Служба святому праведному Алексию, пресвитеру Московскому

На Господи воззвах: стихиры, глас 1.

Подобен: Небесных чинов:

Любовию Божественною исполнен, / теплую молитву о страждущих и скорбящих / ко Всемилостивому Спасу непрестанно возносиши, / дивный старче Алексие.

Досточудне отче Алексие, / молитися не престай о нас; / прощение прегрешений и веры укрепление испроси, / яко еси скорый помощник и утешитель / всем прибегающим к тебе.

Во дни скорби и гонений / любовь Христову проповедал еси, отче, / силою ея побеждая власти тьму, / и направи чада твоя / ко спасению вечному.

Слава, глас 6:

Старчества святых отец наследниче, / в трудех и молитве созидаше душу твою, / сокровищницу благих даров соделал еси ю, / из неяже истекоша живительныя струи / жаждущим нетленныя жизни, / преславне старче Алексие.

И ныне:

Деву и Матерь, / Младенца и Превечнаго Бога паче ума рождшую, / Пресвятую Богородицу Марию воспоим, вернии; / Та бо непреложная Заступница рода христианскаго.

На стиховне стихиры, глас 2.

Подобен: Доме Евфрафов:

Даровася тобою / державе Российстей радость велия, / старче праведне Алексие; / ты бо обрел еси дерзновение пред Господем / молитися о спасении нашем.

Стих: Блажен муж, бояйся Господа, / в заповедех Его восхощет зело.

Лучами Света Божественнаго облистаемь, / светоносне старче, предстал еси, / просвети и ныне / души славящих тя / светом нетления.

Стих: Священницы твои облекутся в правду, / и преподобнии Твои возрадуются.

Таинницы Пресвятыя Троицы, / старче Алексие и священномучениче Сергие, / с велием сонмом святых земли Русския, / молите спастися отечеству нашему / Православныя веры утверждением.

Слава, глас 8:

Отче Алексие люботрудне, / молитвенниче теплый о всех притекающих к тебе, / милующим сердцем утоляеши всякия скорби, / даруя радость духовную, / со апостолом, учеником возлюбленным / заповедуеши братии в любви пребывати.

на велицей вечерни

На Господи воззвах: стихиры, глас 5.

Подобен: Радуйся:

Радуйся, граде Москва, / обретши сокровище нетленное, / целебныя мощи праведнаго старца Алексия, / яко пресветлую зарю солнечную, / Божественною благодатию источающии преславная чудеса. / Темже сошедшеся празднственно ликующе возопиим: / о всечудне отче Алексие, / моли прославльшаго тя Господа / даровати отечеству нашему мир и велию милость.

Радуйся, земле Российская и торжествуй, / днесь бо прославляем Троицы Единосущныя вернаго служителя, / старца Московскаго Алексия, / кротостию бурю злобы умиряющаго, / молитве и вере в неизреченное милосердие Божие научающаго, / заблудших на стезю спасения наставляющаго. / Егоже молитвами, Человеколюбче Господи, / низпосли людем Твоим мир и велию милость.

Красуйся, Церкве Русская, / память всесветлую досточуднаго Алексия возвеличи днесь; / мы же песненными похвалы воспоим, глаголюще: / радуйся, Божественныя любве светильниче, / скорый помощниче бедствующим и недужных исцелителю, / всемудрый наставниче ищущим спасения, / покаяния и терпения скорбей очистительных проповедниче. / И ныне не престай молити Владыку Вседержителя / умирити мир и спасти души наша.

Радуйся, преславне Алексие, / благих родителей отрасль пречестная, / смиренно волю свою отсекая, материнскую же исполняя, / на путь священства вступи и в сем ревностно подвизался еси; / незлобиво обиды и нужду претерпевая, козни вражия победил еси; / и до конца последовав Христу, явился еси сосуд избран даров Святаго Духа. / Радуйся, старчества святых отец преемниче; / радуйся, столпов оптинских собеседниче; / с нимиже днесь Престолу Святыя Троицы предстоиши, / моля даровати душам нашим велию милость.

Ина стихира, глас 6.

Подобен: Все отложше:

Огнем любве Божественныя распалаемь, / добродетелей сияя светлостию, / старче праведне Алексие, / токи живительныя любве сея излиял еси, / напаяя скорбящих сердца радостию, / врачуя язвы грсховныя и страстей недуги, / светоносными лучами веры прогоняя власти тьму, / и всяку слезу изсушая теплотою молитв твоих. / Да тя вси, яко светильника Божия и отца чадолюбива, / ныне величаем.

Ина стихира, глас 4.

Подобен: Яко добля:

Дарами духовными от Бога украшенный, / Тому Единому послужил еси, / яко сострадателен, яко благолюбивый, / милосердие Божие призывая; / отчаянных утешая и пропавших на поле брани сродником возвращая, / нестроения и раздоры семейныя примиряя, / недужных исцеляя, от пагубных страстей свобождая, / ищущих спасения послушанию и покаянию научая, / и всех любовию и молитвою твоею покрывая, старче преславный Алексие.

Слава, глас 2:

В лике святых земли Русския просиял еси избранниче Божий, / молитвенным бо заступлением святителя Филарета рождение твое благопоспешно свершися, / вхождение в Небесныя обители благословением исповедника патриарха Тихона препровождаемо бысть, / праведным Иоанном к служению старческому призванный, дарами духовными исполнися; / будущее яко настоящее провидя, помощь и исцеление щедро подавал еси; / любовию окрыляя, верою укрепляя и радостию исполняя сердца просящих тя, отче Алексие.

Вход, прокимен дне и чтения.

На литии стихиры, глас 3:

Наста днесь светлый праздник / обретения честных мощей праведнаго старца Алексия, / приидите вси вернии, / прославим Преблагаго Бога нашего, / даровавшаго нам сокровище неизъемлемо, / граду нашему твердую стену, / Отечеству крепкаго предстателя, / и молитвенника о душах наших.

Ины стихиры, глас 1:

Веру Христову, яко свет на свещнице поставил еси, / тьму богоотступничества осиявая светом Божественным, / и многи от неверия и отчаяния ко спасению приведе, / старче Московский Алексие.

Чист сердцем и душею, / выну предзрел еси Господа пред собою, / молитвою слезною врачуя немощи и болезни душевныя и телесныя, / благодатне отче Алексие.

Яко весь Христу приближаяся яснейши, / не посрами ны, верою уповающих на тя, / дивный старче Алексие, / грехов прощения у Христа прося / и восприятия жизни вечныя.

Слава, глас 6:

Старче предивне Алексие, / споспешествуй нам, чадом твоим, / на видимыя и невидимыя враги наша; / имаши бо на сие от Бога данную ти силу, / исповедниче, молитвенниче и истинный угодниче Христов. / Да избавимся от всякаго зла / твоими, святе, молитвами.

И ныне, Богородичен.

На стиховне стихиры, глас 8:

Любовию и состраданием преисполнен, / милосерде отче Алексие, / тяготы и скорби страждущих понесл еси, / скорый помощник и утешитель тем быв. / Предстательствуй ныне и о нас, молим ти ся.

Стих: Священницы Твои облекутся в правду, / и преподобнии Твои возрадуются.

«Покайтеся же, чадца моя», / — с любовию взывал еси, отче, / —неизреченно бо милосердие Владычне; / Отец бо приемлет чада своя на вечери, / идеже присно закалает ти ся Единородный Сын Отчий, / возставляя падшее грехом человеческое естество.

Стих: Блажен муж, бояйся Господа, / в заповедех Его восхощет зело.

«Возлюбим друг друга, братие, / яко любы от Бога есть», / — вслед за Богословом взывал еси отче, / — Христос бо по нас душу Свою положи; / и мы должни есмы себе утесняя, / житие ближних облегчати.

Слава, глас 2:

Егда на Христа и Церковь Святую пребеззаконии ополчахуся, / тогда на всенощнобденную молитву вернии собирахуся; / и храм твой — корабль спасения / посреде волн злобы к тихому пристанищу мудрым кормчим управляем бысть. / Ты же пророчески возвещая, уверял еси, отче: / «Возстанет вера православная».

И ныне, Богородичен.

Тропарь, глас 5:

Помози в бедах, утеши в скорбех, / пастырю добрый, отче Алексие, / подвигом бо старчества миру просиявый, / веру и любовь Христову во мраце беззакония исповедал еси, / болезнуя сердцем о всех притекающих к тебе. / И ныне за ны Бога моли, / любовию чтущия тя.

на утрени

По 1-м стихословии седален:

На милосердие Божие посреде бури жестокия уповати призываху, паству от звероуловления огради, на пажити покаяния и любве воспитал еси ю, чадолюбиве отче; да внидут вкупе с тобою в пакибытие вечное.

Слава и ныне, Богородичен:

Едина Пречистая Дево и Мати, Единаго от Святыя Троицы неизреченно рождшая; Того моли, Милосердая, помиловати души наша.

По 2-м стихословии седален:

Покаяния ревнителю, слезами и молитвою пустыню сердечную многомятежнаго града возделал еси; долготерпение Владычне прославляя и милость к заблудшим призывая, плодоносну верою и надеждею ю сотвори.

Слава и ныне, Богородичен:

Жизнь миру рождшая, Дево Всенепорочная, не презри мольбы убогих и немощных, Всеблагая; нетленныя жизни Твоя песнословцы сподоби.

По полиелеи седален:

Житейская волнения и печали мирския, Алексие, старче Московский, глубину души твоея не поколеба, в молитве пред Зиждителем припадующую выну; Егоже лицезрети в Трисиянном свете ныне сподобился еси.

Слава, и ныне, Богородичен:

Со Архангелом Деве принесем целование: радуйся, Духа Святаго приимшая; радуйся, Бога Слова вместившая; радуйся, велией тайне воплощения послужившая; радуйся, Благодатная, Господь с Тобою.

Прокимен, глас 4: Честна пред Господем смерть преподобных Его.

Стих: Что воздам Господеви о всех, яже воздаде ми?

<Евангелие от Матфея, зачало 43.>

По 50-м псалме стихира, глас 6:

Днесь светоносное торжество; / приидите вси вернии, / восхвалим угодника Божия, вопиюще сице: / радуйся, огнезрачный столпе, озаряя нас чудес светлостьми; / радуйся, тихое дыхание, бурю умиряя страстей; / радуйся, росный облаче, орошая доброплодныя начатки мысленныя; / старче праведне Алексие.

Канон Богородице на 4 и святому праведному Алексию на 8, глас 4.

Песнь 1

Ирмос: Отверзу уста моя:

Се ныне приступаю восхвалити светильника Божия Алексия, старца Московскаго; укрепи, Владыко Христе, направи сердце и ум, отверзи уста воспети достойно святаго угодника Твоего.

Кто возглаголет труды и подвиги твоя, отче Алексие: ты бо присно в служении ближним пребывая, Всевышнему же неизменно духом предстоя, в мире пожив, премирен явился еси.

С небесными лики песньми немолчными Святую Троицу воспевати сподобился еси, Царствия наследниче, Алексие; и о прославляющих тя моли, во еже спастися нам.

Богородичен: Егоже трепещут херувими и серафими во объятиях носившая, Дево Пречистая, с матерним дерзновением Того моли спасти любовию поющих тя.

Песнь 3

Ирмос: Твоя песнословцы:

Со упованием на милость Божию святитель Филарет о рождении твоем молися усердно у Престола Владычня, избранника Христова провидя тя, еще суща быти ти во утробе матерней.

Добрая отрасль родителей благочестивых прозябл еси, преславне; от нихже восприял еси веру крепку и любовь нелицемерну к Создателю и ближним твоим.

Ревнуя великому наставнику, пламенному светильнику Божию Филарету и того последуя подвигом и трудом, Спасу Христу благоугодил еси, отче праведне.

Богородичен: Глаголы благовещения радоватися Пречистей Деве архангел повеле; радость бо Тоя рождества растворяет печаль Адамову и весь род человеческий возводит к веселию вечному.

Ин кондак, глас 2:

Велия труды любве и милосердия подъял еси, / праведный старче Алексие, / от святаго пастыря Кронштадтскаго благословение на помощь страждущим прияв, / беды и скорби людския яко вериги на рамо свое возложи. / Мы же ведуще тя молитвенника дерзновенна ко Господу, / со умилением зовем ти: / моли Христа Бога спастися душам нашим.

Седален, глас 8:

Явлей Господь велию милость людем Российстей земли, посла тя, отче Алексие, избранника Своего, лучами света Божественнаго просветившаго сердца во отчаянии, бедах и скорбех сущия.

Слава и ныне, Богородичен:

Мати Бога Слова, како изглаголати возможем Твое Пречистое рождество, или киими словесы прославим непостижное милосердие Божие и Твою, Пренепорочная, любовь к роду нашему, ко спасению возведенному Крестом Сына Твоего.

Песнь 4

Ирмос: Седяй в славе:

Из млада Христа возлюбивши и всецело душу предаде в руце Божии, кроток и послушлив быв; волю рождшей тя исполнивши, на путь священства вступи; в сем же трудолюбно подвизался еси.

Ангели сослужаху ти, отче, егда в безлюдном храме неустанно молитвы возношаше у Престола Божия; укрепляяся духом и распалаяся любовию Божественною, даров высших сподобился еси.

Радоватися повеле ти пастырь Кронштадтский, егда свет помрачися во очесех твоих от рыданий горьких и слез по успении супружницы верныя; тойже к подвигу старчества тя призывая рече: «Отрещися себе, отверзи сердце прияти тяжкия скорби и беды людския».

Богородичен: К Заступнице и Владычице, и Матери Спаса нашего слезно возопиим вкупе со старцем Алексием: разреши, Пресвятая, болезни и скорби, утоли всякия нужды и печали; да возрадуемся и возвеселимся о Господе.

Песнь 5

Ирмос: Ужасошася всяческая:

Ярем старчества в терпении носившии, любовь ко Христу и ближним и друг ко другу имевшии, праведне Алексие Московский и преподобне Анатолие Оптинский, в нескончаемой радости ныне торжествуя, молите спастися славлящих вы.

Видя подвиги и труды твоя, старче Алексие, скитоначальник оптинский Феодосий удивляшеся, рече: «Единому сие не под силу есть; Господь ти помогает, отче».

Древним отцем наследниче и оптинским подвижником собеседниче, светозарением добродетелей сияюще, во граде яко в пустыни подвизался еси, слезами и молитвами безводную верою тую оросивый.

Богородичен: Дево Пречистая, Духа Святаго приятелище, приими и наша грешных молитвы, очисти всяку скверну душевную, да просветимся неприступным светом славы Сына Твоего.

Песнь 6

Ирмос: Божественное сие:

Радости исполнишася московстии людие, обретоша в тебе заступника непреложнаго; плачущаго с плачущими, враждующих примиряющаго, вземлющаго на плещи твоя немощи человеческия, утоляющаго непосильную скорбь и печаль.

Егда приспе время испытаний и волны гневныя обыдоша землю Русскую, тогда возсия ясно свет души твоея; Божественною любовию исполнен, сеял еси ю во оляденевшия сердца, научая во Христе обретати спасение.

Отеческую любовь являя чадом твоим, любоблаже отче, молитвою исцелял еси недужныя, защищал еси от злых человек, глада и смерти. Не престай в водительстве сем и ныне: укрепи во испытаниях, избави от ненависти и всякия злобы, милосердие Божие призывая.

Богородичен: Страждеши слезяще, Всемилостивая, грядущия беды отечеству нашему предвозвещая; из очес Твоих с чудотворныя иконы Феодоровская истекаемыя, старцем Алексием и всеми предстоящими во храме на молитве зримыя.

Кондак, глас 8:

Простотою веры высоты смирения достигл еси; / в молитве и доброделании подвизаяся, дарами духовными обогатился еси; / светом Христовым просветился, помощниче и утешителю отче Алексие. / И ныне веру нашу укрепи и любви ко Господу и ближним научи, / и ко спасению приведи молитвами твоими.

Икос:

Праведне отче Алексие, старче Московский и всех православных радование; кто зря светолепное лице твое и сияние очес твоих благоговения не исполнися; или кто, слыша смиренномудрыя речи твоя, не умилися, возжелая в делании угодити Богу; или кто во мрак отчаяния впадый и утешен тобою быв, не покаялся и верным чадом Христовым не содеяся; или кто, гневлив и злоречив сый, тихостию нрава твоего не преложися. Темже священную память твою празднующе, молим тя: веру нашу укрепи, любви ко Господу и ближним научи, заповеди Христовы исполнити помози и ко спасению приведи молитвами твоими.

Песнь 7

Ирмос: Не послужиша твари:

«Аз помолюся», — отвещевал еси, старче богомудре, на всяко прошение, скорбь и беду, душею сокрушенною и духом смиренным пред Милосердым Владыкою предстоя; молися и ныне, ходатаю наш о вопиющих верно: препетый отцев Господь и Бог благословен еси.

Душа твоя чистотою и светлостию сияя, отче незлобиве, даром слезным обогатися; «Бог милостив, чадо, и мы сынови Его есмы вси», — со умилением учил еси; во всяком обстоянии не престаяй взывати: препетый отцев Господь и Бог благословен еси».

«Бог даде мне тверду детску веру», — в простоте поведал еси отче мудре; посреде злонравия богомерзкаго вера твоя многих ко спасению приведе и научи воспевати: препетый отцев Господь и Бог благословен еси.

Богородичен: Милосердая Мати, не презри недостойных молений наших, молящи вкупе со святыми покровители храма сего Сына Твоего спасти всех воспевающих Тя.

Песнь 8

Ирмос: Отроки благочестивыя:

«При погребении моем радость обрящете», — прозорливо провещал еси, отче, радуяся отшествию своему во отечество Горнее, патриаршим же благословением утешение чадом подавая, взывающим: Господа пойте дела и превозносите Его во вся веки.

Ищущим тебе обретаешися готовый помощник и скоро подаеши благодатную помощь; якоже иногда болящаго Александра сотворил еси здрава, и сына матери возвратил еси, и от напрасныя смерти избавил еси; посети убо и нас, отче щедре, твоею помощию, поющих: Господа пойте дела и превозносите Его во вся веки.

Святыя Твоя, Господи, с сонмом безплотных ангельски воспевают Тя; с нимиже новый угодник, старец Московский Алексий совозсиял есть, вопиюще: Господа пойте дела и превозносите Его во вся веки.

Богородичен: Мати Божия Всенепорочная, души язвы исцели, сласти плоти утоли, ум умири от всякаго вреда, и вражиих избави напастей, превозносящих Тя во веки.

Песнь 9

Ирмос: Всяк земнородный:

Помози, теплый молитвениче наш, не малодушествовати во испытаниях крестных, сохранити верность Христу, за Него же ты готов был еси муки прияти и смерть; преемник же сын твой Сергий исповедник и священномученик явися.

Буди и нам пастырем добрым, научая любве и вере, не устани воздвизати ны падающия, приведи, отче милосердый, во обители Небесныя, идеже ты в радости непрестанной пребываеши.

Воспеваем благосветлое житие твое, в немже яко верный раб Господень в малом и велицем верен бых; и ны, лукавыя и злонравныя, неленостно поработати Христу научи, да и мы очистившися внидем в радость Господа нашего.

Богородичен: Воспеваем Сына Твоего и Бога нашего, Мати Всесветлая, Дево Пречистая; Егоже непорочно роди на спасение наше и обновление.

Светилен:

Во свете незаходимем, отче Алексие досточудне, ныне предстоиши Престолу Святыя Троицы со ангелы и святыми и молиши о всех, верою блажащих тя.

Богородичен:

Благодатная Богородице Дево, предстояще Престолу Сына и Бога Твоего, моли о нас, хотящих спастися, уповая на милость Его безмерную.

На хвалитех стихиры, глас 8.

Подобен: О, преславнаго чудесе:

Радуйся, первопрестольный граде Москва, / ликуй, Церковь Христова совокупльшися, / днесь созывает верных праведнаго Алексия торжество; / егоже песненными цветы увенчаем, зовуще: / О, светоносне старче Алексие, / ты бо на путь спасения множество заблудших наставляеши, / скорбящим душею божественное утешение даруеши, / от бед и обстояний ограждаеши, / и о всех просящих тя с верою Всевышняго умоляеши.

О, преславнаго чудесе, / слава твоя, милосерде отче Алексие, / града Тобольска достиже; / матери, зельне плачущей о сыне-воине, / Саровский чудотворец явися, / повелевая во престольном граде достигнути храма святаго твоего; / и та, вся исполнивше, утешение и надежду из уст твоих получи, / сына же обретше прослави Бога, / дивнаго во святых Своих.

Душу положи за ближния, старче Алексие / чад твоих сирых не оставити обещая, / пред исходом рекл еси: / «Аз же присно с вами буду!» / И ныне вечнуеши со Христом, Егоже всем сердцем возлюбил еси, / и Ему Единому в житии послужил еси; / мощми во храме святем твоем пребываеши, / и попечений о пастве не оставлявши, / являя на всяко дело благо незримую помощь твою.

Слава, глас и подобен тойже:

Богоугодно поживши, / Небесных обителей достигл еси, / добре стадо словесное упасл еси, наставниче богомудре, / темже со умилением вопием ти: / радуйся, кореню благий, от него же за Христа пострадавый сын-священномуче­ник прозябе; / радуйся, лоза многоплодная, во чадех грозд зрел принесе. / И ныне у Престола Святыя Троицы не престай молити, / да сопричтет и нас Праведный Судия овцам избраннаго стада Своего / в страшный день судный.

И ныне, Богородичен:

О преславнаго чудесе, / Мати Божия и Царица / предстоит с лики бесплотных и святыми, / с нимиже новомученицы и исповедницы, и праведнии сродницы наша, / славя вкупе величие Владычне, / молят стране Российстей спастися; / мы же православно исповедающе, / поклоняемся Триединому и Триипостасному, / Всесильному и Всемилостивому Богу нашему.
на литургии

Блаженны на 8, песнь 3 и 6.

Прокимен, глас 7: Честна пред Господем смерть преподобных Его. Стих: Что воздам Господеви о всех, яже воздаде ми?

Апостол к галатом, зачало 213.

Аллилуиа, глас 6: Блажен муж, бояйся Господа, в заповедех Его восхощет зело. Стих: Сильно на земли будет семя его.

<Евангелие от Луки, зачало 24.

Причастен: В память вечную будет праведник, от слуха зла не убоится.>