Гимнография сщмч. Анатолия, митр. Одесского (1938)
Служба священномученику Анатолию, митрополиту Одесскому
На велицей вечерни
Блажен муж 1-й антифон.
На Господи, воззвах: стихиры праздника 3
и священномученика 5, глас 4.
Приидите, христоименитии людие, / песньми духовными похвалим Анатолия чуднаго, / апостольских престолов сонаследника / и ликов мученических сопричастника твердаго, / и глас услышим дивнаго священномученика, / от небесныя славы нам вещающий: / чадца моя духовная и возлюбленная, / храните твердо веру апостольскую, / яже во благочестии всю вселенную утверди, / храните, чадца, веру отеческую, / еяже ради и аз страдания претерпех, / храните даже до сканчания века // веру святую Православную.
Приидите, православных собори, / пение боголепное принесем днесь Анатолию, / святителю преславному и богомудрому, / во мучениих твердому исповеднику / и, того похваляюще, усердно возопием: / о треблаженне отче и досточудне, / града и страны нашея заступление, / Церкве Православныя воистину дивное украшение, / моли о нас Господа Человеколюбца, // Анатолие отче наш.
Всекраснейшее Церкве Христовы украшение / и ангельских ликов купножителя, / святителя же и мученика преславнаго / приидите вси радостию воспоим, / Крест Христов на рамена своя подъемльшаго / и даже до Голгофы за Господом последовавшаго, / сего ради, страстем его поклоняющеся, / верою и любовию взываем: / моли о нас Господа Человеколюбца, // Анатолие отче наш.
Великаго во иерарсех Анатолия, / и твердаго во страданиих исповедника / ныне вся вселенная проповедует / и ангели купно с лики земнородных / славу днесь возвещают единаго от новомученик, / не убоявшагося злобы богоборцев / и ярости безбожных не устрашившагося, / егоже воспевающе, вопием: / моли о нас Господа Человеколюбца, // Анатолие отче наш.
Ангела досточуднаго Церкве Одесския / небесная воинства радостию днесь величают / и мученичестии лицы песньми прославляют / единаго от новомученик и исповедник, / вселенная же вся веселия исполняется, / память совершающе священномученика Анатолия / и люди православнии сему усердно вопиют: / заступи молитвою твоею град и люди, // память твою светолепно совершающия.
Слава, глас 4:
Грядите людие, / священномученику дивному поклонимся, / Анатолию всепетому и богомудрому / и сему усердно возопиим: / о златословесная богословия трубо и сосуде всекраснейший Пресвятаго Духа, / мучениче всекрепкий и препрославленный, / страданьми вшедый в радость Господа своего, / Егоже непрестанно моли от всякаго зла сохранити град и люди, // память твою светолепно совершающих.
И ныне, праздника, глас тойже: Трепеташе рука Крестителева:
Вход. Свете тихий. Прокимен дне. Чтения три.
Притчей чтение:
Память праведнаго с похвалами:
Притчей чтение:
Праведник аще постигнет скончатися:
Премудрости Соломоновы чтение:
Уста праведнаго каплют премудрость:
На литии стихиры, глас 8:
Подобен: О преславнаго чудесе:
Глас Господень услышал еси, глаголющ: / возьми крест свой и по Мне гряди, / с радостию за Христом последовал еси, / и ко страстем с веселием течение совершающе, / яко знамение спасения Крест Христов прием, / ярость вселютейшую победил есть / и новомученик преславный явился еси, отче Анатолие, / темже и мы, любовию тя днесь воспевающия, // радости вечныя причастники явитися сподоби.
Слава, глас тойже:
Потщашеся вселукавии служители беззакония / отторгнути землю нашу / от веры отеческия / и воздвигнуша жестокая гонения на Церковь Православную, / ты же, отче треблаженне Анатолие, / яко свеща светолепная явился еси, / во тьме безбожия верою пламенеющая, / юже не поколебаша шатания еретическая / и погасити не возмогоша преисподнейшая злоба нечестивых. / Сего ради яко столпа веры Православныя / и единаго от лика новомученик / вселенная вся тя днесь похваляет / и лицы песнословцев славу твою проповедуют, // досточудне и преславне Анатолие.
И ныне, праздника, глас той же:
Днесь тварь просвещается:
На стиховне стихиры, глас 5.
Подобен: Радуйся, Живоносный Кресте:
Радуйся, преславне отче Анатолие, / архипастырю истеннейший людем православным, / не убоял бо ся еси волков злобы душетленныя, / стадо твое расхитити тщащихся, / но душу свою за чада твоя предал еси, / Пастыреначальника Великаго сый верный учениче, / темже и ныне не забуди стадо твое, // но молитвами твоими во Православии нас утверди.
Стих: Честна пред Господем / смерть преподобных Его.
Радуйся, священномучениче Анатолие, / Евангелия вечнаго воистину проповедниче неленостный, / житием бо твоим Истины свидетель был еси / и, страданьми житие непорочно запечатлевши, / новомученик и исповедник явился еси всепетый, // темже ти похвалы днесь радостию приносим.
Стих: Что воздам Господеви о всех, / яже воздаде ми.
Радуйся, Анатолие отче наш, / ревностный служителю Церкве Православныя, / смуты бо богомерзкия / расколов безбоязненный обличитель явился еси, / темже ныне ти припадая вопием: / вознеси, треблаженне отче, молитвы, / да утишит Господь бури искушений и соблазнов, / да умирит ересей и расколов вселестнейшая шатания, // да ниспослет Церкви Своей мир и велию милость.
Слава, глас 1.
Подобен: Небесных чинов:
Священномученика Анатолия днесь величающе воспоим, / той бо молитвою душу очистив, / ко мучением радостно шествовал со апостолом вопияше: / вся могу о укрепляющем мя Иисусе; / темже Всесильне Господи, молитвами треблаженнаго Анатолия // ниспосли Церкви Твоей мир и велию милость.
И ныне, праздника, глас 4:
Тебе в дусе и огни очищающа грех мира:
Тропарь, глас 5:
Во святителех благочестно пожил еси, / и мучения путь скончав, / богоборцев ярость посрамил еси, / поборник быв Христову стаду, богомудре. / Темже тя почитаем ныне, вопиюще: / священномучениче Анатолие, / моли Христа Бога, // спастися душам нашим.
НА УТРЕНИ
На Бог Господь: тропарь праздника, дважды.
Слава, святаго. И ныне, праздника.
По 1-м стихословии седален, глас 3:
Крестоношения вольнаго радости вечныя причастник воистину показался еси, отче Анатолие, и вся научаеши за Христом радостно шествовати даже до страстей и Голгофы, темже молитвою твоею чада твоя утверди, да благое иго Христово на рамена подъемлюще, сподобимся радости Пасхи вечныя причаститися.
Слава, и ныне, праздника:
Владыка днесь на Иордан прииде:
По 2-м стихословии седален, глас 4:
Страстьми твоими уязвил еси богомерзкую гордыню вселукаваго человекоубийцы древняго и безбожных посрамил дерзновение нечестивейшее, темже тя радостию прославляем, яко всеславнаго ярости демонския победителя.
Слава, и ныне, праздника:
Богоявления время, Христос явися нам во Иордане реце:
По полиелеи седален, глас 1.
Недостойных устен немощное пение / от любве ти восписуемое, отче Анатолие, / приими и призри от пренебесныя великия славы твоея / на люди, память твою верно совершающия / и усердно вопиющия: / радуйся, благоуханное молитвы кадило, / радуйся, столпе недвижимый веры православныя, / радуйся, молние еретическое злочестие попаляющая, / радуйся, Церкви нашея чудное украшение / и града нашего всепетое заступление, // радуйся, Анатолие отче наш.
Слава, и ныне, праздника, глас тойже:
Струи освятил еси Иорданския:
Степенна, 1-й антифон 4-го гласа.
Прокимен, глас 4-й: Уста моя возглаголют премудрость, / и поучение сердца моего разум.
Стих: Уста праведнаго поучатся премудрости, / и язык его возглаголет суд.
Всякое дыхание:
Евангелие от Луки, зачало 106.
По 50-м псалме стихира, глас 6:
О, дивнаго и преславнаго чудесе! О явления силы Божией! Кровь мученика семенем веры является / и сокрушаются демонския дерзости. / Церковь необорима враты адовы пребывает / и люди православнии память совершают Анатолия, / священномученика новаго // и молитвенника о душах наших.
Канон праздника со ирмосом на 6 и святаго на 8.
Канон святаго, глас 2. Егоже краегранесие: Пение немощное приими, отче Анатолие.
Песнь 1
Ирмос: Непроходимое волнящееся море:
Песнь победную воспевающе, приидите составим лицы и похвалу принесем дивному Анатолию, священномученику славному и всепетому.
Едиными усты и единым сердцем ликовствующе, воспеваем песнь, любовию величающе Анатолия, и сему молитвы приносим, священномученику славному и всепетому.
Ныне ангели и человецы неизглаголанныя радости исполняются, ныне вся вселенная ликовствует и православнии люди похвалу воспевают Анатолию, священномученику славному и всепетому.
Богородичен: Исаино проречение исполнишася и поколебашеся мрачная основания адовы и ангельстии чини удивишася и земнородных лицы ликующе воспеша Рождество Твое, Богородице Дево Чистая и Всепетая.
Катавасия праздника.
Песнь 3
Ирмос: Иже в начале премудростию Твоею, Христе:
Единый Истинный и Всепетый Господь избра тя от рождения, Анатолие отче наш, и ко служению многотрудному призва, да явишися исповедник веры отеческия.
Небеснаго Царя от юности твоея возлюбил еси, отче Анатолие, Тому послужити возжелел еси всем сердцем, сего ради яви тя Господь людем православным пастыря добраго и новаго исповедника веры отеческия.
Евангельскии глаголы от юности распалиша сердце твое огнем пренебесныя божественныя любве, еяже и нас причаститися сподоби, новый исповедниче веры отеческия.
Богородичен: Мати Божия Всепетая, Госпоже Дево Богородице, милостию Твоею заступи люди, Тя воспевающия, и недвижимо утверди до скончания века Православную Святую веру отеческую.
Кондак и икос праздника.
Седален священномученика, глас 1:
Анатолие всеславне отче наш, от чад твоих возносимое днесь пение яко фимиам благоуханен приими и молитвою твоею во Православии утверди страну нашу, священномучениче досточудне и всеблаженне.
Слава, и ныне, праздника, глас тойже:
Иисусу родшуся от Девы Марии:
Песнь 4
Ирмос: Пою Тя, слухом бо, Господи:
Огнем разжегшеся любве яже ко Христу, отче Анатолие, отбежал еси лукавства мира сего и, ангельскому ревноваше житию, облеклся еси во иноческий чин, да Господу послужиши неленостно.
Шествовати возжелел еси путем тесным жития монашескаго, и отверглся суетнаго лукавства и соблазнов многомятежнаго мира сего, и явился еси наставник монахов, и служитель Господень неленостный.
Не возмогша красная и лукавая прельстити тя, отче, всем сердцем доброту Небесную возлюбившаго и ангельскому житию прилепившагося, ангелом воистину сомолитвенника и Господня служителя неленостнаго.
Богородичен: От Небесных ликов пение возсылается присно Ти, Владычице Всенепорочная, вселенней всей милости истощающей, и людие православнии песни Ти возносят неленостно.
Песнь 5
Ирмос: Просвещением заповедей Твоих, Едине Щедре:
Епископскаго служения бремя многотрудное возложи на рамена твоя Господь, Анатолие предивне, да во время бед и искушений явишися людем укрепление и Церкве Православныя дивный архипастырь.
Предивный и Божественный свет осия лице твое, отче Анатолие, егда совершашеся архиерейское поставление твое, сим являя тя новаго чудотворца и Церкве Православныя дивнаго архипастыря.
Руце в преподобии и чистоте воздевающе, в молитве ко Господу за мир весь ходатайствовал еси, яко кадило благовонное благоухающе, сего ради прославляем тя, молитвенника великаго и Церкве Православныя дивнаго архипастыря.
Богородичен: Иесеова корня благочестиваго Отрасле Пречестная, Преблагословенная Мати Божия, прозябшая Цвет нетления Христа Бога нашего, Егоже моли помиловати люди православныя, присно Ти моления приносящия.
Песнь 6
Ирмос: Прообразуяй Твое погребение, Крест и страсть Иона:
Ирода древняго и Нерона безбожнаго наследницы новии лютейшее гонение потщашася на Церковь воздвигнути и на тя дерзнуша руцы возложити, Анатолие отче наш, но ты злобы демонския посрамитель явился еси.
Многомятежную лютейшую бурю гонений мира сего князь воздвиже и адовых врат служители всебезбожнии Церковь Христову сокрушити потщашася безумием своим, ты же, отче, Православия столпе несокрушимый, в крепости своей злобы вражия посрамитель явился еси.
Истину попрати восхотеша демонския лести поборницы, на Церковь Христову восташа змия древняго вселукаваго служители безумнии, но крепостию твоею, Анатолие отче наш, злобы вражия посрамитель явился еси.
Богородичен: Огнем купина неопалимая, Тя, Богородице Всечистая, прообрази древле, темже молим Тя, Всемилостивая Владычице, огня геенскаго избави рабы твоя.
Кондак, глас 5:
Апостолов сопрестольниче / и святителей украшение, / православным щит и утверждение был еси, / просвещая безбожия нощь глубокую; / сего ради явился еси священнострадалец за Христа, / от бед избави нас твоими молитвами, // священномучениче Анатолие.
Икос:
Ничтоже возмогло есть отлучити тя от любве Божия: ни скорбь, ни теснота, ни гонения, но вся сия превозмогл еси силою возлюбленнаго тобою Господа Иисуса, за Ним же последовал еси, отвергше ветхаго человека и вземше крест свой, имже посрамил еси злобу и ярость богоборцев. Сице пришедше от скорби велией и убелиша ризы своя кровию за Христа излиянною, в радости предстоиши ныне пред престолом Божиим и ходатайствуеши о мире всем, отче священномучениче Анатолие.
Песнь 7
Ирмос: Херувимы подражающе, отроцы в пещи ликовствоваху:
Терпение твое кто изрещи возможет, и крепость твою кия уста дерзнут воспети, отче Анатолие, исповедниче преславный и священномучениче досточудный, во страдании своем явивыйся столп непоколебимый Православия.
Чудо всеславное зряще, удивляхуся чини небеснии, како естеством сый един от земнородных, мучения яко безплотен терпиши и страданьми твоими в селения ангельския восходиши и являешися столп непоколебимый Православия.
Естество человеческое превозмогающе крепостию яже ко Господу любве, мраз и глад, раны и поношения терпел еси, и в темнице, яко во храме красном молитвою пламенеюще, столп непоколебим явился еси Православия.
Богородичен: Ааронов жезл прозябл иногда, таинство Твое прообразуя, Дево Всепетая Богородице, ангельских чинов радование и утверждение людем православным.
Песнь 8
Ирмос: Глагол мучителев понеже превозможе:
Не возмогоша тя, отче треблаженне, ни скорбь, ни теснота, ни гонения от любве Божия отлучити, но на Голгофу за Христом шествовал еси радостно, священномучениче преславный Анатолие.
Ангели воспеша страдания твоя и демонския полки вострепеташа, егда ко Господу шествовал еси, яко знамение победы крест носяще, священномучениче преславный Анатолие.
Тесная узилища и мрачная светом пренебесным озарени быша, егда душа страдальца безвиннаго ко престолу Божию возношашеся, идеже и ныне о мире всем молитвы своя возносит священномученик преславный Анатолий.
Богородичен: Огнезрачнии серафими недоумеют тайну Твою, Богородице, разумети, мы же како по достоянию возможем Тя воспети, обаче, любовию побеждаеми, песни Ти дерзаем возносити, Владычице.
Песнь 9
Ирмос: Чудо преславное и таинство странное:
Лукавая и нечестивейшая шатания безбожных невозмогоша веру твою сокрушити, Православия адаманте всетвердый, и тщание немощное сокрушися подвигом твоим, темже вся вселенная ти пение приносит.
Исповедниче всепетый веры Православныя, отче досточудне и всехвальне Анатолие, не устрашился еси иногда злобы адския, темже ныне полки демонскии молитвы твоея трепещут и вселенная вся ти пение приносит.
Егоже ради страдания и смерть претерпети сподобился еси, отче Анатолие, Господа Иисуса моли непрестанно со всеми новомученики и исповедники Русскими страну нашу недвижиму во Православии утвердити до скончания века.
Богородичен: Всепречистая Дево Мати Божия, Всемилостивая Владычице и Всепетая, к Твоему притекаем заступлению и Тя усердно молим: страну нашу недвижиму во Православии утвердити до скончания века.
Светилен:
Церкве поборниче всесвятый, Анатолие преславне и богомудре, дерзновенною молитвою твоею умири вся ереси и расколы и на камени веры православныя недвижимы чада твоя утверди, священномучениче отче Анатолие.
Слава, и ныне, праздника:
Явися Спас, благодать и истина:
На хвалитех стихиры праздника 3 и
священномученика 3, глас 2.
О вселукавое и безбожное собрание, / о служителие злобы поднебесныя, / нечестивии люди и безбожнейшии, / како дерзнули есте на святителя руце возложити, / или кто настави вас на мучения старца богопросвещеннаго предати, / или коея ярости исполнени бысте, / егда убили есте дивнаго архипастыря, / но сей злобы демонския явился еси посрамитель преславный // и молитвенник всепетый о душах наших.
О безчестие злобы окаянныя, / на благочестие дерзнувшее вооружитися; / о яростное намерение людей безбожных, / возставших на Церковь Православную. / Ныне сии посрамлены суть / и погублени всечестным Крестом Христовым, / егоже, яко меч восприем священномученик Анатолий, / страдании во пренебесныя селения восходит / и является людем православным заступление необоримое // и молитвенник преславный о душах наших.
О всеоружие злобы поднебесныя, / брань воздвигнувшее противу Церкве Божия, / дерзнувшее святыя храмы разорити / и нечестиво убити служителей веры Христовыя. / Ныне разорени быша вся лукавая твоя советования / и Церковь необорима враты адовы красуется, / светло прославляющи единаго от новомученик, / пречуднаго и вседивнаго Анатолия, / той бо явился еси чудотворец изрядный // и молитвенник усердный о душах наших.
Слава, глас 6.
Подобен: Тридневен:
Ликуй ныне, богоспасаемый граде Одессо, / яко лучами солнечными просвещаемый чудотворным образом Касперовским; / се бо богомудрый Иннокентий / со твердыми во мучениих Анатолием и Григорием, / пречудный Гавриил-храмостроитель / и дивный в чудотворениих Иона / со преподобным отцем Кукшею, / яко звезды небесныя сияющи, / присно молятся спастися граду нашему // и всем верою живущим в нем.
И ныне, праздника, глас 8:
Господи, исполнити хотя:
Славословие великое. И отпуст.
НА ЛИТУРГИИ
Блаженны праздника, песнь 5-я и священномученика, песнь 6-я.
Прокимен, глас 7: Честна пред Господем / смерть преподобных Его.
Стих: Что воздам Господеви о всех, яже воздаде ми.
Апостол ко Евреем, зачало 335.
Евангелие от Иоанна, зачало 36.
Причастен: В память вечную будет праведник, от слуха зла не убоится.
Тропарь, гл. 5
Во святителех благочестно пожил еси, и мучения путь скончав, богоборцев ярость посрамил еси, поборник Христову стаду был еси, богомудре. Темже тя почитаем ныне, вопиюще: священномучениче Анатолие, моли Христа Бога спастися душам нашим.
Кондак, гл. 5
Апостолов сопрестольниче и святителей украшение, православным щит и утверждение был еси, просвещая безбожия нощь глубокую. Сего ради явился еси священнострадалец за Христа. От бед избави нас твоими молитвами, священномучениче Анатолие.
Молитва
О священномучениче святителю отче Анатолие! К тебе, молитвеннику теплому и пред Богом предстателю усердно притекаем. В лютую годину гонений и испытаний земли нашея, внегда безбожныя врази предаваша смерти верныя рабы Божия и церкви святыя сокрушаша, яви тя Господь Церкве Своея столпа непоколебима и людем Божиим пастыря добра, душу свою за овцы полагающа и волки душепагубныя далече отгоняюща. Ныне убо призри на нас, со умиленною душею и сокрушенным сердцем тебе призывающих. Крепость бо наша в нас оскуде и вражия ловления и сети окружиша нас. Молися за нас ко Господу Богу, да не погибнем до конца со беззаконьми нашими, но да обратит нас на стезю покаяния и спасения, да простит нам вся согрешения наша, избавит нас от нашествия иноплеменников, междоусобныя брани и всяких раздоров и нестроений. Утверди, священномучениче, веру и благочестие во всех чадех Церкве Православныя, испроси нам от Господа мужества дар, да явимся наследницы Царствия Небеснаго, сохраняя верность до конца жизни нашея Господу Богу и Спасу нашему Иисусу Христу, Емуже подобает всякая слава, честь и поклонение, со Отцем и Святым Духом, ныне и присно, и во веки веков. Аминь.
Акафист священномученику Анатолию митрополиту Одесскому и Херсонскому
Кондак 1
Избранный страстотерпче Христов и премудрый архипастырю, в святости стадо Христово хранивший, священномучениче Анатолие, восхваляя дивное житие твое, смиренно тя умоляем: проси Человеколюбца Господа да помилует нас, ищущих твоего за нас к Нему заступления и зовущих ти: Радуйся, священномучениче Анатолие, Архиерею Небесному верно служивший.
Икос 1
Ангелом небесным уподобился еси, дивне Анатолие, избранный Господом во святителя от младых лет твоих, егда ты, духовную науку постигая, иноческим житием послужити Богу возжелал еси. Мы же, воспеваем ангельскую чистоту твою пениями сими:
Радуйся, во святом крещении Андреем нареченный. Радуйся, яко Андрей Первозванный, ко Господу приведенный. Радуйся, материю твоею во благочестии жити обученный. Радуйся, со Христовою Церквою навеки обрученный. Радуйся, в разуме Богом просвещенный и умудренный. Радуйся, в вере православней сердцем и душею утвержденный. Радуйся, священномучениче Анатолие, Архиерею Небесному верно служивший.
Кондак 2
Видя Господь непорочное житие твое, плотскими страстями не омраченное, сподоби тя, священномучениче Христов, быти достойным принятия монашескаго звания со именем Анатолий. Ты же, с ревностию монашеския обеты исполняя, Господу воспевал еси беспрестанно хвалу: Аллилуиа.
Икос 2
Разум Христов чистою душою восприяти сподобивыйся, богомудре Анатолие, в богословских науках преуспевая, труды в Киевстей духовней академии подъял еси. Восхваляя вся, еже во прославление Господа творил еси, воспеваем тебе сице:
Радуйся, измлада смирения и молчания хранителю. Радуйся, заповедей Божиих усердный исполнителю. Радуйся, молитвы и воздержания ревнителю. Радуйся, спастися желающим мудрый учителю. Радуйся, человеческаго суемудрия и неправды обличителю. Радуйся, веры православныя неустанный насадителю. Радуйся, священномучениче Анатолие, Архиерею Небесному верно служивший.
Кондак 3
Силою свыше облече тя Дух Святый, пастве Казанстей во епископа тя поставляя. Егда же бысть архиерейская хиротония твоя, сниде свет неизреченный, круг главы твоея дивное сияние образуя, святе Анатолие. Людие вси, диву сему дивишася и воспеваху Богу:Аллилуиа.
Икос 3
Имеяй в сердце своем свет Христов, святче Божий, сошедый на тя в чудном явлении, ревностно хранил еси его в твоем святительстем служении Господу и претерпевши до конца вся скорби и гонения, кротостию и смирением своими Христу уподобился еси. За все сие, восхваляем тя тако:
Радуйся, сосуде Божественнаго избрания. Радуйся, цвете благоуханный добраго воспитания. Радуйся, не посрамляющий нашего упования. Радуйся, не уклонивыйся от Господнего призывания. Радуйся, от нас не отнимающий своего внимания. Радуйся, исполненный райскаго благоухания. Радуйся, священномучениче Анатолие, Архиерею Небесному верно служивший.
Кондак 4
Бурею христоубийства дышуще, богоборческая власть отделила есть Церковь от государства и повелела есть всим духовным заведениям закрытыми быти. Ты же, святителю Анатолие, будучи ректором Казанския духовныя академии, умудрился еси ея сохраняти некое время, воспевая умудряющему тя Творцу: Аллилуиа.
Икос 4
Слышавше ученицы твоя, яко возможно есть им в тайне от власти богоборческия академическое обучение продолжати, творяху сие, да явно Господь воздаст за труды и старания я. Мы же, дивяся мудрости твоея, яко ты, Анатолие богомудре, в лихолетие тайную академию отечески окормлял еси, поем ти:
Радуйся, в Церкви образе служения неленостнаго. Радуйся, всею душою взыскавый Царствия Небеснаго. Радуйся, чадом твоим подателю спасения чудеснаго. Радуйся, немощным врачу недуга телеснаго. Радуйся, страждущим избавителю от ада кромешнаго. Радуйся, заблудшим указателю пути известнаго. Радуйся, священномучениче Анатолие, Архиерею Небесному верно служивший.
Кондак 5
Богу, на судищи Пилатовом стоящему, уподобился еси, блаженне Анатолие, егда власти тя в неподчинении обвиняху и тюремному заключению осуждаху. Ты же, укрепляющему тя Христу, воспевал еси хвалу: Аллилуиа.
Икос 5
Видя в тебе непоколебимую веру и стойкость, боголюбиве Анатолие, по освобождении твоем от уз темничных, благоволи тебе Господь епископом Самарским и Ставропольским быти. Окормляй и нашу паству Херсонскую своим заступлением, поющую ти:
Радуйся, единаго Христа всем сердцем возлюбивый. Радуйся, яко бесценный бисер в душе Его хранивый. Радуйся, душу свою Пастырю Небесному всецело покоривый. Радуйся, венец из руку Творца на небе получивый. Радуйся, собою образ пастыря достойнаго явивый. Радуйся, яко бесплотный ангел житие свое проживый. Радуйся, священномучениче Анатолие, Архиерею Небесному верно служивший.
Кондак 6
Проповедником истины Христовыя паки явился еси, славный священномучениче Анатолие, егда не терпящие безбоязненнаго служения твоего, богоборцы паки тя во узы заключаху. Ты же, на Господа все свое упование возложив, сладко воспевал еси Ему во узах своих: Аллилуиа.
Икос 6
Возсия в сердце твоем свет Божественныя благодати, святителю Анатолие, и вознесе тя на велию высоту, в сан архиепископа возводящую. Мы же, в тебе глубокую веру, высокий дух и несокрушимое мужество зряще, благоговейно поем ти:
Радуйся, себя на волю Божию всецело предававый. Радуйся, богомыслием уныние неленостно отревавый. Радуйся, помыслы плотския молитвою проганявый. Радуйся, чадом всепрощения у Господа взыскавый. Радуйся, козни богомерзския присно побеждавый. Радуйся, нетленное наследие в душе своей стяжавый. Радуйся, священномучениче Анатолие, Архиерею Небесному верно служивший.
Кондак 7
Хотяй стадо Христово целым и невредимым к пажитям небесным привести, святителю Анатолие, велие попечение о судьбах Церкви имел еси, от раскола ея сохраняя и Христу по вся дни воспевая:Аллилуиа.
Икос 7
Дивное показал еси долготерпение, Христову долготерпению подражаяй, егда в годину тяжких испытаний Одесскую кафедру окормлял еси, будучи ей щитом и оградою от всякия напасти вражия. Людие, умиленно на тебя взирая, душами умиротворяхуся и во благом уповании на Бога укрепляхуся. Мы же, духовными очами на тебя взирая, воздаем тебе хвалы сия:
Радуйся, яко путь во Царствие Небесное обрел еси. Радуйся, яко сим путем невозвратно шествовал еси. Радуйся, яко небесная паче земнаго возлюбил еси. Радуйся, яко Ангелом житием своим уподобился еси. Радуйся, яко Господа чистым сердцем зрети сподобился еси. Радуйся, яко Пресвятей Троице с благоговением поклонятися возмогл еси.Радуйся, священномучениче Анатолие, Архиерею Небесному верно служивший.
Кондак 8
Странное и преславное чудо бысть маловерным и малодушным зрети, благодушне Анатолие, како в лютых гонениях священное житие стяжевая, утверждал еси слабеющих в вере, укреплял еси немощных духом, призывал еси к терпению в исповедывании веры, поминая слова Спасителя: «Не бойтеся убивающих тело, души же не могущих убити», воспевая с ними: Аллилуиа.
Икос 8
Весь исполнен быв любви Христовы, благодарно Господу молился еси, егда благоволи Владыка Небесный возвести тя, Владыку земнаго, в сан митрополита. Ты же, паству Одесскую в вере укрепив, по повелению Божию, к Харьковстей пастве стопы своя направил еси. Мы же, таковому твоему радению о спасении душ христианских радующеся, воспеваем ти:
Радуйся, страже Церкве Христовы неустрашимый. Радуйся, исполнителю заповедей Его неутомимый. Радуйся, за Господа неверными гонимый. Радуйся, Спасителем на всех путях земных хранимый. Радуйся, Девою Пречистою с нежностию любимый. Радуйся, Ангелами присно на небесах хвалимый. Радуйся, священномучениче Анатолие, Архиерею Небесному верно служивший.
Кондак 9
Подвигом добрым подвизался еси, всечестне Анатолие, слово Божие в сердцах людей вселяя и веру во Христа им умножая. Боголюбивый же народ Божий присно любляше тя, обреташе бо в тебе отеческое наставление и святительское благословение, Творцу с тобою воспевая: Аллилуиа.
Икос 9
Ветии многовещаннии не возмогут по достоянию восхвалити вся страдания твоя за Христа, страстотерпче Христов Анатолие, не токмо телесныя, но паче душевныя, тяжко бо зрети тебе бысть, яко врази веры православныя лучшия от пастырей твоих на муки предаваху и храмы Божии разрушаху. Мы же, скорби твоя сердечныя ублажая, умиленно поем сице:
Радуйся, яко в райских обителях ныне пребываеши. Радуйся, яко с высоты небесныя нас назираеши. Радуйся, яко своим заступлением чудеса нам содеваеши. Радуйся, яко твоими молитвами милость Божию на ны изливаеши. Радуйся, яко своим предстательством от бед ны избавляеши. Радуйся, яко плачущих и страждущих с любовию утешаеши. Радуйся, священномучениче Анатолие, Архиерею Небесному верно служивший.
Кондак 10
Спасти хотяй души младыя от погибели вечныя, многия от них ко принятию иерейскаго сана уготовил еси, твердыми быти в вере научая и от Церкви Божией в годины бедствий и гонений не отпадая. И тако в венцах мученических привел еси к Богу многия, жаждущия жизни вечныя, ныне же поющия Богу: Аллилуиа.
Икос 10
Стеною твердою и крепкою оградою Одесския паствы явился еси, святителю Христов Анатолие, богомудрым водительством Церковь и словесныя овцы стада Христова сохраняя. И ныне светом Божественныя мудрости твоея тьма отгоняется, ним же просвещаемии, вопием ти сице:
Радуйся, яко тобою Церковь Божия благоукрасися. Радуйся, яко тобою в ней вера Христова утвердися. Радуйся, яко тобою край наш просветися. Радуйся, яко тобою мир в языцех укрепися. Радуйся, яко тобою душа православная усладися. Радуйся, яко тобою небо умилися.Радуйся, священномучениче Анатолие, Архиерею Небесному верно служивший.
Кондак 11
Пение умиленное приносим ти, священномучениче Анатолие, прославляюще твоя за Христа страдания и молим тя: испроси нам у Господа нашего Иисуса Христа крепко в православии стояти, козней злолукавых избегати и с тобою купно воспевати: Аллилуиа.
Икос 11
Светлым и радостным лицем последовал еси на страдания, уготованныя ти от мучителей, страстотерпче Анатолие, в полунощном крае заключение свое отбывая. Воспоминая вся страдания твоя, коими ты Господу уподоблялся еси, зовем ти:
Радуйся, края Таврическаго немеркнущая славо и украшение. Радуйся, градов наших крепкая защито и ограждение. Радуйся, глухих слышание и слепых прозрение. Радуйся, путей неправедных истинное исправление. Радуйся, веры православныя в земли нашея утверждение. Радуйся, сирых и обездоленных покров и защищение.Радуйся, священномучениче Анатолие, Архиерею Небесному верно служивший.
Кондак 12
Благодатию от Бога данною, чрез святое Евангелие, кое в тюремных лагерях сохранити возмолг еси, ты, святе Анатолие, в спокойствии духа и глубокой молитве пребывал еси, во узах веселяся надеждою небесныя свободы, поя Освободителю Христу песнь славы:Аллилуиа.
Икос 12
Поюще твою страдальческую кончину, блаженне Анатолие, воспоминаем, яко ты держа обеима рукама крест нательный свой, иже бысть ти победным знамением над мучившими тя, скончал еси шествие твое по тернистому пути, приявши от Подвигоположника Христа венец мученический и исповеднический. Мы же, почитая славныя подвиги и труды твоя во благо Православныя Церкви, поем ти:
Радуйся, лишенным смысла ум здравый подаваяй. Радуйся, всем с верою приходящим токи чудес изливаяй. Радуйся, в сониих и видениих помощь твою являяй. Радуйся, светом истины Христовы нас озаряяй. Радуйся, Божественною любовию души наша согреваяй. Радуйся, страну нашу православную собою украшаяй. Радуйся, священномучениче Анатолие, Архиерею Небесному верно служивший.
Кондак 13
О, святе Анатолие, дивный архипастырю Божий, к тебе припадаем и заступления твоего смиренно просим: твоею бо благодатною помощию очистим сердца и души наша, да возможем во Царствие Божие внити и Троице Святей во умилении воспети: Аллилуиа. Аллилуиа. Аллилуиа.
Сей кондак читается трижды. Затем икос 1 и кондак 1.
