Гимнография свт. Афанасия исп., еп. Ковровского (1962)
Служба на преставление иже во святых отца нашего Афанасия Песнописца, епископа Ковровскаго, исповедника Российскаго
ВЕЧЕР
На Господи, воззвах: стихиры, глас 8.
Подобен: О преславнаго чудесе:
Святителю Афанасие досточудне, / печальнику земли Русския / преподобному Сергию ревнуя, / яко един от птенцев онаго явился еси, / любве ради Христовы душу полагая / за Церковь Православную, / и яко добропеснивый / святых сродников наших воспел еси, / с ними же ныне поеши Троицу Единосущную.
Святителю Афанасие богомудре, / страдания яко угль горящ от олтаря Господня / очистиша богоглаголивая твоя уста, / темже предания церковная попирающая твердо обличал еси, / разумея в последняя их участь, / како погибоша за беззаконие свое, / и яко соние востающего / Господь их уничтожил есть, являя истину.
Святителю Афанасие блаженне, / Христово был еси благоухание в земли Русской, / воню разума Его являя песньми священными, / дело творя благовестника / и злостражда, яко добр воин Христов, / имене Его ради заточения, изгнания и горькия работы терпя, / уповая, яко труд твой несть тощ пред Господом.
Слава, глас и подобен тойже:
По вся дни умерщвляем был еси Бога ради, / Церкве Русския славо, святителю Афанасие, / яко овча заколения вменяяся, / обаче за Возлюбльшаго тя препобеждаше / скорби и тесноты, гонения и глад: / известихся бо, яко никтоже тя возможе разлучити от любве Божия, / яже о Христе Иисусе, Господе нашем.
И ныне, Богородичен.
Вход. Прокимен дне.
Чтения (одно святительское и два преподобнические, они же исповеднику)
1. Похваляему праведнику:
2. Праведницы во веки живут:
3. Праведных души:
Аще творим бдение, на литии поставим стихиры сия, глас 2:
Подобен: Егда от древа:
Измлада православному благочестию прилепився, / Афанасие, отче священный, / от силы в силу шествовал еси, / орган быв Святаго Духа, / Егоже действом Господа пред мучители исповедал еси, / и песнопениями / Церковь Русскую удобрил еси, / и овцы Христовы / добре упасл еси.
Слава, глас 8:
Святителю и исповедниче Христов Афанасие, / понеже не от мира сего был еси, / сего ради мир тя возненавиде, / но дерзая вслед Победившаго мир, / и ты верою в Воскресшаго из мертвых побеждаше, / исповедуя усты твоими Господа Иисуса, / души своея отвергнувся Его ради, / темже соблюл еси ю в живот вечный.
И ныне, Богородичен: глас тойже, самогласен:
Срадуются умная вся чиноначалия, / духовный совокупльше лик, / видяще Царицу и Владычицу всех, / многоименне верными славиму: / радуются же и дуси праведных, / сущия зрителие видения, / на воздусе молебно простирающу всечестнии Свои руце, / просяще умирения миру, / и земли Русской утверждения / и спасения душ наших.
На стиховне стихиры, глас 2:
Приидите, празднолюбцы и постницы, / воспоим благочестия ревнителя, / Афанасия богодухновеннаго, / иже яко труба таинственная к духовному пению вся воздвиже, / святых земли Русския восхваляюще, / и устремлении молебных словес / Церковь Русскую напаяюще.
Стих: Ты Иерей вовек / по чину Мелхиседекову.
Приидите, архиереи и священницы, / святителя Господня песньми почтим, / Жертву Бескровную в темницех и изгнаниих приносившаго / и страждущих за Христа Хлебом Жизни питавшаго, / ныне же бессмертныя трапезы наслаждающагося.
Стих: Исповемся Тебе, Господи, / всем сердцем моим.
Приидите, любострадальцы, / прославим святителя боголюбиваго, / Христа ради вся во уметы вменившаго, / тако во исповедании лице Его предварявшаго: / яко аз на раны готов Тебе ради, / и аще бы восхотел еси жертвы, / дал бых убо, Господи.
Слава, глас 6:
Подобен: Тридневен:
Прошедше сквозе огнь страданий по Христе / и воду слез постнических, / ныне вечнаго покоя наслаждаешися, святителю Афанасие, / песнь нову Богу воспевая, / Егоже моли, добрый наш пастырю, / услышати воздыхания / окованных страстьми / и спасти вся кроткия Русския земли.
И ныне, Богородичен.
Тропарь, глас 2:
Святителю отче Афанасие, / никтоже тя разлучи от любве Божия, / поношение и раны, заточение и изгнание, / горькия работы Христа ради сладце претерпел еси, / сердцем веруя в правду, / усты Господа Иисуса исповедуя во спасение: / Русь Святая, храни веру православную, / в нейже тебе утверждение.
НА УТРЕНИ
На Бог Господь: тропарь тойже.
По 1-м стихословии седален, глас 5:
Сердце милующее стяжал еси, святителю Афанасие, / расточая и дая убогим имения своя с добрым изволением, / ни единому же зла за зло воздающе, / сего ради милости от Бога сподобился еси, / и в век века правда твоя пребывает (дважды).
Слава, и ныне, Богородичен, глас 4:
Яко многоценное сокровище хранит град Шуя чудесно написанную икону Твою, Пресвятая Владычице Дево Богородице, / во исцеление лютой язвы и во утешение православным Тобою дарованную, / от неяже источники благодатныя милости и утешения и доныне обильно изливаются. / Пробави, Пречистая, и на будущее время милости Твоя ведущим Тя, / храни град Твой и всю Русскую землю / и спасай людей, к Тебе с верою и любовию притекающих
По 2-м стихословии седален, глас 7:
Приимше вся оружия Божия, / во плоти ходяще, не по плоти воинствовал еси, святителю Афанасие, / и благодатию Божиею устоял еси во время гонений на Церковь Русскую, / покры бо тя в тайне лица Своего Господь, / Его же моли помиловати нас в день судный (дважды).
Слава, и ныне, Богородичен, глас 4:
Днесь светло красуется богохранимый град Ковров, / яко священный дар восприимше, Владычице, / святую Твою икону Смоленскую, / к нейже мы притекаем и вопием: / прибежище и сила наша, Богородице, / державная помощь рабом Твоим! / Покрый град Твой и окрестныя веси от всякаго зла, / землю Русскую в мире сохрани, / людей Твоих в Православии утверди / и к Сыну Твоему молитву вознеси о спасении душ наших.
Величание:
Величаем тя, святителю отче Афанасие, / и чтим страдания твоя, яже во исповедание / Православие во Отечестве своем утвердил еси.
Ино величание (поем пременяюще):
Величаем тя, святителю и исповедниче Христов Афанасие, / богодухновенными песньми Церковь Русскую украсившаго / и святых сродников наших любовию воспевшаго.
Псалом избранный:
Благо есть исповедатися Господеви и пети имени Твоему, Вышний (Пс. 91:2).
Священницы Твои облекутся правдою, и преподобнии Твои возрадуются (Пс. 131:9).
Повем имя Твое братии моей, посреде церкве воспою Тя (Пс. 21:23).
Приидите чада, послушайте мене, страху Господню научу вас (Пс. 33:12).
Возненавидех церковь лукавствующих, и с нечестивыми не сяду (Пс. 26:5).
Исповемся Тебе, Господи, всем сердцем моим и милости Твоей и истине Твоей (Пс. 137:1,2).
Господь Помощник мой, на Него улова сердце мое, и исповемся Ему (Пс. 27:7).
Изведи из темницы душу мою, исповедатися имени Твоему (Пс. 141:8).
Глаголах о свидениих Твоих пред цари, и не стыдяхся (Пс. 118:146).
Не ненавидящия ли Тя, Господи, возненавидех, и о вразех Твоих истаях (Пс. 138:21).
Не предажь зверем душу, исповедающуюся Тебе (Пс. 73:19).
Исповемся имени Твоему, Господи, яко благо, яко от всякия печали избавил мя еси (Пс. 53:89).
Вложи во уста моя песнь нову, пение Богу нашему (Пс. 39:4).
Пойте Господеви преподобнии Его, и исповедайте память святыни Его, во всех людех чудеса Его (Пс. 29:5; 95:3).
По полиелеи седален, глас 4:
Якоже по всемирнем потопе радостотворная дуга, / тако ты посреде гонений верныя люди русския утешал еси, святителю Афанасие, / свидетельствуя, коль благ Бог Израилев правым сердцем, / яко от корене православныя веры силен возставити сокрушение душ Русския земли (дважды).
Слава, и ныне, Богородичен:
К Заступнице страны нашей, Приснодеве Богородице, притецем, и к первописанной иконе Ея ныне припадем, с верою зовуще из глубины души: о Мати Божия, спаси землю Русскую, исцели сокрушение ея и верных людей утеши.
Степенна 1-й антифон 4-го гласа.
Прокимен, глас 4: Честна пред Господем смерть преподобных Его.
Стих: Что воздам Господеви о всех, яже воздаде ми?
Всякое дыхание:
Евангелие от Луки, зач. 64 (12:8-12).
По 50-м псалме стихира, глас 6:
Прием силу, нашедшу Святому Духу на тя, / святителю Афанасие, / бысть свидетель Христов во время безбожных гонений в земле Русской, / образ покаяния и исповедания являя, / пении богодухновенными верных укрепляя, / Егоже моли, пастырю наш добрый, / помиловати души наша.
Канон, глас 8, егоже краегранесие:
Претерпевый до конца, той спасен будет
Песнь 1
Ирмос: Колесницегонителя фараона погрузи, / чудотворяй иногда / Моисейский жезл, крестообразно поразив / и разделив море, / Израиля же беглеца, пешеходца спасе, / песнь Богови воспевающа.
Приими пение от души, яко лепту вдовствующей, святителю Афанасие, от юности полагавый в сокровищницу Церкве Русския плод устен, исповедающихся имени Божию, и ныне в Церкви преподобных Господа воспевающий.
Радостию по Бозе море неверия и зловерия вспять от земли Русския обратил еси, и ныне твоих подвиг море проходя, держим исповедание неуклонное, воспевающе и поюще в сердцах наших Господеви.
Егда дадеся ти благодать не точию во Христа православно веровати, но и по Нем страдати, немокренно мук пучину прошел еси, верным сыном Церкви образ быв, и во исповедании вниде во врата небесная.
Богородичен: Твоего чрева благословен Плод, Богоневесто, Имже земнии вси клятвы избавихомся, Благословенная, Пречистая, несказанное Чудо, недоразумеваемое Ведение, всех верных Спасение.
Песнь 3
Ирмос: Утверждей на камени веры, / на сем созижду Мою Церковь, рекий Господь, / спаси мя, вопиюща: / Ты еси Христе, Сын Бога Живаго, / и в Тебе утвердися дух мой.
Егда восташа отступницы на святыни земли Русския, тогда ты учаще неложно, богомудре Афанасие, како подобает в дому Божии жити, яже есть Церковь Бога Жива, столп и утверждение истины.
Реша безбожнии, несть Бог, приидите, и отставим вся праздники Божия от земли Русския. Ты же глаголал еси, святителю Афанасие: о, безумнии! Чада церковная, храните веру православную, в нейже ваше утверждение.
Повелевал еси верным апостольски, Афанасие богодухновенне, отлучатися от всякаго брата, безчинно ходяща, а не по преданию, и благодатию утверждати сердца.
Богородичен: Едина словом плотию Слова рождшая, Чистая, молимся, избави сетей вражиих души наша и утверди на камени Божественных хотений, яко на Тя упование возложихом.
Седален, глас 4:
Взирая на Начальника и Совершителя веры Иисуса, верою возмогше от немощи, правду соделал еси, святителю Афанасие, в горьких работах множае, в ранах преболе, в темницех излиха, в смертех многащи, в путных шествиих множицею благодушно пребывая, беды от гонителей, беды от лжебратии терпя, темже жизнь вечную наследовал еси (дважды).
Слава, и ныне, Богородичен:
Днесь светло красуется славнейший град Владимир, / радостно совершая, Владычице, / праздник явления Твоего святителю Максиму, в нем бывшаго, / о немже ныне воспоминающе / и молящеся Тебе, взываем сице: / о Пречудная Владычице Богородице, / молися Превечному Архиерею Сыну Твоему, / да непоколебиму утвердит Церковь Православную, / град наш Владимир и всю Русскую землю / в мире сохранит / и спасет в правоверии души наша.
Песнь 4
Ирмос: Ты моя крепость, Господи, / Ты моя и сила, / Ты мой Бог, Ты мое радование, / не оставль недра Отча / и нашу нищету посетив, / тем с пророком Аввакумом зову Ти: / силе Твоей слава, Человеколюбче.
Всякая печаль упраздняется молебными пении твоими, упованием на Бога исполненными, слово бо твое силу от богоугоднаго жития прием, вся возставляет славити Единаго Человеколюбца.
Исповедал еси Господа пред отступники и гонители: с нами Бог, разумейте и покаряйтеся, страха же вашего не убоимся, ниже смутимся, Господа же Бога нашего Того святим, и Той будет нам в страх.
И даже до старости Бог не остави тя, дондеже мышцу Его роду грядущему возвестил еси: яко аще не Господь помогл бы нам, не помянулось бы имя Руси ктому, ныне же силу Его воспеваем.
Богородичен: Доброту Иаковлю, красную Тя, Всечистая, едину обрет от века Пребезначальное Слово, и вселився в Тя, обнови человеческое естество, Егоже моли от всякия мне избавитися скорби.
Песнь 5
Ирмос: Яко бога иного, Блаже, / паче Тебе, не знаем, / к Тебе, Свету незаходимому, от нощи утренююще, / воспеваем Тя, Человеколюбче.
Осиротевше от паствы твоея лицем, а не сердцем, за дело Христово даже до смерти приблизился еси, исповедуя Господа Человеколюбца.
Круг церковный песньми твоими в нощи гонений звездолепно уяснявши, дремание душегубное отгоняеши, во свете исповедания зря Господа Человеколюбца.
От всякой скорби Бог утешаше тя, да возможеши утешати сущия в скорбех, еще же и гонящия благословляти, воспевая Страстоположника Господа Человеколюбца.
Богородичен: Направи мя к покаянию, Твердь умная, Солнце правды нам возсиявшая, яко да увижу свет спасения, Владычице Чистая.
Песнь 6
Ирмос: Иону в ките, Господи, / единого вселил еси, / мене же, связаннаго мрежами вражиями, / яко от тли онаго, спаси.
Церковное исполнение подвиги твоя воспевает, святителю Афанасие, бездну страданий молитвою в ризу спасения претворившаго.
Алчущих слова спасительнаго и безбожными гонении обуреваемых, богоприятными песнопении к тишине упования неложнаго окормил еси.
Текл еси тесным путем, радуяся, Афанасие великоимените. песни свои со слезами покаяния и исповедания Богу возсылая.
Богородичен: Освяти ум мой и просвети сердце мое, Святая Мати Божия, и одержащих мя зол измени, христиан Заступнице.
Кондак, глас 8:
Богодухновенными пении Церковь Русскую украсил еси, / Пречистую Богородицу и святых земли Русская / на умоление Господа за народ Божий сокрушенный призывая, / порабощенному телу, душу непорабощенну соблюл еси, / за овцы Христовы ея полагая и гонителей благословляя, / темже и нас к пажитем небесным возведи, святителю и исповедниче Афанасие.
Икос:
Покаяния проповедниче и утешения ходатаю, / умиления пучино и молитвы столпе, / песнопений живоносных неизсякаемый источниче, / к земле Русской любовию распалаяся, / неверие и зловерие со дерзновением обличал еси, / темже, страдания по Христе волею вземшу на рамо, / злокозненный враг невольно плещи ти даде, / и ныне, вовеки веселяся за лета, в няже видяще злая, / поминай нас, любовию чтущих тя, святителю и исповедниче Афанасие.
Синаксарий
Стихи: Безсмертия тезоименный исповедниче Христов, / со святыми русскими Бога во веки славиши веков.
В сей день память совершаем иже во святых отца нашего Афанасия Песнописца, епископа Ковровскаго, исповедника Российскаго. Да веселятся небесная, да радуются земная, ибо яко новая звезда возсия оный приснопамятный святитель в сонме святых русских, на духовном небе, под коим зиждется земля Русская.
Родился он в лето от Рождества Христова 1887-е, месяца иулия во 2 день и благочестивыми родители Григорием и Матроною в страсе Божий воспитан бе. Во святом крещении имя преподобнаго Сергия Радонежского приемше, во учениих Божественных в лавре Троице-Сергиевой усовершается, таможе образа ангельскаго с именем святителя Афанасия, патриарха Царя-града, Лубенскаго чудотворца сподобляется и от печальника земли Русския несказанной любовию ко Святой Руси исполняется. В лютую же годину гонений на веру православную узы, раны, изгнания и горькия работы тридесять лет от безбожныя власти претерпевает. Обаче никгоже возможе разлучити его от любве Божия, яко апостол Павел к Римляном глаголет, паче же сам святитель Афанасий к любве Божией гонители своя и соузники, неверныя и зловерныя привлекает. Слово Божие усердно проповедуя, службе Божией зело прилежит, аще и на ложи умиляяся, немощи и обстояний ради, и Бога присно хвалит и благодарит. Смирению и воздержанию прилеплялся, мнозех словом и писанием назидает и утешает, милость паче меры стяжевает, дары же прозрения и исцеления утаити тщится. Богодухновенными пении Церковь Божию украшая, за весь мир молитву деет, и в молитве спасения искати чадом своим заповедает. Святии же земли Русския, ихже святитель Афанасий чрез все житие сугубо воспеваше, пред блаженною кончиною ему являются и неизреченныя радости его исполняют. Преставися он в лето от Рождества Христова 1962-е, месяца октобрия в 15-й день, во граде Владимире погребен бе, и доныне благодатную помощь с верою просящим дарует.
Молитвами святителя и исповедника Твоего Афанасия, Христе Боже, утверди землю Русскую в вере православной и помилуй нас. Аминь.
Песнь 7
Ирмос: Божия снизхождения / огнь устыдеся в Вавилоне иногда, / сего ради отроцы в пещи радованною ногою, / яко во цветнице ликующе, пояху: / благословен еси, Боже отец наших.
Имуще щит веры православныя, стрелы разжженныя мучителей отражал еси, песнопоя: аще бо паки возможете, и паки побеждени будете, аз же благословлю Бога отец наших.
Со беззаконными вменився, путем нечестивых никогдаже идый, и ненавидим Господа ради был еси, обаче не опали малодушие сердце твое, поюще любовию Бога отец наших.
Паче силы гонители отяготиша тя, обаче сам в себе осуждение смерти имел еси, надеющеся на Бога, возставляющаго мертвыя, темже от вечныя смерти избавил тя Бог отец наших.
Богородичен: Агнца зрящи воздвизаема на древе неправедне, многопетая Агнице плачущи восклицаше, матерски слезяще, и долготерпение пояше, славяще Сына Своего и Бога отец наших.
Песнь 8
Ирмос: Нечестия органы иную песнь, / благочестия же благовещании пояху гусли: / благословите, дела Господня, Христа вовеки.
Силою многою благовествовал еси, приемше от Господа глаголы: се, удаляющии себе от Тебе погибнут, да исповедают Тя, Боже, вси людие вовеки.
Едем узилище соделав, реку божественных песнопений оттуду источил еси, нечестие потопляя и лице земли Русския и другие страны напаяя вовеки.
Написуя верным благочестивно разум Божественный, Святаго Духа явился еси трость, Емуже со Отцем и Сыном исповедаешися вовеки.
Богородичен: Бессмертнаго Бога рождшая, течение смертное укротила еси, темже умертви, Чистая, страсти телесе моего, да Тя славлю вовеки.
Песнь 9
Ирмос: Благословен Господь Бог Израилев, / воздвигнувый рог спасения нам / в дому Давидове, отрока Своего, / в нихже посети нас Восток с высоты / и направил ны есть на путь мира.
Умиляяся на ложи смертнем, исповедался еси Богу зело усты твоими: Твой есмь аз, спаси мя, Господи, и отпусти, Владыко, раба Твоего с миром.
День от дня сугубейше молитвы творяще, егда иноплеменницы грех ради наших на Русь ополчишася: пощади, пощади, Господи, Отечество наше, и направь мир весь на путь мирен.
Елики сподоби тя Бог скорби, Его ради, претерпети и обращься оживотворил тя, темже, сам искушен быв, чада церковная вкупе соблюди и настави ны на путь мирен.
Богородичен: Тя верою поющия просвети, Всенепорочная, просветительными молниями Сына Божия, из Твоея прошедшаго утробы, и тьмы нас несветимыя изми Твоим предстательством.
Светилен:
Представил еси себе жертву живу Богови, / святу, благоугодну, в словеснем служении и исповедании, / святителю Христов Афанасие, / и тако просветися свет твой в земли Русской, / яко славит выну о тебе Отца Небеснаго.
Слава, ин светилен:
Печальнику земли Русския преподобному Сергию / от юности последовал еси, святителю Афанасие, / и той, яко второе солнце, житие твое озаряше, / с нимже купно моли Триединаго Бога о спасении душ наших.
И ныне, Богородичен:
Свет от Света миру рождшая, / светлости святых сподоби люди земли Русския, Тебе почитающия, / и благодарение от души приносящия Тебе, / не забуди рабов Твоих, едина Благословенная.
На хвалитех стихиры, глас 4:
Святителю Афанасие всехвальне, / ты в годину лютых гонений на Церковь Русскую / украсил еси ю велелепием исповедания / и песнопении богопросвещенными, / и столп Православия явился еси, / узами и ранами искусився / в лишениих, изгнаниих и горьких работах многолетне пребывая, / ныне же, приемше обетование живота вечнаго, / во хвалении Бога величаеши.
Святителю Афанасие богоносне, / егда безбожие сокруши землю Русскую, / премножество силы Божия проповедал еси, / во всем скорбяще, но не стужающе си, / не чаем, но не отчаяваяся, / гоним, но не оставляем, / низлагаем, но не погибающе, / в терпении мнозе, бдениих и пощениих, / во благости, любви нелицемерни и словеси истины, / утверждение Руси, Бога нашего с песнию восхваляюще.
Святителю Афанасие боголюбезне, / по слову Господню враги твоя любил еси, / образ страждущим верным людем русским являя, / кленущия тя благословляше, / добро творя ненавидящим тя, / и моляся за напасти творящих и изгоняющих, / яко да всыновления сподобишися Отцу Небесному, / Егоже ныне со святыми земли Русския / во славе восхваляеши.
Иерусалима Вышняго гражданы, / от земли Русския возсиявшия / и всякое место ея освятившия, / во дни же обстояний сугубо за нея предстательствующия, / ихже чрез все житие воспевал еси, / явишася с Господом пред кончиною твоею утешити душу твою, / яко не ведети ти, в теле или кроме тела, / на земли или на небеси был еси, святителю Афанасие, / Бога дивнаго во святых восхваляя.
Слава, глас 8:
Днесь предстоит Триипостасному Божеству / купно с новомученики и исповедники Российскими / святитель Афанасий, / тепле моляся о Церкви Отечества нашего, / мы же завет его да напишем в сердцах: / Русь православная, храни веру Божию, / в нейже тебе утверждение.
И ныне, Богородичен, глас тойже.
Подобен: О, преславнаго чудесе:
О преславнаго чудесе! Небесе и земли Царица, / от святых сродников наших умоляемая, / доныне землю Русскую покрывает / и лика Своего изображении милостивно обогащает. / О Владычице Державная! Не престани и на будущее время / в утверждение на Руси Православия / милости и чудеса изливати до века. Аминь.
Славословие великое и отпуст.
НА ЛИТУРГИИ
Блаженны от канона, песни 3-я и 6-я.
Прокимен, глас 4: Пойте Господеви преподобнии Его и исповедайте память святыни Его (Пс. 29:5).
Стих: Яко да воспоет Тебе слава моя, Господи Боже мой, во век исповемся Тебе (Пс. 29:13).
Апостол ко Евреем, зач. 334.
Аллилуиа, глас 2:
Праведнии исповедятся имени Твоему, и вселятся правии с лицем Твоим (Пс. 139:14).
Стих: Господи, Господи, сило спасения моего, осенил еси над главою моею в день брани (Пс. 139:8).
Евангелие от Матфея, зач. 38, окончание в зач. 39 (Мф. 10:32-39).
Причастен: Пойте Господеви, преподобнии Его, / и исповедайте память святыни Его (Пс. 29:5).
Тропарь, глас 2:
Святителю отче Афанасие, / никтоже тя разлучи от любве Божия, / но яко луча Солнца правды / во мраце гонений богоборческих / над землею Русскою возсиял еси, / поношения и раны, заточения и дальняя изгнания / и горькия работы / Христа ради тридесять лет претерпевая, / святых сродников наших воспевая и в помощь призывая, / иже пред кончиною твоею купно с Господом явишася тебе, / с нимиже и ныне водворяяся взываеши: / Русь Святая, / храни веру православную, / в нейже тебе утверждение.
Ин тропарь, глас 4, писан к прославлению:
Славы Божия ревнителя / и благолепия церковнаго блюстителя, / тесным житием и многими подвиги / великому иерарху Александрийскому подобника, / святителя Афанасия, исповедника Российскаго, / усердно восхвалим, вернии. / Сей бо присно молится / о спасении земнаго Отечества своего / и о всех живущих в нем, / велегласно с любовию взывая: / Русь святая, / храни веру православную, // в нейже тебе утверждение.
Кондак, глас 8:
Богодохновенными пении Церковь Русскую украсил еси, / Пречистую Богородицу и святых земли Русския / на умоление Господа за Русь сокрушенную призывая, / порабощенну телу душу непорабощенну соблюл еси, / за овцы Христовы ю полагая и гонителей благословляя; / темже и нас к пажитем небесным возведи, святителю и исповедниче Афанасие.
Ин кондак, глас 3, писан к прославлению:
Днесь Афанасий святитель, / Христов исповедник и праведник, / в невечернем Царстве Славы / светло ликует / и в сонме всех Русских святых, / всесоставным гласом победную песнь воспевая, / прилежно молит о нас // Превечнаго Триединаго Бога.
Молитва
О многострадальне и благоглаголиве святителю и исповедниче Христов Афанасие, пастырю добрый овец пажити Церкве Русския, Православия ревнителю, покаяния проповедниче, молитвы столпе, любве неизсякаемый источниче, цевнице богодохновенная! Ты, древнею землею Владимирскою и святою Лаврою преподобнаго Сергия воспитанный, измлада сосуд избран Богу явился еси, ревностно служа Ему словесы и деянии, молитвою теплою, постом неослабным, милостынею нелицемерною. Службе Божией зело прилежа, талант песнотворчества усердно умножил еси и многими духовными песнопении Церковь Русскую украсил еси, наипаче же потрудился в прославлении святых земли Русския, ихже пред кончиною купно с Господом зрети сподобился еси.
Истины ради и кротости, и правды достойно помаза тя во святители земли Владимирския благодать Святаго Духа, еюже просвещен, проповедал еси Православия предания неуклонно посреде безбожных гонителей, аще и в заточениих, изгнаниих и горьких работах тридесять лет пребыл еси, поношения, озлобления и раны за Христа сладце претерпевая. Ты, священное исповедание, яко забрало, восприим, богохульныя дерзновенно обличил еси и безплотныя враги посрамил еси, паству свою делы паче слов поучая, яко Богу подобает повиноватися паче человек.
Темже блаженства изгнанных правды ради сподобився и престолу пренебесному предстоя, моли Всеблагаго Бога нашего, да возродится Русская земля святым покаянием, да утверждается Православная Церковь Русская незыблемо от ересей, расколов и гонений, да пребудут пастыри и чада ея тверды во исповедании святаго Православия и единым сердцем и единеми усты прославляют дивнаго во святых Своих Бога, Отца и Сына и Святаго Духа, во веки веков. Аминь.
Акафист святителю Афанасию, епископу Ковровскому,
исповеднику и песнописцу.
Кондак 1
Возбранниче светлый на тму века сего, во вся оружия Божия облеченный и веру Христову, аки щит, противу суетных мудрований державый, восхваляем тя любовию, святителю и исповедниче Афанасие, ты же яко молитвенник о нас ко Господу дерзновенный, утверждения в истине Православия испроси нам, зовущим: Радуйся, Афанасие, новый исповедниче и Православия учителю.
Икос 1
Ангельскаго чая образа, Афанасие блаженне, измлада игранием детским не внимал еси разумом, молитвам же теплым во храме Господни и рукоделию в доме матернем, аки бы в келлии, всегда прилежа, дерзновенно предвозвещал еси отроком, сверстным тебе, яко имаши быти Церкве Христовы служитель священный. Ведуще убо мы, яко Промыслом Божиим сбыся речение твое, со удивлением зовем ти:
Радуйся, древнею и святою землею Владимирскою в добронравии воспитанный; радуйся, в Лавре преподобнаго Сергия лику инокующих вчиненный.
Радуйся, постом и молитвою житие богоугодное стяжавый; радуйся, от Господа к подвигу свидетельства во дни лукавыя избранный.
Радуйся, благолепия церковнаго блюстителю; радуйся, премудрым Православия наставником подобниче.
Радуйся, Афанасие, новый исповедниче и Православия учителю.
Кондак 2
Видев, яко лютое на Церковь Российскую гонение наста, не точию гнев Божий, праведно движимый на ны, помышлял еси оное, Афанасие богоразумне, но паче премудрую жатву душам, яже созреша в живот вечный, и сего ради Господу жатвы Христу воспевал еси: Аллилуиа.
Икос 2
Разумея Собор всех святых земли Русския, Отечеству нашему от бед избавление быти, словеса тем праздничная нача слагати, богодухновенне, песньми дивными Церковь украшая. Мы же, грешнии, ныне тя зряще в лице присно тобою чтомых угодников Божиих, восписуем ти похвальная сия:
Радуйся, молений умиленных слагателю; радуйся, пения Господеви разумнаго рачителю.
Радуйся, чудотворцев Российских чисте возлюбивый; радуйся, предстателей страны нашея в помощь всегда призывавый.
Радуйся, яко страстотерпцы новыя увенчал еси на земли похвалами; радуйся, яко в сонме тех на Небеси Бога славиши.
Радуйся, Афанасие, новый исповедниче и Православия учителю.
Кондак 3
Силу мняще безбожницы на правоверие прияти, честныя мощи святых земли Владимирския посреде Успенскаго храма соборнаго непокровенны поставиша, во еже посмеитися им, ты же, доблий ратниче Христов, народу во храм притекшу, воззвал еси велегласно: Благословен Бог наш! И тако злоумысляемое святыням поругание в молебное прославление претворил еси, с верными вкупе вопия Богу: Аллилуиа.
Икос 3
Имеющу ти почтенну быти честнейшим епископства саном, всуе потщишася гонители Церкве Христовы прежде архиерейства твоего грозными словесы и прещении тя устрашити, яко благодать Святаго Духа достойно помаза тя во святители земли Владимирския, идеже исповедник и Православия учитель явился еси, Афанасие боголюбезне. Поминающе убо ревностное служение твое, глаголем ти сице:
Радуйся, веры правыя крепкий поборниче; радуйся, раскола новейшаго небоязненный обличителю.
Радуйся, мудрований века сего, возносящихся на разум Божий, посрамление; радуйся, от волков, в одежде овчей во стадо Христово входящих, ограждение.
Радуйся, смущением колеблемых в истине утверждавый; радуйся, отступников ко обращению приводивый.
Радуйся, Афанасие, новый исповедниче и Православия учителю.
Кондак 4
Бури и смятению раскола противу стоя, аще и в заточение бысть неправедно ввержен, святителю Божий, обаче не оставил еси кормила церковнаго, вся верныя писаньми твоими увещавая и моля, да не соединяются с отступниками ни да боятся лукаваго того времене, но яко малое стадо, емуже благоизволи Отец Небесный дати Царство, взывают выну: Аллилуиа.
Икос 4
Слышавше, дивляхуся вси вернии благодушию твоему, исповедниче, темницу бо, в нюже затворен бысть, прибежище благое от поветрия обновленческаго нарицал еси, имея же тамо соузников немало, вкупе с тобою за веру Христову страждущих, веселился еси о Господе со единомысленники твоими, вся святыя земли Русския молитвенно воспевая. Мы же, яко достойный образ нам злострадания являеши, приносим ти таковая:
Радуйся, темницу молитвенным сиянием озаривый; радуйся, и во вратех смертных Жизнодавцу хвалу возсылавый.
Радуйся, страждущих истины ради милосердый утешителю; радуйся, и безбожников заточенных человеколюбный питателю.
Радуйся, скорбьми от любве Божия не разлученный; радуйся, в терпении твоем от Господа укрепленный.
Радуйся, Афанасие, новый исповедниче и Православия учителю.
Кондак 5
Богохранимаго избранника помышляем тя, друже Христов Афанасие, зане на брезе Онежскаго езера в темнице нарочито учиненной, да бы заточенныя тамо смерти удобно предати, мнози спленницы твоя нуждне от мучителей кончину прияша, тебе же, трие месяцы день и нощь убиением безсудным угрожаема бывша, избави Господь Многомилостивый, Емуже благодарно воззвал еси: Аллилуиа.
Икос 5
Видя всегда очима сердца твоего, духоносне Афанасие, коликими ранами и труды стяжаша отцы святии истинное по Бозе житие, досады и укоризны многая претерпевал еси, гонителей твоих, яко заповеда Христос, благословляя. Обременен же быв горькими работами, во узилищи, аки вторый Иоанн Дамаскин, вся места нечистая рукама твоима безропотне омывал еси. Неизреченнаго ради смирения твоего приносим ти похвальная сия:
Радуйся, кротости пречудныя образе; радуйся, блаженнейшаго послушания сыне.
Радуйся, от нечестивых уничижение в честь себе вменивый; радуйся, обидящим тебе вседушно погрешения простивый.
Радуйся, враждебников твоих возлюбителю нелицемерный; радуйся, ненавидящим тебе благодетелю усердный.
Радуйся, Афанасие, новый исповедниче и Православия учителю.
Кондак 6
Проповедник немолчен Евангелия Христова и в темницах явился еси, Афанасие досточудне, разбойников бо даже и душегубцев суровых к покаянию приводил и научал еси песнь хвалы и благодарения воспевати Богу: Аллилуиа.
Икос 6
Возсиявшу тебе в темнице светом истины, приказа мучитель некий отвести тя во узилище иное, и стражницы, яже ведоша тебе, немилосерди быша зело и томляху тя, старче святый, скоро гоняще, во еже малыми деньми прейти толикую долготу пути. Таже гладом в заточении том непрестанно морим бысть, яко едва тебе живу остатися. Обаче, крепостию телесною изнемогая, не изнемогал еси терпением, вся Христа ради препобеждая. Мы же, таковому дивящеся подвигу твоему, поем ти сице:
Радуйся, без крове мучениче добропобедный; радуйся, воине Христов непреодоленный.
Радуйся, огнем страданий паче злата искушенный; радуйся, в мужестве непоступнем паче адаманта утвержденный.
Радуйся, кротце в жертву правды Бога ради себе предавый; радуйся, слезами всеянное радостию пожавый.
Радуйся, Афанасие, новый исповедниче и Православия учителю.
Кондак 7
Хотяще безбожницы, исповедания ради и сана твоего святительскаго, не отпустити даже по заточении тя свободна, глаголаша лукавне, яко ни от кого имаши обрести послужения в старости твоей, и затвориша тя в темничнем доме призрения, где паче неже в узилищи, безчисленными скорбьми и поношении стужаху ти. Но попечением христиан благочестивых от горшаго места онаго изведен был еси, воспевая помощи подателю Богу: Аллилуиа.
Икос 7
Новому наставшу гонению на Церковь Христову, повелеша богопротивницы заключити святыя храмы, а иныя до основания разорити. Ты же, на Господа надеяся несумненно, мужество ближним твоим внушал еси, да не будут страшливи и малодушии, рече бо Господь, яко врата адова не одолеют Церкви Его. Темже вопием ти сице:
Радуйся, неизреченнаго милосердия Христова добрый вестниче; радуйся, благонадежнаго упования Божия тихий Ангеле.
Радуйся, глубиною покаяния высоту смиренномудрия стяжавый; радуйся, от сыновняго Церкви послушания к совершению святых отец ея востекший.
Радуйся, за Отечество наше молитвенниче непрестанный; радуйся, ходатаю о людех его ко Творцу неусыпный.
Радуйся, Афанасие, новый исповедниче и Православия учителю.
Кондак 8
Странное и неудобь разумеемое чудо яви о тебе Господь, святителю Афанасие, литургисавшу бо ти во святей обители преподобнаго Сергия, нецыи от молящихся зреша тя аки бы волною, из алтаря святаго и паки во оный по воздуху износима и вносима быти. Самовидцы же чудеси тому со удивлением возопиша в сердцах своих Богу: Аллилуиа.
Икос 8
Всем неблагоразсудным, яже точию в домех своих молишася, общения же церковнаго ся отлучаху, богоразумными словесы и посланьми твоими, наказовал еси, миротворче усердный, присоединится, аки удом, прочему телеси церковному, да раскола бы новаго не сотворили, и тех к согласному единомыслию добре управил еси. Того ради и мы, мира днесь Церкве Православней и скораго раздором утоления взыскующе, зовем ти:
Радуйся, соблазны и несогласия среде верных потребивый; радуйся, хитона церковнаго раздранию возбранити предуспевый.
Радуйся, расточенныя овцы Христовы во едино стадо собираяй; радуйся, заблуждающих от пути истиннаго к покаянию обращаяй.
Радуйся, яко послушанию Матери Церкви чада ея наставляеши; радуйся, яко веру православную хранити научаеши.
Радуйся, Афанасие, новый исповедниче и Православия учителю.
Кондак 9
Всю верным бывшую радость кто изрещи возможет, святителю славне, егда во Владимире граде явился еси, празднества ради осми сот летом собора Успенскаго; како клирицы и вся люди сладце зряху на тя и любезно о Господе тя целоваху; таже видением твоим духовнаго веселия исполньшеся, вмале не на руках своих внесоша тебе во храм, поюще Богови: Аллилуиа.
Икос 9
Ветию тя преизящна показа Господь, Афанасие благоглаголиве, песньми новыми украсившаго памяти и праздники святых земли Русския, гимны бо церковныя и канонов словеса слагая, в таковых трудех душеполезных и Церкви Христовой зело потребных, препроводил еси лета довольна, оттуду же и песнописца прозвание стяжал еси. Мы же, от умиленных глаголов твоих и до днесь, аки пищею духовною питающеся и аки сладким потоком ся напаяюще, восхваляем тя:
Радуйся, талант песнотворчества, от Бога ти данный, изрядно умноживый; радуйся, молитвословия многоразлична, послушания ради церковнаго, со тщанием добре исправивый.
Радуйся, цевнице духовная, сердца наша увеселяющая; радуйся, источниче изобильный, воду живоносную нам источающий.
Радуйся, яко песнописцы новыя к усердию благочестивому подвизаеши; радуйся, яко, от словес твоих оправданный, и нам у Бога оправдания молиши.
Радуйся, Афанасие, новый исповедниче и Православия учителю.
Кондак 10
Спасенному пути по вся дни чада церковная наставлял еси, духоносне Афанасие, мнози бо вернии с любовию к тебе течаху, да бы поучитися от честнаго жития твоего, поелику сердцем смирен и тих обычаем, негневлив и кроток, и всех добродетелей исполнен сый, делы твоими паче словес научал еси пети Богу: Аллилуиа.
Икос 10
Стену твердую от навет и козней вражиих веру православную первие проповедал еси, старче святый, таже покаяние слезное и молитву непрестанную вкупе с богоугодными делы, и себе на служение всем приходящим к тебе предавая, многих ко спасению добре управил еси. Сего ради и мы, недостойнии, руководствия добраго требующе, вопием ти тако:
Радуйся, недоумевающим благий советниче; радуйся, заблуждающих кроткое вразумление.
Радуйся, душ смятенных сладостный умирителю; радуйся, неудобоизцельных страстей отгонителю.
Радуйся, лукавыя помыслы в сердцах человеческих провидевый; радуйся, благоуветливыми словесы ко отложению греховнаго прилога увещававый.
Радуйся, Афанасие, новый исповедниче и Православия учителю.
Кондак 11
Пению молебному прилежаща усердно, утеши тя Господь пред кончиною видением чудным, яко святых земли Русския, ихже присно почитал бе любовию, зрети сподобился еси купно со Христом, Емуже абие воззвал еси: Аллилуиа.
Икос 11
Светом Божественнаго явления осиянный, последний бо день и час блаженнаго исхода твоего провозвещен бысть от Господа ти, мирно предал еси, тайновидче, душу твою в руце Христа Бога, Егоже от юности возлюбил и за Негоже толикая пострадал еси. Но яко в животе своем, подвижниче велий, свет бысть миру такожде и по преставлении чудесы многими озарити нас не престаеши, зовущих:
Радуйся, воина юнаго от лютыя смерти чудесно избавивый; радуйся, вдовицу благочестивую из руку зловольника дивно исхитивый.
Радуйся, яко персть и былие от гроба твоего недужным исцеления подаваша; радуйся, яко мнози при гробе твоем молившеся, душепагубным страстем врачество обретоша.
Радуйся, честнаго брака христианскаго известный покровителю; радуйся, девствующих и целомудренных заступниче благонадежный.
Радуйся, Афанасие, новый исповедниче и Православия учителю.
Кондак 12
Благодать, юже тесным твоим житием и подвиги многими у Бога стяжал еси, ведая, освященный Собор Православныя нашея Церкве сопричте тебе сонму всех русских святых, в том же светло ликуеши ныне, всесоставным гласом воспевая победную песнь: Аллилуиа.
Икос 12
Поем тя со умилением, святителю достохвальне, яко во обители горней вселивыйся, на земли нам оставил еси честныя твоя мощи, яже благоговейно днесь почитаем и скораго исцеления скорбем душевным и телесным чающе, взываем ти тако:
Радуйся, блаженства изгнанных правды ради праведно удостоенный; радуйся, в светлостех немерцающих Пресвятыя Троицы присно живущим соводворенный.
Радуйся, ангельским чином сликовствующий в вышних; радуйся, от человек похвалы досточестно приемлющий в нижних.
Радуйся, верою тя почитающим скорое утешение; радуйся, любовию тя воспевающим благое веселие.
Радуйся, Афанасие, новый исповедниче и Православия учителю.
Кондак 13
О святителю благоглаголиве Афанасие, имене Божия досточудный исповедниче, земли Владимирстей радование и Церкви Святей украшение, убогое сие услыши моление наше и благомощное ходатайство твое вознеси о нас Господеви, да вся полезная ко спасению душевному нам дарует, во еже непреткновенно внити нам в Царство Небесное и воспета тамо Живоночальной Троице: Аллилуиа.
Сей кондак глаголи трижды. И паки чтется первый икос: Ангельскаго чая образа… и кондак первый: Возбранниче светлый…
