: Аллилуиа.
Икос 9
Витийства человек, не ведавших истины веры Православныя, словом Божиим отметал еси, досточудне, увещавая паству свою твердо стояти во Православии, не внимая словесем, восстающих на Церковь Божию. Сего ради, хвалим тя за таковое твое попечение о спасении душ наших пении сими: Радуйся, Церкви Христовой светило светозарное. Радуйся, пастве твоей заступление предивное. Радуйся, возвеселивый ангельский чин твоим за Христа страданием. Радуйся, по Бозе и Богородице все наше упование. Радуйся, тесным путем к Дому Божию шедый. Радуйся, благословение Отца Небеснаго наследивый. Радуйся, Божия милости нам щедрый подателю. Радуйся, пред Господем наш верный предстателю. Радуйся, священномучениче Прокопие, Херсонскаго края светильниче неугасимый.
Кондак 10
Спастися хотящим и Небеснаго Царствия взыскующим вспомоществовал еси, отче предивный, верныя чада твоя присно утешая. Ты бо Херсонскою паствою мудро управлял еси и в заточении далече сущи, и даже до мученическия кончины твоя не оставил еси ю, присно наставляя всех на путь спасения и научая пети: Аллилуиа.
Икос 10
Стена и прибежище был еси чадом твоим, святителю Прокопие, ограждая их молитвами своими от всех наветов вражиих. Ныне же, прославляя святую память твою, усердно молим тя: предстоя Престолу Творца всяческих, защищай присно и нас от всякия скорби и напасти, да умиленно поем ти: Радуйся, един многоценный бисер, иже есть Христос, стяжавый. Радуйся, Его ради вся блага мира сего презревый. Радуйся, представши Престолу Господню, поклонитися Ему сподобивыйся. Радуйся, на Небесех с радостию вселивыйся. Радуйся, Ангелом и всем святым во Царствии Божии сожителю. Радуйся, града Херсона небесный хранителю. Радуйся, пред Отцем Небесным Христом исповеданный. Радуйся, на небеси надеждою вечнаго спасения обрадованный. Радуйся, священномучениче Прокопие, Херсонскаго края светильниче неугасимый.
Кондак 11
Пение ангельское всеумиленно принося в души твоей, священномучениче Прокопие, мужественно на смерть со Иоанном пресвитером шествовал еси. Мы же, взирая на подвиг ваш и мученическую кончину вашу, взываем ко Господу: Аллилуиа.
Икос 11
Свет небесный осия души ваша, священномученицы святии Прокопие и Иоанне, егда сия вознесени быша святыми Ангелы ко Престолу Господню. Сего ради, немощный глас наш ко ангельскому пению совокупив, восхваляем мученическую кончину вашу и взываем: Радуйтеся, в невечернем дни Царствия Божия водвореннии. Радуйтеся, славою Божиею на небесех осененнии. Радуйтеся, пред Христом Иисусом приснии наши заступницы. Радуйтеся, веры Православныя неустрашимии исповедницы. Радуйтеся, во Царствии Небеснем нетленную часть улучившии. Радуйтеся, от Искупителя вечную мзду приимшии. Радуйтеся, с небеси на нас присно взирающии. Радуйтеся, на спасения стезю нас наставляющии. Радуйся, священномучениче Прокопие, Херсонскаго края светильниче неугасимый.
Кондак 12
Благодатию от Бога почтенный, святителю отче Прокопие, сердце твое сокрушенно и смиренно соблюл еси. Сего ради молим тя, Архипастырю наш, научи и нас, чад твоих, смиренным сердцем и сокрушенною душею купно с тобою славити Бога песнию: Аллилуиа.
Икос 12
Поюще твое ангелоподобное житие и восхваляя мученическую кончину твою, Прокопие всеблаженне, благодарим щедраго и милостиваго Бога, иже дал есть нам таковаго крепкаго покровителя и защитника граду нашему. Сего ради, уповая на велию помощь твою, с надеждою взываем ти: Радуйся, града Херсона милостивый покровителю. Радуйся, паствы Херсонския мудрый святителю. Радуйся, верныя люди от врагов защищаяй. Радуйся, всех от болезней и скорбей присно избавляяй. Радуйся, краю Херсонскому присный предстателю. Радуйся, благ вечных и временных нам от Бога подателю. Радуйся, словесному стаду твоему добрый пастырю. Радуйся, добрый и благий наш Архипастырю. Радуйся, священномучениче Прокопие, Херсонскаго края светильниче неугасимый.
Кондак 13
О преславный угодниче Божий, священномучениче Прокопие, светлый светильниче земли Херсонския! Ныне, восхваляя святую память твою, молим тя: приими от нас малое сие моление наше и умоли Господа, да милостив будет к немощем нашим и, простив нам всякое прегрешение вольное же и невольное, сподобит нас на Страшнем Суде одесную Его стати и купно с тобою и со всеми святыми в радости нескончаемей воспевати: Аллилуиа. Аллилуиа. Аллилуиа.
Сей кондак читается трижды. Затем икос 1 и кондак 1.
