Гимнография новомучеников и исповедников Пензенских
Гимнография:
Даты:
Тропарь:
Тропарь, глас 4:
Ризы архиерейства и священства на земли мучением украсивше, / сугубыя венцы на Небесех исплетосте победы, / славою победоносною увенчастеся, / подвигоносцем единовсельницы, / сего ради слово истины исправляя, / и веры ради пострадали есте даже до крове, / новомученицы и исповедницы Пензенстии, молите Христа Бога \ спастися душам нашым.
Кондак:
Кондак, глас тойже:
Безбожия глубину рекою кровей ваших изсушивше, / разженныя стрелы богоборцев шитом веры Православныя угасили есте, юзами любве Христовы связуеми, / юзы темничныя и смерть с веселием претерпели есте, / новомученицы и исповедницы Христовы, / молитеся ко Господу / град Пензу и страну нашу во благочестии сохранити, / Церковь Русскую во Православии утвердити \ и спасти душы наша.
Молитва:
Молитва
О святии новомученицы и исповедницы земли Сурския, святителие и пастырие Христовы, иноки и инокини, и христиане всякаго возраста и сословия, веру Православную неизменно соблюдшии, верность Христу даже до смерти сохранившии и нетленными венцы Жизни Вечныя украсившиися. Киими словесы и похвалы прославим имена ваша? Вы, благодатию Божиею укрепив сердца, якоже приношения чистая и непорочнии агнцы приведостеся нас ради Заклавшемуся, от Него мученическия венцы победы яко от Подвигоположника приемше. Вемы бо, яко вашими подвигами и святыми молитвами, а наипаче кровию и за веру и правду Христову стоянием, ныне по всей земли Русской храмы святыя и обители воздвизаются, и в них Имя Божие прославляется. Ныне, святии сродницы наши, призрите с высоты святыя своея на нас и умолите Господа Бога, да пробавит Он милость Свою на Православное Отечество наше и оградит е от всякаго нечестия, иноверия, смуты и междоусобныя брани; да сохранит Церковь Святую, в нейже единей спасение вечное содевается; пастырем же Церкве да подаст разум духовный, благочестие и ревность о спасении пасомых; воинству нашему — любовь ко Отечеству, мужество и на враги одоление; вся же православныя христианы да утвердит в вере святей и любви нелицемерней; да научит ны выну творити волю Свою святую, и вся предания церковная, от отец наших нам заповеданная, хранити.
Молитеся, святии подвигоносцы, да и мы купно с вами в тихое пристанище Небеснаго Царствия достигнем, идеже со всеми новомученики и исповедники Российскими прославим Отца и Сына и Святаго Духа, ныне и присно и во веки веков. Аминь.
