Служба святому праведному пресвитеру Петру Великодворскому, исповеднику.

На велицей вечерни

 

Блажен муж: 1-й антифон. На Господи, воззвах: стихиры на 8, глас 4.

Днесь возсия световидно, якоже солнце, / всехвальная память твоя, / чудотворче и исповедниче, предивне отче Петре, / просвещая омраченныя души наша / светом исправлений твоих, / и веселием исполняет сердца наша, / всесвященное торжество твое совершающих.

Приидите мучениколюбцев собори, / память праведнаго мужа почтим, / путь тесный и спасительный избравшаго / и за Христом даже до уз последовавшаго, / исповеданием веры апостолом подобника, / мучеников равностоятеля, / богоблаженнаго Петра днесь ликующе восхвалим.

Воспоим, людие, песни хвалебныя, / прозябение добролозное земли Рязанския ублажим, / сторичный клас нивы Христовой прославим, / ковчег щедрот божественных облобызаем, / приятелище даров Утешителя благочестно почтим, взывающе: / радуйся, отче Петре, / молитвенниче всеусердный о душах наших.

Притецем днесь, вернии, / ко  источнику  исцелений неоскудному, / щедрот и милостей кладезю неизчерпаемому, / учителю благочестия добродетельному, / Петру, исповеднику всехвальному, / и благодарне тому возопиим: / радуйся, каменю веры,/ Божественными словесы паству твою напоивший / и росою молитв твоих / безбожия зной утоливший.

 

Слава, глас 2:

Воспоим ныне, братие, / светлопразднственную песнь, / новоявленнаго исповедника Петра ублажающе, / и к тому возносяще молитву, / во еже очистити сердец наших очеса / и памятию чудес его просветити души наша.

И ныне, глас тойже: Прейде сень законная:

Вход. Прокимен дне, и чтения 3.

 

Притчей чтение (главы 10, 3 и 8):

Память праведнаго с похвалами, и благословение Господне на главе его. Блажен человек, иже обрете премудрость, и смертен, иже уведе разум. Лучше бо сию куповати, нежели злата и сребра сокровища. Честнейшая же есть камений многоценных, все же честное недостойно ея есть. Долгота бо дней и лета живота в деснице ея; в шуйце же ея богатство и слава. От уст ея исходит правда, закон же и милость на языце носит. Послушайте убо мене, о чада, честная бо реку: и блажен человек, иже пути моя сохранит: исходи бо мои, исходи живота, и уготовляется хотение от Господа. Сего ради молю вас, и предлагаю мой глас сыновом человеческим: яко аз, премудрость, устроих совет и разум и смысл аз призвах: мой совет и утверждение, мой разум, моя же крепость. Аз мене любящия люблю, ищущии же мене обрящут благодать. Разумейте убо, незлобивии,  коварство, ненаказаннии же, прилагайте сердца. Послушайте мене и паки, честная бо реку, и отверзу от устен правая; яко истине поучится гортань мой, мерзки же предо мною устны лживыя. С правдою вси глаголы уст моих; ничтоже в них стропотно, ниже развращенно. Вся права суть разумевающим и проста обретающим разум. Научаю бо вас истине, да будет о Господе надежда ваша, и исполнитеся Духа.

 

Притчей чтение (главы 10 и 11):

Уста праведнаго каплют премудрость: язык же неправеднаго погибнет. Устне мужей праведных каплют благодати, уста же нечестивых развращаются. Мерила льстивая мерзость пред Господем: вес же праведный приятен Ему. Идеже аще внидет досаждение, тамо и безчестие: уста же смиренных поучаются премудрости. Совершение правых наставит их, и поползновение отрицающихся упасет их. Не пользуют имения в день ярости, правда же избавит от смерти. Умер праведный, остави раскаяние: наручна же бывает и посмеятельна нечестивых пагуба. Правда непорочнаго исправляет пути, в нечестие же падает неправда. Правда мужей правых избавит их: безсоветием же пленяются беззаконнии. Скончавшуся мужу праведну, не погибнет надежда: похвала же нечестивых погибнет. Праведник от лова убегнет, вместо же его предается нечестивый. Во устех нечестивых сеть гражданом, чувство же праведных благопоспешное. Во благих праведных исправится град, усты же нечестивых раскопается. Ругается гражданом лишенный разума, муж же мудрый безмолвие водит.

Премудрости Соломоновы чтение ( глава 4):

Праведник, аще постигнет скончатися, в покои будет. Старость бо честна не многолетна, ниже в числе лет исчитается. Седина же есть мудрость человеком, и возраст старости, житие нескверное. Благоугоден Богови быв, возлюблен бысть, и живый посреде грешник, преставлен бысть. Восхищен бысть, да не злоба изменит разума его, или лесть прельстит душу его. Рачение злобы помрачает добрая, и парение похоти пременяет ум незлобив. Скончався вмале, исполни лета долга. Угодна бо бе Господеви душа его. Сего ради потщася от среды лукавствия. Людие же видевше и не разумевше, ниже положше в помышлении таковое: яко благодать и милость в преподобных Его, и посещение во избранных Его.

На литии стихиры храма и святаго, глас 8:

Сошедшеся днесь, христоименитых собори, / с Горними Силами лик составим, / богоноснаго Петра радостно возвеличим, / подвигом исповедания его просветившеся, / Триипостасному Божеству боголепно поклонимся, / Дивному и Славному во святых своих.

Слава, глас тойже:

Сладкоуханный фимиам славословий / Троице Живоначальней принесем, / почитающе всесвященную память / дивнаго угодника Петра всеблаженнаго, / усерднаго и трудолюбнаго делателя вертограда Христова, / пастыря овец словесных благостнаго, / исповедника твердаго веры отеческия / и молитвенника теплейшаго о душах наших.

И ныне, глас тойже:

Недвижимое утверждение веры / и честный дар душ наших, / Богородицу песньми величаем, вернии: / радуйся, Камень Жизни во чреве Твоем вместившая; / радуйся, концей надеждо, скорбящих заступление; / радуйся, Невесто Неневестная.

На стиховне стихиры, глас 5:

Подобен: Радуйся:

Радуйся, Церкви Русския украшение, / пастырей Отечества нашего славо, / целомудреннаго жития добрóто, / священства Христова благочестное правило, / исповедания веры добропобедный столпе, / священночестне отче Петре, / Божественнаго Человеколюбия просим получити твоими молитвами / и миру даровати велию милость.

Стих: Честна пред Господем / смерть преподобных Его.

Радуйся, благочестия подвижниче, / средь безбожнаго мрака Света Божественнаго проповедниче, / злых нравов испрáвителю, / богоборческаго нечестия обличителю, / веры православныя неустрашимый защитниче, / воине Христов терпеливодушный, / праведне отче Петре, / не престай молитися ко Господу / даровати душам нашим мир и велию милость.

Стих: Блажен муж, бояйся Господа, / в заповедех Его восхощет зело.

Радуйся, христианскаго жительства образе, / заповедей Господних усердный хранителю, / добрый и кроткий людéй православных пастырю, / душ немощствующих врачу милостивый, / священнотаинниче Божий, пренебесныя дары земнородным являяй, / Христа Спаса верный служителю, / Того прилежно моли, пречудне отче Петре, / мир мирови даровати / и низпослати душам нашим велию милость.

Слава, глас 6:

Память праведнаго с похвалами совершающе, / песни хвалебныя принесем Христу Богу, / даровавшаго нам таковаго молитвенника и чудотворца, / Петра исповедника богоноснаго, / и, притекающе к раце мощей его, тако рцем: / помяни нас, отче священнейший, / у Престола Вседержителя всех Господа, / да дарует нам время на покаяние / и вся к душевному спасению полезная.

И ныне, глас тойже:

Творец и Избавитель мой, Пречистая:

На благословении хлебов тропарь святаго дважды и Богородице Дево: единожды.

Тропарь святаго, глас 3:

На утрени

Земли Русския украшение, / правою верою благочестно пожил еси, / верныя в годину гонений истине научая и утешая, / узы, поношения и скорби терпя, / молим тя, праведне отче Петре: / спасай нас молитвами твоими / от всех бед и печалей.

По 1-м стихословии седален, глас 1:

Иерусалима Горняго жителя, / святых сонма сопричастника, / праведнаго отца нашего Петра возвеличим, / богодаровáнныя мощи его облобызающе, возопим: / моли, блаженне, прилежно Христа Бога,/ спастися душам нашим.

Слава, и ныне, глас тойже:

Невесто Неискусобрачная, / премудрости село показася утроба Твоя Бога Слова: / Ты бо едина, Мати Божия, / благих Ходатаица явившися, / всяких страстей избави рабы Твоя, / непрестанно воспевающия славу Твою.

По 2-м стихословии седален, глас 3:

Отче предивне Петре, / ты в житии твоем тело духови порабóтил еси, / сего ради по смерти твоей нетлением процвел еси / и источник исцелений верным явился еси, / темже тя любовию почитаем.

Слава, и ныне, глас тойже:

Чертог, присносущною славою укрáшен, видяще выну, / желание имамы совнити в онь, / но, одежды не имуще, стыдимся, / да не связани от Ангел и извержени будем. / Ты, сущи одежда нагих дерзновения, Дево Марие, украси ны / и введи внутрь Царствия Христова.

По полиелеи седален, глас 8:

Веселия исполняется днесь земля Владимирская, / и рязанстии люди хвалятся / в торжестве предивнаго и богомудраго Петра, / и с ними вси народи Отечества нашего ликовствуют, / прославляюще единаго от новых мучеников, / исповедника твердаго и пастыря благостнаго, / и с любовию вопиют ему: / спасай нас молитвами твоими, / Петре, присный наш предстателю.

Слава, и ныне, глас тойже:

Богородице Дево, / Вседержавная наша Царице, / омофором молитв Твоих покрывающая весь мир, / приими от благодарных сердец наших / похвальныя песни сия / и испроси нам у Сына Твоего Богоначальнаго / грехов прощение и велию милость.

Таже степенна, 1-й антифон, глас 4. Прокимен, глас 4: Возвеселится праведник о Господе / и уповает на Него. Стих: Услыши, Боже, глас мой, внегда молитимися к Тебе. Всякое дыхание: Евангелие от Луки, зачало 64.

 

По 50-м псалме стихира самогласна, глас 6:

Свидетель истинный и твердый, / во дни гонения безбожнаго, / явился еси славне отче Петре, / богоборческое безумство тихостию нрава посрамил еси, / чудесы многоразличными веру православную в людех утверждая, / малодушныя словесы Божественными утешая, / всех ко Христу приводя; / тако и нас не лиши твоего заступления, / почитающих память твою верно.

Канон Богородицы со ирмосом на 6 и святаго на 8, егоже краегранесие: Пятницкаго светильника Петра воспеваю. Глас 8.

Песнь 1

Ирмос: Песнь возслем, людие, чудному Богу нашему, свободившему Израиля от работы, песнь победную поюще и вопиюще, поим Тебе, Единому Владыце.

Песнь хвалебную, Богу содействующу, приношу ти, отче праведне Петре: от избытка бо сердца глаголют уста и потщатся на славословие твое.

Языческия народы в Церковь Свою призвавый чрез огненоязычных апостолов Своих, тя, отче, показует строителя Таин духовных, Христос.

Тристаты фараоновы древле потопивый, Боже, и наши грехи в море благости Твоея раствори, Щедре, молитвами Петра чуднаго, да вопием Ти, Господи, победную песнь.

Богородичен: Неболезновавшая чревом, родшая Христа Господа, мольбами Твоими матерними исцели болезни душ и телес наших, да благодарно Сыну Твоему приносим победную песнь.

Песнь 3

Ирмос: Несть свят, яко Господь, и несть праведен, яко Бог наш, Егоже поет вся тварь: несть праведен, паче Тебе, Господи.

Истине Евангельской с детства наученный, животворныя заповеди Спасовы исполнил еси ревностно, отче Петре, и явился еси проповедник деятельный пути спасительнаго.

Целомудренное житие избравый, с супружницею твоею Мариею духом николиже разлучался еси, и нас не остави сиры, блаженнее Петре, любовию тя чтущих.

Крестоношение служения священническаго на рамена своя подъял еси, боголюбче отче Петре, и вся коварства бесовския и лютость богоборцев доблественне претерпел еси.

Богородичен: Ангелов удивление, человеков дерзновение, Богородице Чистая, Приснодево, моли Христа Бога, спасти непрестанно Тя блажащия.

Седален, глас 1:

Небесными надеждами немощь человеческую укрепивши, дерзновенно на страдания за Христом последовал еси, от Него же восприял еси благодать немощныя души и телеса врачевати, богомудре отче Петре, тем любовию тя ублажаем.

Слава, и ныне, глас тойже:

Упование христиан, Пресвятая Дево, Егоже родила еси Бога, паче ума же и слова, непрестанно моли с вышними Силами подати оставление грехов наших всех и исправление жития верою и любовию присно Тя славящим.

Песнь 4

Ирмос: Из горы приосененныя, Слове, пророк, единыя Богородице, хотяща воплотитися боговидно усмотри и со страхом славословяще силу Твою.

Глаголал еси богомысленно, отче Петре: вся жизнь моя – чудо есть, и благодарне Господу взывал еси: Силе Твоей слава, Человеколюбче.

Образ был еси верным: словом, житием, любовию, сего ради вселися в тя Дух Святый, отче богоносе, и нам, помолися, стяжати благодать Того.

Светом Пресущным просвещенный, воспламенился еси любовию Божественною и явился еси светильник пресветлый, облистающий безбожия нощь.

Богородичен: Владычице Милостивая, не возгнушайся язвами нашими греховными, Врача рождшая душ и телес наших, утоли болезни и исцели неможения, и спаси души наша.

 

Песнь 5

Ирмос: Страстей мя мглы, яко от глубокия нощи, избавляяй, утреневати сподоби дух мой, молюся, во свете дне повелений Твоих, Христе.

Единаго от Святыя Троицы, Воплощеннаго Сына Божия, проповедавый, отче Петре, и люди к покаянию о гресех своих приводя, научал еси вопити: мир душам нашим даждь, Благоутробне.

Тезоименит был еси, отче, первоверховному апостолу и твердо проповедал еси Евангелие Христово, душетленныя плевелы исторгая и благочестие в душах насаждая.

Илии боговидцу и огненному небошествователю поревновал еси, отче боголюбезне Петре, и безбожная учения посрамил еси.

Богородичен: Льщением человекоубийцы древняго праотцы наша от Присносущныя Жизни отпадоша: Рождеством Твоим, Чистая, земнороднии вси паки в рай восхищенни быхом.

Песнь 6

Ирмос: Содержима мя, приими, Человеколюбче, грехи многими, и припадающа щедротам Твоим, яко пророка Иону, Господи, и спаси мя.

Ненавистнии безбожнии люди ввергоша тя, святе, во глубины сердца морскаго, ты же, пророку Ионе подобяшеся, взывал еси бодрено: да взыдет из истления живот мой к Тебе, Господи, Боже мой.

Изгнания и поношения претерпевшаго Господа ради, иерея Божия преблагостнаго, Петра чуднаго в песнех восхвалим, да его молитвами получим грехов прощение.

Кораблем церковным бушующее море житейское преплыл еси неврежденно и достигл еси, богоблаженне, вечныя пристани, оттуду и нас, святе Петре, помяни, празднующих память твою.

Богородичен: Архангельский глас вопием Ти: Радуйся, Благодатная, Господь с Тобою; радуйся, Благословенная, Заступница наша и скорая в бедах Помощница.

 

Кондак, глас 3:

Первоверховному соименнаго пастыря, / утешителя скорбящих, целителя немощных, / хвалу и утверждение наше днесь любовию восхвалим вернии. / Сей бо есть целитель доблий / и молитвенник о душах наших.

Икос:

Добродетельным житием на земли просиявшаго / и на Небесех со Ангелы ныне ликующаго, / пастыря дивнаго и чудотворца всехвальнаго, / сугубым венцем исповедничества и целомудрия увенчáннаго, / Петра боголюбезнаго воспоим вернии, /сей бо есть целитель доблий / и молитвенник о душах наших.

 

Песнь 7

Ирмос: На поле Деире иногда мучитель пещь постави на мучение Богоносных, в нейже три отроки песнословляху Единаго Бога, троично воспеваху, глаголюще: отцев Боже, благословен еси.

Плотская востания, отче, низложив, духом пламенеюще Христу вопиял еси: благословен еси во веки, Господи, Боже, отец наших.

Единомудреннаго отцем древним пастыря и сотаиника тя, блаже, почитаем и вопием радостно: благословен еси, Господи, Боже, отец наших, и Препетый и Превозносимый во веки.

Трудолюбный делатель молитвы показался еси, отче Петре, службы церковныя усердно совершая и люди пети научая: благословен еси в храме святыя славы Твоея, Препетый и Превозносимый во веки.

Богородичен: Радосте наша, Пречистая Дево, Ты едина во всех родех Мати Божия показалася еси, Божество неопально вместившая. Тем Тя благословим, Марие Богоневестная.

 

Песнь 8

Ирмос: Победители мучителя и пламене благодатию Твоею бывше, заповедем Твоим зело прилежаще, отроцы вопияху: благословите, вся дела Господня, Господа.

Ангелом сомолитвенниче, отче Петре, священнодействуя праведно, ты сердцем чистым Господа зряще и телесными очима на Престоле Агнца Божия за мир закалаема видяще, Вседержителю взывал еси: Господа пойте дела и превозносите во вся веки.

Весь дальняя освятися пришествием твоим, отче богосиянне Петре, и стецахуся к тебе люди от конец Отечества нашего, ищуще твоея помощи и утешения.

Отец чадолюбивый был еси всем приходящим к тебе со скорбию сердечною и нуждою, и никтоже неутешен отыде от твоего лица, блаженне.

Богородичен: Слово Отчее Единосущное, Адамово избавление от кровей Твоих девственных воплотися, Един, яко весть, Всепетая, спасая нас Своею благостию.

 

Песнь 9

Ирмос: Проявленное на горе законоположнику во огни и купине Рождество Приснодевы в наше, верных, спасение песньми немолчными величаем.

Плоды трудов твоих праведных восприял еси, отче блаженне, дарами Духа обогатився, в селения пренебесныя вселился еси, оттуду не престаеши посещати чад твоих, пастырю наш милостивый.

Елеем милосердия твоего помазуем души наша и ограждаемся от злых оплотом молитв твоих, Петре священнейший, величающе Духа Святаго державу, тако прославляющаго угодники Своя.

Весь во Свет Божественныя Троицы с веселием прешел еси, ангельским воинством ныне срадуешися, пречудне отче Петре, с нимиже непрестанно моли всем спастися, поющим тя.

Ангельския чини и человеков собори ликовствуют в памяти твоей, святе отче Петре, Бога славословяще, Чуднаго и Прехвальнаго во святых Своих.

Богородичен: Юже воспевают Силы Небесныя, Владычицу Деву, Церкве красоту, верных державу и похвалу, благодарно величаю и пение скончаваю.

Светилен:

Светом Превечнаго сияния озарився, отче Петре, Христу последовал еси, и Того благодатию просветився, источник чудес и милостей явился еси, сего ради молим тя: спаси души наша.

Слава, и ныне, Богородичен:

Зарю пресветлую, являющую нам Солнце незаходимое, вемы, Тя, Пресвятая Дево Богородице. Сего ради молим Тя: яко Мати Света сущи, просвети нас светом Сына Твоего, Христа Бога нашего.

На хвалитех стихиры святаго, глас 6:

Подобен: Тридневен:

Тридневно воскресшаго Христа Господа / верный ученик явился еси, / достоблаженне отче наш Петре: / паствы русския радование, / молися Человеколюбцу Богу, / да спасет души наша.

Живодавцу  Спасу Господу / последовал еси во страданиих твоих, / крест жития исповедническаго подъял еси, / подкрепляемь Божественною благодатию. / Темже вопием ти, отче Петре, / моли о нас, спастися душам нашим.

Воспеваем житие твое многострадальное / и чтим в Горняя преселение твое праведное, / лобызаем честныя мощи твоя, / токи чудес нам источающия, / и празднуем радостно всесвященную память твою, / богоносе, блаженне отче Петре.

Явился еси светильник благодатный, / святе отче Петре, / кротким светом любве и смирения сияя / и нас милостию твоею озаряя. / Темже и мы, благодарне чтуще память твою, / вопием ти усердно: / моли о нас, пастырю наш добрый / и новоявленный чудотворче.

Слава, глас 8:

Да торжествует Церковь Твоя, Христе, / украшéнная сонмом славных мучеников, / жизнь свою Тебе предавших / и от Тебе живот вечный получивших; / их молитвами Долготерпеливе, Человеколюбче Господи, / Отечество наше в православии сохрани / до скончания века.

И ныне, глас тойже:

Владычице, приими молитвы раб Твоих / и избави нас от всякия нужды и печали, / Ты еси, Богородице, оружие наше и стена, / Ты еси Заступница, и к Тебе прибегаем, / Тя и ныне на молитву призываем, / да избавиши нас от врагов наших. / Возвеличим Тя вси, / Всенепорочную Матерь Христа Бога, / Юже осени Дух Пресвятый.

 

Славословие великое и отпуст. И бывает помазание братии от лампады святаго.

 

НА ЛИТУРГИИ

Блаженны от канона песнь 3-я и 6-я. Прокимен, глас 4: Возвеселится праведник о Господе / и уповает на Него. Стих: Услыши, Боже, глас мой, внегда молитимися к Тебе. Апостол ко Ефесеем, зач. 233. Аллилуиа, глас 4: Праведник, яко финикс, процветет, / яко кедр, иже в Ливане, умножится. Стих: Насажденнии в дому Господни во дворех Бога нашего процветут. Евангелие от Матфея, зачало 11.  Причастен: В память вечную будет праведник: