Гимнография свт. Агафангела исп., митр. Ярославского (1928)
Служба сщмч. Агафангелу исповеднику, митрополиту Ярославскому
НА ВЕЛИЦЕЙ ВЕЧЕРНИ
На Господи, воззвах: стихиры, глас 8.
Подобен: О преславнаго чудесе:
Святителю отче Агафангеле, / ты от утробы матерния / на служение Господу избран быв, / в день Воздвижения / Животворящаго Креста Господня родися / и крест свой взем, усердно Христу последовал еси, / души своея отвергнувся Его ради, // темже соблюл еси ю в живот вечный.
Святителю отче Агафангеле, / ты яко дуга радостотворная явился еси, / от востока до запада / землю Русскую озаряя / молитвами слезными и трудами Богоугодными, / проповеданием Слова Божия, милосердием и смирением, / и яко сотворивый и научивый // велий в Царствии Небеснем нареклся еси.
Святителю отче Агафангеле, / страдания, яко угль горящ от олтаря Господня, / очистиша богоглаголивая твоя уста, / темже предания церковная попирающия твердо обличал еси, / разумея в последняя их, / како погибоша за беззаконие свое, / и яко соние востающаго // Господь в Церкви Русской образ их уничижил есть.
Святителю отче Агафангеле, / Христово был еси благоухание, / воню разума Его являя в земли Русской, / дело творя благовестника / и злостражда, яко добр воин Христов, / имене Его ради заточения и изгнания, поношения и болезни терпя, // уповая, яко труд твой несть тощ пред Господем.
Слава, глас тойже:
Егда Православная Церковь Русская / богоборческими гонении люте обуревашася, / святитель Агафангел страж неусыпный тоя явися, / по вся дни произволением умирая за Христа, / темже жизнь вечную наследова, / мощи своя граду Ярославлю во утверждение даровав, / и ныне в сонме новомученик Российских на Небесех ликует, // тепле моляся о душах наших.
И ныне, догматик: Царь Небесный:
Вход. Прокимен дне.
Чтения три исповеднику:
Премудрости Соломоновы чтение: Похваляему праведнику:
Премудрости Соломоновы чтение: Праведницы во веки живут:
Премудрости Соломоновы чтение: Праведник, аще постигнет скончатися:
На литии стихира храма и святаго стихиры, глас 1:
Таков нам подобаше архиерей, / преподобен, незлобив, / домоправитель верный и мудрый дома Божия, / пастырь добрый, / душу свою за овцы Христовы полагающий, / иже не убояся убивающих тело, / души же не могущих убити, / яков ты явился еси, святителю Агафангеле, // образ себе самаго верным чадом Церкве Русския подавая.
Супружницы и сына во единочасии лишився, / Божие посещение уразумел еси, святителю Агафангеле, / и призвание на путь монашеский, / таже и дар слова от Господа восприяв, / сторицею той проповеданием и учением преумножил еси / и светильник целомудрия елеем милости просветив, // с мудрыми девами в Чертог Небесный вшел еси.
Слава, глас 6.
Подобен: Все отложше:
Стойте и держите / предания церковная, — / неленостно поучал еси паству, / святителю Агафангеле, / егда же в Ярославскую обитель Спасову / безбожными заключен был еси, / вернии людие на криле церковнем собирашася, / да поне издалеча / видением лика твоего утешатся, / темже и ныне предстани в помощь нам, // празднующим любовию святую память твою.
И ныне, Богородичен, глас и подобен тойже:
Возвеличим Тя вси, / Пренепорочную / Матерь Бога нашего, / Юже освяти Дух Пресвятый. / Ты бо еси, Богородице, / оружие наше и стена / и Святой Руси Заступнице, / к Тебе ныне прибегаем, / Тя на молитву призываем, / да избавиши нас // от врагов наших.
На стиховне стихиры, глас 2:
Приидите, празднолюбцы, / воспоим святителя Агафангела достоблаженнаго, / учителей печать и страдальцев единонравна, / Христа ради вся во уметы вменившаго, / велелепием исповедания Церковь Русскую украсившаго, // ныне же посреде Церкви преподобных Бога воспевающаго.
Стих: Ты иерей во век / по чину Мелхиседекову.
Приидите, архиереи и священницы, / святителя Господня песньми почтим, / той бо Жертве Безкровней исповеданием уподобися, / еяже приносити издетска слезно возжеле / во умилостивление за грехи почивших в вере, // в памяти смертней поучаяся.
Стих: Исповемся Тебе, Господи / всем сердцем моим
Приидите, любострадальцы, / прославим Агафангела освященнаго, / страсти по Христе возлюбившаго, / тако во исповедании Лице Его предварявшаго: / яко аз на раны готов Тебе ради и аще бы восхотел еси жертвы, // дал бых убо, Господи.
Слава, глас 6:
Возлюбил еси Бога паче живота / и ближняго своего, яко себе, / во главу угла благо Церкви Святей поставляя, / предания святых отец неизменно хранити повелевая, / сквозе огнь и воду страданий по Христе прошел еси / и ныне вечнаго покоя наслаждаешися, // святителю Агафангеле, отче наш.
И ныне, Богородичен: Творец и Избавитель:
На благословении хлебов тропарь, глас 2:
По вся дни умерщвляем был еси Бога ради, / святителю и исповедниче Христов Агафангеле, / во время безбожных гонений лютых / попечение о Церкви Русской от Святейшаго Патриарха Тихона прияв, / коварныя козни слуг диавола разорил еси / и корабль Церковный мудре управил еси / силою возлюбившаго тя Господа, // Егоже моли даровати нам мир и велию милость.
НА УТРЕНИ
На Бог Господь: тропарь тойже.
По 1-м стихословии седален, глас 7:
Приимше вся оружия Божия, / во плоти ходяще, не по плоти воинствовал еси / и благодатию Божиею устоял еси во время гонений лютых на Церковь Русскую, / святителю отче Агафангеле, / покры бо тя в тайне Лица Своего Господь, // Егоже моли помиловати нас в День Судный.
Слава, и ныне, Богородичен:
Предстательнице теплая и Заступнице христиан еси, Богородице Всепетая, / темже со святыми всеми земли Русския / Сына Твоего и Бога моли // обрести нам велию милость.
По 2-м стихословии седален, глас 2:
В грозное время брани и смуты / воинов Российских во имя Христово призвал еси / верно Отечеству служити, / веру православную незыблемо хранити / и живот свой полагати за други своя, / святителю Христов Агафангеле, // сам же молитвою сугубою за тех подвизался еси.
Слава, и ныне, Богородичен:
Воистинну Богородицу Тя исповедуем, Владычице, / ибо Бога неизреченно родила еси, разоршаго Крестом смерть / и к Себе привлекшаго святых соборы, // с нимиже моли Его спасти землю Русскую, яко та есть Дом Твой.
Величание:
Величаем тя, святителю отче Агафангеле, / и чтим за исповедание Христово страдания твоя, // яже во утверждение на Руси Православия претерпел еси.
Псалом избранный:
1 лик. Священницы Твои облекутся правдою, и преподобнии Твои возрадуются. (Пс. 131:9)
2 лик. Повем имя Твое братии моей, посреде Церкве воспою Тя. (Пс. 21:23)
1. Приидите, чада, послушайте мене, страху Господню научу вас. (Пс. 33:12)
2. Возненавидех церковь лукавнующих, и с нечестивыми не сяду. (Пс. 26:5)
1. Яко ревность дому Твоего снеде мя, и поношения поносящих Ти нападоша на мя. (Пс. 68:15)
2. За словеса устен Твоих аз сохраних пути жестоки. (Пс. 6:4)
1. Искусил мя еси, и не обретеся во мне неправда. (Пс. 16:3)
2. Правдою Твоею избави мя и изми мя. (Пс. 30:2)
1. Погна враг душу мою, посадил мя есть в темных. (Пс. 142:3)
2. Изведи из темницы душу мою, исповедатися имени Твоему. (Пс. 141:38)
1. Бог мой еси Ты, и исповемся Тебе всем сердцем моим. (Пс. 127:28; 137:1)
2. Глаголах о свидениих Твоих пред цари, и не стыдяхся. (Пс. 118:146)
1. Благо есть исповедатися Господеви и пети имени Твоему, Вышний. (Пс. 91:2)
2. Пойте Господеви, преподобнии Его, и исповедайте память святыни Его, во всех людех чудеса Его. (Пс. 29:5; 95:3)
По полиелеи седален, глас 2:
Отверзошася ти врата правды, / и ныне вшед в ня Господеви исповедуешися, / хвалу Ему в церкви преподобных возсылая, / и кадило молитв священных Престолу Его вознося, / темже помяни чада Церкве Русския, любовию чтущия тя, // святителю Агафангеле всехвальне.
Слава, и ныне, Богородичен:
Не имамы иныя надежды во обстояниих, / разве предстательства Богоматере, / верных поучал еси, святителю Агафангеле, / к Толгскому чудотворному образу Ея притекая, / о спасении Руси усердно Пречистую молил еси.
Степенна 1-й антифон 4-го гласа.
Прокимен, глас 4: Честна пред Господем:
Стих: Что воздам Господеви:
Евангелие от Луки, зачало 64.
По 50-м псалме стихира, глас 6:
Прием силу, нашедшу Святому Духу на тя, / святителю Агафангеле, / во время безбожных гонений в земле Русской / духом непоколебим явился еси, / старец сый телом немощный и притрудный, / заточения, изгнания и болезни, / глад и мраз претерпевая, яко воистинну свидетель Христов, // Егоже моли помиловати души наша.
Канон, глас 8. егоже краегранесие:
Претерпевый до конца, той спасен будет.
Песнь 1. Ирмос: Колесницегонителя фараоня:
Приими пение от души, благих вдовствующей, / яко лепту, святителю Агафангеле, / положивый в сокровищницу Церкве Русския / плод устен, исповедающих имя Божие.
Ревностию по Бозе / море неверия и зловерия от земли Русской вспять обратил еси, / и ныне твоих подвиг море проходя, / держим исповедание упования неуклонное, / воспевающе и поюще в сердцах наших Господеви.
Егда дадеся ти благодать / не точию во Христа православно веровати, но и по Нем страдати, / немокренно мук пучину прошел еси, / верным сыном Русским образ быв, / и во исповедании вниде во врата Небесная.
Богородичен: Твоего чрева благословен Плод, Богоневесто, / Имже земнии вси от клятвы избавихомся, / Благословенная, Пречистая, несказанное чудо, недоразумеваемое ведение, / всех верных спасение.
Песнь 3. Ирмос: Утверждей на камени веры:
Егда восташа отступницы на святыни земли Русския, / тогда ты учаше неложно, Богомудре Агафангеле, / како подобает в Дому Божии жити, / яже есть Церковь Бога Жива, / столп и утверждение истины.
Реша безумнии: несть Бог, / приидите и отставим вся праздники Божия от земли Русския, / ты же глаголал еси, блаженне Агафангеле: / единением во святой вере и братском мире утверждайтеся.
Повелевал еси верным апостольски, Агафангеле Богодухновенне, / отлучатися от всякаго брата, безчинно ходяща, а не по преданию, / в научения странна и различна не прилагатися, / но благодатию утверждати сердца.
Богородичен: Едина словом плотию Слово рождшая, Чистая, / молимся, избави сетей вражиих души наша, / и утверди на камени Божественных хотений, / яко на Тя упование возложихом.
По 3-й песни седален, глас 4:
Взирая на Начальника и совершителя веры Иисуса, / верою возмогше от немощи, правду соделал еси, святителю Агафангеле, / в темницех и изгнаниих терпеливодушно пребывая, / беды от гонителей, беды от лжебратии терпя, / темже жизнь вечную наследовал еси.
Слава, и ныне, Богородичен:
К Заступнице страны нашея Приснодеве Богородице притецем, / и к первописанней иконе Ея ныне припадем, / с верою зовуще из глубины души: / о Мати Божия, спаси землю Русскую, / исцели сокрушение Ея и верных людей утеши.
Песнь 4. Ирмос: Ты моя крепость, Господи:
Виждь враги моя, яко умножишася и туне возненавидеша мя, / сохрани душу мою и избави мя, / яко Тебе ради претерпех поношение, / — вопиял еси псаломски, Агафангеле крепкодушне, — / и прославлю силу Твою, Человеколюбче.
Исповедал еси Господа пред отступники и гонители: / с нами Бог, разумейте и покаряйтеся: / страха вашего не убоимся, ниже смутимся. / Господа Бога нашего, Того освятим, и Той будет нам в страх.
Имене Своего ради посреде скорби сохрани тя Господь, / темже в роды родов мышцу Его возвещаеши: / яко аще не Господь помогл бы нам, не помянулося бы имя Руси ктому, / ныне же силу Его воспеваем.
Богородичен: Доброту Иаковлю, / красную Тя, Всечистая, Едину обрет от века / Пребезначальное Слово, / и вселився в Тя, обнови человеческое естество, / Егоже моли от всякия мне избавитися скорби.
Песнь 5. Ирмос: Яко Бога иного:
Осиротевше от паствы твоея лицем, а не сердцем, / за дело Христово даже до смерти приблизился еси, / исповедуя Господа Человеколюбца.
Кую измену даст человек за душу свою? / евангельски поучался еси, / темже не зайде солнце исповедания твоего / Света незаходимаго Господа Человеколюбца.
О всякой скорби Бог утешаше тя, / да возможеши утешати сущия в скорбех, / еще же и гонящия благословляти, / воспевая Страстоположника Господа Человеколюбца.
Богородичен: Направи мя к покаянию, / твердь умная, Солнце правды нам возсиявшая, / яко да увижу свет спасения, Владычице Чистая.
Песнь 6. Ирмос: Иону в ките:
Царюющия, святителю Агафангеле, / смириша во оковах нозе твои, / обаче Слово Божие связати не возмогоша.
Аще благая прияхом от руки Господни, злая ли не стерпим, / да яко сыновне наказание приимем, / тако учаше, священнейший отче.
Темже убо благоволим / во изгнаниих, в теснотах по Христе, / егда бо немощствуем, тогда о Господе сильни есмы, / глаголал еси, Богомудре.
Богородичен: Освяти ум мой и просвети сердце мое, / Святая Мати Божия, / и одержащих мя зол измени, / христиан Заступнице.
Кондак, глас 4:
Исполняя во плоти твоей лишение скорбей / за Тело Христово, еже есть Церковь, / старейший быв, страждущим Ея чадам послужил еси, / предания церковная попирающия обличив и далече отгнав, / милостию и смирением, миротворением и мудростию / на свещнице архиерейском возсиял еси, / мощи своя граду Ярославлю во утверждение даровав, / святителю Агафангеле, отче наш.
Икос:
К Церкви и земли Русской любовию распалаяся, / неверие и зловерие со дерзновением обличал еси, / повиноватися и покарятися законным пастырем чада церковная поучая, / и преизлиха имети их в любви за дело их. / Темже, страдания по Христе волею вземшу на рамо, / злокозненный враг невольно плещи ти даде, / и ныне, во веки веселяся за лета, в няже видяше злая, / поминай любовию чтущих тя, святителю Агафангеле, отче наш.
Песнь 7. Ирмос: Божия снизхождения:
Имуще щит веры православныя, / стрелы разженныя мучителей отражал еси, вопия: / аще бо паки возможете и паки побеждени будете, / аз же благословлю Бога отец наших.
Со беззаконными вменився, / путем нечестивых никогдаже идый, / и ненавидим Господа ради был еси, / обаче не опали малодушие сердце твое, / горящее любовию к Богу отец наших.
Паче силы гонители отяготиша тя, / обаче сам в себе осуждение смерти имел еси, / исповедуя Христа, возставляющаго мертвыя, / темже от вечныя смерти избави тя Бог отец наших.
Богородичен: Агнца зрящи воздвизаема на древе неправедне, / многопетая Агница плачущи восклицаше, матерски слезяще, / и долготерпение пояше, славяще Сына Своего и Бога отец наших.
Песнь 8. Ирмос: Нечестия органы:
Силою многою благовествовал еси, / приемше от Господа глаголы: / се, удаляющии себе от Тебе погибнут, / да исповедятся Тебе, Боже, людие Русстии во веки.
Едем узилище соделав, / реку Божественных учений оттуду источил еси, / нечестие потопляя и лице земли Русския напаяя во веки.
Написуя верным благочестивно разум Божественный, / Святаго Духа явился еси трость, / Емуже со Отцем и Сыном исповедаешися во веки.
Богородичен: Безсмертнаго Бога рождшая, / течение смертное укротила еси, / темже умертви, Чистая, страсти телеси моего, / да Тя славлю во веки.
Песнь 9. Ирмос: Благословен Господь Бог:
Узы твоя поминающия / и любовию чтущия память твою, / вечных и нерешимых уз избавити молися Христу, / святителю Агафангеле, / яко ходатай теплый чад Церкве Русския.
Дар освященный народу Русскому / свыше послан бысть, святе Агафангеле, / в годину лютую аки адамант в вере православней его утверждающий, / и ныне помяни благословящия о тебе Господа.
Единаго Бога возлюбив, / священное служение исповеданием запечатлел еси, / и яко клас зрелый земли Русския, / в Небесных житницех упокоился еси, славне Агафангеле.
Богородичен: Тя верою поющия просвети, Всенепорочная, / просветительными молниями Сына Божия, / из Твоея прошедшаго утробы, / и тьмы нас несветимыя изми Твоим предстательством.
Светилен:
Представил еси себе жертву живу Богови, / святу, благоутодну, / в словеснем служении и исповедании, / святителю Агафангеле, / и тако просветися свет твой на Святой Руси, / яко славит выну о тебе Отца Небеснаго.
Слава, и ныне, Богородичен:
Свет от Света миру рождшая, Пречистая, / светлости святых сподоби люди земли Русския, Тебе почитающия, / и благодарение от души приносящия Тебе: / не забуди рабов Твоих, Едина Благословенная.
На хвалитех стихиры, глас 4:
Досточудне святителю Агафангеле, / ты в годину гонений на Церковь Русскую / столп православия исповеданием Христа явился еси, / узами и изгнанием яко злато в горниле искушаем, / и в мире почив, благоугоханием от святых мощей твоих верныя возвеселил еси, // ныне же во хвалении Бога величаеши. (Дважды).
Егда безбожие сокруши землю Русскую, / премножество силы Божия проповедал еси, Агафангеле всехвальне, / гоним, но не оставляем, / низлагаем, но не погибающе, / в терпении мнозе, бдениих и пощениих, / во благости, любви нелицемерней и словеси истины, // утверждение на Руси Бога нашего восхваляюще.
По слову Господню врази твоя любил еси, / образ страждущим верным людем Русским являя, / святителю Агафангеле, / кленущия тя благословляше, / добро творя ненавидящим тя / и моляся за напасти творящих и изгоняющих, / яко да всыновления сподобишися Отцу Небесному, // Егоже ныне во славе восхваляеши.
Слава, глас 8:
Святителю и исповедниче Христов Агафангеле, / ты первее Ярославскую паству / от омофора святителя Тихона прияв, / приимите мя в любовь свою, якоже онаго, / людем глаголал еси, / последи же заветом Первостоятеля, / попечение о Церкви Русской подъял еси, / и тому во время гонений безбожных спострадал еси, / и ныне купно с Ним Престолу Божию предстоиши, // моляся о душах наших.
И ныне, Богородичен:
Срадуются с нами умная вся чиноначалия, / духовному совокуплыпе чувственный лик, / видяще Царицу и Владычицу всех, / многоименне верными славиму: / радуются же и дуси праведных, сущии зрителие видения, / на воздусе молебно простирающу всечестнеи Свои руце, / просяще умирения миру / и земли Русской утверждения // и спасения душам нашим.
Славословие великое и отпуст.
НА ЛИТУРГИИ
Блаженны от канона, песни 3-я и 6-я.
Прокимен, глас 7: Изведи из темницы душу мою / исповедатися имени Твоему. (Пс.141:8). Стих: Гласом моим ко Господу воззвах. (Пс. 141:1)
Апостол к Евреом, зачало 334.
Аллилуиа, глас 2: Праведнии исповедятся имени Твоему и вселятся правии с лицем Твоим. (Пс.139:14)
Стих: Господи, Господи, сило спасения моего, осенил еси над главою моею в день брани. (Пс. 139:8)
Евангелие от Матфеа, зачало 38.
Причастен: Пойте Господеви преподобнии Его и исповедайте память святыни Его. (Пс. 29:5)
Тропарь, глас 4:
Земли Ярославския небесный покровителю, / Церкве Русския красото и славо, / святителю Агафангеле богомудре, / Православныя веры учителю, / святых ея догматов хранителю, / о пастве российстей усердный попечителю. / Предстани в помощь нам, празднующим святую память твою, / моли милостивано Бога // Церковь Христову в мире соблюсти и спасти души наша.
Ин тропарь, глас 2:
От младенческих лет Богом избранный, / на служение Святей Церкви призван был еси, / овцы словесныя стада Христова добре упасл еси, / за веру Православную гонение претерпел еси. / Исповедниче святителю Агафангеле, / моли о нас Бога, до конца в вере истинней пребывати, // пастырю наш добрый.
Молитва святителю и исповеднику Агафангелу митрополиту Ярославскому и Ростовскому.
О, Богомудре святителю и исповедниче Христов Агафангеле, измлада возжелевый служити олтарю Господню, ты, первее Сибирския и Прибалтийския страны Отечества нашего архипастырским служением добре управив, последи Ярославской пастве дарован был еси, во время же богоборческих гонений заветом Святейшаго Патриарха Тихона попечение о Русской Церкви приял еси. Тогда, священное исповедание яко забрало восприим, богохульныя дерзновенно обличал еси и безплотныя враги посрамил еси, чада церковная поучая предания святых отец соблюдати, единство святыя веры в союзе братскаго мира хранити и пастырем законным усердно повиноватися. Темже заточения, изгнания и многия лишения за имя Христово претерпев, блаженства изгнанных правды ради сподобился еси и Престолу Пренебесному с ликом новомученик и исповедник Российских предстоиши. Моли Всеблагаго Бога нашего, да сохранит Православную Церковь Русскую от ересей, расколов, нестроений и гонений, да возродится Русская земля святым покаянием и единым сердцем и едиными усты прославляет Дивнаго во святых Своих Бога, Отца и Сына и Святаго Духа во веки веков. Аминь.
Акафист святителю и исповеднику Агафангелу, митрополиту Ярославскому и Ростовскому
Кондак 1
Избранниче предивный, Господем возлюбленный, на служение Церкви Христовой поставленный, саном священноначалия возвеличенный, пастырь добрый и истинный друг Христов показался еси, святителю Агафангеле, добродетельми и подвиги духовными украшен, Господа в молитве непрестанно взыскуя, приятелище соделался еси Духа Святаго. Слово Божие проповедаше, паству обильно пополнял еси, сопричти и нас избранному стаду Христову, благочестно поющих ти: Радуйся, святителю Агафангеле, Православныя веры исповедниче и теплый за ны молитвенниче.
Икос 1
От юности житие безмолвное возлюбил еси, хождаше на сельское кладбище, среди крестов и могил тишиною и покоем сердце питаше, поучался еси глаголам вечности, в тщету вменяя временное житие, младенческою молитвою к Богу пламеневый, умолял еси Его соделати тя служителем олтаря. Мы же, умиляяся богомудрию твоему, с детских лет явившуся, со благоговением взываем:
Радуйся, житие твое младенческое в богомыслии проводивый; радуйся, яко святитель Игнатий, тишину и уединение паче детских игр возлюбивый.
Радуйся, глаголам вечности поучавыйся; радуйся, в молитве к Богу устремлявыйся.
Радуйся, служити Богу во олтари с детства стремивыйся, радуйся, служити Ему верою и правдою от благочестивых родителей научивыйся.
Радуйся, родителей присное радование; радуйся, истинных учителей славная похвало.
Радуйся, Церкве православныя пастырю предивный; радуйся, града Ярославля бисере многоценный.
Радуйся, святителю Агафангеле, Православныя веры исповедниче и теплый за ны молитвенниче.
Кондак 2
Видяши град Ярославль святыя мощи твоя, от них же воистинну источаются обильныя чудеса и исцеления, дивляшеся благоутробию Божию, давшу нам предивнаго заступника и теплаго молитвенника, у Престола Божия за ны молящагося, со умилением и верою взывающе всех благ Подателю: Аллилуиа.
Икос 2
Разум Божественный дарова ти Господь, уготова тя к высокому служению в сане архиерейстем. Ты же талант от Господа восприявый, в земли его не сокрывый, во сто крат приумножил еси. Слово Божие по всей стране проповедаше, в паству Христову многая овцы уловил еси, не остави и нас сирых, воспевающих ти сице:
Радуйся, истинный проповедниче веры Православныяй; радуйся, православных радование.
Радуйся, светильниче небесный, присно горящий; радуйся, столпе огненный, во тьме неверия и смут верным светящий.
Радуйся, облаче, исполненный росою благодати духовныя; радуйся, красото и слава церковная.
Радуйся, земли Российския заступление; радуйся, града Ярославля предивное украшение.
Радуйся, святителю Агафангеле, Православныя веры исповедниче и теплый за ны молитвенниче.
Кондак 3
Силою Вышняго осенен был еси, святителю Агафангеле, егда горько уязвленный смертию благоверныя супруги твоея и сына твоего вся тленная и временная мира сего отрясл еси, иноческий постриг восприяв, умиленно Богу воспевал еси: Аллилуиа.
Икос 3
Имеяше благоразумие, егда лишихся счастия земнаго, не возроптал еси, с твердою же верою и упованием к Богу обратихся, возжелал еси служити Ему в иночестем чине. Крест свой на рамена подъявый, узкою стезею неуклонно в Царствие Небесное устремился еси. Мы же, похваляюще труды и подвиги твоя, умиленно воспеваем:
Радуйся, крест житейский на спасительный Крест Христов пременивый; радуйся, всем сердцем Христа возлюбивый.
Радуйся, в горе от Господа не отвративыйся; радуйся, от взора Его не сокрывыйся.
Радуйся, на Господа упование возложивый; радуйся, в житии твоем Христу послуживый,
Радуйся, вселенским учителем поревновавый; радуйся, верность Истине показавый.
Радуйся, святителю Агафангеле, Православныя веры исповедниче и теплый за ны молитвенниче
Кондак 4
Бурю сумнений посеяше в сердце твоем злочестивый начальник, наученный врагом рода человеческаго, егда восхоте содеяти раскол в Церкви Христовой, яко лис прехитрый, прихождаше к тебе, научая заняти пост Патриаршаго Местоблюстителя. Трижды уготовляше ти искушение, посрамися смирением и терпением твоим. Ты же духом непрестанно горе устремляющеся воспевал еси Богу: Аллилуиа.
Икос 4
Слышаша Слово Божие из богоглаголивых уст твоих, люди в истинней вере утверждашася, благочестно и праведно жити научахуся. Таже всем сердцем к Богу устремляхуся, благодатию Божиею укрепляемии, во узах и темницах за веру Христову страдаша, многоразличныя скорби претерпеваша, с верою и упованием Богу воспевая песнь хвалы и благодарения. Мы же имамы тя молитвенника чуднаго, со умилением вопием ти:
Радуйся, верою Христовою люди просвещающий; радуйся, твердо веру истинную проповедати научающий.
Радуйся, Святыя Троицы храме благоукрашенный; радуйся, любовию Христовою уязвленный.
Радуйся, Церкви непоколебимый столпе; радуйся, граду Ярославлю нерушимая стено.
Радуйся, твердое веры утверждение; радуйся, древа Иисусова райское прозябение.
Радуйся, святителю Агафангеле, Православныя веры исповедниче и теплый за ны молитвепниче.
Кондак 5
Боготечная звезда явился еси, святителю Агафангеле, егда многая грады имеша тя пастыря добраго, избраннаго Божественным промышлением на многия архиерейския кафедры земли Российския. Ты же, яко истинный отец чадолюбивый, кротостию и смирением пример пастве показуя, многочисленныя чада духовныя приобрел еси, научающе их воспевати Богу: Аллилуиа.
Икос 5
Видящи, како любляше народ ярославский святителя Тихона, со слезами с ним расставашеся, сетующе и горько стеняху, ты отче богомудре в печали им сострадаше, в слове архипастырстем к ним обративыйся, просил еси их и тя прияти в любовь свою. Они же радостно тебе воспеваху:
Радуйся, пастырю предобрый; радуйся, молитвенниче наш пребодрый.
Радуйся, земли ярославския славо и украшение; радуйся, ветви райския насаждение.
Радуйся, в скорбех и печалех нас утешающий; радуйся, лишения терпети ради Христа научающий.
Радуйся, ангеле земный и человече небесный; радуйся, наставниче нелестный.
Радуйся, святителю Агафангеле, Православныя веры исповедниче и теплый за ны молитвенниче.
Кондак 6
Проповедник веры Православныя изящнейший явился еси, благодатию Святаго Духа умудренный, пастве глаголы жизни вечныя неустанно возглашал еси, призываше всех служити Христу, дабы вси Царствия Небеснаго соделалися причастницы, вкупе со ангелы Богу воспевающи: Аллилуиа.
Икос 6
Возсиял еси житием твоим, яко адамант пресветлый, славнаго града Ярославля украшение и всея земли Российския похваление, благочестием и смиренномудрием души верных просвещающе, любовию к Богу и ближним Христу служити научающе, благодатию святительскою сердца верных озаряюще, озари и наша сердца любовию небесною и благодатию духовною, поющия ти:
Радуйся, жития подвижническаго ревнителю; радуйся, благочестия насадителю.
Радуйся, злочестия и неверия обличителю; радуйся, о пастве ярославстей усердный попечителю.
Радуйся, догматов церковных верный хранителю; радуйся, истинный Пресвятыя Троицы служителю.
Радуйся, Ангелов небесных сожителю; радуйся, духов злобы всесильный борителю.
Радуйся, святителю Агафангеле, Православныя веры исповедниче и теплый за ны молитвенниче.
Кондак 7
Ходатай за повинныя смерти мятежники явился еси, миролюбче милостиве Агафангеле, егда грози им смерть неминуемая, умоляше помиловати их, тако и сам от Господа помилован еси, со избранными Божиими сопричтен еси, в Царствии Небеснем непрестанно Богу воспеваеши: Аллилуиа.
Икос 7
Новый исповедник истинныя веры явился еси, егда старец болезненный и многотрудный в Толгстем монастыре пребываше, безбожныя власти в келиях твоих обыск учиниша, в нестяжании богомудраго пастыря уверишася, но в покое не оставиша, уготовляюще тебе многая скорби и узы темничныя. Мы же укрепляемии силою духа твоего, с любовию воспеваем ти:
Радуйся, новый исповедниче Христов явивыйся; радуйся, прещений безбожных властей не устрашивыйся.
Радуйся, узы темничныя за Христа претерпевый; радуйся, помощником в скорбех Христа Подвигоположника имевый.
Радуйся, житием твоим мученику Агафангелу подражавый; радуйся, мучителем вся Христа ради прощавый.
Радуйся, твердым исповеданием любовь ко Господу показавый; радуйся, Царствие Небесное страданием стяжавый.
Радуйся, святителю Агафангеле, Православныя веры исповедниче и теплый за ны молитвенниче
Кондак 8
Странник и пришлец был еси на земли, святче Божий, сие показа ти Господь, егда старец сединами убеленный, немощный и много болезненный, пришел еси во узах в землю, идеже ранее был еси архипастырем, поучаше народ благочестию и спасению. Ты же с благодарением тепле взывал еси Богу: Аллилуиа.
Икос 8
Вси люди удивляшеся, како пречестный старец терпит страдания телесныя вкупе с мужами крепкими, егда во узах темничных пребываше, ты же воине Христов предоблий в Слове Божии дни и нощи поучался еси, духом крепляшеся, к Богу в пламенней молитве обращашеся, вся Христа ради терпел еси. Мы же не могуще достойно восхвалити тя, со умилением вопием:
Радуйся, страданием за Христа плоть свою умерщвляющий; радуйся, терпением скорбей верныя люди научающий.
Радуйся, жизнь временную ни во что вменяющий; радуйся, взамен Царствие Небесное приобретающий.
Радуйся, благодушно претерпевати вся нас научающий; радуйся, купец премудрый, за долготерпение вечное блаженство искупающий.
Радуйся, духов злобы кротостию и смирением уязвляющий; радуйся, поборати страсти нам помогающий.
Радуйся, святителю Агафангеле, Православныя веры исповедниче и теплый за ны молитвенниче.
Кондак 9
Вси людие горько восплакашася, рыдаху и стеняху, егда видя тя во гробе положена быша, пастыря предобраго и наставника премудраго лишишася, но уповающи на Господа крепляхуся, с верою взывая: Аллилуиа.
Икос 9
Витии многоглаголивыя недоумеют, како похвалити житие твое, егда ты вся временная отринувше, к вечным обителем райским устремился еси, путем тесным и прискорбным жития иноческаго, блаженство райское стяжал еси, любовию ко Христу уязвляемый в вечности с Ним соединился еси. За сие верныя люди похваляют тя, богомудре отче, воспевая тако:
Радуйся, правило веры и кротости духовныя; радуйся, непоколебимый столпе церковный.
Радуйся, архиереев Божиих похваление; радуйся, нечестиво живущих посрамление.
Радуйся, врагов Церкви Христовой грозный обличителю; радуйся, козней демонских разорителю.
Радуйся, твердое наше упование; радуйся, града Ярославля непрестанное радование.
Радуйся, святителю Агафангеле, Православныя веры исповедниче и теплый за ны молитвенниче.
Кондак 10
Спасение ти уготовляюще, дарова ти Христос прозревати грядущее отшествие, предуказа ти день кончины. Ты же, отче преславне, духом в Небесныя селения устремляяся, на земли тело твое ко отшествию приуготовил еси, Святых Христовых Тайн причастился еси, в мире и покое в Небесный град вечныя радости преселился еси, идеже непрестанно поеши Богу: Аллилуиа.
Икос 10
Стена нерушимая и крепкое заступление дадеся граду Ярославлю святыя мощи твоя, святителю пречудне, мы же с любовию и благоговением им поклоняющеся, помощь скорую обретаем, со умиленною душею и чистым сердцем взываем ти:
Радуйся, мощи твоя святыя благоухания духовнаго исполнены; радуйся, благий отче, давый нам мощи сии чудотворныя.
Радуйся, града Ярославля предивное заступление; радуйся, веры Православныя укрепление.
Радуйся, граду Ярославлю Божие благословение; радуйся, в скорбех отрада и утешение.
Радуйся, благ духовных таинниче; Радуйся, за землю Русскую молитвенниче.
Радуйся, святителю Агафангеле, Православныя веры исповедниче и теплый за ны молитвенниче.
Кондак 11
Пение похвальное от нас недостойных приими, отче святый и не остави нас, уповающих на тя, с верою и любовию к мощем твоим притекающих, помощи и заступления просящих, дабы и мы сподобилися в Царстве Славы вкупе с тобою воспевати: Аллилуиа.
Икос 11
Светильник великий явился еси, не сокрытый под спудом, но высоко на свещнице Церкви Христовой поставленный, святителю Агафангеле, светом твоим верныя просвещающий, путь спасения неложный людем указующий, имже сам прошел еси и многия овцы словесныя превел еси. Не остави и нас заблудитися на путех земных, воспевающих ти тако:
Радуйся, путь в Царствие Небесное указующий; радуйся, благодать духовную нам дарующий.
Радуйся, заблудших взыскание; радуйся, неверных в стадо Христово призвание.
Радуйся, чтущих тя радостию небесною озаряющий; радуйся, и по смерти нас не оставляющий.
Радуйся, неизсякаемый источник благодати и исцелений; радуйся, Церкви Российския присное похваление.
Радуйся, святителю Агафангеле, Православныя веры исповедниче и теплый за ны молитвенниче.
Кондак 12
Благодатъ и славу неизреченную от Господа улучив, вселился еси в Небесныя обители, святителю Агафангеле, тую же щедро подаеши всем верно ти молящимся, сего ради к тебе припадаем, не остави нас немощных и грешных в безакониих умрети. Умоли Господа, дабы сподобил ны благую кончину улучити безболезненну, непостыдну, Христовых Тайн причастну. Дабы и мы вкупе с тобою вечно воспевали Богу ангельскую песнь: Аллилуиа.
Икос 12
Воспеваем величие Божие и милосердие неизреченное, яже дарова нам заступника небеснаго и помощника преизряднаго, егоже святыя мощи во граде Ярославле благочестно почивают, источающе токи благодати. Мы же к сим чудотворным мощем притекающи, святителю Агафангеле, ублажаем тя поющи:
Радуйся, источниче чудес и исцелений; радуйся, разорителю богопротивных учений.
Радуйся, догматы Церкви Христовой крепко хранивый; радуйся, хранити истинную веру нас научивый.
Радуйся, талант в земли не сокрывый; радуйся, ученьми твоими всю страну просветивый.
Радуйся, от телесных недугов исцеляющий; радуйся, вечное спасение нам низпосылающий.
Радуйся, святителю Агафангеле, Православныя веры исповедниче и теплый за ны молитвенниче.
Кондак 13
О, предивный угодниче Христов, новый исповедниче и пастырю предобрый, в житии твоем Господу неустанно служивый и во уме непрестанно Христа созерцавый. Ты вся временныя блага отринул еси, крест свой на рамена подъяв, за Христом последовал еси, с Ним же в жизни вечной соединился еси. Мы же грешнии и смирении с теплою молитвою к тебе притекаем: не остави нас сирых и убогих в мире сем многоскорбнем, умоли Господа Сил даровати нам веру крепкую, надежду несумненную, покаяние истинное и любовь нелицемерную. Да прошедше стезю жития земнаго сподобимся неосужденно вкупе со ангелы и всеми святыми вечно Богу воспевати: Аллилуиа. (трижды)
