Гимнография сщмчч. Александра, архиеп. Самарского, и с ним Иоанна Смирнова, Александра Иванова, Иоанна Сульдина, Александра Органова, Вячеслава Инфантова, Василия Витевского и Иакова Алферова пресвитеров (1938)
Служба священномученику Александру (Трапицыну),
архиепископу Самарскому
ВЕЛИКАЯ ВЕЧЕРНЯ
Блажен муж:
На Господи воззвах: стихиры на 8, глас 4.
Подобен: Дал еси знамение:
Гонения претерпел еси и беды подъял еси, Богоглаголивый святителю Александре, дондеже лесть обличал еси безбожную, и стадо твое от нечестия спасл еси, яко пастырь истинный Церкви Христовой. Сего ради светло сошедшеся тя почитаем. Дважды.
Добродетельми светло процвел еси, яко маслина плодовита, в дому Божиим, тучами твоих пречистых молитв. Нашествие раскола, страстотерпче Александре, разрушил еси, нечестивых верою посрамил еси, православных победою укрепил еси и венец от Бога приял еси, Его же моли от тмы и бед избавити нас. Дважды.
Глас 2.
Подобен: Приидите вернии:
Приидите, видите печаль, сердце растерзающую! Се бо разлучает враг Александра святителя и паству его. И вси обливаются слезами и горько к нему вопиют: кому ны оставляеши сиротствующих, святый владыко? Не оставлю никогоже, глаголет, николиже. Вездесущей Троице, Богу нашему, слава и ныне и во веки. Дважды.
Приидите, видите любовь велию паствы к пастырю. Се бо провождают Александра в невозвратное заточение. И вси плачут и рыдают, руце же его и нозе целуют, и землю, стопы его священными попранную, в благословение себе востерзают. О, Новая Голгофа страстей людских и претерпевшим спасительное в Бозе упокоение. Дважды.
Слава, глас 6:
Веселися днесь, граде Самаро, се бо честная наста память архипастыря твоего, пострадавшаго верою, радуйся и земле волжская, таковаго святителя имущая, ко всем благосострадательна, преподобна, незлобива, предстоящаго пред Престолом Пресвятей Троицы, и молящагося за град Божий и всех живущих в нем православных христиан.
И ныне, догматик, глас 6: Кто Тебе не ублажит:
Вход, прокимен дне, и паримии 3.
На литии стихиры, глас 1:
Веселися о Господе, граде Самаро! Радуйся, вся волжская земле, и похвалами воспойте новаго страдальца Александра, в последняя дни пострадавшаго и равное древним терпение показавшаго. Прославим Христа, его укрепившаго и победы на безбожныя даровавшаго и венцем светлым венчавшаго, нам же молитвами его подающаго велию милость.
Веселися граде Самаро, яко в тебе страдании возсия добропобедный Александр, мученически венец победы достойно приял есть, поправ мужески коварство врага, и всем людем проповеда держатися веры Православныя, Троице певаемому Богу, Емуже со дерзновением мы вопием: спаси души наша.
Слава, глас 3:
Александра, святителя земли нашея во дни нестроения, вернии сошедшеся восхвалим, яко нам путь православнаго строительства проповедавша и бoгoпpотивныя власти обличивша дерзновение, и в темнице замучен еси и ныне с сонмом мучеников живый предстояй Христу, молится спастися нам.
И ныне, глас тойже:
Ныне Святитель Александр предстоя Божией Матери и молящийся за град Самару, и мы с тобою припадаем ко Пречистой: Пресвятая Богородице, помогай нам.
На стиховне стихиры, глас 5.
Подобен: Радуйся:
Радуйся, священная главо, чистый сосуде Духа Святаго святителю Александре, церковное украшение, града Самары великое удобрение, ересей обличение и Православия утверждение, мужественно положил еси душу твою за паству свою, Христу подражая. Егоже моли даровати душам нашим мир и велию милость.
Стих: Честна пред Господем:
Радуйся, святителю Самарский отче Александре, судом Божиим попустися тебе видети страшная и ужасная, стадо твое расколами и ересьми разрываемо и порабощенное лютым безбожием, храмов Божиих разорение, монастырей разрушение, Святых Олтарей ископание и священных сосудов ниспровержение. Но со слезами яко новый Иеремия, вопия ко Господу, моли и ныне о нас, даровати душам нашим мир и велию милость.
Стих: Священницы Твои облекутся в правду:
Радуйся, страстотерпче Христов Александре, в темнице заточенный, обаче Божественным учением укрепляемый, мучителем никакоже повинулся еси, темже искусом огненным ко Христу пришел еси радуяся, Егоже моли от тмы и бед избавитися верою совершающим всечестную память твою.
Слава, глас 4.
Подобен: Зван свыше:
Всехвальный отче Александре, архипастырю града Самары чудный, Троицу несозданную исповедавше, безбожную лесть множеством ран и мук победил еси и победы венцем венчавшися, молися ко Господу, даровати нам мир и велию милость.
И ныне, Богородичен, по гласу Славы.
Тропарь, глас 6:
Священномучениче Александре, безбожную крепость твердым борением низложил еси и вознесл еси веру Православную, злочестивое служение уничижил еси и дерзновенно Христа Бога проповедал еси и ныне неустанно молися за град Самару и вся волжския страны, даровати нам мир и велию милость.
УТРЕНЯ
На Бог Господь: тропарь дважды.
Слава и ныне, Богородичен воскресный по гласу тропаря.
Седален по 1 стихословии, глас 1:
Яко благословенный новый воине Христов, священномучениче Самарский вседоблий, законно пострадавши и венчавшися от Христа, молися о нас, совершающих память твою, всякаго избавитися лютаго обстояния.
Слава и ныне:
В кров Твой, Пречистая Дево, прибегающих, мольбу приемлеши от нас, не престай молящи Человеколюбца спасти рабы Твоя.
Седален по 2 стихословии, глас 2:
Яко солнце пресветлое во тьме безбожия показася, священный страстотерпче, просвещаяй верныя, согреваеши тех к Божественней любви и яко якорь крепкий во время треволнения утверждаеши колеблющияся в вере сердца.
Слава и ныне:
Общея беды Адамова греха нас избавляеши предстательством Твоим, Пречистая, и венцев славы сподобляеши.
По полиелее седален, глас 3:
Благодати и силы Божественныя исполнен быв, благочестия непреклонно держался еси, святителю отче Александре, мученическую показал еси твердость, за Христа пострадав радуяся, безбожную ересь посрамил еси, испроси и нам велия милости.
Слава и ныне:
Пречистие руци Твои, Дево Мати, простерши, покрый уповающия на Тя и Сыну Твоему зовущия: всем подаждь Христе, милости Твоя.
Степенна, глас 4.
Прокимен священномученика.
Евангелие от Иоанна, зачало 35 от полу.
Стихира по 50-м псалме, глас 6:
Веселися, граде Самаро, радуйся, соборе святых, светло торжествующих память священномученика Александра, Православия наставника и утишителя ересей, расколов искоренителя и безбожия обличителя, молящагося о спасении душ наших.
Канон Богородице молебный, глас 8,
и канон святому, глас 6.
Песнь 1
Ирмос: Волною морскою:
Божественнаго страдальца мудраго святителя, чудес источника, пастыря добраго, Церкви Православной утверждение, песньми велегласно яко светильника града Самары, Александра священномученика, вси восхвалим, радующеся.
Священствовав преподобно и законно пострадав, святителю Александре, священство показал еси светльшее, кровьми излиянными за любовь Христа Бога, Источившаго Кровь Свою за человеческий род.
Глас твой свету срастворився, и Божественными осиян светлостьми, тьму ересей и расколов, всемудре Александре, отметая, и к Истине Православия приводя заблудших.
Богородичен: Избави мя всякаго прилога сопротивнаго змиина, Мати Дево Чистая, и сердце мое просвети, Тя Всенепорочную славящаго верою.
Песнь 3
Ирмос: Тебе на водах:
Явился еси священномученнче Александре, первее преподобне Бескровную жертву принося Избавителю: последи же яко жертву себе самаго священнодействовал еси.
Был еси не наемник, но вернейший пастырь, преподобне Александре, твою кровь проливая Боголюбезне за стадо твое.
Изрядне упасл еси Владыки Твоего стадо, святителю Александре, тем на месте злачне вселился еси.
Богододичен: Даждь нам помощь мольбами Твоими, Пречистая, прилоги отгоняеши любых обстояний.
Седален, глас 1:
Кровь твоя, отче Александре, вопияше от земли яко Авелева: яве бо проповедал еси Троицу Несозданную, сохраняя стадо Владыки от безбожных врагов. Темже пастырски просияв, отгнал еси ересей звери, яко хранитель веры Православныя.
Слава и ныне:
Пречистыя руки Твоя, Дево Мати, простерши, покрый уповающия на Тя, и Сыну Твоему зовущия: всем подаждь, Христе, милости Твоя.
Песнь 4
Ирмос: На Кресте Твое:
Светлейшую тя звезду на высоте церковной положи, святителю Александре, Господь, страданий священнейше, и благодати сиянием всех сердца просвещающа.
Исповедав Веру Православную пред судищем мучителей, страстотерпче Александре, яве посрамил еси гордых расколоучителей и суемудренное безбожие.
Возвышаему морю прелести безбожия бурею, Божественным окормлением прешел еси, славне Александре, пристанище тишайшее всем быв плавающим.
Богородичен: Неискусобрачная Дево Благословенная, иерархов похвало, и страстотерпцев всех венче, бед и скорбей поющия Тя избави.
Песнь 5
Ирмос: Богоявления Твоего, Христе:
Исаия виде пророческима очима на Престоле превознесенна Бога, ты же, отче Александре, в новей благодати священнодействуя, агнца Божия, за всех закланнаго, жрел еси, воскресшаго и одесную Отца седящаго.
Безбожником нечестивым, чада твоя, Александре, убивающим, болезновал еси утробою, но паки радуяся душею, благочестию процветающу, на земли скорбей, слезами орошаемой.
Раздирая душу свою скорбию крепкою, народ твой Троице предал еси навеки, Александре, и убо взят бысть нечестивый от среды мышцею высокою, и благочестие паки процвете на земли Самарстей молитвами твоими.
Богородичен: Древле тя провиде Исаия, Богородительнице, — яко Дева — вопияше, — во чреве приимет и Дева родит, и по рождестве паки Дева пребудет, Мати Еммануилева.
Песнь 6
Ирмос: Ят бысть:
Житейское море прелестное зря волнуемо бурею страстей, Александре, преславный страдалец вопияше: возведи от тли нас, днесь молящихся Тебе.
Христу подобяся, за паству душу твою предал еси, о славный мучениче и страдальче Александре блаженне, и безбожныя стены разрушил еси.
От колебаний и расколов утверди своими страданьми, Александре, приснопамятный страдальче, к жизни небесней от земли преводяй всех, молящиеся тебе.
Богородичен: Пречистая Владычице, рождшая земным Кормчего Господа, страстей моих непостоянное и лютое укроти смущение, и тишину подаждь сердцу моему.
Кондак, глас 2:
Яко просияв, Александре, житием святительским, и в мире облистал еси течением страдальчества, разгнал еси мрачную прелесть безбожников воинствующих и раскольников злобствующих, показав истинную славу православных, сего ради моли Христа Бога спастися душам нашим.
Икос:
Яко волнами вод многих обуревается Церковь Православная, колеблема ложными ученьми и безбожным поруганием враг Ея. Веруем и уповаем купно с тобою, святителю Александре, яко врата адова не одолеют Ея, и молим тя, испроси у Господа великия милости, да ниспослет нам в дни испытаний наших крепость духа и твердое стояние во истине Православия, да не явится кто из братии нашей сыном погибели, но моли Христа Бога спастися душам нашим.
Песнь 7
Ирмос: Неизреченное чудо:
Благодать во уста твоя, Александре, излияся, тем обратил еси от безбожныя лести светом Евангелия и привел еси ко Христу стадо твое, яко пастырь истинен, зовуще: благословен еси, Боже отец наших.
Неусыпна имать тя, мудре Александре, верных собор молитвенника, утоляюща безбожия волны свирепыя, напастей еретиков укрощающа и нас научающа вопити: благословен еси, Боже отец наших.
Твою честную память, Александре, торжествующе, преблагаго Господа сил умоли от гонителей злочестивых нас избавити и спасение даровати вопиющим: благословен еси, Боже отец наших.
Богородичен: Согнивший души моея дом, Пречистая Отроковице, покаяния образы яко благая обнови, яже все человечество Рождеством Твоим обновившая.
Песнь 8
Ирмос: Ужаснися бояйся небо:
Стал еси на судищи, крепко подвизаяся, отче Александре, совершеннейшему бо пределу любве поучился еси, яко изволил еси умрети за други твоя, вопиющия: благословите, вся дела Господня, Господа.
Светел и словом и умом, светлу стяжал еси душу, светло лице и ныне же подвизался даже до крове, отче Александре, правителем богохульным противлься и вопия: благословите, вся дела Господня, Господа.
Нападоша, блаженне Александре, на тя крепции земли, умертвити тя беззаконнейшая делающии: но ты простираяся к Рождшемуся Избавителю от Девы Чистыя, взывал еси: благословите, вся дела Господня, Господа.
Богородичен: Ты бо, Всенепорочная, родила еси, яже Тому первее уготована, чаяние языков Христа, Ему же поем: благословите, вся дела Господня, Господа.
Песнь 9
Ирмос: Не рыдай Мене, Мати:
Евангелие едино сокровище имел еси, отче Александре, нищенствуя плотию на земли, но якоже великий апостол, ничесоже содержа, многих обогатил еси сокровищи Духа, и одесную грядущаго Судии предстояния люди предуготовляя.
Возносяй смиренныя Господь вознесе тя, отче Александре, из глубины иноческаго смирения на престол святительства, оттуду же на Небо Небесе, и венча тя венцы преподобия и новаго мученичества.
Иерарше Христов и учителю Православия Александре всехвальне, егоже вещания сладце послушаше вся христоименитая Самара, утверди ны в благочестии молитвами твоими.
Богородичен: И мы Тебе вопием, якоже древле Предтечева мати, Дево Всечестная: откуду нам сие, яко к многогрешным приходиши и всем помогаеши неистощимою милостию Твоею.
Светилен, глас 3:
Приими, о Троице покланяемая, новаго мученика Александра, его же приводит к Тебе род безбожный, яко жертву совершенную, яко благоуханный цвет, яко благовонный фимиам, яко миро многоценное и даруй нам и граду Самаре избавитися от всех напастей и просветитися светом истины.
Слава и ныне:
Марие Богоневестная, христианом Предстательнице, Ангелом же Царице и всем святым Первостоятельнице, не престай молящи Господа о православно воспевающих Тя.
На хвалитех стихиры, глас 4:
Терпел еси гонение от неверных, радовался еси воздаянием, яже уготова Бог любящим Его. Сего ради, священномучениче, ветхаго совлеклся еси человека, ветхаго же искоренив идола безбожия, благодатию мучений своих освятил еси град Самару, и в нем яко солнце незаходимое возсиял еси. Сего ради молим тя, отче Александре: моли Христа Бога спастися душам нашим.
Терпел еси от безбожных гонения, и радовался еси от Владыки Христа воздаянием, и к злобствующим вопиял еси: нужно страдание, но радостно возмездие, многи скорби, но сладок рай и сего ради многи оставльша раскол, к тебе притекаху, глаголюще: моли Христа Бога, отче Александре, да твоими молитвами спасет души наша.
Терпя мучения кровавыя, одежду священства своего, святителю Александре, светло украсил еси, и в Небесную Церковь введен бысть, и со Ангелы всегда Богу предстоя, мудре, и ныне моли даровати мир душам нашим.
Слава, глас 8:
Самарскому граду вся волжская страна спразднует днесь, в память честнаго сего архиерея, ибо концы земнии восплещуще веселятся нынешним торжеством священномученика. Тем же и мы песньми, яко цветы, венцы сплетше, возопиим: радуйся пастырю добрый, иже душу положи за овцы своя, молимся тебе, богоносне отче Александре, молися стадо свое от безбожных волков избавити и небесныя ограды с тобою сподобитися.
И ныне:
Владычице, приими молитвы раб Твоих, и избави нас от всякия нужды и печали.
Великое славословие и отпуст.
Свщмч. Александра (Радченко) иерея, Лыпьянского, Черкасского (†1938)
ТРОПАРЬ, глас 6
В житии своем Христу подражая, / гонения за Него претерпел, / непоколебим в вере православной пребыв, / венец мученический от Христа приял еси, / священномучениче Александре, / моли милостиваго Бога / спасение пастве твоей даровати / и душам нашим велию милость.
КОНДАК, глас 3
Гонения, клевету и поношения смиренно претерпеша, / душу свою за овцы Христовы положил еси, / не убоявшеся убивающих тело, / но мо лился еси слезно о пастве своей, / спаси нас твоими молитвами, священномучениче Александре, отче наш
Свщмч. Иоанна (Затовского) иерея, Корсунского, Черкасского (†1938)
ТРОПАРЬ, глас 6
В житии твоем Христу добре послуживый, / в гонениях лютых непоколебим в вере пребыл еси, / венцем мученическим от Христа увенчанный, / священномучениче Иоанне Корсунский, / моли милостиваго Бога / спасение чадом твоим присно даровати / и душам нашим велию милость.
КОНДАК, глас 3
Гонение, презрение и темничное заключение претерпевый, / Пастыреначальнику Христу подражая, / в лютых скорбях Бога прославил еси, / о убийцах слезне моляся, / не убоявыйся убивающих тело, / не остави нас твоим молитвенным предстательством / священномучениче Иоанне, отче наш.
Молитва священномученику Александру Лыпьянскому
О великий угодниче Божий и предивный пастырю наш, отче Александре, православныя веры ревнителю и учителю, раскола и неверия обличителю и лжеименнаго умствования посрамителю! Призри от горния славы на нас, теплохладных, страстьми зараженных, и моли милостиваго Бога, да исцелит Он нас от душевных и телесных болезней, укрепит в вере православней и умножит ю в наших сердцах! О, святче Александре! Ты в земней жизни скорьби многия претерпевый, свободи нас от врагов видимых и невидимых, а в скорбех - укрепи и утеши небесною радостию! Неверующим в весе нашей и всей стране сей умоли, святче Божий, да познают они Бога Духом Святым и обратятся от неверия к вере истинной, да никто от них не погибнет! Пастырю наш добрый! Все житие твое земное бысть исповедничеством Евангельским, даждь и нам дух твердый исповедовати Иисуса Христа всем житием своим! Положивый, отче Александре, душу свою за други своя, даруй и нам сию жертвенность в служении ближним! С радостию восшедый на крест свой, укрепи и нас в нынешних и грядущих мучениях, от врагов видимых и невидимых воздвизаемых за имя Христово. Сохрани, мучениче, нас от духа антихриста, даруй силы благословляти, а не проклинати обижающих нас, да сподобимся с тобою наследия Царствия Небеснаго, идеже ты ныне ликуеши в сонме святых, и купно со всеми вами воспевати имя Пресвятыя Троицы, Отца и Сына и Святаго Духа и твое милостивное заступничество во веки веков. Аминь.
Молитва священномученику Иоанну Корсунскому
О святый угодниче Божий, многострадальный пастырю наш, отче Иоанне, крине земли нашея, звездо, воссиявшая в сонме святых Новомучеников Черкасских! Ты в земнем житии своем добре Богу поработал еси: во учении, врачевании и пастырском служении, многия плоды Духа Святаго стяжавый и мученическим венцем увенчанный от Самаго Пастыреначальника Иисуса Христа! Призри от горния славы на нас, немощных, обуреваемых страстьми, и испроси у Господа Славы нам дары духовныя: веру укрепи, надежду и всецелое упование на Господа умножи, а паче сего венец всех даров - любовь нелицемерную ко Творцу и ближним даруй! Твоим врачебным искусством исцели наша болезни телесныя и даруй терпение их пренести без ропота! Заблудших, в стране тебе присной, к свету истины приведи, в расколы ушедших – покаянием в Лоно Церкви Православныя возврати, в ереси отпадших – вразуми, да никто от них не погибнет в конец.
О священномучениче Иоанне! В страшных гонениях ты не отреклся еси веры Христовой и святаго пастырства, помози и нам, теплохладным, душу непрестанною молитвою согревати, покаянием слезным очищати, состраданием к ближним освящати, и сим достойно приготовитися к сретению Царя Небеснаго!
Святче Иоанне! Сохрани нас от слуг грядущаго Антихриста в пустыне спасении нашего! А егда восхощет Господь и нас, твоим водительством, святый отче, мученичеством увенчати, буди нам заступником и путеводителем, и укрепи душу и тело, да не отречемся Сладчайшаго Господа нашего Иисуса Христа никогда же, но да исполнятся сердца наша радостию неизреченною, да в сих мучениях грядущих, тобою укрепляеми и сохраняеми, прославим имя Пресвятыя Троицы, Отца и Сына и Святаго Духа и твое милостивное предстательство во веки веков. Аминь.
Акафист Свщмч. Александру (Радченко)
Кондак 1
Богоизбранного воина Христова, / ревностнаго пастыря земли черкасския, / воспоим вернии священномученика Александра, / во дни тяжких гонений за веру православную / подвигом своим паству укреплявшаго, / благодатными словесами заблудших вразумлявшаго /. И ныне молитвами твоими, отче Александре / от всяких нас бед и напастей сохрани / с верою и любовию зовущих ти: Радуйся, священномучениче Александре, живот свой за Христа положивый!
Икос 1
Ангелов Творец избра тя, святый отче Александре, от народа нашего богоизбраннаго на служение Себе в дальней стране Сибирстей. Тамо бо приводил еси язычников к вере Христовой, уча их Слову Божию. Мы же, видяще попечение о тебе от ранней юности Промысла Божия, с радостию вопием ти:
Радуйся, от юности Христа возлюбивый;
Радуйся, в Сибири добре Ему послуживый.
Радуйся, светом Евангелия народы ея просвещавый;
Радуйся, в вере Христовой их укреплявый.
Радуйся, тамо на пастырское служение призванный;
Радуйся, пастве своей читинской богоданный.
Радуйся, гонения от богоборцев приявый;
Радуйся, в скорьбех Христа познавый.
Радуйся, священномучениче Александре, живот свой за Христа положивый!
Кондак 2
Видяще Господь твердую веру твою и всецелое упование на Него, отче наш Александре, храни Тя до времени от неистовства жестокосердных, да благим примером своим, непрестанною молитвою и проповедию, научаеши верных воспевати Богу: Аллилуия.
Икос 2
Зело страда сердце твое, отче, зря отступление народа некогда богоизбраннаго, попирающаго святыни православнии, междуусобною бранею прогневляющаго Бога. Мы же, видяще любовь твою ко отечеству земному, со усердием воспеваем тако:
Радуйся, ревностию по Бозе Илии уподобивыйся;
Радуйся, возлюбивый Бога паче всего.
Радуйся, яко Моисей, ведый паству ко спасению;
Радуйся, научающий всех терпению.
Радуйся, о погибели душ нераскаянных зело скорбевый;
Радуйся, блага міра сего презревый.
Радуйся, проповедию покаяния сердца окаменелыя возгревавый;
Радуйся, покровом молитвенным чад духовных выну покрывавый.
Радуйся, священномучениче Александре, живот свой за Христа положивый!
Кондак 3
Сила Вышняго осеняше Тя на всех путиях жития земнаго, священномучениче Александре, научаеши избегати гнева неправеднаго. Подражая Небесному Учителю Христу, рекшему: «Аще Мене изгнаша и вас изжденут», ты, святый отче, скитался еси по земли, поучая и нас любити Небесное Отечество паче земнаго, вопия Богу: Аллилуия.
Икос 3
Бегая гнева неистовнаго, отче Александре, ты возвратишася во отечество и, зря погибель и духовное запустение на месте святем, сердечно скорбеша о сем. Темже и мы, дивясь велией любви твоей к страждущим, вопием тако:
Радуйся, кротость и смирение стяжавый;
Радуйся, о помиловании народа выну взывавый.
Радуйся, паче присных Бога возлюбивый;
Радуйся, Христу Богу верно даже до смерти послуживый.
Радуйся, паствы твоей велие утешение;
Радуйся, гонимых правды ради призрение.
Радуйся, пастырям верным укрепление;
Радуйся, обидимых заступление.
Радуйся, священномучениче Александре, живот свой за Христа положивый!
Кондак 4
Бурю гонений воздвиже на Тя, славный воине Христов, лукавый дух, возмущаше одержимых им. Аки странник во юдоле сей многоскорбной, искаша утешение в молитве сердечней, отче Александре, научая сим в скорбех нашиих выну взывати ко Утешителю Богу: Аллилуия.
Икос 4
Видяще запустение святых храмов, светильниче земли черкасския, день и нощь проповедовал еси покаяние, тайно совершая требы, поучаши приходящих к тебе не отступати от веры православныя. Темже и мы ублажаем тя тако:
Радуйся, нищий духом, яко унаследовал еси Царствие Небесное;
Радуйся, зело скорбящий и плачущий, яко утеши тя Господь.
Радуйся, кроткий нравом, яко в земле нашей прославленный;
Радуйся, алчущий и жаждущий правды, яко насытишася.
Радуйся, чистый сердцем, яко Бога в скорбех узреша;
Радуйся, миротворче, сыном Божиим нареченный.
Радуйся, изгнанный правды ради, яко твое есть Царствие Небесное;
Радуйся, милостивый, от Бога помилованный.
Радуйся, священномучениче Александре, живот свой за Христа положивый!
Кондак 5
Звезда многосветлая в земле черкасстей возженная, священномучениче Александре, ты возвратишася в весь родную, идеже совершал еси тайно молебствия, отпевая погибающих от голода, крестяше младенцев, совершаше тайно Службу Божию, купно с паствою своею разделяя радости и горе, и научая пети всех: Аллилуия.
Икос 5
Слыша стенания народа, от голода умирающаго, ты, святый отче, вразумляше его, яко той есть - попущение Божие за отступление от веры и за разрушаемыя храмы Божии. Темже и мы, видяще восстановление разрушенных святынь, воспеваем ти:
Радуйся, молитвенниче о нас присный;
Радуйся, заступниче усердный.
Радуйся, покровителю небесный;
Радуйся, пастырю наш добрый.
Радуйся, кроткий вразумителю обидящих;
Радуйся, смиренное утешение обидимых.
Радуйся, благословлявый гонителей;
Радуйся, наказателю святыней хулителей.
Радуйся, священномучениче Александре, живот свой за Христа положивый!
Кондак 6
Проповедовал еси Слово Божие, отче Александре, в веси родной, идеже Господу потрудишася зело, мир душевный и премудрость велию, чистоту сердечную, кротость и смирение стяжав, исполняя заповеди Господни и иных воздвизая к сему, воспевая Богу: Аллилуия.
Икос 6
Воссияв светом истины земли нашей многострадальней, святче Александре, в молитвах пламенея непрестанно, взывая к Богу о помиловании народа от Него отступльшаго и о даровании ему покаяния. Сего ради воспеваем ти таковая:
Радуйся, Церкви Христовой со страхом Божиим послуживый;
Радуйся, к Богу непрестанно молитвы возносивый.
Радуйся, веру в Него умножавый;
Радуйся, заблуждающих ко Христу призывавый.
Радуйся, скорбящих утешавый;
Радуйся, неверующих вразумлявый.
Радуйся, всех ко спасению призывавый;
Радуйся, в Православии верных утверждавый.
Радуйся, священномучениче Александре, живот свой за Христа положивый!
Кондак 7
Хотяще веру православную безбожницы в земле сей искоренити, народ в рабство обращаху, храмы Божии разрушаху, чад в неверии воспитываху, повелевая всем от веры отрещися. Но ты, добрый пастырю наш, отче Александре, пробуждая совесть в людиех, потщався привести их к покаянию, непрестанно Богу вопия: Аллилуия.
Икос 7
Зря в тебе ревностнаго поборника Православия, священномучениче Александре, инии - духовно прозреваху, друзии же - озлоблялись зело, пакости ти дея. Мы же, пламенея ревностию о подвизе твоем, поем ти тако:
Радуйся, поношения Христа ради претерпевый;
Радуйся, паче благ земных спасение получити восхотевый.
Радуйся, утехи міра сего презревый;
Радуйся, отрещися служения священническаго не восхотевый.
Радуйся, даже самим присутствием в веси родной лукавому досаждавый;
Радуйся, имя Божие непрестанно призывавый.
Радуйся, Ангелов Божиих своим крепким исповедничеством возвеселявый;
Радуйся, рассеянныя овцы во едино стадо Христово собравый.
Радуйся, священномучениче Александре, живот свой за Христа положивый!
Кондак 8
Бурю неистовства воздвиже на тя, отче Александре, полк демонский, чрез верных служителей власти богоборческой, кии изгнаша тя из веси родной, а не возмогоша до времени убити тя, ибо десница Господня храняще вернаго служителя Своего невредимым, тако научая и нас, в скорбех житейских взывати Подвигоположнику Христу: Аллилуия.
Икос 8
Весь предавшись в руцы Божии, святче Александре, подражая великомученице Варваре, удалишася от гнева ищущих погибели твоей в весь, нарицаемую Лыпьянка, да тамо продолжиши служение свое исповедническое, его же мы ублажаем тако:
Радуйся, узкими и тесными вратами в Царствие Небесное восшедый;
Радуйся, венец исповедничества от Господа достойно приемый.
Радуйся, на небеси и на земли Церковью прославленный;
Радуйся, во страданиях Господом не оставленный.
Радуйся, светлая звездо путь ко Христу указующая;
Радуйся, светило незаходимое земли нашей многострадальной.
Радуйся, духа уныния и отчаяния силой Божией связующий;
Радуйся, духа неверия крепостию веры прогоняющий.
Радуйся, священномучениче Александре, живот свой за Христа положивый!
Кондак 9
Всякое естество ангельское удивися промышлению Божию о тебе, священномучениче Александре, егда ты в веси Лыпьянке, аки на Голгофе, проповедовал еси неустанно покаяние людием озлобленным, желая пострадати за Христа, даже и до смерти. Мы же, обретя сокровище сие, вопием Богу непрестанно: Аллилуия.
Икос 9
Ветии многоглаголивии не возмогут по достоянию изрещи величие подвига твоего, отче Александре, егда ты обретоша в Лыпьянке Голгофу свою, памятуя Распятаго, помышлял еси принести себе Богу Живому в жертву за греси людския. Сего ради мы вопеваем тебе тако:
Радуйся, звездо в сонме новомучеников просиявшая;
Радуйся, за имя Христово живот свой положивый.
Радуйся, в міре живущих заступниче и покровителю;
Радуйся, присный о нас молитвенниче.
Радуйся, на служение свое в Лыпьянке со страхом Божиим взиравый;
Радуйся, всех ко спасению призвавый.
Радуйся, яко слезы твои о народе погибающем Бог зревый;
Радуйся, яко стенания о нем Господь услышавый.
Радуйся, священномучениче Александре, живот свой за Христа положивый!
Кондак 10
Спасения чающе всем человеком, Господь призва тя на последний подвиг в земнем житии твоем, отче Александре, егда нощию мучители заточиша тя в темницу и зело избиша, хотяще да отречешися от Христа. Но ты, крепчае адаманта пребыв, воспоминая вольная страдания Христовы, укреплялся еси духом, взывая Ему: Аллилуия.
Икос 10
Наставниче богоданный быша всем, мучениче Александре, не словом точию, но примером страданий вольных научая, како надобно любити ближних, душу свою полагая спасения их ради. Темже и мы, видяще жертвенность твою, вопием ти тако:
Радуйся, крест страданий на ся вземый;
Радуйся, с радостию его до конца пронесый.
Радуйся, в темнице заключенных в страданиях укреплявый;
Радуйся, с сонмом новомучеников Черкасских пострадавый.
Радуйся, чашу смертную до конца испивый;
Радуйся, блаженство вечное унаследовавый.
Радуйся, оскорбления и биения кротко претерпевый;
Радуйся, мучителей не презревый.
Радуйся, священномучениче Александре, живот свой за Христа положивый!
Кондак 11
Пение непрестанное Иисусу Сладчайшему и Пречистей Его Матери возносяще, святче Александре, благословиша убийц своих и моляще о прощении их, яко не ведают чью злую волю творят, сим и нас научая врагов своих благословляти, а не проклинати, воспевая богокрасную песнь: Аллилуия.
Икос 11
Кто возможет изрещи силу страданий твоих телесных, священномучениче Александре, егда в темнице пребываше, и силу страданий душевных, егда видеша помрачение умов и сердец убийц своих? Но мы, сострадая тебе, святче, вопием:
Радуйся, аки Петр, темничное заключение претерпевый;
Радуйся, отсюду на крест свой с радостию восшедый.
Радуйся, дух свой возлюбленному Иисусу Христу предавый;
Радуйся, яко Господь главу твою мученическим венцем увенчавый.
Радуйся, яко Ангели на Небеси о тебе возвеселишася;
Радуйся, в селениях праведных вселивыйся.
Радуйся, мученическая похвало;
Радуйся, заступниче наш небесный.
Радуйся, священномучениче Александре, живот свой за Христа положивый!
Кондак 12
Благодати велия сподобивыйся от Господа, пречестне отче Александре, утешати скорбящия, вразумляти заблудшия, в вере православной укрепляти. Тем велика светильника яви тя Господь нам, малодушным и теплохладным, вразумляя веру правую содержати, распрей и расколов избегати, твердое упование на него имети и любовь ко Сладчайшему Иисусу стяжати, вопия Ему во умилении сердец: Аллилуия.
Икос 12
Воспевая велия страдания твоя, отче Александре, ублажаем и мученическую кончину твою, молитвенно торжествуя святую память твою, со усердием воспевая тако:
Радуйся, пастырю добрый, данный нам во укрепление;
Радуйся, отче чадолюбивый, данный Богом в заступление.
Радуйся, любящим тя ходатаю спасения;
Радуйся, наша радость и веселие.
Радуйся, воине Христов богоизбранный, мысленного Амалика победивый;
Радуйся, ко храму святому всех призывающий.
Радуйся, прошениям чтителей твоих внимающий;
Радуйся, к стяжанию мира душевнаго призывающий.
Радуйся, священномучениче Александре, живот свой за Христа положивый!
Кондак 13
О, предивный угодниче Христов и верный пастырю наш, священномучениче Александре, приими малое моление сие, в похвалу твою возносимое, и призри на чада твоя духовная, зде собравшиися и чтущии святую память твою, проси, святче, милостиваго Бога нашего Иисуса Христа даровати нам умножение веры, терпение в скорбех, дух ревности по славе Божией, да сохранит Он нас от грядущаго богомерзкаго антихриста и злых слуг его, враг видимых и невидимых, вечнаго мучения избавит нас и сподобит в Царствии Небеснем со всеми святыми воспевати Пресвятой Троице:
Аллилуия. Аллилуия. Аллилуия.
Сей кондак чтется трижды, по сем икос 1 и кондак 1.
Акафист священномученику Иоанну Корсунскому
Кондак 1
Избраннаго Богом от народа нашего / и призваннаго на подвиг пастырскаго служения, / Христу Пастыреначальнику даже до смерти поработавшаго, / смерти же истинно мученическия, / восхвалим вернии новаго светильника нашея земли, / в сонме Святых Новомучеников Черкасских ублажаемаго. / Ты же предстояй пред Престолом Всевышняго, / от всяких нас скорбных обстояний свободи, / да во имилении зовем ти: / Радуйся, священномучениче Иоанне, / новый светильниче черкасския земли!
Икос 1
Образом благочестия родители твоя быша, отче Иоанне, прилежанию ко храму Божию издетска тебе научиша и в молитве сердечней тебе наставиша, ею же осеняем, скорбный путь земнаго жития прешел еси. Темже и мы, зряще чистоту души твоея издетска сохраненную, с радостию вопием ти:
Радуйся, благочестивым родетелем чадо богодарованное;
Радуйся, истинное их утешение.
Радуйся, Ангела Хранителя тихое призрение;
Радуйся, чадо Божие от юности к подвигу избранное.
Радуйся, в молитве пламенеющей горевый;
Радуйся, прелести сего міра презревый.
Радуйся, издетска сугубую благодать стяжавый;
Радуйся, Господа в сердце своем познавый.
Радуйся, священномучениче Иоанне, новый светильниче черкасския земли!
Кондак 2
Провидя Господь, еще сущу ти во утробе матери, пламенное твое горение в любви к Нему и к чадом Божиим, отче Иоанне, благоволи Заступником Небесным тебе быти Святаго Предтечу и Крестителя Своего Иоанна да подражаеши ему в житии своем, не токмо деяниями, но и молением, вопия Богу непрестанно: Аллилуия.
Икос 2
Разум несумненный имея от юности Богом данный, святче, учению прилежно вдался еси, а по сем и сам учительствовавый, научая чад Божиих делу христианскаго совершенствования, прилежанию ко храму Божию и церковной молитве. Сему радующеся, вопием тебе тако:
Радуйся, в ревности по Бозе Предтече подражавый;
Радуйся, проповеди никогда же оставлявый.
Радуйся, злохулителей имени Божия обличавый;
Радуйся, пламенною любовию просиявый.
Радуйся, подражая Иоанну Пророку, в темницу без ропота веденный;
Радуйся, яко Небесный Заступник твой, за Христа убиенный.
Радуйся, кровию своею землю нашу освятивый;
Радуйся, душею ко Престолу Вседержителя воспаривый.
Радуйся, священномучениче Иоанне, новый светильниче черкасския земли!
Кондак 3
Сила Вышняго и Покров Царицы Небесныя осеняше тя, отче Иоанне, на жизненном пути, егда горя любовию ко страждущим воином, ты служил еси им врачебным искусством, подражая Пантелеимону Целителю, не взирая на опасности и лишения, непрестанно в сердце Богу поя песнь: Аллилуия.
Икос 3
Имуще дар слова, от Бога тебе данный, отче Иоанне, врачуя телеса страждущих, ты не забывал еси и о душах их, утешая, вразумляя, наставляя и врачуя от маловерия, уныния и отчаяния злаго. Мы же, зряще подвиги твоя, умиленно взываем:
Радуйся, яко милосердный самарянин, ближним послуживый;
Радуйся, надежду в души их влагавый.
Радуйся, от наветов духа злобы защищавый;
Радуйся, в молитве за болящих день и ночь горевый.
Радуйся, скорби купно с ними разделявый;
Радуйся, многих к покаянию призвавый.
Радуйся, веру ослабевшую в них оживлявый;
Радуйся, в сим служении любовь к ближним познавый.
Радуйся, священномучениче Иоанне, новый светильниче черкасския земли!
Кондак 4
Бурю неистовства воздвигли есте на православный народ наш слуги антихриста – храмы разрушая, священнослужителей избивая, землю кровию обильно поливая. Ты же не покоривыйся им, отче Иоанне, но с воинами ополчения народнаго стал еси на брань супротиву полчищ сатанинских, верно Богу воспевая: Аллилуия.
Икос 4
Видя отступление народа нашего, некогда богоизбраннаго, от Святыя Церкви и неправедное избиение богоборцами Царя Мученика Николая с его Семейством, отче Иоанне, многия слезы о сем проливал еси, скорбя о жестокосердии неистовствующих безбожников. Сие ведая, и мы воспеваем тебе тако:
Радуйся, обильным плачем, аки Царь Давид, скорбь душевную растворявый;
Радуйся, в сих душевных муках веру не потерявый.
Радуйся, о прощении народа к Богу день и нощь взывавый;
Радуйся, в сих скорбях волю Божию на себе познавый.
Радуйся, воине Царя Небеснаго;
Радуйся, яко не отреклся еси царя земнаго.
Радуйся, слугам антихриста не поклонивыйся;
Радуйся, ими зело возненавиденный.
Радуйся, священномучениче Иоанне, новый светильниче черкасския земли!
Кондак 5
Богопросвещенный светильниче земли нашея, егда Господь призва тя на новый подвиг – пастырского служения во время неистовства безбожников, не поколебался еси, но, подражая в сем Святым Апостолом, вся презрев, отдался еси в руцы Божии, пламенея любовию к Богу, непрестанно взывая Ему: Аллилуия.
Икос 5
Слыша Апостол Петр вопрошение Иисуса Христа: «Любиши ли мя паче сих?», отвещаша Ему: «Ей, Господи, Ты веси, яко люблю Тя!» Тако и ты, святче Иоанне, слыша в сердце своем сие вопрошение, рекл еси Спасителю: «Ей, Господи!» Господь благослови тя на тесный путь пастырскаго служения, яко и Петра: «Паси овцы Моя! Паси агнцы Моя!» Мы же зряще послушание твое Деснице Божией, ублажаем тя тако:
Радуйся, от Пастыреначальника избранный;
Радуйся, крест сей на рама своя вземый.
Радуйся, за грехи народа, аки агнец, закланный;
Радуйся, скорби до конца претерпевый.
Радуйся, службы никогдаже оставлявый;
Радуйся, во трудех апостольских пребывавый.
Радуйся, к покаянию всех призывавый;
Радуйся, от духа безбожия паству богоданную защищавый.
Радуйся, священномучениче Иоанне, новый светильниче черкасския земли!
Кондак 6
Видя богоугодное житие твое, отче Иоанне, многия безбожники оставиша свое заблуждение и в покаянии возвратишася к Богу. Нецыи же, во ослеплении пребывая, прилагаху беззаконие к беззакониям, лютую брань на тя воздвигоша, клеветою омрачая святое имя твое, мучениче, не разумея пети ангельскую песнь: Аллилуия.
Икос 6
Возсиявый в сердце светом истинныя любви к духовно погибающим, святче Иоанне, ты денно и нощно служил еси им, проповедуя всем Слово Божие, яко власть сатанинская попущена Богом за греси народа, отступившаго от веры православныя и убиения Помазанника Божия не возбранившаго. Таковую твою ревность о спасении погибающих зряше, с радостию вопием ти:
Радуйся, добрый пастырю Христова Стада;
Радуйся, душу положивый за овцы своя.
Радуйся, ко Христу многия привел еси;
Радуйся, велий в Царствии Небеснем нареченный.
Радуйся, в уныние падших возставлявый;
Радуйся, скорбями отягченных утешавый.
Радуйся, отчаяние от паствы прогонявый;
Радуйся, кающихся к житию богоугодному наставлявый.
Радуйся, священномучениче Иоанне, новый светильниче черкасския земли!
Кондак 7
Егда нача управляти державою нечестивый богоотступник Иосиф, тогда его клевреты народ наш в рабство обращаху, веси в запустение приводиша, веру православную искореняюще, храмы Божия закрывающе, а инии – разрушающе. Ты же, отче Иоанне, во время лихолетия сего утешавый паству свою, яко гонение сие временно суть, к терпению призывая. Тем же и мы, чудяхуся мудрости твоей, пастырю наш дивный, в сладости сердечней вопием Богу: Аллилуия.
Икос 7
Яко Древний Египет предашася казнем, по слову боговидца Моисея, тако и на землю нашу, оскверненную беззакониями народа, от Бога отступившаго, опустишася лютый глад, и народ стеняше зело под властию лютаго антихриста и слуг его. Ты же, пастырю наш дивный, состраждуща о пастве своей, любовь свою проливавый на ню, поучая, яко не хлебом единым будет жива душа, но всяким глаголом, исходящим из уст Божиих, питая паству хлебом духовным. Сего ради вопием тебе тако:
Радуйся, в скорбях Бога благословлявый;
Радуйся, житием своим Бога прославлявый.
Радуйся, подобно пророку Иеремии, о гресех народа плакавший;
Радуйся, власть безбожную обличавый.
Радуйся, подобно Иоанну Предтече, к покаянию народ призывавый;
Радуйся, пастырскаго служения никогдаже оставлявый.
Радуйся, Бога в скорбях и гонениях познавый;
Радуйся, нечестие богоборцев обличавый.
Радуйся, священномучениче Иоанне, новый светильниче черкасския земли!
Кондак 8
Слыша приказание слуг власти антихристовой, преселился еси, отче Иоанне, в землю черкасскую, во славный град Корсунь, идеже пребывал еси в служении даже и до заключения в темницу. В сем граде, видя запустение храмов Божиих, ты собрал еси рассеянную паству во едино стадо, утешая ея в открытии церкви, научая пасомых выну пети Богу: Аллилуия.
Икос 8
Весь исполнен ревности в проповеди Слова Божия, святче Иоанне, не убоявыйся прещения власть придержащих, но памятуя слова Господни: «Проклят всяк, иже с нерадением творит дело Божие» и «Не убойтесь убивающих тело, души же не могущих убити», ты всецело предался еси служению, научая и нас подражати тебе в сем и пети тебе тако:
Радуйся, нищий духом, яко твое есть Царствие Небесное;
Радуйся, скорбящий и плачущий, яко утешил тя Господь.
Радуйся, пастырю кроткий, яко Богом прославленный;
Радуйся, алчущий и жаждущий правды, яко насытивыйся.
Радуйся, милостивый к страждущим, яко Богом помилованный;
Радуйся, чистый сердцем, яко Бога ныне непосредственно зриши.
Радуйся, миротворче, сыном Божиим нареченный;
Радуйся, гонимый за правду, яко твое есть Царствие Небесное.
Радуйся, священномучениче Иоанне, новый светильниче черкасския земли!
Кондак 9
Все естество ангельское удивишася крепости духа твоего, мучениче, егда ведая о том, яко ищут слуги сатанинския погубити тя, не убоявся сего и не укрылся еси от их неистовства, но, яко светильник ярко горящий наверху горы поставлен быша, тако и ты, отче Иоанне, светил еси всем верою, надеждою и любовию, озаряя им путь ко спасению, научая пети ангельскую песнь: Аллилуия.
Икос 9
Витии многовещаннии не возмогут по достоянию воспети подвиги твоя, священномучениче Иоанне, ты бо, памятуя глагол Господень, яко ученик не выше учителя, смиренно вся претерпел еси до конца. Зряще таковую твою ревность по Бозе, вернии воспеваху тебе:
Радуйся, яко Богу подражал еси в крестоношении;
Радуйся, яко укреплявыйся духом в гонении.
Радуйся, смиренно претерпевый презрение;
Радуйся, от Господа получивый велие утешение.
Радуйся, с паствою путь исповедничества до конца прошедый;
Радуйся, пасомых ко Христу приведший.
Радуйся, ныне в славе Божией наслаждаешися;
Радуйся, к ней же и нас призывающий.
Радуйся, священномучениче Иоанне, новый светильниче черкасския земли!
Кондак 10
Хотяй спастися всем человеком, Господь призва тя, отче Иоанне, к мученическому подвигу. «Егда зерно не падет в землю, не даст плода во век», - рекл еси Спаситель наш. И ты, святче, памятуя сии слова, яко зерно, падшее в землю, мног плод духовный принесл еси, научая воспевати немолчно Богу песнь: Аллилуия.
Икос 10
Стена крепкая, ухищрениями диавола не одоленная, пребыл еси до конца, мучениче Христов Иоанне, в стены каменныя со иными мучениками заключенный, тамо их утешал еси, яко во страданиях познается любовь Божия. Темже и мы потщимся прославити подвиги твоя:
Радуйся, яко раб в темницу веденный;
Радуйся, в ней заключенный.
Радуйся, хулителями презренный;
Радуйся, міром забвенный.
Радуйся, стада Христова пастырю наш присный;
Радуйся, верными прославляемый.
Радуйся, не отверженный Богом;
Радуйся, Им же во блаженство райское призванный.
Радуйся, священномучениче Иоанне, новый светильниче черкасския земли!
Кондак 11
Видяще терпение твое, отче Иоанне, многии юзники укрепляшеся во узах. Ты же непрестанно славляше сладчайшее имя Иисуса Христа, взывавый к Пречистей Его Матери, да вразумит хулителей имени Божия и не даст им погибнути в конец, не ведающими пети Богу: Аллилуия.
Икос 11
Како возможем мы немощнии, изрещи силу страданий твоих, священномучениче Иоанне, в темнице пренесенных: во гладе и во хладе, без сна пребывая, тяжкии побои претерпевый, святче, но не отрекийся ни священнаго сана, ни веры Христовой. Темже и мы ныне прославляем страдания твоя:
Радуйся, глад телесный Словом Божиим утолявый;
Радуйся, яко на мразе Иисусовою молитвою согревавыйся.
Радуйся, жестоко биемый, вспоминал еси страдания Христовы;
Радуйся, во издевательствах хулителей благословлявый.
Радуйся, крайним незлобием их удивлявый;
Радуйся, от них уважение снискавый.
Радуйся, мір, плоть и диавола презревый;
Радуйся, отрещися от веры не восхотевый.
Радуйся, священномучениче Иоанне, новый светильниче черкасския земли!
Кондак 12
Благодатию Божией покрываемый, вся претерпел еси без ропота, и на убиение веденный, благословиша убийц своих, моляся в сердце о них, да не погибнут во ожесточении своем. Твоею кровию святою, отче Иоанне, вси мы освятихомся и к вере Христовой пришедше, с радостию о тебе поем Богу: Аллилуия.
Икос 12
Воспевая милосердие твое неизреченное ко всем страждущим и болящим, сирым и немощным, убогим и презренным, отче Иоанне, памятуем исповедничество твое. Взирая же на страдания твоя, за Христа претерпенныя, ублажаем и мученическую кончину твою, воспевая тебе тако:
Радуйся, яко ангелов удививый;
Радуйся, яко землю нашу освятивый.
Радуйся, к Пастыреначальнику душею воспаривый;
Радуйся, сирыми нас на земли не оставивый.
Радуйся, молитвенниче о нас присный;
Радуйся, заступниче наш Небесный.
Радуйся, мучениче Богокрасный;
Радуйся, исповедниче непоколебимый.
Радуйся, священномучениче Иоанне, новый светильниче черкасския земли!
Кондак 13
О предивный пастырю наш, священномучениче Иоанне! Приими от любящих и благодарных сердец сие малое моление в похвалу тебе приносимое. Предстательством твоим ко Господу помяни нас в теплых своих молитвах: болезни наша исцели, уныние и отчаяние от сердец наших прогони, даруй терпение в скорбех и напастех, и от слуг грядущаго Антихриста сохрани, да сподобит Господь нас в Царствии Небеснем купно со всеми святыми воспевати Пресвятую Троицу:
